నెహె 5

ఇమాన్‌ దార్ హుయోతె నెహెమ్యాను సేవ

14 బుజు మే యూదా దేహ్‍ఃమా ఇవ్నా అధికార్వాల తరా నిర్ణయించుతె ధన్ అగాఢితూధరీన్‍, కతో అర్తహషస్త రాజొ యేలుకరతె ఈహ్ఃమను వరహ్ఃమా అగాఢి కంతూ డోఢిహ్ఃఫర్‍ బే వరహ్ః తోడి ఆ భార వరహ్ః అధికార్ తరా మన ఆవ్నుతె దవ్లత్నా మేతోబి, మారు పరివార్తోబి లీదుకొయిని. 15 పన్కీ మన అగాఢి ఛాతె అధికార్వాల అద్మియేన కంతూ ఖాణునా, అంగూర్ను రహ్ఃన, చాలీహ్ః థోలను ఱూపునా లేతాహుయిన్‍ ఆయు. ఇవ్ను కామ్‌కరవాల సహా అద్మియేనుఫర్‍ జులామ్‍ నాక్తా ఆయు, పన్కి దేవ్ను ఢర్ను బన్తి మే ఇమ్నితరా కర్యొకొయిని. 16 ఆస్‍ కాహెతిమ్‍ మే ఆ భీత్ను కామ్‍ కరమా మారు కామ్‍ కరవాలుబీ ఆ కామ్‍ కర్తూహుయీన్ ఆయు. హమే జమీనే కాయ్బి కమాయ్‌ కర్యకొయిని. 17 మారు ఖాణును బల్లాను అష్ఫీ‍స్‍ ఛాతె అన్యజనాభో మతూ ఆయుతె అద్మియేనకేడె యూదుల్బి, అధికారుల్బి మొత్తం ఏహోః అఢాయీహ్ః అద్మి బేషీన్‍ థూ. 18 మారు హాఃజె హరేక్‍ ధన్‍ ఏక్‍ దాంఢొనా, స్రేష్ఠంహుయూతె ఛొ మ్హేండనా తయార్ కరీన్‌ ఛా. ఆస్‍ కాహెతిమ్ జిన్వార్‌యే, ధహ్ః రోజ్నా ఏక్‍ చో‍ట్‍ కెత్రూకి తరికను హుయూతె అంగూర్ను రహ్ఃనా తయార్‍ కర్యొ. ఆస్‍ తరికతీ కర్యాతోబి ఆ అద్మియే గులామ్మా జాహఃత్‍ కఠీన్తి ర్హావమా బారెమా అధికార్‌ వాలన ఆవ్నుతె దవ్లత్నా మే ఆహ్ః కర్యొకొయిని. 19 మారొ దేవ్‍, ఆ అద్మియేనా మే కర్యొతే హరేక్‍ రంగ్నుహుయూతె మేల్నా బట్టిన్‍ మన మేల్‍ హోనుతిమ్‍ మారఫర్‍ ధ్యాన్‍ రాక్‍.