1 अग्रीप्पा पौलनी आन्या, "निक नीद बाजू मांडाशेळदी परवानगी उंडाद." दिन मिंदा पौल स्वताद शेई मिन्दिक शेशी स्वता न वाचय मतेद भाषण सुरु शेश्या. 2 अग्रीप्पा महाराज, नीन स्व्तान धन्य स्म्जास्तान येनटीक की यहुदील मी मुंदार ना उलटा शेशीने आरोपलाद बचाव शेशेळदी संधी इफोद नाक शिक्या. 3 विशेषता, यहुदी रिती रीवाज इंगा प्रश्न संगेम माटलाद मनाक शिंगार प्रकारता यरकाउंडाद तर इदी जास्तने खरेम आणाला, आप्पुड मीर नाय माटलु धीरता ऐकाशी तीस्कोनाला इल्ला नीन विंनती शेस्तान.

4 नीन नाद जीवन जवानीकेल ना प्रांतला इंगा यरुशलेम शहरला या रीतीता जगादून इदी आंता यहुदी मंदीक शिंगारे यरका उंडाद. 5 वार नन्नु संगेम काळकेल ओळखास्तार इंगा वारदी इच्छा उंटे तर नीन वगा परुशी म्हणजे मा यहुदी धर्मटोळ वगा कट्टर गटटोळ सभासद इ नाताता यला जगास्का वस्तीन इविषयला वार साक्ष इचू शकाश्यार. 6 इपुड परमेश्वर मा पूर्वजलाक याद वचन इच्या दांदी आशा फटीने इचांग नाद न्याय आदेंक नीन नीला फडीनान; 7 आयी वचनलु शिकीदेंक आशा फेटी मा बारा वंशळ परमेश्वरदी सेवा मबुदिवस एकाग्रताता शेस्तुनान, महाराज, आद्दे आशा फटीने इचांग ना मिंदा यहुदील आरोप फेटीनार. 8 परमेश्वर सचीनोरनी इंगा लेफिस्ताड, इल्ला मी पैकी यंता जनकी विश्वास फेटीदेंक अयोग्य येनटीक वाटाला. 9 नासरथ येशुन फेरउलटा येम-येम शेया वची आदी-आदी नीन शेयाला इल्ला नाकपण वाटादू. 10 इंगा नक्की इदे नीन यरुशलेम शहरला शेस्तिम, येनटीक की मुख्य याजकला तीकेल नाक आला अधिकार शिकीन्या, दांचांग नीन द्यावार संगेम संतलान जेलला येस्तीन इंगा इदी संतजनलान जेमता म्तेस फारशीर, वार उलटा नीन नाद मत नोंदा मतुतीन. 11 संगेम सभास्थानला नीन वारकी शिक्षा शेस्तीन इंगा द्यावार उलटा जबरद्स्तीता खराब भाषण शेशेदेंक आंचेळदी नीन प्रयत्न शेस्तीन, इ मंदी मिंदूळदी नाद कोफाम इंता मींदीक फोइन्या आंका की, नीन वारदी छळ शेशेदेंक इंगोगो शहरला पण फोदुन.

12 वगा दिमिष्क शहरला फोयेदेंक मुख्य याजकलु नाक अधिकार इंगा परवानगी इच्चीर आप्पुड महाराज. 13 दावाला भर मध्याम वेळला नीन ना इंगा नादेगार उंडीने भोवती स्वर्गीय यलगु फाकास्नेद सुस्तीन, आदी यलगु सूर्यपेक्ष पण जास्त प्रखर उंड्या. 14 मिम आंदार किंदा भुमी मिंदा फडतीम इंगा इब्री भाषाला ना संगा माटलाळतांना ओकाट आवाज नीन ऐकास्तीन, आदी आवाज आन्या, "शौल, शौल, नाद छळ नु येनटीक शेस्ताव? अणकुचीदार कट्या मिंदा तनकाम निक हानिकारक उंडाद." 15 इंगा नीन आंटीन, 'प्रभू, नु यवार उंडाव?' प्रभूड उत्तर इच्या, "नीन येशुड का, यवांदी नु छळ शेस्तुनाव. 16 इपुड लेय इंगा नीला फड! इ कारण इचांग नीन निक दर्शन इचीनान नीनु सेवक आंका नेमाला इंगा येम पण निक सुपिस्तीन इंगा येम सुपिच्यान दान साक्षीदार आंका नीनु नेमाला. 17 इ मंदीकेल इंगा इंगोगाराष्ट्रटोर इचांग नीन नीद रक्षण शेश्यान. 18 नीन नीनु वार तीकुड आंपडीस्तान, दिनकस्रोम की, वार मबूलोन्केल येली मंचीतीकुड इंगा शैतान अधिकारता परमेश्वर अधिकार तीकुड तीर्गाला, दांचांग नु वारी कनलू उघडामताला इंगा वारकी पापलाद क्षमा काला इंगा ना मिंदूळदी विश्वासता पवित्र आयीने मंदीला वतन शिकाला."

19 दिनकस्रोम, अग्रीप्पा महाराज नाक जो स्वर्गदी दृष्टांत आय्या, दांदी नीन आज्ञाभंग शेयालेन. 20 उलटा पहला तीकुल दिमिष्कलोनटोर इंगा नंतर यरुशलेम शहरलोन, यहुदिया प्रांतलोंटोर आंदार इंगा इंगोगो राष्ट्रटोर मंदीकपण प्रभून वचनदी साक्ष इच्या, वार पश्चात्ताप शेयाला, परमेश्वर तीकुड तीर्गाला इंगा पश्चात्ताप शोभाशी इल्ला फनील शेयाला इल्ला नीन वारकी शप्तीन. 21 इ कारण इचांग नीन परमेश्वर भवनला उंडतांना काही यहुदी मंदी नन्नु फटीर इंगा जेमता मतेळदी प्रयत्न शेशीर. 22 पण परमेश्वर नाक मदत शेश्या दांचांग नीन इंदू नीला फडी समाजलोन्टोर शिनावरकी साक्ष इस्तुनान, येम पण मुंदारकी आयेळदी उंड्या, दान विषयला संदेष्ट्याल इंगा मोशेळ येम शप्या दानपेक्षा दुसराद नीन शपान. 23 दान लेका परमेश्वर अभिषिक्त जो ख्रिस्त वाड दुःखसहन शेशी इंगा सचीनेन्का लेपेळला वाड पहिला उंडी, यहुदी मंदीक आले यहूदी लेनोर्क पण परमेश्वर प्रकाशाद घोषणा शेशी.✝26:23 यशया 40.

24 पौल स्वतान वाचामतेळ संबंधला माटलाळतांना फेस्त वान बेग्याता आन्या, "पौल, निक तिका फटीनाद, जास्त ज्ञानइचांग निक तिका फटीनाद." 25 पौल उत्तर इच्या, "फेस्त महाराज, नाक तिका फटालेद; तर याय माटलु खरेम उंडाय इंगा संगेम बरोबर उंडाय, आटलाविषयलाने नीन माटलाळतुनान. 26 यंदू हजर उंडीने महाराजलाक इविषयला शिंगार माहिती उंडाद इंगा दिनकस्रोम नीन वार संगा मोकळापणता माटलाळू शकास्तान, वान ध्यान लोन्केल येमी इळा लेकुंटे, इल्ला नाक खात्रीता वाटास्ताद, नीन इदी आंटान, येनटीक की इदी माटा यादाना कोपऱ्याला कालेद. 27 अग्रीप्पा महाराज, संदेष्ट्याल याद लीवाशीर दान मिंदा मिद विश्वास उंडाद येम? मिद दानमिंदा विश्वास उंडाद." इदी नाक नक्की यरका उंडाद. 28 दिनमिंदा अग्रीप्पा आन्या, "इंता कमी वेळला ख्रिस्ती आदेंक नु नाद मन तीपु शकाश्याव इल्ला निक वाटास्ताद येम?" 29 पौल उत्तर इच्या, "रवा वेळला आंडा किबा जास्त वेळला आंडा, नीन यला उंडान आले फक्त मिरे लेदतर इफोद यवार-यवार इंदू कुसनी नाय माटलु ऐकास्तुनार वार आंदार नालेका इ साकळीशिक्षालेका, विश्वास फेटेटोर काला, इल्ला नाद परमेश्वरकी नम्र विनंती उंडाद."

30 दिन नंतर राजा, बर्णिका, राज्यपाल इंगा वार संगा इंगोगोर यवार कुशिंडीर, वार आंदार लेशीर. 31 वार न्यायालयकेल बेटीक फडीनेन्का एकमेकोरणी माटलाळदूर, वार आनीर, "येमटी इचांग तुरुंगवास किंवा सचेळदी शिक्षा इयाला इल्ला येमीच इ मणशी शेया लेळ." 32 अग्रीप्पा फेस्तनि आन्या, "इ मणशी कैसरतीकुड न्याय आळगा लेकुंटे, तर वान इळा वस्तुन्या."