2 Tessalonicenses 2

ಝೂ಼ಟೊ ಅದ್ಮಿನಿ ಬಾರೇಮ

1 ಭೈಯೆ ಭೇನೊ, ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತ ಆವಾನಿ ಬಾರೇಮ ಅಜು಼ ಅಪ್ಣೆ ಖ್ಹಾರು ಎಕ್ಟು ಹುಯಿನ್ ಇನ ಮಳಾನಿ ಬಾರೇಮ ತುಮೂನ ಬೋಲಿಲಿಯೇಸ್. 2 ಪ್ರಭುನೊ ದನ್ ಐರ‍್ಹೋಸ್ ಕರಿ ತುಮೆ ಆತ್ಮಥಿರ‍್ಹಿಲೇವೊ ವಾತೆಮರ‍್ಹಿಲೇವೊ ಹಮಾರಿ ಚಿಟ್ಟಿರ‍್ಹಿಲೇವೊ ತುಮೆ ವಗ್ಗಿಸ್‌ಮ ಕಲಾವ್ಣಿ ನಕೊಹುವೊ. 3 ಕೋಣ್‌ಬಿ ಕೆವ್ಹಿ ತರಿಖಾಮಾಬಿ ಠಗಾವ್ಣುನಾತೆ ಇಮ್‌ ದೇಖಿಲೇವೊ. ಶನಕತೊ ಪಹಿಲೆ ವಿಶ್ವಾಸ್‌ನ ಕಾಡಿನಾಖಿನ್ ನಾಶಕರವಾಳೊ, ವಿರೋದಿ ಭಡ್ಕಲಗುಬಿ ಯೊ ದನ್ ಆವ್‌ಶೆ ಕೊಯ್ನಿ. 4 ಖಿವು ದೇವ್‌ನು ಹುಯಿರ‍್ಹುಸ್ ನತರ್ ಆರಾದನೆನ ಯೋಗ್ಯಹುಯಿರ‍್ಹಾವನು ಹುಯಿರ‍್ಹುಸ್ಕಿ, ಯೋ ಖ್ಹಾರಾನ ನಾಶ್ ಕರ್ಷೆ. ಇನು ಯೋಸ್ ಖ್ಹಾರೇಥಿಬಿ ಭಡೈಲೀನ್, ದೇವ್ನಿ ಮಂದಿರ್‌ಮ ಬೇಶಿನ್‌ ಯೋಸ್ ದೇವ್‌ಕರಿ ಬೋಲಿಲಿಶೆ. 5 ಮೇ ತುಮಾರಿ ಜೋ಼ಡ್ಮ ಥೋತೆ ತದೆ, ಆ ಖ್ಹಾರಿ ಬಾರೇಮ ಬೋಲ್ಯೊತೆ ತುಮೂನ ಯಾದ್ ಕೊಯ್ನಿಕಿ ಶು? 6 ಯೋ ಬರೋಬರ್‌ನಿ ವಖ್ಹತ್‌ಮ ದೆಖಾವ್ಣುನಾತೆ ಇಮ್ ಅನಿ ಬಾರೇಮ ಶಾತ್ ಅಡ್ಡಿ ಹುಯಿರ‍್ಹುಸ್‌ಕರಿ ತುಮೂನ ಮಾಲುಮ್ ಛಾ಼. 7 ಠಗಾವ್ಣು ಅಜೂ಼ಬಿ ಗಪ್ಲಥ್ಥಿ ಕಾಮ್ ಕರುಕರಸ್. ಕತೋಬಿ ಅನ ಠೇರೈರಾಖವಾಳೊ ವಾಟ್‌ ಮ್ಹೇಲಾಲಗುಬಿ ಯೋ ಗಪ್ಲಥ್ಥೀಸ್ ರ‍್ಹಿಶೆ. 8 ಯೋ ಅಧರ್ಮಿ*2:8 ಅಛ್ಛಾ಼ನ ವಿರೋದ್‌ ಕರಾವಳೊ ದೆಖಾವ್‌ಶೆ. ಪ್ರಭು ಯೇಸು ಇನ ಮ್ಹೋಡಾನು ದಮ್‌ಥೀಸ್ ಇನ ಮಾರಿನಾಕ್‌ಶೆ. ಅಜು಼ ಯೋ ಹಿಜ಼್ಜಾ ರ‍್ಹಿಶೇತೆ ಇನಖ್ಹಾಜೇಸ್ ಇನ ನಾಶ್ ಕರಿನಾಕ್‌ಶೆ. 9 ಯೋ ಅಧರ್ಮಿ ಶೈತಾನ್ನಿ ಶಕಥ್ಥಿ ಭರೈನ್ ಆವ್‌ಶೆ ಅಜು಼ ಕೈಯೆಕ್ಕಿಥರಾನು ಠಗಾವನು ಮೋಟುಕಾಮ್, ಅದ್ಭುತ್‌ಕಾಮ್, ಚಮತ್ಕಾಕರ್‌ನ ಕರ್ಶೆ. 10 ಇವ್ಣೆ ಖ್ಹಾಚಿನ ಪ್ಯಾರ್ ನಾಕರೀನ್‌, ರಕ್ಷಣೆ ಕೋಲೆಯಿಂತೆ ಝಿಟ್ಕಾರಿನ್ ನಾಶನ್ನ ಮಾರಗ್‍ಮ ರ‍್ಹವಾಳನ ಅಖ್ಖೀಸ್ ಥರಾನಿ ಖರಾಬ್‌ ದಿಮಾಕ್‌ಥಿ ಯೋ ಠಗಾವ್‌ಶೆ. 11 ಇನಖ್ಹಾಜೇಸ್ ದೇವ್ ಇವ್ಣುನ ಘಣಿ ಮೈಕಮ್ಮ ನಾಖಿನ್ ಇವ್ಣೆ ಯೋ ಝೂ಼ಟಿನ ನಂಬಾನಿಘೋಣಿ ಕರ್ಷೆ. 12 ಅನೇಥಿ ಖ್ಹಾಚಿನ ವಿಶ್ವಾಸ್‌ಕರ‍್ಯುಕೊಂತೆ, ಪಾಪ್ನು ಕಾಮ್ಮ ಖ್ಹುಶಿಕರಾವಾಳ ಹರೇಕ್ನ ತೀರ್ಪ್‌ ಉಶೆ.

ತುಮೆ ರಕ್ಷಣೇನ ಚು಼ಣಿಲಿದ

13 ಪ್ರಭು ಪ್ಯಾರ್ ಕರಾಸ್ತೆ ಭೈಯೆ ಭೇನೆವೊ, ಹಮೆ ತುಮಾರಿ ಬಾರೇಮ ಹಮೇಶ ದೇವ್ನ ಧನ್ಯವಾದ್ ಕರಾವಳ ಹುಯಿರ‍್ಹಾಸ್. ಶನಕತೊ ತುಮೆ ಪವಿತ್ರಾತ್ಮಾಥಿ ಪಾಕ್‌ ಹುಯಿನ್, ಖ್ಹಾಚಿಪರ್ ವಿಶ್ವಾಸ್‌ರಾಖಿನ್ ರಕ್ಷಣೆನ ಲೀಲ್ಯಾವದೆಕರಿ ದೇವ್ನೆ ತುಮೂನ ಶುರುವಾತ್‌ಮಾಸ್ ಚೂ಼ಣಿರಾಖ್ಯೊಸ್. 14 ತುಮೆ ಅಮ್ ರಕ್ಷಣೆಮ ಐನ್, ಅಪ್ಣೊ ಪ್ರಭು ಯೇಸು ಕ್ರಿಸ್ತನಿ ಮಹಿಮೆಮ ಪೇಖ್ಹ್‌ಣುಕರಿ, ಹಮೆ ಬೋಲ್ಯಾತೆ ಸುವಾರ್ತೆಥಿ ದೇವ್ನೆ ತುಮೂನ ಬುಲಾಯೊ. 15 ಇನಖ್ಹಾಜೇಸ್ ಹಮಾರ ಭೈಯೆ-ಭೇನೆವೊ, ಘಟ್ ಭೀರ‍್ಹೆವೊ, ಹಮೆ ವಾತೇಥಿರ‍್ಹವೊ ಅಜು಼ ಹಮೆ ಲೀಖ್ಯಾತೆ ಕಾಗತ್‌ಥ್ಥಿರ‍್ಹವೊ ತುಮೂನ ಮಾಲುಮ್ ಕರಾಯಾತೆ ಪದತ್ತಿನ ತುಮೆ ಘಟ್ ಧರಿಲೆವೊ. 16 ಅಪ್ಣುನ ಪ್ಯಾರ್ ಕರೀನ್, ಕೆದೇಬಿ ರ‍್ಹವಾನು ಹುಮ್ಮಖ್ಹ್‌ನಬಿ, ಅಛ಼್ಛು ಭರೋಖ್ಹಾನಬಿ ಇನಿ ವಾರ್‌ಖ್ಹೇಥಿ ದಿದೋತೆ ಅಪ್ಣೊ ಬಾ ಹುಯಿರ‍್ಹೋತೆ ದೇವ್‌ಬಿ ಅಪ್ಣೊ ಪ್ರಭು ಯೇಸು ಕ್ರಿಸ್ತ ಯೋಸ್ ತುಮಾರ ದಿಲ್‌ಮನ್ನ ಧಿಲ್‌ಪತ್‌ ದ್ಯವಾದೆ. 17 ಖ್ಹಾರಿಸ್ ತರ‍್ಹಾನು ಅಛ಼್ಛಕಾಮ್ಮಬಿ ಅಛ಼್ಛು ವಚನ್‌ಮಾಬಿ ತುಮುನ ಭಾಲಿದ್ಯವಾದೆ.