1 ఆఖరినా భైయ్యే, తుమారమా జరుగుకరతే ప్రకారం ప్రభువాక్యంనా సీగ్రంతీ‍ ఫైలాయిన్‍ మహిమ పరచబడను నిమిత్తమ్‍బి. 2 హామే అద్మినా మూర్ఖుడ్‍ అజు దుష్మన్‍కంతూ చుఖ్కాయిలీన్‍ జానుకరీ హామారటేకె ప్రార్థనాకరో విష్వాస్‍ హాఃరనా కొయిని.

3 హుయితోబీ ప్రభూబు నమ్మకంవాలొ; ఇను తుమ్నా స్థిరపరిచీన్‍ దుష్మాన్‍కంతు బాచవ్సే. 4 హామే తుమ్నా ఆజ్ఞా దేవుకరాతే ఇన తుమే కరుకరాస్‍ కరి, ప్రభూవునాలిన్‍ తుమ్నాన లిన్‍ భరోసతి ఛియ్యే.

5 దేవ్ను ఫ్యార్‍నాలిన్‍ క్రీస్తు కర్యోతె సహానంబీ తుమ్నా మలహాఃర్కూ ప్రభూ తుమారు దిల్‍నా ఆర్దాంహువ హాఃర్కు కరను గాక

6 భైయ్యే, భేనె, హమార హాఃజె పొంద్యతె బోధన ప్రకారం కాహేతిమ్‍ మోండ్డితి చాలవాలు హర్యేక్‍ భైయ్యేకంతూ నికిజానుకరి అప్నో ప్రభూహుయోతె యేసుక్రీస్తు నామ్‍తి తుమ్నా ఆజ్ఞాదెంకరియేస్‍. 7 కిమ్‍ హామ్నా పోలిన్‍ చాల్నుకీ తుమ్న మాలం, హమే తుమార ఇచ్మా అక్రమ్‍నితర కోచాల్యాని. 8 కినాకనబీ చుక్కేతి ధాన్‍ ఖాద్యాకొయిని, హమె తుమరమా కినాబీ భోజొనీతరా నార్హానుకరీ ప్రయాసంతీబి, మీనాత్తీబి రాత్ ధన్నూ కామ్‍కర్తూహుయిన్‍ జీవ్ను జీంకరియేస్‍. 9 తుమే హామ్నా పోలిన్‍ చాల్నుకరీ హమారు హమేస్‍ మాదిరిగా దెఖ్కాఢిలేవనస్‍ అంనింతరా కర్యాథా పన్కి, హమ్నా అధికారం ఛా పన్కి, తుమ్నా మాదిరిగా ర్హానుకరి కోయినికరి కోకర్యని. 10 బుజు హమే తుమారకనా థోతెదె కోన్బి కామ్నా నాకర్యుతోతెదె యో ధాన్‍ నాఖానుకరీ తుమ్నా ఆజ్ఞాదిదా కొయిన్నా.

11 తుమారమ థోడుజను కేహు కామ్బి కరకొయినితిమ్‍ బగ్లావ్‍ను జోలిన జాతూ, ఖరాబ్‍తీ చాలుకరాస్‍కరీ హఃమ్జుకరియేస్‍. 12 యెజాత్నువాలు ఢిల్లేతి కామ్‍ కర్తూహుయిన్‍ హుఃద్‍తి కామైయ్‍కర్యతె ధాన్‍నా ఖానుకరి అప్నో ప్రభుహుయోతే యేసుక్రీస్తు నామ్‍తి ఇవ్నా ఆజ్ఞత జాగ్రుత్‍ కరూకరియేస్‍.

13 భైయ్యే, భేనే, తుమే హుయితో అషల్ కామ్ కరనాటెకే ఖీజ్‍ నొకొఖాసు. 14 ఆ పత్రికా ములామ్‍తి హమే బోల్యతె వాత్‍ కోన్బి నాచాల్యుతో ఇనా దూంఢికాఢీన్‍ యో షరమ్‍హువహఃర్కూ నిమిత్తం ఇనేతి మలీన్‍ కరొనొకొ. 15 హుయితోబి ఇనా దుష్మాన్‍నితర నాసోఛిన్‍ భైయేనితర సోఛిన్‍ బుద్ది దేవొ.

16 సమాధనకర్త హుయోతే అప్నో ప్రభూవు యోస్‍ హార్యేక్‍ రకంతీ తుమ్నా సమధానం అనుగ్రహించే హువదా, ప్రభూ తుమ్నా హాఃరనా కేడె ర్హానుహువదా.

17 పౌల్‍కరి మే మారి హాత్ను రాతతీ వందనమ్‍ కరి లిఖ్కూకరూస్‍ హర్యేక్‍ పత్రికామబీ యోస్‍ గుర్తు, మే అమ్మస్‍ లిఖ్కుస్‍.

18 అప్నొ ప్రభుహుయోతె యేసుక్రీస్తును కృప తుమ్నా ఖారనా కేడేహుయిన్‍ ర్హావదా. ఆమేన్‍