दंडाम इंगा उपकारस्तूती
1 ख्रिस्त येशुन दीनटल्या उनिनेद जीवन विषयद अभिवचनदी घोषणा शेदेंग, परमेश्वर इच्छाता ख्रिस्त येशुनदी प्रेषित पौल इन्तीकुड नुस, 2 प्रिय कोडकु तिमथ्य इनकी, परमेश्वर आबा इंगा ख्रिस्त येशुड मा प्रभूळ इन देगार नुस कृपा, दया इंगा शांती उंडाला.
3 ना पूर्वजलेका या परमेश्वरदी नीन शुध्द विवेकभावता सेवा शेस्तान, आ परमेश्वरदी नीन उपकार मानास्तान इंगा मोबू फगुल ना प्रार्थनाला नीद नेहमी आठवन शेस्तान. 4 निद येडस्काम ध्यानाम शेशी नीनु भेटाशेद शेंगेम इच्छा उंडाद दिनकस्रोम कि नीन आंनदता पूर्ण काला. 5 नि दिंटलोनदि निष्कपट विश्वासदि नाक येरका उंड्या जे पहिलानदा नि मुचामा लोईस दिनटल्या उंड्या इंगा नि आम्मा युनिकेद दिनटल्या उंड्या इंगा ना खात्री उंडाद कि आद्दे विश्वास नि दीनटल्या पण उंडाद.
आस्था इंगा हिम्मत फेटीदेंक बोध
6 दीनचांग नीन निक आठवन शेशीस्तान कि, परमेश्वर जे कृपादान ना शेइ निमिंदा फेटीन मुड आंका नि ठायी उंडाद, आदी प्रज्वलीत शेय. 7 येनटीक की परमेश्वर माक येरस्कुनेद आत्मा इयाल्या तर सामर्थ्यद, प्रेमदी इंगा धम फटेद आत्मा इच्ची नाड. 8 दानचांग मना प्रभून विषयला साक्ष इदेंग शिगु फटाक नाई तर नीन येवाड वानइचांग कैदी आतीन आदी नाद शिगु फट्टाक. तर सुसमाचार इचांग परमेश्वरदी सामर्थ्य लेका नु नाबरोबर दु:खद फाल तीस्को. 9 वाळ मोमलान ताराश्या इंगा पवित्र पाचारन शेषा. मिम काही शिंगार फनील शेस्तीम आंका लेद तर वान स्वता इच्छाता इंगा कृपाता शेषा. इदी कृपा युगदी सुरुवात केले परमेश्वर ख्रिस्त येशुन दीनटल्या माक इच्चीन्या. 10 पण याद इपूळ मंमलान मा तारण शेषेटोळ ख्रिस्त येशुनदी प्रकट आयेळदी सुपिदेंग ओचीनाद. ख्रिस्ताड सचकाम्दी नाश शेषा इंगा सुसमाचार द्वारे अविनाशीपण इंगा जीवन एलगुला येकाच्या. 11 नाक आदी सुसमाचार दि घोषनाचंग, प्रेषित इंगा शिक्षक इल्ला नेमाशी नीर. 12 इंगा इदी कारण चांग नीनसुध्दा दु:ख भोगास्तुनान. पण निन शिगु फडान येनटीक की येवार मिंदा नीन विश्वास फेटी नान वान नीन ओळखास्तान इंगा नाद खात्री उंडाद कि, आदी दिवस ओचीनतक वाड जे नाक सोपाशी नाळ दांदि वाड रक्षण शेशी. 13 याद सुवचनदी नमुना नु ना तीकुड नुस आयकाशी तीस्कूनटी, आदी नमुना ख्रिस्त येशूनलोन दि विश्वास इंगा प्रेम दीनटल्या मजबूत फट. 14 मनादीनटल्या नीलचे पवित्र आत्माद्वारे आ शिंगार फेटने माटलाद रक्षण शेय.
15 आशिया प्रांतला उंडेटोर आंदार नन्नु इडशी नार इदी निक येरका उंडाद. दानटल्या फुगल इंगा हर्मगणेस उंडार. 16 अनेसीफर इल्लु मिंदा प्रभुड दया सुपीयाला येनटीक की वाड संग्याम तुकुल नाद समाधान शेशीनाड इंगा नाद तुरुंगला निल्चेद वांकी शिगु वाटायल्या. 17 उलटा रोम शहरला उंडेतापुड वाळ नाद तपास आंटी नंताक पूर्ण जोर आन्ची नाद शोध शेशा. 18 प्रभूळ शेयाला इंगा आद्दे दिवस नाळ प्रभूनतीकुळ नुस दया शिक्काला येनटीक कि नाद इफीसला येनि तरी प्रकारता नाद सेवा शेश्या इदी निक शिंगार येरका उंडाद.