1 यप्पुड येशुड इंगा शिष्यल यरुशलेम शहर देगार जैतुन कोंडा देगार बेथफगे इंगा बेथानी उरदेगार वच्चीर आप्पुड येशुड वान इद्दार शिष्यलान इल्ला आनी आंपताड की, 2 "मुंदार उळ्योंक फोंडा, उळ्योंक फोइनेंका या दान मिंदा यवार कुसना लेद इल्ला गाडदी फिल्ला कट्टीनेद शिक्की. आदी इडशी इंदूक येकादांडा. 3 जर यवाराना मिमलान आडगीर, ‘मीर इदी येनटीक येका फोतूनार?’ तर मीर इल्ला आनांडा, ‘प्रभून की दिंदी गरज उंडाद.’ इंगा वाड आदी लगेच आंपी." 4 मग वार येल्लीर इंगा वारकी दावा मिंदा, वगा इल्लु दरवाजा देगार वगा गाडदी फिल्ला कट्टीनेद कमशा मग वार दान इडशीर. 5 आंदू नीला फडीने मंदीपैकी काही मंदी वारनी आनीर, "इदी येम शेस्तुनार इ गाडदी फिल्लान येनटीक इडस्तुनार?" 6 शिष्यल उत्तर इच्चीर येशुड वारकी येम शेपीन्या आदी वार शप्पीर. आप्पुड आ मंदी गाडदी फिल्लान एका फोनीचीर. 7 वार आदी गाडदी फिल्ला येशुन तीकुड येकोचीर. वार मना बट्टाल दान मींदा कप्पीर इंगा येशुड दान मिंदा कुसन्या. 8 शेंगेम मंदी वारी बट्टाल दावा मिंदा फरशीर इंगा इंगोगोर शेल्लोनी तेम्पीनेय डाळ्याल फरशीर.

9 मुंदारकी नडशेतोर इंगा यंका नडशेतोर घोषणा शेयदूर,

"होसान्ना, प्रभून फेरता वचेतोड धन्यवादीत उंडाला*.

10 मा पूर्वज दावीद इनदी वचेद राज्य धन्यवादित उंडाला.

स्वर्गला होसान्ना."*

11 मग येशुड यरुशलेम शहरकी फोई नेंका वाड परमेश्वर भवनलोंक फोया इंगा आजुबाजूक आंता सुश्या. आ वेळला फददु मुनगीन्या दान कस्रोम वाड वान बारा शिष्यल जताक बेथानिक येल्ली फोया.

12 इंगोगो नाड, येशुड इंगा शिष्यल बेथानीनुस येल्लीनेंका येशुनकी आकाल आय्या. 13 वानकी आकुलाता निंडीनेद वगा माक कमशा. दान मिंदा येमाना शिक्की इ आशाता वाड आंदूक फोया पण वानकी आंदू आकुलान इडशी येमीच शिक्काक फो येनटीक की अंजीरदी सीजन लेकुंड्या. 14 मग वाड दान आन्या, "दिन बाद नि फळलु यवारूच तीनाक फोयार." वान शिष्यल इदी इनीर.

15 यप्पुड येशुड इंगा वान शिष्यल यरुशलेम शहरकी वच्चीर इंगा येशुड परमेश्वर भवनलोंक फोया आप्पुड भवनला यवार आंमेद इंगा कोंकूनेद व्यवहार शेयदूर वारनी येशुड बैटीक तीदेंक आंट्या. वाड सराफाली चौरंगलु इंगा यवार कबुतर आंमुदूर वारी कुसनेय पाट्याल उलटा मतेश्या. 16 वाड यवारकीच यादुच वस्तुलाद परमेश्वर भवनलेल वचेद फोयेद शैयानियालेद.

17 मग येशुड नेरपेदेंक आंट्या. वाड वारनी आन्या,

"ना इल्लुन आन्नी जातीला कस्रोम प्रार्थना भवन आन्यार, इल्ला पवित्र शास्त्रला राशीनेद लेद येम?

पण मीर दान दोंगालदी इल्लु बना मतीणार." *

18 मुख्य याजकलु इंगा नियमशास्त्र शिक्षकलु इदी इनीर इंगा वार वानदी जेम तीस्कुनेद दावा सुदूर येनटीक की आंता मंदी वान शिक्षणता थक्क आयनीर आंका वार वानकी आद्रुदूर.

19 यप्पुड फददु मुनग्या येशुड इंगा वान शिष्यल शहर बैटीक फोईर.

20 फद्दीना येशुड इंगा वान शिष्यल फोयेताप्पुड आदी अंजीरदी शटटू मुळालनुस येंडीनेद सुशीर. 21 पेत्रक ध्यानाम वच्या. वाड येशुन आन्या, "रब्बी, सूड! या अंजीर शटटूक नु श्राप इच्चीनिंटी आदी येंडी फोयानाद."

22 येशुड उत्तर इच्या, "द्यावार मींदा विश्वास फेटना. 23 नीन मिक खरेम शेपतान की, यवार पण इ कोंडान ‘फिकीगास समुद्रला फोई फड’ इल्ला आनी इंगा मना मनला शक शेय्याक फोई मनाम येल्ला आंटाम आल्ले आय्यी इल्ला विश्वास फेट्टी तर आल्ले आय्यी. 24 दिन कस्रोम नीन मिक शेपतान येम पण मीर प्रार्थनाला आडग्यार आदी शिक्कीनादुच इल्ला विश्वास फेटना आंटे आदी मिक शिक्की. 25 यप्पुड मीर प्रार्थना शेस्का नीला फडतार आप्पुड मी मनला जर येवाराना बद्दल येमाना उंटे तर दानदी क्षमा शेयना. दिन कस्रोम की, मी स्वर्गलोन आब्बाड मी पापलाद क्षमा शेय्याला. 26 पण मीर जर क्षमा शेय्याक फोतीर तर मी स्वर्गलोन आब्बाड पण मी अपराधलाद क्षमा शेय्याक फोई."

27 येशुड इंगा वान शिष्यल वापस यरूशलेम शहरकी वच्चीर इंगा येशुड परमेश्वर भवनला तीरगेताप्पुड मुख्य याजक मंदी, नियमशास्त्र शिक्षकलु इंगा आब्बागार वान तीकुड वच्चीर. 28 इंगा वार वान आडगीर, "नु या अधिकारता इ माटलु शेस्ताव? इ माटलु शेशेद अधिकार निक येवार इच्चीर?" 29 येशुड वारनी आन्या, "नीन पण मिमलान वगा प्रश्न आडगुतान इंगा जर मीर नाक दानदी उत्तर इस्तीर तर नीन इ माटलु या अधिकारता शेस्तान इदी मिक शेप्यान. 30 योहानदी बाप्तिस्मा स्वर्गकनुस उंड्या की मनशीनुस उंड्या? दिंदी उत्तर इयांडा." 31 दान बद्दल वार आपसला चर्चा शेशीर इंगा आंदूर जर मनाम आदी स्वर्गनुस आंटीम तर वाड आनी, "मग वान मिंदा मीर विश्वास येनटीक फेट्टाले? 32 जर मनाम आदी मनशी नुस आंटे तर मंदी मना मिंदा कोफाम फड्यार." वारकी मंदीद येरपू आदू येनटीक की मंदीद विश्वास उंड्या की योहान खरेमे संदेष्टा उंड्या. 33 मग वार येशुनकी उत्तर इच्चीर, "माक येरका लेद." आप्पुड येशुड वारनी आन्या, "मग नीन पण इ माटलु या अधिकारता शेस्तुनान इदी मिक शप्पान."