1 ना कोडका नु ख्रिस्त येशुन ठायी उंडीने कृपाला बलवान का. 2 नातीकुळ नुस याय माटलु नु सनगेम साक्षीदारला मुंदार इन्ती आय्यी तीस्को इंगा इंगोगर की नेरपेदेंग समर्थ इल्ला विश्वासु मंदीक सोपास काळ.

3 ख्रिस्त येशुन मनची सैनिक इ नातागोन ना बरोबर दु:ख सोसाय. 4 सैनिकी फनिल शेषेटोळ येवार पण जीवनलोंदी जगलोनी फनिल फटाला दीनटल्या अटकायाड. दिनकस्रोम कि वान्की वान फेदा अधिकारीन कि संतुष्ट शेय्या दावाला. 5 जर येवार पण मल्ल युध्द शेस्ताळ, तर आदी नियम अनुसार शेशीन शिवाय वांकी मुकुट शिकाद. 6 कष्ट शेषेटोळ शेतकरी मंदी पहिलाणे पीकदी हिसा तीस्कुनेद योग्य उंडाद. 7 जे नीन माटलाळतान आदी समझाशी तीस्को, येनटीक कि प्रभू ळ निक इ आणि माटलाद समज इच्ची.

8 ना सुसमाचार लेखा जो सची फोईणे नुस लेपिणाळ दाविदान पिढीटोळ येशु ख्रिस्तळ, इनदी ध्यानाम शेय. 9 येनटीक की आ सुसमाचार इचांग दु:ख सहन शेस्का उंडान, इडदाणका कि गुन्हेगारलेखा साखडीलता नाक कटदेंग ओच्या, पण परमेश्वरदी वचन कटदेंग दाल्या. 10 दिनकस्रोम परमेश्वरदी निवडाशिनेरचांग नीन आंता काही आराम शिरता सहन शेषका उंडान, आंटे वारकी पण ख्रिस्त येशूनद्वारे शिक्येद तारण इंगा अनंत काळदी गौरव प्राप्त कावाला.

11 इदी वचन विश्वासदी उंडाद कि,

जर मिम वान संगा सची फोतिम, तर वानबरोबर जिवंत पण उंड्याम

12 जर मिम दु:ख सहन शेस्तिम तर मिम वानबरोबर राज्यसुध्दा शेशाम

जर मिम वांकी नाकारास्तिम, तर वाळसुध्दा माद नकार शेशी

13 जर मिम अविश्वासी उंडाम तरी वाड इपूड पण विश्वासू उंडाड येनटीक की वाड वान्दी नाकार शेशी शकायाळ.

14 मंदीक इ माटलाद द्यानाम इच्का उंड. प्रभु मुंदरा वार्की समजा मती शप की तीटलाडा कुंडा. इल्ला जगळाल यादुच फायदाय लेव. जे येवारकी पण फनिक फडान्दे एकाशोतोर नाश दि कारण आताद. 15 नु सत्यद वचन योग्य रितीता शेपेतोड इल्ला इंगा याद फनी शेस्ताव दानटल्या शिगुवाटायदेंग येमीच कारण लेकून न्योड परमेश्वर की स्वीकृत इल्ला फनी शेशेतोड आय्येद प्रयत्न शे. 16 पण अमंगळपन दि रिकामिद जगडाल आडेळदी इडु येनटीक की वाड मंदीन परमेश्वर देगार नुस सना आंटे सना दुराम येका फोताळ. 17 इंगा दिन लेका जगडाल आडेतोर्दी शिकवन कर्करोगलेका पसरास्ताड. इ मंदीला हुमनाय इंगा फिलेत उंडाळ, 18 वार सत्यदेगार नुस दुराम फोई नार. पुनरुत्थान आय्यी गास फोई नाद इल्ला वार आंटार इंगा येंतातरी मंदी विश्वासदी नाश शेस्तार. 19 तरी परमेश्वर येशीणे जोता स्थिर उंडी उंडाद, वांदी इदी शिक्का उंडाद की, "प्रभूड जे वानटोर उंडार वार्नी ओळखास्ताड," इंगा "येवार पण प्रभूनदी फेर तीस्कून टार वार वाईट मार्ग नुस दूराम उंडाला."✝2:19 नहूम 1:7.

20 फेदा इंडलाला फक्त बंगारयेंडीय बतकुल उंटाय इल्ला लेद तर कटलु इंगा मनु दीनदेगर नुस बनामतीणेय पण उंटाय. काहीक सन्मान इचांग इंगा काहीक अनमाण इचांग नेमाशिनेय उंटाय. 21 दानचांग जर येवार पण दान देगार नुस दुराम उंडी स्वतान शुद्ध शेशी, तर वाळ पवित्र शेशीणे, मालकूनकि फनिक फडदेंग, प्रत्येक शिंगार फनिक तयार शेशीने इल्ला मान दि बतकु आयार.

22 पण जवानी वासनादेगार नुस दुराम उंड इंगा जे प्रभून कि शुध्द अंत:करनाता कुतेस्तार इंगा प्रभून मिंदा विश्वास फेटतार, इल्ला मंदी बरोबर, नितीमत्त्व, विश्वास, प्रेम इंगा शांती इटला येन्का आन्ट. 23 पण मूर्खपणदि इंगा अज्ञानी जगळाल देगार नुस दुराम उंडा येनटीक की निक येरका उंडाद कि, दानचंग जगडाल निर्माण आताय.

24 परमेश्वर सेवकलु जगडाल शेयारोद, तर आंता मंदी संगा सौम्यताने वागायला, आले शिक्षनला कुशल इंगा सहनशील उंडाला. 25 येवार वांकी विरोध शेस्तार, वार्की शांत तों शिक्षण इयाला कदाचित वार खरेम ओळखायला दानचांग परमेश्वर वार्की पश्चाताप शेशेद बुद्धी इच्ची. 26 इंगा शैतान मना इच्छा लेका फटी येका फोईणे वान फासालोन नुस इळीगात शुद्धीला ओच्यार.