Mateus 4

Fii no Ibuliisa Ndarndori Iisaa

1 Ɓawto ɗun, Ruuhu Allaahu on nawri Iisaa ka wulaa fii no Ibuliisa ndarndora mo. 2 O hoori balɗe cappanɗe nay, jemma e ɲalorma. Ɓawto ɗun o weelaa. 3 Ndarndotooɗo on ɓadii mo, wi’i: «Si tawii ko a *Ɓiɗɗo Alla, yamir ɗee kaaƴe yo ɗe wontu ɲaametee.»

4 Iisaa jaabii: «No windii wondema: ‹Neɗɗo hinaa ɲaametee tun wuurirta, kono ko kala konguɗi iwruɗi ka Alla.› »*4.4 Yaɲ. 8.3

5 Ibuliisa nawri mo kadi ka saare hormorde, ɗun ko Yerusalaam, o joɗɗinoyi mo ka hoore warɲakere *juulirde mawnde, o wi’i mo: 6 «Si tawii ko a Ɓiɗɗo Alla, hocco ɗon cikkoɗaa ka leydi, ko fii no windii wondema: ‹O yamiray malaa’ikaaɓe makko ɓen fii maa, ɓe tamboro-maa juuɗe maɓɓe ɗen, fii wota koyngal maa ngal feggo e hayre.› »*4.6 Zab. 91.11-12

7 Iisaa jaabii mo wi’i: «No windii kadi wondema: ‹Wota a ndarndo Joomiraaɗo on, on Alla maa.› »*4.7 Yaɲ. 6.16

8 Ibuliisa nawri mo kadi e fello toowungo fota, o holli mo laamateeriiji aduna on fow e darja mun. 9 O wi’i mo: «Mi okkete ɗun fow si a jiccike, a sujjanii lan.»

10 Iisaa jaabii, wi’i: «Pottito, yo Ibuliisa, ko fii no windii: ‹Ko Alla Joomiraaɗo maa on sujjantaa, rewaa mo kanko tun.› »*4.10 Yaɲ. 6.13

11 Onsay Ibuliisa pottitii mo. Ɓawto ɗun malaa’ikaaɓe ɓadii Iisaa fii kurkanagol mo.