యోహాన్ 14

16 మే భాన వేడిలేవుంకరు, తుమారకనా హమేసా ర్హావనటేకె యో అలాదు మద్దత్‍ కరవాలో, దిస్యే. 17 ఇనే దేవ్ను హాఃఛిన బయల్పర్చనటేకె ఆత్మహుయీన్‍ ఛా, ములక్‍ ఇనా కేదెబి కోదేక్నారుని, యో ఇవ్నామాలం ఇనాటేకె తుమే ఇనా గుర్తుధరస్‍ యో తుమరేతి నివసింసే, తుమారమా రాసే.

18 తుమాన అనాదుతరా కోమేదిస్ని తుమారకనా థొడు ధన్నా బాద్మా ఆయిస్‍ 19 ఆ ములక్‍ మనా అజు కేదేబి దేక్సెకొయిని. హుయితొ తుమే మనా దేక్సు, పన్కి బుజు తుమే మన దేక్సూ, మే జిమ్‍క్రూతె ఇమ్‍ తుమేబి జివ్సూ. 20 యో ధన్ ఆయుతెదె, మే మార భాకనా ఛావు కరి, తుమే మరాకన మే తుమారకనా ఛియ్యేకరి యో ధన్నా తుమే మాలంకర్సు.

21 మార ఆజ్ఞాల్‍నా అంగీకారించీన్‍ ఇవ్నామాలంకర్య హుయోస్‍ మన ఫ్యార్‍వాలో. మన ఫ్యార్‍కరవాలో మార భాతి ఫ్యార్‍హుయు బడ్సే మేబి ఇనా ఫ్యార్‍కరస్‍; మనాబి ఇవ్నా ఓపిలిసే కరి బోలాస్.

22 యూదా ఇస్కరియోతు కాహేతె బుజెక్‍ యుదా, ప్రభూ తూ ములక్నా కాహేతీమ్‍ హమారు హామ్నాస్‍ తారు తునా దెఖాడిలేవను సే? పుఛ్చావమా.

23 తెదె యేసు ఇవ్నా బోల్యొ, ఏక్జాను మన ఫ్యార్‍కరతే యో మారి బోధా గ్రహించే తెదె మారో భా ఇనా ఫ్యార్‍కరస్‍; హమే ఇనకనా ఆయిన్‍ ఇనా ఖందె నివాసం కరుసు. 24 మన ఫ్యార్‍కరకొయిన్‍తే వాలో మారి బోధనా ఖాంచేకొయిని; తుమే ఖాంజుకరతె బోధ మారి బోధ కాహే మన మోక్లోతే భాను బోధ.

25 మే తుమారకనా థో. తెదేస్‍ ఆ వాతె ఖారి తుమారేతి బోల్యొ థో. 26 ఆదరణకర్త, కతో భాన నామ్తీ బోలిమోకల్సేతే పరిసుద్ధాత్మ, సమస్తంనా తుమ్నా బోధించీన్‍ మే తుమారేతి బోల్యోతే సంగతుల్‍ ఖారూబి తుమ్న‍ హఃయాల్‍ కరావ్సే.