1 ఆదివార్‍నా వ్హానెహఃత్రె హూంక్రతో యోబాయికా లీరాక్యూతే అత్తర్, రాఛనా పళ్లీజైన్‍ యేసునూ సమాధికనా గయూ. 2 యో సమాధిఛాతే గ్హవీనా మూఛీరాక్యతే భండో నీక్లీరవ్హమా దేఖీన్‍ మైహ్‍ గయా పణికీ 3 యూవ్నా ప్రభు యేసును ఆంగ్‍ కోదేఖైయుని. 4 ఇనటేకె యూవ్నాఖైయిబి సోఛవకోయినితీమ్‍ రవ్హమా, ఏత్రాస్‍మా ధోళు పట్‍ జమ్‍కుకరతే లుంగఢా పేర్‍రాక్యుతే బే అద్మీయే ఆక్చార్యంహుయీన్‍ ఇవ్నే ఖామే హీభ్ర్యు.

5 యూవ్నే ఢరీన్‍ ముఢ్‍క్యా హేట్‍ జుఖైలేవమా ఆవ్నే జీవీ ర్హోతే ఇనా ఘోరాఢవ్‍మా తూమే ష్యాన ఢూంఢుకరస్‍? 6 యో అజ్గ కోయిని, యో జివీన్ ఉట్టీరోస్‍; యో గలీలయమా రయ్యో తేదె, 7 తూమ్‍నా అద్మీనో ఛీయ్యో పాపుల్‍నా హాతే ధరైన్‍ సిలువ నఖైన్‍ మరిన్‍ తీన్‍మనూ ధన్నే ఉటాను ఛాకరీ బోల్యొతే వాతే ఖాయాల్‍ కర్‍లేవో కరి బోల్యు.

8 తేదె యూవ్నే యోవాతే ఖాయల్‍ కర్లీదు. 9 యో సమాధి కన్‍తూ యూవ్నే జైన్‍, హారఅద్మి సిష్యుల్‍నబి అద్మీయే హాఃరవ్‍నా యో వాతేనా బోల్యు. 10 యో వాతే బోల్యుతే కోన్‍కతో మగ్దలేనే మరియబి, యోహాన్నబి, యాకోబ్‍ని ఆయా మరియ, యూవ్నాకేడె అజు థోడి బాయికా థీ. 11 హూయుతో యూవ్నే వాతె దేవ్నా వాతెంతర దేఖ్కాయు అవ్నె బోల్యుతె వాతేనా షిష్యుల్‍ నమ్మ కొయినితిమ్‍ బొల్లి దు. 12 రైతోబి పేతురు ఉట్టీన్‍ జైన్‍ యో సమాధి కనా దేఖమా ఖాళీ లుంగఢా పఢ్యుతూ, ఇనా దేఖీన్‍ యో హషంహూయి ఘర్‍ కనా ఛలేగొ.

13 యోస్‍ ధన్నే యూవ్నామా బేజణ యెరూషలేమ్‍నా ధర్రాసు దూర్‍మా ఛాతే ఎమ్మాయు కరి ఏక్‍ గమ్మా ఛలి జౌంగ్రతో, 14 యెరూషలేమ్‍మా జర్‍గ్యూతే అక్కు ఏక్‍నా ఏక్‍ బొల్లేతూర్హయు. 15 యూవ్నే ఇమ్‍ వాతే బోల్తాహూయిన్ సోచుకర్తథా, యేసుబి ఆయిన్‍ యూవ్నాకేడె ఛాలనిక్‍ల్యొ. 16 కానీ యూవ్నే యేసునా దేక్యా పన్కీ, గుర్తుదర్యూకొయినీతిమ్‍ ఢోళో ముచ్చాయుగయూ. 17 యో, తూమే చాల్తోహూయిన్‍ తూమే ష్యాను వాతే బోల్‍లేంగ్రస్ కరి బోలమా, యూవ్నే ధుఃఖపడ్తుహూయిన్‍ హీభ్రి గయూ. 18 యూవ్నామా ఏక్‍జణో క్లెయొపా కరి జణో యేసుతీ ఆమ్‍ బోల్యొ, యెరూషలేమ్‍మా రైన్‍బీ తూన ఆవాతే మాలంకొయినినా? కరి బోల్యొ.

19 యేసు యోష్యాను వాతేకీ బోల్కరి బోల్యొ, యూవ్నే నజరేయుడ్నొ హుయోతె యేసుని వాతేస్‍; యో దేవ్నాబి, అద్మీయేకనాబి, క్రియామాబి, క్హారవ్మా ఏక్‍ ప్రవక్తనితర ర్హయో. 20 అపుణు ప్రధాన యాజకుల్బి అధికారుల్బి యేసునా కింమ్నితర మరణ్‍ షిక్చానా ధర్యాయ్‍, సిలువమా నఖాయకీ తుమ్నా మాలంకొయిన్నా. 21 హామే ఇష్రాయేల్‍నా యోస్‍ భచవ్‍స్యే కరి భరోసా కర్‍రాక్యథా. ఆ ఖారూ హూయిన్‍ తీన్‍ ధన్‍ హూంక్రస్‍ కరి బోల్యు. 22 హమారమా థోడీ బాయికా వ్వాణే ఖాత్రే ఇనూ సమాధి కనా జైన్‍ దేఖామా, ఆష్చర్యాపర్చూ. 23 థోడ దేవదూతల్‍ దేఖైన్‍ యో జీవిన్‍ ఉటీరోస్‍ కరి బోల్యుతే వాతే హమ్‍నా బోల్యు. 24 యోబాయికా బోల్యుతిమ్‍ అజు థోడు జణుబి జైన్‍ దేఖామా, యూవ్నాబి యేసును ముర్దు దేఖైకోయిని కరి బోల్యు.

25 ఇనటేకె యో యూవ్నేతి బుద్దు అద్మీయే, "ప్రవక్తల్‍ బోల్యుతే వాతేనా నమ్మానా అత్రే ఆల్యసం ష్యాన కరుకరస్‍? కరి బోల్యొ. 26 క్రీస్తు ష్రమపఢీన్‍ మరీజైన్‍ యో మహిమమా జాస్యేతే జరూర్‍ కాహేనా?" కరి యూవ్నేతి బోలిన్‍, 27 బుజూ మోషేబి, కేత్రాకీ ప్రవక్తల్‍ నిఖ్యాతే యోఖారవ్‍మా ఇనా గురీంచీన్‍ లిఖైర్యూతే వాతేనా బోలీన్‍ ఇనూ మతలబ్నా మాలంకరాయో.

28 యత్రమా ఇవ్నేజంకరతె గామ్‍ కందే ఆవమా, యో బుజుథోడు దూర్‍బి జవవాళోంతర దేఖాయో. 29 యూవ్నే ఇనా హాఃమి క్హాంజ్‍హూయిగు తూ హమారకేడెస్‍ ర్హాకరి బోలమా, యేసు తెదె యూవ్నాకేడె గయో. 30 తేదె యూవ్నేహాఃరు ఖాణు ఖావనాటేకె బేఖామా యో ఏక్‍ రోటొనా పాడీన్ కృతజ్ఞతకరీర్‍ ఇనా తోడిన్‍ ఇవ్నా దేవమా, 31 తేదె యువ్నా డోళొ వుక్‍డైన్‍ ఇనా యేసు కరి ఖణాద్ ధర్యు; పన్కి యేసు తేదె యువ్నా దేఖాయో కోయినితీమ్‍ మాయం హూయిగో.

32 తేదె యూవ్నే, యో వాట్‍ఫర్‍ ఇనా గురించీన్‍ వాక్యంనూ వాతే బోల్యొ తేదె అపుణు దిల్‍మా ఏక్‍ ఆగ్‍నితర భళ్యుకోయిన్నా? కరి యూవ్నే బోల్లీదు.

33 తేదెస్‍ యూవ్నే ఉట్టీన్‍ యెరూషలేమ్‍నా పరీన్‍ గయా. ఏజ్గా గ్యారజణబి అజు క్హార అద్మీయేబి ఏక్‍జోగొ మలీన్‍ బేటు థూ. 34 ప్రభు క్హాచ్చీస్బి జివీన్ వుట్టీన్‍ సీమోన్‍నా దేఖైయో కరి బోల్లీదు.

35 యూవ్ను వాతే ఖంజీన్‍ వాట్ఫర్‍ యేసుతి వాతె బోల్తాహూయిన్‍ ఆయాతే యూవ్నేతి యో బోల్యోతే వాతే, బుజు రోటొనా థోడీన్‍ దిధోతే యో వాతేవ్నా యో బేజణ యూవ్నేతి బోల్య.

36 యూవ్నే హాఃరు యో వాతే బోల్లేంగ్రతో, ఎగ్గీస్‍ యేసు యూవ్నా ఇఛ్మాకరీ ఆయిహిబ్రిన్‍ "తూమ్‍నా సమాధానం హూవదా" కరి యూవ్నేతి బోల్యొ.

37 తేదె యూవ్నే ఖారు భూతంనా దేఖ్యాకరీ ఢరీగయూ. 38 పన్కీ, యేసు ఇవ్నేతి, తూమే ష్యాన ఢర్యూకరస్‍? తూమారు దిల్మా అత్రే అనూమానం కీమ్‍ ఆవాస్‍? కరి బోల్యొ. 39 మార హాత్‍ గోఢనా దేఖో, యోస్‍ మే, మన ఛీమిన్‍ దేఖొ, మన భోటీ హాఢ్‍క్యా ఛా, కానీ భూతంనా యో ఖారు కోర్హైని కరి.

40 ఇమ్‍ బొల్తూవక్హత్‍ యో యూవ్నా ఇనూ హాత్‍, గోఢాన దేఖాఢ్యొ. 41 తేదె యూవ్నే ఖూషీతి అజున్‍బి యూవ్నా నమ్మకొయింతె, హాషం హూంగ్రతో, తేదె యేసు తూమార కనా ఏక్‍ రోటొ ఛానా? కరి బోల్యొ. 42 యూవ్నే భుంజ్యుహూయు ఏక్‍ మాస్లాను టుక్డొన ఇనా దిధూ. 43 యో ఇనా లీన్‍ యూవ్నా ఖామేస్‍ ఖైగో.

44 మే తూమారేతి మళిన్‍ ర్హయో తేదె మోషే ధర్మషాస్ర్తంమా, ప్రవక్తల్‍నూ గ్రంధాల్మా, కీర్తనల్‍మా మరా గురీంచీన్‍, నీఖైర్యూతే ఖారు జరగ్‍స్యే కరి మే తూమ్‍నా బోల్యొతే వాత్‍ జర్యుగుకరీ ఇవ్నేతి బోల్యొ.

45 తేదె యో యూవ్నా వాక్యంనా అర్దం కరవానటేకె యూవ్ను దిల్నా ఖూల్లా కర్యొ.

46 క్రీస్తు ష్రమ పడీన్‍ మరీజైన్‍ తీన్‍మనూ ధన్నే జీవిన్‍ వుట్‍స్యేకరీ లిక్కారుతింమ్‍, 47 "యెరూషలేమ్‍థూ ధరీన్‍ హాఃరు జనాభోమా ఇనూ నామ్‍తు దిల్‍ భద్లాయిలేవనూ, పాప క్చమపణ్‍ ప్రచార్‍హూస్యే" కరి లిఖ్కైర్యూస్‍. 48 ఆ వాతే ఖారవ్నా తుమేస్‍ సాక్చుల్‍ కరి బోల్యొ.

49 హదేక్‍ మారో భా వాక్దాన్‍దిదోతే ఇనా మే తూమారఫర్‍ బోలిమొక్లుస్‍; పణికీ స్వర్గం‍మతూ పరిసుద్దాత్మనూ షక్తి తూమారఫర్‍ ఆవతోడీ తూమే యెరూషలేమ్నూ హఃయార్‍మస్‍ ర్హవో.

50 యేసు బుజు యూవ్నా బేతనియతోడీ బులైలీజైన్‍ హాత్‍ పాడీన్‍ యూవ్నా ఆషీర్వదించ్యో. 51 ఇవ్నా ఆషీర్వదించ్యుకరతో తేదెస్‍ యో యూవ్నేతి దూర్‍ హూయిజైన్‍ స్వర్గంమా ఛలేగయో. 52 ఇనబాద్మా యూవ్నే ఇనా హఃలమ్‍ కరీన్‍, కెత్రేకీ ఖుషీతి స్తుతికర్తూ యెరూషలేమ్‍మా గయా. 53 బుజు యూవ్నే దేవాలయ్‍మా రైన్‍, లగాతార్‍ దేవ్నా స్తుతిస్తూ ర్హయా.