1 హాదేక్‍ దవ్లత్‍వాల, తుమారఫర్‍ ఆవ్సేతె మిన్హత్‍ రోదనా కరో, రోవ్వో. 2 తుమరు పైసా హాఃరబ్‍హుయు. తుమరు లుంగ్డ ఉదియా దర్లిసే. 3 తారు ఘేణు, రూపు చిళం ధర్లిదు; ఇను చిళం తుమరఫర్‍ సాబుత్‍గా ర్హాహిన్‍ ఆగ్‍తార తమరు ఆంగ్నా హాఃయిలీసే; ఆఖరి ధన్మా పైసాన జమకర్లిదా. 4 హాదేక్ తమరు ఖేతర్మా వాడ్యుయుతే కాంకరవాలనా నద్వేకొయినితిం, తుమే మోసంతి ధర్యతె కూలి మొర్రపెట్టుకురస్‍. తమరు వాఢవాలు ఛిఖ్రాన్‍ సైన్యంములు అధిపతి హుయోతె ప్రభువును ఖాన్మా గాయు. 5 తుమే జమీన్‍ఫర్‍ సుఖంతి జీవిన్‍ భోగసక్తుల్‍ హుయీన్‍ హాఃత్రను ధన్మా తుమారు ఆంగ్నా పెంచుకరస్‍. 6 తుమే నీతివాలోహుయోతే ఇవ్నా సిక్చానకిన్‍ మరకిదిసు, యో తుమ్నా ఎదిరించేకోయిని.

7 భైయ్యే భేనె, ప్రభువును అవాను వహఃత్‍తోడి ఓపికతి ర్హహిన్‍ ర్హవొ; దేక్కొ; ఖేతర్‍వాలో అగాఢి అజు ఆఖరి పాణి వర్హక్ను ఓపికతి ఎదురు ద్యేక్‍తో ర్హాసే. 8 ప్రభువు ఆవ్నువహాఃత్‍ హాఃదేస్‍ ఛా అనటేకే తుమేబి ఓపిక ర్హాహిన్‍, తుమరు నిరీక్చాణా స్థిరపరిచిలేవొ. 9 భైయ్యే భైనె, తుమే న్యావ్‍ పొందకొయిన్తిం ఏక్నాఉపార్‍ ఏక్జాను నోకొభణికిలేవో; హాదేక్‍ న్యాయాధిపతి ధర్వజుకన ఉబ్బిరిన్‍ ఛా. 10 మార భైయే భైనె, ప్రభువు నామ్నా బోధింఛతే ప్రవక్తల్నా, మిన్హత్ను అనుభవంనా ఓపికనా మాదిరితరా మ్హేందిలెవో. 11 సహించిన వాలన ధన్యుకరి బోలస్నా. యోబు ఓర్పున గురించి తుమే హాఃజా. ఇనా సమస్తంనా దిదో, అనటేకే ప్రభువు కెత్రకి జాలిబి గోర్‍ వాలోకరి తుమే మాలం కరీన్‍ ఛా.

12 మార భైయో భైనె, ముఖ్యహుయుతె సంగతి సాత్కతో ఆకాష్‍ ఒట్టుకరి, జమీన్‍ ఒట్టుకరి బుజు కెవుబి ఒట్టుకరి ఒట్టు నామ్హేంద్నుతిమ్, తుమే "హాఃఛికతొ హాఃఛికరి న్హైతో, కాహేకతొ కాహెకరీ" ఇమ్నితర ర్హహితొ తుమే దేవ్ను న్వావ్ను పాల్‍ కోహుసుని.

13 తుమరమా కినాబి మిన్హాత్‍ అయుతో ఇనే ప్రార్థనా కర్ను. కినాబి ఖుషిహుయుతో ఇనే స్తుతి గీద్‍ బోల్ను. 14 తుమరమా కొన్బి జాన్‍ఖుద్‍ హుయిన్‍ ఛాన? యో సంఘమోట్టన బోలాయిలేను, ఇవ్నే ప్రభువు నామ్మా ఇనా తేల్‍ లాగడిన్‍ ఇనాటేకె ప్రార్థనా కర్ను. 15 విష్వాసంను ప్రార్ధనా యో రోగేలునా అష్యాల్ కర్సే. ప్రభువు ఇనా ఉట్టాడ్సే, యో పాప్‍ కరిన్‍ ర్హహితో పాప్నుమాపి మాల్‍సే. 16 అనటేకే తుమరు పాప్నా ఏక్నా యేక్‍ ఒపిలేవొ. తుమ్నా స్వస్థత కలగతిమ్‍ ఏక్నాటేకె ఏక్‍ ప్రార్థనా కరో. నీతివాలను విజ్ఞాపన యో కెత్రుకి తాహాఃత్‍హుయిన్ ఛా. 17 ఏలీయాబి అప్నతరస్‍ ఏక్‍ ఆద్మి. పాణి పడకొయినితిమ్‍ యో ఘను ప్రార్థనా కర్యతో హాఃడ్తీన్‍ వరహ్‍ః జమీన్‍ఫర్‍ పాణి పడ్యుకొయిని. 18 యో ఫరీన్‍ ప్రార్థనా కర్యోతొ ఆకాష్‍మతూ పాణిపడ్యు, జమీన్‍ఫర్‍ ఖేతర్‍వాడి కర్యా.

19 మార భైయ్యే భేనె, తుమారమా కినాబి హాఃచ్చిన మాతు నిక్లిగయుతెదె‍ అజేక్‍జనో ఇనా హాఃఛినా భనె ఫరాయోతో 20 యెజాత్న పాపినా ఇను గల్తిను వాట్మతూ పర్రాయోతె యో మరణ్ మతూ ఏక్‍ ఆత్మనా బఛ్చాడీన్‍ కెత్రూకి పాప్నా ఢాపినాఖిదేసెకరి యో మాలంకర్లేను.