ಅಪೊಸ್ತಲರ‍್ನು ಕಾಮ್‌ಖ್ಹಾರು 8

18 ಅಪೊಸ್ತಲರ್ ಖ್ಹಾರು ಅದ್ಮಿಪರ್ ಇವ್ಣ ಹಾತ್ ಮ್ಹೇಲಾದಿನ್ ಅದ್ಮಿಖ್ಹಾರಾನ ಪವಿತ್ರಾತ್ಮ ಮಳಿರ‍್ಹೂತೆ ಸಿಮೋನ್‍ನೆ ದೇಖ್ಯೊ. ಇನಖ್ಹಾಜೆ ಸೀಮೋನ್ನೆ ಪೈಶಾಲಯಿನ್ ಅಪೊಸ್ತಲರ‍್ನ ಖ್ಹಾಮ್ಣೆ ಮ್ಹೇಲ್ಯೊ. 19 ಅಜು಼ "ಮೆ ಕಿನಾಪರ್ ಹಾತ್ ಮ್ಹೇಲೂಸ್‍ಕಿ ಇವ್ಣೆ ಪವಿತ್ರಾತ್ಮನ ಲೀಲ್ಯಾವಾನಿತರ ಆ ಅದಿಕಾರ್ ಮನಾಬಿ ದೇವೊ" ಕರಿ ಬೊಲ್ಯೊ. 20 ಕತೋಬಿ ಪೇತ್ರನೆ ಇನ "ತಾರ ಪೈಶ ತಾರಿಜೋ಼ಡ್ಮ ನಾಶಹುಯಿಜಾ಼ವಾದೆ. ದೇವ್ನಿ ವರಾನ ಪೈಶಾನ ಲಿಯೆಜಾ಼ಯ್ ಕರಿ ಲಾಝ್ಯೊಕಿ ಶು?" ಕರಿ ಜ಼ವಾಬ್ ದಿದೊ. 21 ಆ ಕಾಮ್ಮ ತುನ ಭಾಗ್‍ಬಿ ಕೊಯ್ನಿ ವಾಟೊಬಿ ಕೊಯ್ನಿ; ತಾರೊ ದಿಲ್‌ ದೇವ್ನ ಖ್ಹಾಮ್ಣೆ ಬರೋಬರ್ ಕೊಯ್ನಿ. 22 ಇನಖ್ಹಾಜೇಥಿ ಆ ತಾರ ಖರಾಬ್ ಕಾಮ್ನ ಮ್ಹೆಂದಿನ್ ದೇವ್‌ಭಣಿ ಫರಿಜೈನ್, ಅಜು಼ ಪ್ರಾರ್ಥನೆ ಕರೀಲೆ. ಪ್ರಭು ತಾರ ದಿಲ್ನಿ ಖ್ಹಯಾಲ್ನ ಮಾಪ್‌ಕರ್ಶೆ. 23 ಶನಕತೊ ತೂ ಜಾ಼ಖ್ಹತ್ ಕಡ್‌ವ್ಹಾಟ್‌ನಿ ಬಳಾಪೆಥಿಬಿ ಭರೈರ‍್ಹಾವಾಳೊ, ಝರೇಲಿ ಅನೀತಿಥಿಬಿ ಭರೈರ‍್ಹೋತೆ ಮೇ ದೇಖುಕರುಸ್ ಕರಿ ಬೊಲ್ಯೊ. 24 ಇನ ಸೀಮೋನ ಅಜು಼ ಪೇತ್ರ ಇವ್ಣ ಬೇಜ಼ಣಾನ, ‘ತುಮೆ ಬೋಲ್ಯಾತೆ ವಾತೆಮ ಖಿವೂಬಿ ಮಾರಪರ್ ನಾ ಆವ್ಣುತೆ ತಿಮ್ ಮಾರಖ್ಹಾಜೆ ಪ್ರಭುಮ ತುಮೆ ಪ್ರಾರ್ಥನೆ ಕರೊ’ ಕರಿ ಬೊಲ್ಯೊ.