లూకా 12

15 బుజు యో యూవ్నేతి తూమే కీనఫర్‍బి గ్హణు ఆక్హ్‍నకోకరో; అద్మీను జీవ్నూ యో కేత్రు జమా కర్యుతోబి ఇనఫర్‍ ఆధారం కోహూసేని.

తెలివికొయింతె రఫ్యావాలను ఉపమానం

16 యో యూవ్నేతీ ఏక్‍ ఉపమానం బోల్యొ; ఏక్‍ మ్హాజీన్‍ వాళోనూ ఖేతర్‍ కేత్రేకీ అసేల్‍ పీకాస్‍. 17 తేదె ఇనా వాడీన్‍ నాఖాన జోగో కోపురాని, ఇనటేకె మే ష్యాత్‍ కర్‍నూ కరి ఇనూ దిల్‍మా సోచీన్‍ తేదె యో ఆమ్‍ కర్షే. 18 మారు గోధమ్‍ పోడైన్‍ అనేతి అజు గ్హణు మోటు భంధైస్‍, పీక్యూతే ఖారు ఇనమా నఖైన్‍, తేదె యో ఆమ్‍ బోల్లీదో. 19 ఇను జాన్‍తి యోస్‍, మారో జాన్‍ కేత్రాకీ వరఖ్‍ః ఖావనూ రాఛ కమాయో, తూ ఖైన్‍ పీన్‍ సుఖపఢ్‍ కరి బోల్లీస్యే. 20 తేదె దేవ్‍, బుద్దుకోయినితె అద్మి ఆజ్‍రాత్‍ తారు జాన్‍ మే మాంగుకరుస్‍; తూ కమాయోతే ఖారు కీనూ పాల్‍ హూస్యే కరి పుఛాయో.

21 దేవ్‍తి దౌవ్లత్‍ వాళో నాహూయిన్‍, ఇనా ఖాజే దౌలత్‍నా జమా కర్‍లేవళునూ గతి ఇమ్మస్‍ ర్హాస్యే.