Mateus 24

Fii Golloowo Holniiɗo e Golloowo Bonɗo

45 «Hara ko jiyaaɗo hombo reeniiɗo holniiɗo woni ko jom mun halfinta neemingol kurkaaɗi mun ɗin e saa’i haanuɗo? 46 Maloore wonanii on jiyaaɗo, mo jom mun ari tawi no jokkiri non. 47 Ka haqiiqa mi andinii on, o halfinay mo jawle makko ɗen fow. 48 Kono si tawii on jiyaaɗo ko bonɗo, wi’oowo: ‹Jom an neeɓii araali›, 49 onsay, o nangana tilfugol ɗimmooɓe makko ɓen, hara kanko himo ɲaama yarida e mandilooɓe ɓen, 50 jom on jiyaaɗo aray nde on jiyaaɗo sabbaaki mo, e saa’i mo o sogitaaki, 51 o letta mo lette sattuɗe, o waɗa mo ka faasiqiiɓe ɓen waɗetee ton, ka wullaandu e ŋatindiro ɲiiƴe woni ton.