विनाश कोडकु
1 तम्मूडलु इंगा शेल्यानलु, मनाद प्रभू येशु ख्रिस्ताद वच्चेद इंगा वानदेगारा मनाद वगातडा आय्येद इदी संबंधागोन मीम मीरक इळा विनंती शेस्ताम की, 2 मीर लगेच दचकाशी थांबा वायाकांडा इंगा यरसकुणाकण्डा; प्रभून्द दीनुम वची ठेपाशीन्द उंडाद इळा शप्यातोरक आत्म्यागोन इंन्का जणूयेम मतीकनोल वचीन्द वचनागोन लेकाते पत्रागोन यरस्कुणाक; 3 यादबी प्रकारे यवारतिकूट फसायाक; कारण आ दीनुम्द पहिला विशावासद त्याग आइ वाड अनीतीमान मणशी, नाशाद कोडकु प्रकट आइ; 4 वाड नाशाद कोडकु, इरोधी व यवारक परमेश्वर इंका उपासणीय आणकेन आणटार आ आंदार किन्टा स्वत वेर वेदाद शेशातोड, आंटे नीन परमेश्वर उंडान, इळा स्वताद प्रदर्शन शेशी परमेश्वरद भवनाला कुसण्यातोड इळा उंडाड.2:4 दानिएल 11:36-37.
5 नीन मिरसंगा उंडीनाप्पुड इदी मीरक शपतूण्ड्या इळा वान्द मीरक द्यानम लेद यम? 6 वाड नेमाशीन्द समयीच प्रकट आवाला, उन्गो येळी आवाराद, आणकेन यवार इप्पुड बंध शेस्तार आदि मीरक यरका उंडाद. 7 कारण अनीतीद रहस्य इप्पुडच मनाद कार्य नेडस्ताड, पन जो इप्पुड अडथळा शस्ताड वान नडमीनुट तिशी फेकाशी आय्यी पर्यंत अडथळा शेस्केन निलची; 8 मग वाड अनीतीमान मणशी प्रकट आइ, वान्क प्रभू येशु मनाद नोटलोंन्द श्वासागोन मती वर्षी इंगा वाड वच्यातापूड मनाद दर्शनागोन वान्क नष्ट शेशी;2:8 ईयोब 4:9; यशया 11:4. 9 सैतानाद कृतीगोन वान्द वचेद आय्यी; वाड आंता प्रकारे खोटी सामर्थ्य, आळाच चिन्हल व अद्भूते शेस्केन वची 10 यवारद नाश आवाका वचीद उंडाद वार मनाद तारण साधायाला आनकेन सत्याईशयद प्रीती फेट्या लेद; दानकसरोम वानकसारोम सैतनाद कृतीप्रमानगोन आंता प्रकारद खोटी महत्क्रत्ये, चिन्हल, अद्भूते इंगा आंता प्रकारद अनीतीजन्क कपट दिनगोन युक्त इळा आ अनीतीमानाद वच्चेद आय्यी. 11 वार असत्यमिंदा ईशवास फेटाला आणकेन परमेश्वर वानठायी भ्रांतीद कार्य नेडशी इळा शेस्ताड; 12 यवार सत्यामिंदा ईशवास फेट्या लेद, तर अनीतीला संतोष मानशा आ आनदारद न्याय निवाडा आवाला आणकेन इळा आइ.
विश्वास ला स्तीर उन्डाडा
13 प्रभूद प्रियजनहो, मीर ईशयला मीम द्यावारद उपकारस्तुति नेहमी शायला कारण पवित्र आत्म्याद्वारे आईन्द पवित्रत्री करणाला सत्यामिदूडद इश्वासाला परमेश्वर मीरक प्रथमफळ आनकेन तारणाइच्चाका नेमिशिन्द उन्डाद;2:13 इफिस 1:4-5; अनुवाद 33:12; 1पेत्र 1:1-5. 14 दानटल्या वाड मीमलान माद सुवार्तेद द्वारे मनाद प्रभू येशु ख्रिस्ताद गौरव प्राप्त शेशी तिस्कून्याइच्चाका पाचारण शेशीन्द उंडाद.
15 इंगा मग तम्मूलु इंगा शेल्याल, स्थिर निलूण्डा इंका मुती इंका माद पत्राद्वारे जे संप्रदाय मीर्क नेरप्या आदि बळकट फटी निलूण्डा. 16 मनाद प्रभू येशु ख्रिस्त वाड इंका यवार मनामिंदा प्रीती शेशी आंता कालाम्द सांत्वन इंगा बागा इळा कृपेगोन इच्चा वाड परमेश्वर मनाद आबाड, 17 मीद मनसद सांत्वन शेयाला इंका प्रत्येक बागा फनीला इंगा कथाला मीक स्थिर शेयाला.