లూకా 1

యేసు ఫైదాహుస్యెతే ప్రవచన్‍

26 ఎలీసబెత్‍ ఛోమ్హైనని బేజినితి. తేదె దేవ్‍నె గాబ్రియేల్‍ దూతనా గలిలయమా నజరేతుకరీ ఏక్‍ గామ్‍మా; 27 దావీదును వంషంనో యోసేపు కరి ఏక్‍ అద్మీతి యో ఛోగిరినా హఃగాయి హుయ్రూథూ, యో ఛోగిరినూ నామ్‍ మరియ ఇనా ఆ సందేసంనా బోలిమోక్లొ. 28 యో దేవదూత‍ ఇనకనా జైన్ తునా అఛ్చు హువధా! ప్రభూ తారకేడె ఛాకరి బోల్యొ.

29 మరియ దేవదూతను వాత్న హాఃమ్‍జీన్‍ ఢరిజైన్‍ ఆ వాతేనా మత్లబ్‍ ష్యాత్‍ కరి అష్యంహుయు. 30 ఆ దేఖిన్‍ దేవదూత యినేతి అమ్‍ బోల్యొ ఢర్నకొ మరియ! దేవ్‍ తున కృప కరి రాక్యోస్‍. 31 తూ బేజిని హూయిన్‍ ఏక్‍ ఛొగ్రనా ఫైదాకరీస్‍, యిన యేసు కరి నామ్‍ మ్హేంద్‍జొ. 32 యో ఘణు మోటొ హూయిన్‍ సర్వోన్నతుని దేవ్ను ఛియ్యోకరి బోలావ్సె. ప్రభువు హుయోతె దేవ్ ఇనా జమాననూ దావీదును రాజునితర సింహసన్‍నా యిన దిసె. 33 యాకోబును ఇస్రాయేల్‍ వంషం అక్కవ్‍నా యేసు ఎల్లకాలం ఏల్‍సే. ఇని రాజ్యం కేదేబి అంతం కోహూసేని కరి ఇనేతి బోల్యొ.

34 మన అజూన్‍బి య్హా కోహూయిని! ఆ కీమ్‍ హూసే? కరి మరియ దేవదూతనా పూచాయ్‍.

35 యో దేవదూత ఆం బోల్యొ, పవిత్రాత్మ తార ఉప్పర్‍ ఆవ్‍సే తేదే సర్వోన్నతుని దేవ్‍ని షక్తి తున కమ్మిలిసె. ఇనటేకె తునా ఫైదాహుసేతె లఢుకు పవిత్రంగా ర్హసే. యో లఢుకు దేవ్‍నూ చియ్యో కరి బోలావ్‍సే. 36 తారు హాఃమ్దేను హాఃగు హాఃల్‍ ఎలీసబెతు ఇని బుఢీ ఉంబర్‍మా ఆయా హుంక్రస్‍ వామ్జినికరి బోలాయ్‍తే యో హంకె ఛోమైనని బేజిని హుయ్‍రీస్‍. 37 దేవ్‍నా హూవకోయిన్తే కాయిబికొయినికరి బోల్యొ. 38 తెదె మరియ, "మే ప్రభునా సేవ కరవాలి. తూ బోల్యొతిమ్ హూవదా" కరిపాచు పరీన్‍ బోలి. తెదె దేవదూత ఇనకంతూ చలేగొ.