లూకా 8

27 యో ఉత్రీన్‍ ఆవూస్కర, యో గామ్మాతూ ఏక్జనో యిన హఃమే ఆయో. యో సైతాన్‍ ధర్యోహుయో హూయిన్‍, గణా ధన్తూ లుంగఢాబి నాపేరీన్‍, గోరాఢవ్‍మా తప్ప ఘర్‍మా ర్హవ్వాళొకాహే. 28 యో యేసునా దేఖిన్‍ ఛికర్‍తోహూయిన్‍, యిన గోఢఫర్‍ పఢీన్‍, ఓ యేసు సర్వన్నహుయేతె దేవ్నొ ఛీయ్యో, మారేతి తునా ష్యాను కామ్‍? మన బాధ నకోకర్‍ కరి తూన బతీమాలుకరూస్‍ కరి ఛిక్రీన్‍ బోల్యొ. 29 కీమ్‍కతో యేసు, యో దుష్టాత్మా ఇనమాతు భార్‍ ఆవ్‍ కరి ఆజ్ఞా దిదో, యో కేత్రుకీ ధన్‍తూ ఇనమా ధర్తూ రయు. ఇనటేకె ఇన లోఢనీ ఖాకళ్‍తీ గోఢనా భాంధీన్‍ కావ్లికాసీ ర్హైతోబి, ఖాకళ్‍నా తోణ్నాక్‍ధీన్‍, యో దుష్టాత్మా ఇన గోరాఢవ్‍మా బూలాలీన్‍‌ ఛల్‍జై.

30 యేసు తారు నామ్‍ ష్యాత్‍? కరి ఇనా పుచ్ఛావమా, మారు నామ్‍ సేన*8:30 దుష్టాత్మల సమూహమ గలవాడు. మారు నామ్ సైన్యమ్ కరి బోల్యొ. కతో ఇనమా కేత్రుకీ సైతాన్నిఆత్మ థూ. 31 యో దుష్టాత్మా ఇనేతి హమ్నా నరకమ్‍మా నొకొనాక్‍ కరి బతీలాఢ్యు. 32 ఎజ్గా ఏక్‍ గ్హణు మోటు డూకర్‍నూ గుంబల్‍ ఫాఢ్‍నాఫర్‍ ఛరుకర్తుథూ. తేదె యో భూత్‌ హమ్‍నా యో ఢూకర్‍మా బోలిమోకల్‍ కరి యేసునా బతిలాఢమా, ఇమ్మాస్‍ యూవునా ఢూకర్‍మా జావనా ఆజ్ఞా దిదో.

33 తేదె యో దుష్టాత్మా ఖారు యో అద్మినా మ్హేంధీన్‍ ఢూకరేవ్‍మా పేషీగయూ. తేదె యో ఢూకరే ఖారు, ఫాఢ్‍పర్‍తూహేట్‍ ధర్యావ్‍మా పఢీ మరీగయూ.

34 ఢూకర్‍ ఛరవాళు జర్యుగూతే ఇన దేఖీన్‍ మిలైలిన్‍, హఃయర్‍మా, గామ్‍మా‌ను అద్మియేనా బోల్యు. 35 యూవునే హాఃరు జర్‍గ్యూతే ఇన దేఖనా టేకె యేసుకనా ఆయిన్, భూత్‍ మ్హేంధీ ఛలీగూతే అద్మి అషల్ హూయిన్‍, అఛ్చా అద్మీనితర లుంగ్ఢా పేర్లీన్‍, యేసునా గోఢాకనా భేటూతే ఇన దేఖీన్‍ యూవ్నే ఢరీగయూ.