Mateus 23

యేసు పరిసయ్యూల్నా నియమ షాస్ర్తుల్నా గుర్కావను

1 తెదె యేసు అద్మినుపాంబల్‍నబీ ఇను సిష్యుల్తీబి అమ్ బోల్యు 2 మోషే నియమ షాస్ర్తంనా హాక్కుతి బోలనుకరి నియామషాస్ర్తుల్బి, పరిసయ్యాల్బి అధికారం ఛాకరి బోధించుకరస్‍. 3 అనటేకె ఇవ్నే బోలతెహాఃరనబి కర్నూకరి బొలాస్‍ పన్కి, ఇవ్నే బోలస్ పన్కి, కరకొయినీ. తుమే ఇవ్ను కామ్నామాత్రం కరొనొకొ 4 ఢ్హొవ్వాన హువకొయింతె యెత్రె వజణ్నా బాంధీన్ అద్మిను భుజ్‍నవుప్పర్ ఇవ్నే బెంద్చే. పన్కి ఇవ్నే పల్లిజావనా ఇవ్నా చిట్టాంగ్లి ఏత్రె మద్దత్‍కరనా తయార్‍ హువకొయిని.

5 అద్మియేన దెఖ్కానుకరి ఇవ్ను కామ్ హాఃరుబి కరస్; బుజు ఇవ్ను హాత్నా దేవ్ను వాక్యం భాదింలీన్‍, బుజు ఇవ్ను ముడ్క్యానా వాక్యంను పట్టి భాందిన్‍ లుంగ్డాను మోటా కరీన్‍ పేరస్‍; 6 ధాన్ ఖావను బంతియేమా మాహాన్‍ జోగోమా రాహ్నుకరి యూదుల్ను ప్రార్థనా న్యావ్ను ఉచు జోగొమా స్తానం హోనుకరి సోఛస్‍. 7 సంత గల్లీయమా హఃలామ్ కరాయ్‍లేనుకరి అద్మియేనహాతె గురువు బొలాయ్‍లేనుకరి ఇవ్నా ఘాను ఇష్టం.

8 తుమె గురుకరి బొలాయిలేవో నొకొ, తుమె హాఃరుజణు భైయేయ్. ఇనటేకె తుమ్నా ఎక్కస్ జణొ గురువు, 9 బుజు జమీన్‍ఫర్ కినాబి భా కరి నామ్ నొకొబేంద్చు. స్వర్గంమాఛ్చాతె దేవ్ ఎక్కాస్ జణొ తుమారొ భా.

10 ఎత్రేస్ కాహేతిమ్, తుమె గురువుల్కరి బొలాయ్ లేవొనొకొ; క్రీస్తు ఎక్కస్ జణొ తుమ్నా గురువు.

11 తుమారమా హాఃరతీబి గొప్పవాలో తుమ్నా ప్రచార్‍ కరవాలొహుయిన్ ర్హాను.

12 ఇను యోస్ హెఛ్చించిలీన్ ర్హవ్వాలో తగ్గించిబడ్చే ఇనుయోస్ తగ్గించిలీన్ ర్హవ్వాలో హెఛ్చించి బడ్చే.

యేసు వేషదరుల్నా గుర్కావను

13 నియామషాస్ర్తం పండితువాలా, పరిసయ్యుల్‍వాలా, తుమె ఘను మిన్హత్‍, దేవ్ను రాజ్యంనా అద్మియే నా జానుతిమ్‍ దార్వాజు మూఛినాక్చూ తుమె ఇన్మా జాయ్‍ కొయిని, జాయ్తె ఇవ్నా జావకోదేయిని. 14 ఇవ్నే, విధువారాల్‍నా దవ్లాత్‍నా లూటిలేంకరస్‍, బుజు అద్మియేనా వతాలనాటేకె మోటు ప్రార్థన కరస్‍, ఇనటేకె తుమ్నా మోటు షిక్చా ఆవ్సె.*23:14 ఆ వాక్యం అషల్ మూల గ్రంథంమా లిఖాయిరుస్‍ కొయిని పన్కి హామే లిఖూకరేస్‍.

15 వేషధారూల్‍హుయాతె నియామషాస్ర్తుల్, పరిసయ్యుల్‍వాలా, ఇవ్ను తుమ్నా మలావనా గుంపుమటేకె ప్రాయిత్నిచాస్‍, తుమె ధర్యావ్నాబి, జమీన్నా ఫరీన్‍ ఆవస్‍ ఇనే మలీన్‍ ర్హావనీ వహఃత్‍ ఇనె తుమారతీబి బెంమ్మానుతరా నరక పాత్రునితరా కర్సే.

16 అయ్యో, కాణుహుయీన్‍ అలాదవ్నా వాట్‍ వతాలవాలా తుమ్నా షిక్చా తక్చెకొయిని. తుమె బోలస్‍ కాహేనా కోన్బి మందిరమం తోడుకరి ఒట్టు మేంమ్లిదుతొ ఇన్మా కాయ్బి కొయిని పన్కి, మందిరంమా ఛాతె ఘేణు ఫర్‍ ఒట్టు మేంల్లిదుతో తుమే ఇనా కట్టూబడీన్‍ ర్హానుకరి బోల్చు. 17 బుధ్దికొయింతెవాలా, ఖాణావాలా కెహూ గొప్పా? ఘేణూకి, ఘేణునా పరిసుద్ధ్‌ కరతె మందిరంనా? 18 బుజు బలిపీఠంతోడుకరి ఏక్జనో ఒట్టు మేంమ్లిదుతొ ఇన్మా కాయ్బి కొయిని పన్కి, బలిపీఠంను వుఫ్పర్‍ఛాతె అర్పణనా తోడుకరి ఒట్టు మేంల్లిదుతో తుమే ఇనా కట్టుబడీన్‍ ర్హానుకరి బోల్చు. 19 బుధ్దికొయింతెవాలా, ఖాణావాలా కెహూ గొప్పా? అర్పణ కార్యుతేకి, అర్పణనా పరిసుద్ధ్‌కరతె బలిపీఠంనా 20 బలిపీఠం తోడుకరి ఒట్టు మేందవాలొ, ఇనా తోడుకరిబీ ఇనఫ్పర్‍ఛాతె యోహాఃరు తోడ్నుకరి ఒట్టు మ్హేందిలెంకరస్‍. 21 బుజు మందిరంమ్‍ ఒట్టు మ్హేందిలేవాలొ, ఇనా దేవ్ ఫర్‍ ఒట్టు మ్హేందిలెంకరాస్‍. 22 బుజు పరలోకంఫర్‍ ఒట్టు మ్హేందవాలొ దేవ్ని సింహాసనంఫర్‍ ఇనఫర్‍ బెట్టతెయిన ఒట్టు మ్హేందిలెంకరస్‍.

23 అయ్యో, వేషధారుల్‍హుయాతె షాస్త్రుల్‍, పరిసయ్యూల్‍, తుమె పుదీనామాబి, సోపుమా, జీలకర్రమాబి ధహ్ః మనుభాగ్‍ ఫేడస్‍ పన్కి, ధర్మషాస్ర్తంమా ముఖ్యంనుహూయ్తె విషయాల్నాబి, న్యాయంబి, కనికరంనాబి, విష్వాస్‍నా బెందిదా; ఆహాఃరు కరకొయినితిమ్‍ యోహాఃరు కరూకరస్‍. 24 ఖాణుహుయాతె నియమాషాస్ర్తంమా తుమారు తుమేస్‍ కెహూ ముఖ్యంహుయూతె కెహూకి ఇనా అనుసరించస్‍, పన్కి ఘణు ముఖ్యంహుయూతె ఇనా తుమె బెందెంకరస్‍ న్హాను విషయాల్నా నాపట్టించకొయినితిమ్‍, మోటు విషయాల్నా గలిలేంకరతె తుమేస్‍.

25 అయ్యో, వేషధారూల్‍హుయాతె నియమషాస్ర్తల్‍, పరిసయ్యూల్‍, తుమె గిన్నినాబి తాంబ్యొనాబి బ్హాధర్‍ దొవ్వాస్‍ పన్కి, యో మహీ లపాడనూ ఆహ్ఃతి బరైరూస్. 26 కాణు హుయితే పరిసయ్యూడ్‍, గిన్నెమాబి తాంబ్యొమాబి బ్హాధర్‍ దొవ్వాను అగాడి ఇను మ్హైను దొవ్జొ.

27 అయ్యో, వేషధారూల్‍ హుయుతె నియమషాస్త్రుల్‍, పరిసయ్యూల్‍, తుమె సున్నొ మార్యుతె ఘొరాఢవ్‌తరా పోలిన్‍ ఛా. యో బ్హాధర్‍ అష్యలస్‍ దెఖ్కావస్‍ పన్కి, మహీ మర్యుగూతె ఇవ్ను హడ్‍క్యాతి, సమస్తంహూయుతె గంధతీ భరాయిన్‍ ఛా. 28 ఇమ్మస్‍ తుమె బార్లు అద్మినా నీతిమంతునిఘోని దెఖ్కాంకరాస్‍ పన్కి, మ్హైయీ వేషధారూణహుయూతె పాప్‍తీబి కరాబ్‍కామ్‍తీబి బ్హరాయిన్ ఛా.

యేసు ఇవ్ను షిక్చను బారెమా అగాఢి బోలను

29 అయ్యో, వేషధారణలతోను, నియమషాస్రూల్‍, పరిసయ్యూల్‍, తుమ్నా మిన్హత్‍ ప్రవక్తల్నూ ఘొరాఢవ్నా బంధాంతూహుయిన్‍, నీతిమంతుల్ను గొరాఢవ్నా అలంకరిచిలెంకరస్‍ కరూకరాస్‍. 30 అప్నె అప్ను భాను భానా ధన్మా ర్హైయ్యాతొతెదె ప్రవక్త్ లను మరణ్‍ను విషయంమా ఇవ్నేతి మలీజావాలహుయీన్‍ ర్హయ్యావోత్‍ కొయినీకరి బొల్లిసు. 31 అనటేకేస్‍ తుమె ప్రవక్త్ లనా మార్యూతె ఇవ్ను ఛియ్యాహుయీన్ఛాక‍రి తుమారఫ్పర్‍ తుమేస్‍ సాబుత్‍ బొల్లెంకరాస్‍. 32 తుమేబి తుమారు భాను భా కామ్నా పూర్తికరొ.

33 హాఃప్‍వాలా*23:33 ద్రోహుల్‍హుయాతె ప్రమాదకరంహుయాతె వాలా., హాఃప్ను సంతాన్‍వాలా, నర్కంనూ ఢన్డ్ మతూ తుమె కింమ్నితరా బఛ్చిజాసు? 34 అనటేకే హదేక్‍ మే తుమారకనా ప్రవక్తల్నా, జ్ఞానుల్నా, నియమషాస్ర్తుల్నా, మొక్లుకరూస్‍ తుమే ఇవ్నామా థోడుజననా సిలువునా నాక్చె, థోడుజననా మర్రాక్చె, థోడుజననా తుమారు యూదుల్‍ ప్రార్థనకరాను జొగొమా కొల్డాతీ మారీన్‍, హఃయర్‍మతూ నిఖీన్‍ హఃయర్మా థోడుజననా నక్హాడ్చె.

35 నీతమంతుడ్‍హుయోతె హేబెల్‍ ల్హొయితూ ధరీన్‍ బలిపీఠంనాబీ, మందిరంనాబి ఇచ్మా తుమె మర్రాక్యతె బరకీయ ఛియ్యోహుయోతె జెకర్యా ల్హొయితోడి జమీన్‍ఫర్‍ చిడ్కాయూతె నీతిమంతుల్నూ ల్హొయిహాఃరు తుమారఫర్‍ ఆవ్సె. 36 ఆహాఃరూబి ఆ పిఢీను వాలఫర్‍ ఆవ్సెకరీ తుమారీతి హాఃఛితి బోలుకరూస్‍.

యేసు యెరూషలేమ్‍నా ఫ్యార్‍ కరను

37 యెరూషలేమ్, ప్రవక్తల్నా మర్రాక్తాహుయీన్బి తారకనా మొక్లొతెయివ్నా పత్రావ్తీ మార్తాహుయీన్ రవ్వాలా, కుక్డి ఇను లడ్కావ్నా కిమ్‍ పాక్డిమా హేట్‍ చెరాయ్‍లేస్కి ఇమ్మాస్‍ మేబి తార లఢ్కావ్నా కెత్రూకిచోట్‍ చేరాయ్‍లేనుకరీ దేక్యొ పన్కి, తుమె ఇష్టపడ్యాకొయిని. 38 హదేక్‍ తుమారు మంరంనా ఖాలీతి*23:38 తుమారు మందిరంనా దేవ్‍ ఖాలితి బెందీన్‍ ఛా. వ్యర్థంతి తుమ్నా బెందాయిన్‍ ఛా. 39 హంకేతు నిఖీన్‍ ప్రభువునూ నామ్తీ వలావతేయో స్తుతించబడదాకరి తుమె బోలతోడి మన దేక్చూకొయినీకరి తుమారీతి బోలుకరూస్‍.