1 इदी वचन विश्वास योग्य उंडाद जर यवाराना अध्यक्ष आंदार इचांग काळजी तीस्कोनेटोर आयेळदी इच्छा फेटताळ तर वाळ शिंगार फनीद इच्छा फेटताळ. 2 तर अध्यक्ष इड एमी गुन्हा शेयालेळ, वगा वळती मोगुळ, शांत, मर्यादाला, आदर इचावाड, पाहूनचार शेशेतोळ, शिकामतुदेंक निपुण उंडाला. 3 वाळ सराय तागेतोळ किंवा मतेतोळ (किंवा घाणरडेळ फायदाद आवड फेतेतोळ) बेकाल्या तर वाळ सौम्य, जगडाम न आळेटोर, दुडलाद लालच न फेटारोद बेक. 4 मना स्वता इल्लु मिंदा शिंगार प्रकारदी अधिकार नळपिचेटोर, पूर्ण गंभीर पणता स्वता बीळलाक हर माटा एकशेटोळ इल्ला वाळ उंडाला. 5 जर ओकोनकी स्वता परिवार दी देखभाल शेशेदेंक दा कुंटे तर वाळ परमेश्वर मंडळीद काळजी यला तीस्कोनी? 6 वाळ इ फनीला कोता नेड शावाड बेका लेद आंटे वाळ गर्वला फुगाशी शैतान दंडला फडा काला. 7 वांदी मंडळी बेटीटोळ मंदीला शिंगार फेर उंडाला. दिनकस्रोम की वान मिंदा टीका का रोद इंगा वाळ शैतान जाळीला फडाकाला.

8 दान लेकाने सेवकलाक पण गंभीर का बेक, वाळ रोंड नोरवालेर किंवा सराय तागेटोर बेकालेर इंगा वाईट पणता दुडलु कमाशी श्रीमंत आयेळदी वारकी इच्छा बेका लेद. 9 परमेश्वर जो माक प्रकट शेशिनाळ आदी मा विश्वासदी संगेम लोत सत्य वार शुद्ध विवेकता फटीगात फेटाला. 10 आब्बागार लेका इरदी पण पहिला परीक्षा काला, मग निर्दोष ठहरास्ते, वाळ सेवक पण शेयाला. 11 दान लेकाने, आंडेर पण गंभीर उंडाळा, वार चुगली शेशेतोळ नीलारोद. तर सभ्य इंगा प्रत्येक बाबतीला विश्वासटोर उंडाळा. 12 प्रत्येक सेवक वगा वळती मोगुळ उंडाला इंगा वार-वार बीळलाद इंगा परिवारदी शिंगार प्रकारता काळजी तीस्कोनाला. 13 येनटीक की यवार सेवक पण शिंगार शेशीर, वार मनाक शिंगार पदवी इंगा ख्रिस्त येशुन मिन्दुळदी विश्वासला संगेम धेर्य तीस्कोनतार.

14 नीन नीतीकुड लगाने वचेळदी आशा फेटतीन तरी नीन निक इ माटलू राशिंद उंडाद. 15 तरी नाक वेळ आंटते, परमेश्वरदी इल्लु आंटे जिवंत परमेश्वरदी मंडळी याद सत्यद खांब किंवा पाया उंडाद, आ परमेश्वर इलकाडा नीनु यला वागाया बेक, इदी निक समजाला.

16 सुभक्तीद रहस्य निर्विवाद फेदाद उंडाळ

वाळ शरीरला प्रकट आय्या,

आत्माता वाड नीतिमान ठहाराश्या,

वाळ परमेश्वर दूत नजरला फड्या,

राष्ट्रला गाजामतीणार,

दुन्यामला वान मिंदा विश्वास फेटीर,

वान गौरवला मिन्दिक तीस्कोनीर.