1 ಆ ಹುಯಿಜಾ಼ವನ ಪರ್ ಸೊರ್ಗಾಮ ಮೋಟಿಭೀಡ್ಣು ಟ್ಹೌಕಾನಿತರ ಏಕ್ ಮೋಟಿ ಅವಾಜ಼್ ಖ್ಹಮ್ಜೊ. ಇವ್ಣೆ "ಹಲ್ಲೆಲೂಯ! ಆಖ್ಹ್ರೋಬಿ, ಮಹಿಮೆಬಿ, ಶಕತ್ಬಿ ಹಮಾರ ದೇವ್ಮ ಛಾ಼. 2 ಇನು ನ್ಯಾವ್ನು ತೀರ್ಪ್ಖ್ಹಾರು ಖ್ಹಾಚು಼ಬಿ ನ್ಯಾವ್ನುಬಿ ಹುಯಿರುಸ್.ಅಪ್ಣ ದೇವ್ನೆ ವ್ಯಬಿಚಾರ್ನಿ ತಯೇಡಾನ ದಂಡನೆದಿದೊ, ಯೋ ಮೋಟಿ ವ್ಯಬಿಚಾರ್ನಿ,ಇನ ಪಾಪೇಲ ಕಾಮ್ಥಿ ಧರ್ತಿನ ಗಂಧು ಕರುಕರ್ತಿಥಿ. ಆ ಹೈರಿತೆ ಇನ ಸೇವಕರ್ನ ಮರೈನಾಖಿ ದಿದೀತೆ ಇನಖ್ಹಾಜೆ ದೇವ್ನೆಯಿನ ಬದಲ್ ತೀರ್ಪ್ದಿದೊ". ಕರಿ ಬೋಲ್ತೊಹುಯಿನ್, 3 ಭೇನೆಹಲ್ಲ, ಹಲ್ಲೆಲೂಯ ಕರಿ ಘಣು ಚಿಕ್ರಿನ್ ಯೋ ಬಳುಕರಸ್ತೆ ಧುವೊ ಜ಼ಗ್ಜ಼ಮಾನಮಾಬಿ ಉಪ್ಪರ್ ಅವುಸ್ಕರ್ಷೆ ಕರಿ ಬೋಲ್ಯು. 4 ತದೆ ಸಿಂಹಾಸನ್ಪರ್ ಬೆಠೂತೆ ದೇವ್ನ ಚಾರ್ ಉಪ್ಪರ್ವೀಖ್ಹ್ ಜ಼ಣು ಶಾಣೂಬಿ, ಯೋ ಚಾರ್ ಜೀವಿಬಿ ಆಡ್ಪಡಿನ್ ಆರಾದನೆ ಕರ್ತುಹುಯಿನ್, ಆಮೆನ್, ಹಲ್ಲೇಲೂಯಕರಿ ಬೋಲ್ಯು.
ಮೇಂಢಾನ ಚೆಲ್ಕಾನು ವ್ಯಹಾನು ಮಿಝ಼್ವಾನ್
5 ಇನಪಾರ್ ಸಿಂಹಾಸನ್ ಭಣೀಥು ಏಕ್ ಟಹುಕೊ ಆಯು. ಯೋ ಅವಾಜ಼್ನೆ, "ಅಪ್ಣ ದೇವ್ನು ಚಾ಼ಕ್ರಿಕರಾವಾಳ ಅದ್ಮಿವೊ ದೇವ್ನ ಧನ್ಯವಾದ್ ಕರ್ಯು. ಇನೇಥಿ ಡರಾವಾಳ ನ್ಹಾನ, ಮೋಟಾವೊ ಇನ ಧನ್ಯವಾದ್ ಕರೊ". ಕರಿ ಬೋಲ್ಯು. 6 ಇನಾವಾರ್ ಮನ ಬಿಜೇಕ್ ಅವಾಜ಼್ ಖ್ಹಮಜ್ಪಡ್ಯು ಯೋ ಘಣುಮೋಟು ಅದ್ಮಿನ ಭೀಡ್ಣು ಅವಾಜ಼್ ಮೋಟ ಪಾಣಿನು ಕಹಾರ್ನಿ ತರಾಬಿ ಜಾ಼ಖ್ಹತ್ ಘಲಾರನ ಅವಾಜ಼್ನಿತರ ಥೂತೆ ಏಕ್ ಅವಾಜ಼್ನ ಖ್ಹಮ್ಜೊ ಯೋ, ಹಲ್ಲೆಲೂಯ, ಮಹಾನ್ ಶಕತ್ವಾಳೊ ದೇವ್ ಹುಯಿರೋತೆ ಅಪ್ಣೊ ಪ್ರಭು ಆಳ್ಷೆ. 7 ಮೇಂಢಾನು ಚೆಲ್ಕು ಹುಯಿರ್ಹವಾಳನು ವ್ಯಹಾನಿ ವಖ್ಹತ್ ಐಗಿಕರಿ ಶಂತೋಖ್ಹ್ ಕರಿಯೆ; ಖುಷಿ ಕರಿಯೆ ಇನ ಮಹಿಮೆಕರಿಯೆ, ಶನಕತೊ ಇನ ವ್ಯಹಾ ಕರಾವಳಿ ಕವಾರಿ ಇನುಯೋಸ್ ಖ್ಹವಾರಿರಾಖಿಸ್ಕರಿ ಬೋಲ್ಯು. 8 ಉಜಾ಼ಖ್ಹ್ನುಬಿ ಶುದ್ದಬಿ ಕವ್ಳು ಕೋರುಲುಂಗ್ಡು ಫೇರಾನಯಿನ ವಾರ್ಖ್ಹೊ ಮಳ್ಯು. ಯೋ ಕೋರುಲುಂಗ್ಡು ಕತೊ ದೇವ್ನು ಅದ್ಮಿವ್ನು ನ್ಯಾವ್ನು ಕಾಮ್ಖ್ಹಾರುಸ್ ಹುಯಿರುಸ್. 9 ಅತ್ರೇಸ್ ಕಾಹೆತೆ ಇನೆ ಮಾರೇಥಿ ವಾತೆ ಬೋಲ್ತೊಹುಯಿನ್ ಮೇಂಢಾನು ಚೆಲ್ಕು ಹುಯಿರ್ಹವಾಳನ ವ್ಯಹಾನ ಮಿಝ಼್ವಾನ್ಮ ಬುಲೈರ್ಹಾವಳು ಧನ್ಯರ್ ಕರಿ ಬೋಲಾನು ಲೀಖ್ಕರಿ ಬೋಲಿನ್, "ಆ ಖ್ಹಾರಿವಾತೆ ದೇವ್ನು ಖ್ಹಾಚು಼ ವಚನ್ ಹುಯಿರುಸ್." ಕರಿ ಬೋಲ್ಯೊ. 10 ತದೆ ಮೇ ಇನ ಆರಾದನೆ ಕರ್ನುಕರಿ ಇನ ಪಗ್ಪರ್ ಅಡ್ಪಡ್ಯೊ. ಕತೋಬಿ ದೇವ್ನ ದೂತಾನೆ, ಮನ ಅಮ್ ಆರಾದನೆ ನಕೊಕರ್. ಯೇಸುನ ಖ್ಹಾಚ಼ನ ಲೀರಾಖ್ಯಾಸ್ತೆ ತಾರಿನಿತರಾಬಿ ತಾರ ಭೈಯೇನಿತರಬಿ ಮೇಬಿ ಏಕ್ ಚಾ಼ಕ್ರಿವಾಳೊ. ಇನಖ್ಹಾಜೆ ದೇವ್ನ ಆರಾದನೆಕರ್, ಯೇಸುನಿ ಸಾಕ್ಷಿಸ್ ಪ್ರವಾದನೆನು ಆತ್ಮಕರಿ ಬೋಲ್ಯೊ.
ಧೋಳ ಘೋಡಾಪರ್ ಏಕ್ ಸವಾರಿ
11 ಇನಪಾರ್ ಪರ್ಲೋಕ್ ನಿಕ್ಳಿರ್ಹಾವನು ಮೇ ದೇಖ್ಯೊ. ತದೆ ದೇಕ್, ಧೋಳೊ ಘೋಡೊ ಮನ ದೆಖಾಯು. ಇನಾಪರ್ ಬೆಠೊರ್ಹವಾಳಾನ ವಿಶ್ವಾಸ್ವಾಳೊ, ಖ್ಹಾಚೊ಼ಕರಿ ನಾಮ್. ಯೊ ನೀತಿಥಿ ನ್ಯಾವ್ನ ಫೇಡವಾಳೊ, ನೀತಿಥಿ ಜಂಗ್ಭೀಡವಾಳೊ ಹುಯಿರೊಸ್. 12 ಇನ ಭೇ ಡೋಳ ಆಗ್ನಿ ಝ಼ಲ್ಪಟ್ನಿತರ ಛಾ಼. ಇನ ಮಾಥಾಪರ್ ಕೈಯೆಕ್ಕಿ ಕಿರೀಟ್ಖ್ಹಾರು ಛಾ಼, ಇನ ಏಕ್ ನಾಮ್ ಲೀಖೈದೆವೈರ್ಹೂಸ್, ಯೊ ಇನ ಪಣ್ಕಿ ಬಿಜು಼ ಕಿನಾಬಿ ಮಾಲುಮ್ ಕೊರಿಷೇನಿ. 13 ಯೋ ಲ್ಹೋಯಿಮ ಭಿಗೈರ್ಹವಾನು ಲುಂಗ್ಡಾನ ಫೇರಿರಾಖ್ಯೊಥೊ. ಇನು ನಾಮ್ ದೇವ್ನು ವಚನ್ಕರಿ. 14 ಸೊರ್ಗಾನು ಸಿಪಾಯಿಖ್ಹಾರು ಧೋಳ ಘೋಡಾಪರ್ ಬೇಶಿನ್ ಇನ ಪೀಠೆ ವಳ್ಯಾವ್ತುಥು. ಇವ್ಣೆ ಶುದ್ದ ಪೇರ್ವಾಖ್ಹ್ಬಿ, ಖ್ಹಾಜ಼್ನುಥೂತೆ ಕವ್ಳು ಕೋರುಲುಂಗ್ಡು ಫೇರಿರಾಖ್ಯುಥು. 15 ಜ಼ಗ್ಜಾ಼ತ್ನ ಕತ್ರಾನಖ್ಹಾಜೆ ಇನ ಮ್ಹೋಡೇಖ್ಹು ಚಾ಼ಲ್ತಿ ತಲ್ವಾರ್ ನಿಕ್ಳಿಆವಾಸ್. ಯೊ ಇವ್ಣುನ ಲ್ಹೋಡಾನ ಡಂಡೇಥಿ ಆಳ್ಷೆ. ಸರ್ವಶಕತ್ನೊ ಹುಯಿರೋತೆ ದೇವ್ನಿ ಘಣಿ ಮೋಟಿ ಖೀಜ಼್ಕರಿ ಬೋಲಾನ ದ್ರಾಕ್ಷಿನ ಬಾನೇಮ ರ್ಹವಾಳನ ಖುಂದ್ಲಿನಾಕ್ಷೆ. 16 ಇನ ಲುಂಗ್ಡಾಪರ್ಬಿ, ಟಾಂಗ್ಪರ್ಬಿ, "ರಾಜಾ಼ನೊ ರಾಜಾ಼ಬಿ ಪ್ರಭುನೊ ಪ್ರಭು" ಕರಿ ನಾಮ್ ಲಿಖೈರ್ಹುಸ್. 17 ಇನಪಾರ್ ಏಕ್ ದೇವ್ದೂತನೆ ಚಾ಼ಂದ್ಪರ್ ಭಿಯುರ್ಹವಾನು ದೇಖ್ಯೊ. ಯೊ ಊಚ಼ ಗಳೇಥಿ ಚಿಕ್ರಿನ್ ಆಕಾಶ್ಮ ಉಡಾವಳ ಅಖ್ಖಾಸ್ ಜಿನಾವರ್ನ, ಆವೊ, "ದೇವ್ ಕರವ್ಕರಾಸ್ತೆ ಮೋಟಿ ಮಿಝ಼್ವಾನ್ನ ಖಾಣನ ಮಳಿನ್ ಖಾವೊಕರಿ ಬೋಲುಕರ್ತೊಥೊ. 18 ರಾಜ಼ವ್ನಿ ಬೋಟಿನಾಬಿ, ಶಿಪಾಯ್ನ ಮೋಟಾನಿ ಬೋಟಿನಾಬಿ, ಅಜು಼ ಶಿಪಾಯ್ನ ಬೋಟೀನ, ಘೋಡಾವ್ನಿ ಬೋಟೀನ, ಘೋಡಾನು ಸವಾರಿವ್ನ ಬೋಟೀನ, ಛುಟ್ಕಾರ್ ಹುಯಿರ್ಹವಾಳನು, ಗುಲಾಮ್ಖ್ಹಾರನು, ನ್ಹಾನಾವ್ನು ಅಜು಼ ಮೋಟಾವ್ನು ಬೋಟೀನ ಖಾವನ ಆವೊ" ಕರಿ ಬೋಲ್ಯೊ. 19 ತದೆ ಯೊ ಜಾನ್ವರ್ಬಿ, ಜ಼ಮೀನ್ನ ರಾಜ಼ವ್ಬಿ, ಇವ್ಣ ಶಿಪಾಯಿಖ್ಹಾರೂಬಿ ಯೊ ಘೋಡಾಪರ್ ಬೆಠೊರ್ಹವಾಳನಪರ್ ಅಜು಼ ಇನ ಶಿಪಾಯ್ನ ಉಪ್ಪರ್ಬಿ ಜಂಗ್ ಭೀಡಾನಖ್ಹಾಜೆ ಮಳಿನ್ ಐರ್ಹಾವನು ದೇಖ್ಯೊ. 20 ತದೆ ಯೊ ಜಾನ್ವರ್ನು ಧರಿಲಿದು. ಅತ್ರೇಸ್ ಕಾಹೆತೆ ಜಾನ್ವರ್ ಭಣೀಥು ಅದ್ಭುತ್ ಕಾಮ್ಖ್ಹಾರು ಕರೀನ್, ಜಾನ್ವರ್ನು ಖ್ಹಣೇದ್ ನಖಾಯಹುಯನ, ಅಜು಼ ಇನ ಮೂರತ್ನ ಆರಾದನೆ ಕರವಾಳನ ಪೊಖ್ಹ್ಲೈರಾಖ್ಯೊಥೊತೆ ಯೊ ಝೂ಼ಟುಪ್ರವಾದಿಬಿ ಇನ ಜೋ಼ಡೆ ಧರೈಗಯೊ. ಯೋ ಭೇಜ಼ಣಾನ ಜಾನ್ನಖ್ಹಮೇದ್ ರಂಜ಼ಕ್ಥಿ ಬಳಾನು ಆಗ್ನ ತಲಾವ್ಮ ಫೇಕ್ಯು. 21 ಇವ್ಣು ಶಿಪಾಯಿಖ್ಹಾರನ, ಘೋಡಾಪರ್ ಬೆಠೊರ್ಹವಾಳಾನ ಬಾಕೇಥಿ ಆಯೂತೆ ಬೇಮ್ಹೋಡಾನಿ ತಲ್ವಾರ್ಥಿ ಮರೈಗಯು, ಅಜು಼ ಜಿನಾವರ್ಖ್ಹಾರು ಇವ್ಣು ಬೋಟಿನ ಪೇಟ್ಭರಿನ್ ಖಾದು.
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)