Hebreus 11

ವಿಶ್ವಾಸ್

1 ವಿಶ್ವಾಸ್‌ಕತೊ ಅಪ್ಣೆ ಸೋಚಿನ್ ಜ಼ಪಿರ‍್ಹೇಸ್ತೆ ಖ್ಹಾರು ಭರೋಖ್ಹೊಬಿ, ಅಜೂ಼ಬಿ ದೆಖಾವಕೊಂತೆ ಜಿನಖ್ಹ್‌ಪರ್ ಆಧಾರ್ ಹುಯಿರ‍್ಹೇಸ್. 2 ಅಪ್ಣ ಗಲ್‌ಢಖ್ಹಾರು ಇವ್ಣಿ ವಿಶ್ವಾಸ್‌ಥೀಸ್ ದೇವ್ನಿ ಒಪ್ಪಿಕೆ ಲೀಲಿದು. 3 ಜಗತ್‌ ದೇವ್ನಿ ವಾತೆಥೀಸ್‌ ಉಬ್‌ಜು ಕರಿ ಬೋಲಾನು ವಿಶ್ವಾಸ್‌ಥೀಸ್ ಮಾಲುಮ್ ಕರಿರಾಖ್ಯಾಸ್. ಆ ಜಿನಖ್ಹ್‌ ದೆಖಾವಸ್ತೆ ಆ ಜಗತ್‌ ದೆಖಾವಾಥಿ ರ‍್ಹವೊ ನಾ ದೆಖಾವಾಥಿ ರ‍್ಹವೊ ಉಬ್‌ಜ್ಯುಕರಿ ಬೋಲಾನು ವಿಶ್ವಾಸ್‌ಥೀಸ್ ಪರ್ಖೇಸ್. 4 ವಿಶ್ವಾಸ್‌ಥೀಸ್ ಹೇಬೆಲನೆ ಕಾಯಿನಾನು ಬಲಿಥೀಬಿ ಮಹಾನ್ ಬಲೀನ ದೇವ್ನ ಸಮರ್ಪಣ್‌ ಕರ‍್ಯೊ. ಯೋ ಪರಕ್‍ಥಿ ಯೋ ನ್ಯಾವ್‌ವಾಳೊ ಕರಿ ಸಾಕ್ಷಿಹುಯಿಗೊ. ದೇವ್ನೆ ಇನಿ ಕಾಣ್ಕೆನ ಸ್ವೀಕಾರ್ ಕರ‍್ಯೊ. ಯೋ ಮರಿಗಯೊ ತೋಬಿ ಇನಿ ವಿಶ್ವಾಸ್‌ನಿ ಪರಕ್‍ಥಿ ಬಿಜೂ಼ಬಿ ವಾತೆ ಬೋಲವಾಳೊ ಹುಯಿರ‍್ಹೋಸ್. 5 ವಿಶ್ವಾಸ್‌ಥೀಸ್ ಹನೋಕಾನೆ ಮರಣ್ ಲಿದೊ ಕೊಯ್ನಿತೇಸ್ ಪಡೈಗಯೊ. ಶನಕತೊ ದೇವ್ನೆ ಇನ ಬುಲೈಲಿನ್ ಗಯೋತೆಖ್ಹಾಜೆ ಯೋ ಕಿನಾಬಿ ದೇಖಾಯೊಕೊಯ್ನಿ. ಯೊ ಪಡಾವನ ಪಹಿಲೆ ದೇವ್ನ ಲ್ಹಾಯಕ್ ಕರಾವವಾಳೊ ಕರಿ ಪಹಿಲೇಸ್ ಸಾಕ್ಷಿ ಲೀರಾಖ್ಯೊಸ್. 6 ಕತೋಬಿ ವಿಶ್ವಾಸ್‍ಕೊಂತೆ ದೇವ್ನ ಲ್ಹಾಯಕ್ ಕರಾವನ ಕೊಹುವಾನಿ. ಶನಕತೊ ದೇವ್‌ಕನ ಆವಾಳೊ ದೇವ್ ಛಾ಼ ಅಜು಼ ಇನ ಢೂಂಡವಾಳನ ಪ್ರತಿಫಲ್ ದೇಸ್‌ಕರಿ ವಿಶ್ವಾಸ್‌ಕರ‍್ನು. 7 ವಿಶ್ವಾಸ್‌ಥೀಸ್ ನೋಹಾನೆ ಬಿಜೂ಼ಬಿ ದೆಖಾವ ಕೊಯ್ನಿತೆ ಇನಿ ಬಾರೇಮ ದೇವ್ನಿ ವಾತೆನ ಲೀನ್ ಡರ್‌ಥೀಬಿ, ಭಕ್ತಿಥಿ ಭರಾವವಾಳೊ ಹುಯಿನ್ ಇನ ಘರ್‌ವಾಳಾನ ಬಚೈ಼ಲಾವನಖ್ಹಾಜೆ ಜ಼ಹಾಜ಼್‌ನ ಭಾಂಧಿನ್ ತಯಾರ್ ಕರ‍್ಯೊ. ವಿಶ್ವಾಸ್‌ಥೀಸ್‌ ಇನೆ ಜಗತ್‌ವಾಳು ನಿಶತ್‌ನ ಲ್ಯವಾಳುಕರಿ ತೀರ್ಮಾನ್ ಕರಿಲಿದೊ. ಇನಖ್ಹಾಜೆ ವಿಶ್ವಾಸ್‍ನು ಫಲ್ ಹುಯಿರ‍್ಹೂತೆ ನೀತಿನ ಹಕ್‍ದಾರ್ ಹುಯೊ. 8 ವಿಶ್ವಾಸ್‌ಥೀಸ್ ದೇವ್ನೆ ವಾಗ್ದಾನ್ ಕರ‍್ಯೊತೆ ದೇಖ್ಹ್‌ನ ಇನೆ ಲೀಲೇವ್ಣುಕರಿ ಅಬ್ರಹಾಮ್‌ನೆ ವಿಧೇಯ ಹುವಾಳೊ ಹುಯಿನ್ ಯೋ ಹಕ್‌ಥಿ ಲೇವ್ಣುಥೂತೆ ದೇಖ್ಹ್‌ನ ನಿಕ್ಳಿಗಯೊ. ಇನೆ ಕಿಜ್ಜಾ಼ ಜಾ಼ವ್ಣುಕರಿ ಸೋಚ್ಯೊ ಕೊಯ್ನಿತೇಬಿ ಚ಼ಲೆಗಯೊ. 9 ವಿಶ್ವಾಸ್‌ಥೀಸ್ ಇನೆ ವಾಗ್ದಾನ್ನ ದೇಖ್ಹ್‌ನ ಆವಾಖ್ಹ್‌ತರ್, ಹಿಜ಼್ಜಾ ಬಿಜ಼ ದೇಖ್ಹ್‌ವಾಳನಿತರ ಡೇರಾಮ ರ‍್ಹೀನ್ ಜಿವ್ಣು ಕರ‍್ಯೊ. ಕಿಮ್ ಇಸಾಕ್ ಅಜು಼ ಯಾಕೋಬ್ ಇವ್ಣೆ ಲೀಲಿದಾಕಿ ಯೋಸ್ ವಾಗ್ದಾನ್ನ ಲೀಲಿದೊ. 10 ಶನಕತೊ ಇನೆ ಹಮೇಶ ಹದಿಪಾಯ ರ‍್ಹವಾನು ನಂಗರ‍್ನ ಕತೊ ದೇವ್ನೆ ಖ್ಹೂಜ಼್‌ಕರೀನ್ ತಯಾರ್ ಕರಿರಾಖ್ಯೊಸ್ತೆ ನಂಗರ‍್ನ ಅಬ್ರಹಾಮ್ ಮ್ಹೋರೆ ದೇಖುಕರ್ತೊಥೊ. 11 ಅಬ್ರಹಾಮ್ ಭುಡೊ ಹುಯಿರ‍್ಹೊಥೊ ಆನಾಹುಯಿನ್ ಸಾರ ವಾಗ್ದಾನ್ ಕರ‍್ಯೊತೆ ನಂಬ್‍ಣುಕರಿ ಇನಿ ಉಂಬರ್ ಹುಯಿಗುತೋಬಿ ವಿಶ್ವಾಸ್‌ಥೀಸ್ ಬೇಜೂನಿ ಹುವಾನ ಶಕತ್‌ಲಿದಿ. 12 ಇನಖ್ಹಾಜೆ ಮರಾನಿ ಉಂಬರ್‌ಮ ಥೋತೆ ಅಬ್ರಹಾಮ್‍ಥಿ ಆಕಾಶ್‌ನು ಶುಕ್ಕರ್‌ನಿತರಬಿ ದರ‍್ಯಾವ್‍ನಿ ರೇತಿನಿಘೋಣಿಬಿ ಗಣ್ತಿಕೊಂತೆ ಲಡ್ಕಾ ಹುಯು. 13 ಅವ್ಣೆಖ್ಹಾರು ವಿಶ್ವಾಸ್‌ರ‍್ಹವಾಳು ಹುಯಿನಸ್‌ ಮರಿಗಯು. ದೇವ್ನ ವಾಗ್ದಾನ್ನ ನಾಲಿದೂತೋಬಿ ಯೋ ಅಖ್ಖಾನ ದೂರ್‌ಥೀಸ್ ದೇಖಿನ್ ಸ್ವಾಗತ್‍ಕರೀನ್ ಖುಷಿಪಡ್ಯು; ಇವ್ಣೆ ಜ಼ಮೀನ್‌ಪರ್ ಅಲ್ಹಾವ್ ದೇಖ್ಹ್‌ವಾಳಬಿ, ತಮಾಖ್ಹೊ ದೇಖಾನ ಆಯುಹುಯು ಕರಿ ಮಾನಿಲಿದು. 14 ಅಥ್ರಾನಿ ವಾತೆಖ್ಹಾರು ಬೋಲಾವಳು ಇವ್ಣೆ ಶೊಂತ್‌ ದೇಖ್ಹ್‌ನ ಢೂಂಡವಾಳು ಹುಯಿರುಸ್ ಕರಿ ಬೋಲಾನು ಮಾಲುಮ್ ಪಡಾಸ್‌. 15 ಇವ್ಣೆ ಮ್ಹೇಲಿನ್ ಆಯತೆ ದೇಖ್ಹ್‌ಪರ್ ದಿಲ್‌ರಾಖವಳ ರ‍್ಹಿಯಹೊತ್ತೊ ಹಿಜ್ಜಾ಼ ಪಾಛು಼ಫರಿ ಜಾ಼ವಾನಿಬಿ ಮೋಕಖ್ಹಾರು ಇವ್ಣುನ ಥು. 16 ಕತೋಬಿ ಇವ್ಣೆ ಸೊರ್ಗಕರಿ ಬೋಲಾನ ಮಹಾನ್ ದೇಖ್ಹ್‌ನ ಹರಖ್ಹ್‌ಯು. ಇನಖ್ಹಾಜೇಥಿ ದೇವ್ನೆ ಇವ್ಣೊ ದೇವ್‌ಕರಿ ಬೋಲೈಲ್ಯವಾನ ಖ್ಹರ್ಮಾಯೊಕೊಂತೆ; ಇವ್ಣಖ್ಹಾಜೆ ನಂಗರ‍್ನ ತಯಾರ್ ಕರಿರಾಖ್ಯೊಸ್. 17,18 ದೇವ್‌ಥಿ ಅಬ್ರಹಾಮ್ ತರೀಪ್ಷ ಹುವಾನಿ ವಖ್ಹ್‌ತೆ ಇಸಾಕನ ವಿಶ್ವಾಸ್‌ಥೀಸ್ ಅರ್ಪಣ್ ಕರ‍್ಯೊ. ಯೋ ವಾಗ್ದಾನ್‍ಖ್ಹಾರು ಲಿದೋತೆ ಇನೆ ಇಸಾಕಥಿ ಪೈದಹುವವಾಳುಸ್ ತಾರು ಪಿಳ್ಗಿಕರಿ ಬೋಲೈಲಿಷೆಕರಿ ದೇವ್ನೆ ಇನ ಬೋಲಿರಾಖ್ಯೊತೋಬಿ ಇನ ಎಕ್ಕಸ್ ಛಿಯ್ಯಾನ ಅರ್ಪಣ್ ಕರ‍್ಯೊ. 19 ಅಬ್ರಹಾಮ್‌ನೆ ಮಾರೊ ಛಿಯ್ಯೊ ಮರ‍್ಯೊತೋಬಿ ದೇವ್ ಇನ ಬಚಾ಼ಡನ ತಾಖತ್‌ವಾಳೊ ಹುಯಿರ‍್ಹೋಸ್ ಕರಿ ಮಾಲುಮ್ ಕರಿರಾಖ್ಯೊಥೊ. ಅಜು಼ ಇಮ್ಮಸ್ ಇಸಾಕ್‌ನ ಮರಣ್‌ಥು ಜಿವ್ತೊಹುಯಿನ್ ಆಯೋತೆ ತಿಮ್ ಪಾಛು಼ ಲೀಲಿದೊ. 20 ವಿಶ್ವಾಸ್‌ಥೀಸ್ ಇಸಾಕನೆ ಯಾಕೋಬ್‌ನಾಬಿ ಏಸಾವನ ಆಶೀರ್ವಾದ್‌ ಕರಾನಿವಖ್ಹ್‌ತೆ ಖ್ಹಾಮ್ಣೆ ಚಾ಼ಲ್ನುತೆ ಬಾರೇನಿ ವಾಗ್ದಾನ್ನ ಬೋಲಿವತಾಳ್ಯೊ. 21 ಯಾಕೋಬನೆ ಯೊ ಮರಾನಿ ವಖ್ಹತ್‌ಮ ವಿಶ್ವಾಸ್‌ಥೀಸ್ ಯೋಸೇಫಾನ ಭೇ ಲಡ್ಕಾವ್‍ನ ಆಶೀರ್ವಾದ್‌ ಕರ‍್ಯೊ. ಹಾತ್ಮ ಲಠ್ಠಾನು ಆಧಾರ್‌ಲೀನ್ ದೇವ್ನ ಆರಾದನೆ ಕರ‍್ಯೊ. 22 ಯೋಸೇಫ ಇನಿ ಮರಣ್ಣಿ ವಖ್ಹತ್‌ಮ ಇಸ್ರಾಯೇಲ್‌ವಾಳು ಈಜಿಪ್ಟ್ ದೇಖ್ಹ್‌ಥು ಭಾರ್‌ನಿಕ್ಳಾನು ಬೋಲಿವತಾಳ್ಯೋತೆ ವಿಶ್ವಾಸ್‌ಥೀಸ್. ಕಾಹೆತೆ ಇನು ಪಿಂಜ಼ರ‍್ನ ಪಾಡಿಲೀನ್ ಜಾ಼ವಾನಿ ಬಾರೇಮ ಹುಕುಮ್‌ ದಿದೊ. 23 ಮೋಶೆ ಪೈದ ಹುವಾಖ್ಹತರ್ ಹೈರೋತೆನ ಆಯಬಾನೆ ಲಡ್ಕು ಶನ್‍ಗಾರ‍್ನು ಛಾ಼ ಕರಿ ದೇಖಿನ್ ರಾಜಾ಼ನ ಹುಕುಮ್‌ನ ಡರಿನ್ ವಿಶ್ವಾಸ್‌ಥೀಸ್ ಇನ ತೀನ್ ಮಹಿನ ಲಪಾಡಿ ರಾಖ್ಯು. 24 ವಿಶ್ವಾಸ್‌ಥೀಸ್ ಮೋಶೆ ಶಾಣು ಹುವಾನಪಾರ್ ಫರೋಹನಿ ಛೋ಼ರಿನೊ ಛಿಯ್ಯೊಕರಿ ನಾ ಬೋಲೈಲೇವ್ಣುಕರಿ ಖ್ಹಯಾಲ್ ಕರ‍್ಯೊ. 25 ಥೋಡಿ ವಖ್ಹತ್ ಪಾಪ್‌ಭೋಗ್‌ ಖ್ಹಾರಥಿಬಿ ದೇವ್ನ ಅದ್ಮಿನ ಜೋ಼ಡ್ಮ ವದೇಖ್ಹ್‌ ಲ್ಯವಾನುಸ್ ಕೆತ್ರೇಕ್ಕಿ ಅಛ್ಛು಼ಕರಿ ತೀರ್ಮಾನ್ ಕರಿಲಿದೊ. 26 ಈಜಿಪ್ಟ್‌ನು ಅಖ್ಖಿ ಧನ್‌ದೌಲತ್‌ಥೀಬಿ ಕ್ರಿಸ್ತನಖ್ಹಾಜೆ ಹುವಾಸ್ತೆ ಚಿಂಘಾವ್ಣೀಸ್ ಮೋಟಿ ಭಾಗ್ಯಕರಿ ಮಾನಿಲಿದೊ. ಶನಕತೊ ಖ್ಹಾಮ್ಣೆಆವಾನಿ ಪ್ರತಿಫಲ್‌ಪರ್ ಡೋಳೊ ರಾಖಿಮ್ಹೆಲ್ಯೊಥೊ. 27 ವಿಶ್ವಾಸ್‌ಥೀಸ್ ಇನೆ ರಾಜಾ಼ನ ಇರಾದನ ಡರ‍್ಯೊಕೊಂತೆ ಈಜಿಪ್ಟ್ ದೇಖ್ಹ್‌ನ ಮ್ಹೇಲಿನ್ ಗಯೊ. ಶನಕತೊ ಇನೆ ದೇಖವಾಳೊ ಕಾಹೆತೆಯಿನ ದೇಖಾನಿಘೋಣಿ ಘಟ್ ದಿಲ್‌ವಾಳೊ ಹುಯೊ. 28 ಫೈಲೋಟ ಲಡ್ಕಾವ್‍ನ ಸಂಹಾರ್ ಕರಾವಾಳೊ ಧೂತ, ಇಸ್ರಾಯೇಲ್‌ವಾಳನ ಫೈಲೋಟ ಲಡ್ಕಾವ್‍ನ ನಾ ಛೀಮ್ಣುತೆ ಲ್ಹೋಯಿ ಛೀಚ಼ಕರೀನ್ ಪಸ್ಕ ಚ಼ಲಾವನಿತರ ಇನೆ ಕರ‍್ಯೊತೆ ವಿಶ್ವಾಸ್‌ಥೀಸ್. 29 ವಿಶ್ವಾಸ್‌ಥೀಸ್ ಇಸ್ರಾಯೇಲ್‌ವಾಳು ಲಾಲ್ ದರ‍್ಯಾವ್ನ ಖ್ಹುಕ್ಕಿ ಜ಼ಮೀನ್‌ಪರ್ ಚಾ಼ಲನಿತರ ಉಲಾಂಗ್ಯು. ಈಜಿಪ್ಟ್‌ವಾಳು ಇನ ಉಲಾಂಗನ ಕೋಶಿಶ್ ಕರಿನ್ ಡುಬಿಗಯು. 30 ವಿಶ್ವಾಸ್‌ಥೀಸ್ ಇವ್ಣೆ ಖ್ಹಾತ್ ದನ್‌ಲಗು ಯೆರಿಕೋ ಖ್ಹಯೇರ‍್ನ ಭೀತ್‌ನ ಫರಾಪರ್ ಯೋ ರಡ್ಕಿಗು. 31 ವಿಶ್ವಾಸ್‌ಥೂತೆ ಖ್ಹಾಜೆಸ್ ರಾಹಾಬ ಕರಿ ಶೂಳೆನೆ ಚೋ಼ರೇಖ್ಹು ಖಬರ್‌ದ್ಯವಾಳೊ ಸಮಾಧಾನ್‌ಥಿ ಮದತ್‌ಕರಿ ರಾಖಿನ್ ಅವಿಶ್ವಾಸಿನ ಜೋ಼ಡ್ಮ ನಾಶ್ ಕೊಹುಯಿನಿತೆ ಬಚಿಗಯ್. 32 ಬಿಜೂ಼ಬಿ ಜಾ಼ಖ್ಹತ್ ಶಾತ್ ಬೋಲ್‌ನು? ಗಿದ್ಯೊನ್, ಬಾರಾಕ, ಸಂಸೋನ್, ಯೆಪ್ತಾಹ, ದಾವೀದ, ಸಮುವೇಲ, ಅಜು಼ ಪ್ರವಾದಿಖ್ಹಾರನಿ ಬಾರೇಮ ಬೋಲ್ನುಕತೊ ಮನ ವಖ್ಹತ್ ಕೊಪುರಾನಿ. 33 ವಿಶ್ವಾಸ್‌ಥೀಸ್ ಇವ್ಣೆ ರಾಜ್ಯಖ್ಹಾರೂಬಿ ಜುತ್ಯು, ನ್ಯಾಯನೀತಿಥಿ ಚ಼ಲಾಯು, ವಾಗ್ದಾನ್ ಖ್ಹಾರೂಬಿ ಲೀಲಿದು, ಶುಂಭಾವ್‌ನ ಮ್ಹೋಡಾನ ಭಾಂಧ್ಯು, 34 ಆಗ್‍ನಿ ಝ಼ಲ್‌ಪಟೇನ ಉಜಾ಼ಯು; ತಲ್ವಾರ್‌ನ ಮ್ಹೋಡೇಖ್ಹು ಛು಼ಕಿಗಯು; ಲಾಚ಼ರ್ ರ‍್ಹಯುತೋಬಿ,ವಿಶ್ವಾಸ್‌ಥೀಸ್ ಇವ್ಣೆ ತಾಖತ್‌ವಾಳು ಹುಯು, ಜಂಗ್‌ಮ ಮಹಾ ಶಕತ್‌ವಾಳು ಹುಯು, ಅಲಕ್ ದೇಖ್ಹ್‌ನು ದಂಡುದಳವೈನ ನಖ್ಹಾಡಿದಿದು. 35 ತಯೇಡಖ್ಹಾರಿನೆ ಮರಿಗಯುಥೂತೆ ಇವ್ಣವಾಳನ ಪಾಛು಼ ಜಿವ್‌ತೇಥಿ ಲೀಲಿದಿಯೆ. ಥೋಡ ಜ಼ಣಾನೆ ಖ್ಹತಾಪ್ಣಿ ಪಡಾನಿ ವಖ್ಹ್‌ತೆ ಮಹಾನ್ ಮರಣ್‍ಥಿ ಪಾಛು಼ಜಿವ್ತು ಹುವಾನಿ ಖೂಜ಼್‌ಥಿ ಛುಟ್ಕಾರ್‌ನ ಝಿಟ್ಕಾರ‍್ಯು. 36 ಬಿಜು಼ ಥೋಡುಜ಼ಣು ಚಿಂಘಾವ್ಣಿ, ಕೊಲ್ಡೇಖ್ಹು, ಬೇಡಿ ಘಲೈನ್ ಜೇಲ್‌ಮ ರ‍್ಹಯು. 37 ಬಿಜು಼ ಥೋಡಜ಼ಣಾನ ಅದ್ಮಿಖ್ಹಾರು ಬಂಡೊ ಫೇಖಿನ್ ಮಾರ‍್ಯು, ಥೋಡಜ಼ಣಾನ ಚ಼ರಕ್‌ಥಿ ವ್ಹಾಡಿನ್ ಬೇಭಾಗ್‌ ಕರಿನ್‌ ಮಾರ‍್ಯು, ಥೋಡಜ಼ಣಾನ ತಲ್ವಾರ್‌ಥಿ ಮಾರ‍್ಯು, ಥೋಡುಜ಼ಣು, ಖ್ಹತಾಪ್ಣಿ, ಅಜ಼ ಆ ಖ್ಹಾರು ಲ್ಯವಾಳುಹುಯಿನ್, ಬೋಕ್ಡು, ಮೇಂಢಾನ ಚಾ಼ಂಬ್‌ಡಾವ್ನ ಫೇರವಾಳು ಹುಯಿನ್ ವದೇಖ್ಹ್‌ ಕಾಟ್ಯು. 38 ಅಥ್ರಾನವಾಳಾನ ಆ ಜಗತ್‌ ಬರಬರ‍್ನಿ ಝ಼ಗೊ ಕೊಹುಯಿರ‍್ಹುಥೂನಿ. ಇವ್ಣೆ ಇವ್ಣ ದೇಖ್ಹ್‌ನ ಜ಼ಂಗಳ್‌ಮ, ಪಹಾಡ್, ಘವಿ, ಖಾಡ್‌ಗುಂಟಾಮ ಡುಂಡ್ವಾಳವಾಳು ಹುಯಿರ‍್ಹುಥು. 39 ಅವ್ಣೆಖ್ಹಾರು ಇವ್ಣಿ ವಿಶ್ವಾಸ್‍ಥಿ ಅಛ್ಛಿ ಸಾಕ್ಷಿನಲ್ಯಾವಳು ಹುಯಿರ‍್ಹುತೋಬಿ ವಾಗ್ದಾನ್ನ ಫಲ್ನ ಲಿದುಕೊಯ್ನಿ. 40 ಶನಕತೊ ದೇವ್ನೆ ಅಪ್ಣಖ್ಹಾಜೆ ಮಹಾನ್ ಖ್ಹಾಜ್‌ಥಿ ತಯಾರ್ ಕರೀನ್, ಅಪ್ಣಿ ಜೋ಼ಡ್ಮ ತಬ್ನು ವಿಶ್ವಾಸಿಖ್ಹಾರು ಭರ್‌ಪೂರ್‌ ಹೋಣುಕರಿ ನಿರ್ಧಾರ್ ಕರ‍್ಯೊ.