João 5

Fii no Iisaa Selliniri Jukkunnaajo

1 Ɓawto ɗun, juldeere Yahuudiyankeeɓe waɗi. Iisaa yahi Yerusalaam. 2 Tawi beelun no Yerusalaam ɗon ka binde dambugal wi’eteengal Dambugal Baali. Kun beelun no wi’ee e haala Yahuudiyanke Betesada, caaliiji jowi no hundi kun. 3,4 Nawnuɓe ɗuuɗuɓe no waalii e ley ɗin caaliiji, ɗun ko gila e bumɓe e boofooɓe e maaya-ɓanduuɓe, *5.4 Bindi goo no ɓeyditi ɗun ka lannoode aaya on: habbiiɓe memminagol ndiyan beelun kun. Ko fii hari malaa’ikaajo no woowi tippaade e kun beelun e saa’iiji goo, o yeƴa ndiyan ɗan. Kala non on adinooɗo yollaade ɓawto memminagol ndiyan ɗan, o ndikkay, ɗun non nawnaare nde o wondunoo woo. 5 Tawi goɗɗo no ɗon, ɲawɗo gila duuɓi cappanɗe tati e jeetati. 6 Iisaa yi’i on no waalii, o andi on no ɗon gila neeɓii. Kanko Iisaa o wi’i on: «Hiɗa faalaa hettude cellal?»

7 Ɲawɗo on jaabii mo, wi’i: «Koohoojo, mi alaa hay gooto ko yollammi ka nder beelun si ndiyan ɗan memminike. Ɗoo yo wonu mi hewtii, haray goɗɗo attike lan yollaade.»

8 Onsay Iisaa wi’i mo: «Immo, ƴettaa dankun maa kun, yahaa.» 9 Ɗon kisan on neɗɗo hetti cellal, o ƴetti dankun makko kun, o woni e jindugol.

Ɗun hawrondiri e *aseweere, ɗun ko *ɲalaande fowteteende e mun nden.