João 11

ಲಾಜ಼ರ್‌ನಿ ಮರಣ್

1 ಬೇಥಾನ್ಯಮ ಲಾಜ಼ರ್‌ ಕರಿ ಏಕ್‌ ಜ಼ಣೊ ಥೊ, ಇನ ಜಾನ್ನ ಅಛ್ಛು಼ ಕೋ ಥೂನಿ. ಮರಿಯ ಅಜು಼ ಇನಿ ಭೇನ್ ಮಾರ್ಥ ಆಸ್ ಗಾಮ್ಮ ರ‍್ಹೇತಿಥಿ. 2 ಆ ಮರಿಯ ಕೋಣ್‌ಕತೊ, ಯೇಸು ಪ್ರಭು ಗೋಡಾನ ವಾನುತೇಲ್‌ನ ಲಗಾಡಿನ್, ಇನ ಕೇಖ್ಹ್‌ಥಿ ಗೋಡ ನೂಛಿತೆ ಆಸ್. ಜಾನ್ನ ಅಛ್ಛು಼ ಕೋಹುವಾಂತೆ ಲಾಜ಼ರ್‌ ಅನೋಸ್ ಭೈ.*11:2 ಯೋಹಾನ 12:3 3 ಇನಖ್ಹಾಜೆ, ಇನಿ ಭೇನೇನೆ, "ಪ್ರಭು, ತಾರೊ ಪ್ಯಾರ್‌ನೊ ದೋಸ್ತಿನ ಜಾನ್ನ ಅಛ್ಛು಼ ಕೊಯ್ನಿ" ಕರಿ ಬೋಲಾನಿ ಖಬರ್‌ನ ಯೇಸುಕನ ಮೋಕ್ಲಿಯೆ಼.

4 ಯೇಸುನೆ ಅನ ಖ್ಹಮ್‌ಜಿನ್‌ ಬೋಲ್ಯೊ, "ಲಾಜ಼ರ್‌ನ ರೋಗ್‌ ಐರ‍್ಹೂಸ್ತೆ ಮರಣ್ಣಖ್ಹಾಜೆ ಕಾಹೆ, ಅನೇಥಿ ದೇವ್ನ ಅಜು಼ ದೇವ್‌ನೊ ಛಿಯ್ಯಾನ ಮಹಿಮೆ ಮಳಾದೆ ಕರಿ ಆ ಐರ‍್ಹೂಸ್ತೆ" ಕರಿ ಬೋಲ್ಯೊ.

5 ಯೇಸುನ ಮಾರ್ಥಪರ್, ಇನಿ ಭೇನ್‌ಪರ್ ಅಜು಼ ಲಾಜ಼ರ್‌ಪರ್ ಪ್ಯಾರ್ ಥೂ.*11:5 ಆ ದೇವ್ನಿ ಪ್ಯಾರ್ ಬಾರೇಮ ಬೋಲುಕರಾಸ್ತೆ. ಅನ ಅಗಾಪೆ ಪ್ಯಾರ್ ಕರಿ ಬೋಲಾಸ್. 6 ತೋಬಿ ಲಾಜ಼ರ್‌ನ ಜಾನ್ನ ಅಛ್ಛು಼ ಕೊಯ್ನಿ ಕರಿ ಖಬರ್‌ನ ಖ್ಹಮ್‌ಜಿನ್‌ಬಿ, ಯೋ ಥೋತೆ ಹಿಜ್ಜಾ಼ಸ್ ಬಿಜೂ಼ಬಿ ಬೇ ದನ್ ರ‍್ಹಿಯೊ. 7 ಅನ ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ, "ಅಪ್ಣೆ ಯೂದಾಯಾನ ಪಾಛು಼ ಫರಿ ಜ಼ಯ್ಯೆ಼" ಕರಿ ಬೋಲ್ಯೊ.

8 ತದೆ ಶಿಷ್ಯರ್‌ನೆ, "ಗುರು, ಥೋಡ ದನ್ನ ಅಗಾಡಿಸ್ ಯೆಹೂದ್ಯರ್ ತುನ ಬಂಡಾ ಫೇಕಿನ್‌ ಮಾರ‍್ನು ಕರಿ ಆಯುಥು. ಹಮ್ಕೆ ತೂ ಪಾಛು಼ ಹಿಜ್ಜಾ಼ ಜಾ಼ಸ್ಕಿ ಶು?" ಕರಿ ಬೋಲ್ಯ.

9 ಯೇಸುನೆ, "ದನ್ನು ಭಾರ ಘಂಟಾ ಛಾ಼, ಕಾಹೆಕಿ ಶು? ದನ್ನಿ ವಖ್ಹತ್‌ಮ ಚಾ಼ಲವಾಳು ಠೋಕರ್‌ಖೈನ್‌ ರಡ್ಕಕೊಯ್ನಿ, ಶನಕತೊ ಆ ಜಗತ್‌ನು ಉಜಾ಼ಳು ಇವ್ಣುನ ದೆಖಾವಸ್. 10 ಕತೋಬಿ ರಾತ್ನಿ ವಖ್ಹತ್‌ಮ ಚಾ಼ಲವಾಳು ಠೋಕರ್‌ ಖಾಸ್‌, ಶನಕತೊ ತದೆ ಕೆಹು ಉಜಾ಼ಳುಬಿ ಕೋ ರ‍್ಹೇಯ್ನಿತೆ ಇನಖ್ಹಾಜೆ" ಕರಿ ಬೋಲ್ಯೊ. 11 ಯೇಸುನೆ ಆ ವಾತೇನ ಬೋಲಿನ್, "ಅಪ್ಣೊ ದೋಸ್ತಿ ಲಾಜ಼ರ್‌ ಖ್ಹುತೋಸ್‌, ಇನ ಉಠಾಡಾನಟೇಕೆ ಮೇ ಹಿಜ್ಜಾ಼ ವಳ್ಯೊಜ಼ವುಸ್‌" ಕರಿ ಇವ್ಣುನ ಬೋಲ್ಯೊ.

12 ಶಿಷ್ಯರ್‌ನೆ, "ಪ್ರಭು, ಯೋ ಖ್ಹುತೊ ಉಶೇತೊ, ಇನ ಅಛ್ಛು಼ ಉಶೆ" ಕರಿ ಜ಼ವಾಬ್ ದಿದು.

13 ಯೇಸುನೆ ಲಾಜ಼ರ್‌ ಮರಿಗಯೋತೆ ಬಾರೇಮ ಬೋಲ್ಯೋತೆ, ಕತೋಬಿ ಶಿಷ್ಯರ್‌ನೆ ಲಾಜ಼ರ್‌ ಖ್ಹುಯಿನ್ ಅರಾಮ್‌ ಕರುಕರಸ್ ಕರಿ ಇನೆ ಬೋಲ್ಯೋತೆ ವಾತೆನಿ ಮತ್‌ಲಬ್ ಕರಿ ಸೋಚ್ಯು. 14 ಇನಖ್ಹಾಜೆ ಯೇಸುನೆ ನೇರ್‌ವಳಿಥಿ ಇವ್ಣುನ, "ಲಾಜ಼ರ್‌ ಮರಿಗಯೊ" ಕರಿ. 15 ಮೇ ಹಿಜ್ಜಾ಼ ಕೋ ಥೋನಿತೆ ಇನಖ್ಹಾಜೆ, ತುಮಾರಿ ಬಾರೇಮ ಮೇ ಖ್ಹುಶಿ ಕರುಸ್, ಶನಕತೊ ಅನೇಥಿ ತುಮೆ ಮಾರಪರ್ ವಿಶ್ವಾಸ್‌ ಕರ್ಶು. ಆವೊ ಇನಾಕನ ಜ಼ಯ್ಯೆ಼" ಕರಿ ಬೋಲ್ಯೊ.

16 ತದೆ ದಿದುಮ ಕರಿ ನಾಮ್ನೊ ತೋಮನೆ ಇನ ಜೋ಼ಡ್ನ ಖ್ಹಾರ ಶಿಷ್ಯರ್‌ನ, "ಅಪ್ಣೇಬಿ ಪ್ರಭುನ ಕೇಡೆಸ್ ಜೈ಼ನ್‌, ಮರ‍್ವನಿತರ ಹುಯ್ಯೆ಼" ಕರಿ ಬೋಲ್ಯೊ.

ಯೇಸು ಪಾಛೊ಼ ಜಿವ್ಯೊತೆ ಅಜು಼ ಇನು ಜಿವ್ಣು

17 ಯೇಸು ಬೇಥಾನ್ಯಮ ಆವಾದಿನ್, ಲಾಜ಼ರ್‌ನ ಮಖ್ಹಾಣ್ಯನಿ ಘವಿಮ ಮ್ಹೇಲಿನ್ ಚಾರ್ ದನ್ ಹುಯಿಗಾ ಕರಿ ಇನ ಮಾಲುಮ್‌ ಪಡ್ಯು. 18 ಬೇಥಾನ್ಯ ಯೆರೂಸಲೇಮ್‌ಥು ಖ್ಹುಮಾರ್ ಬೇ ಮೈಲ್‍ಥಿ ಕಮ್ಮಸ್ ದೂರ್ ಥೂ. 19 ಇನಖ್ಹಾಜೆ ಇವ್ಣೊ ಭೈ ಮರಿಗಯೋತೆ ಬಾರೇಮ ಭಾಲಿ ದ್ಯವಾನ.ಯೆಹೂದ್ಯರ್‌ಮ ಘಣು ಜ಼ಣು ಮಾರ್ಥ ಅಜು಼ ಮರಿಯಕನ ಐರ‍್ಹುಥು.

20 ಯೇಸು ವಳ್ಯಾವಸ್ ಕರಿ ಮಾರ್ಥನೆ ಖ್ಹಮ್‌ಜಿನ್‌, ಇನ ಮಳಾನಖ್ಹಾಜೆ ಗೈ, ಕತೋಬಿ ಮರಿಯ ಘರ್‌ಮಾಸ್ ಥೀ. 21 ಮಾರ್ಥನೆ ಯೇಸುನ, "ಪ್ರಭು, ತೂ ಹಜ಼್ಜ ರ‍್ಹಯೊಹೋತ್ತೊ, ಮಾರೊ ಭೈ ಮರ‍್ಯೊಹೋತ್‌ ಕೊಯ್ನಿ. 22 ಕತೋಬಿ ಹಮ್ಕೇಬಿ, ತೂ ದೇವ್‌ಕನ ಶಾತ್‌ ಮಾಂಗ್ಯೊತೋಬಿ, ದೇವ್ ತುನ ದಿಶೆ ಕರಿ ಮನ ಮಾಲುಮ್‌" ಕರಿ ಬೋಲಿ.

23 ಯೇಸುನೆ ಇನ, "ತಾರೊ ಭೈ ಜಿವ್ತೊಹುಯಿನ್ ಉಠಿಆವ್‌ಶೆ" ಕರಿ ಬೋಲ್ಯೊ.

24 ತದೆ ಮಾರ್ಥನೆ, "ಅಂತಿಮ್‌ ದನ್ಮ ಯೋ ಪಾಛು಼ಜಿವ್ತೊಹುಯಿನ್ ಉಠಿ ಆವ್‍ಶೆಕರಿ ಮನ ಮಾಲುಮ್‌" ಕರಿ ಫರೈನ್ ಬೋಲಿ.

25 ಯೇಸುನೆ ಇನ, "ಮೇಸ್ ಪಾಛು಼ಜಿವ್ತೊ ಹುಯಿರ‍್ಹವಾಳೋಬಿ, ಜಾನ್‌ಬಿ ಹುಯಿರ‍್ಹೋಸ್. ಮನ ನಂಬವಾಳೊ ಮರಿಗಯೊತೋಬಿ ಜಿವ್‌ಶೆ; 26 ಅಜು಼ ಬಚಿರ‍್ಹವಾಳೊ ಹರೇಕ್‌ಜ಼ಣೊ , ಮನ ನಂಬ್ಯೊತೊ ಯೊ ಕದೇಬಿ ಮರ್‌ಶೆಕೊಯ್ನಿ" ಕರಿ ಬೋಲ್ಯೊ.

27 ತದೆ ಇನೆ, "ಓಹೋಲಾ, ಪ್ರಭು! ಆ ಜಗತ್ನ ಆವ್ಣುತೆ ದೇವ್‌ನೊ ಛಿಯ್ಯೊ ಹುಯಿರ‍್ಹೋತೆ ಕ್ರಿಸ್ತ ತೂಸ್ ಕರಿ ಮೇ ನಂಬಿರಾಖಿಸ್‌" ಕರಿ ಬೋಲಿ.

ಯೇಸು ರೋಯೊತೆ

28 ಆ ಬೋಲಾನ ಬಾದ್‌ಮ ಮಾರ್ಥನೆ ಜೈ಼ನ್‌, ಇನಿ ಭೇನ್ ಮರಿಯನ ಕಿನಾಬಿ ಮಾಲುಮ್‌ಕೊಂತೆ ಇಮ್‌, "ಗುರು ಹಜ್ಜಾ಼ ಛಾ಼, ತುನ ಬುಲಾವ್ ಕರಾಸ್" ಕರಿ ಬೋಲಿ. 29 ಅನ ಖ್ಹಮಜ಼್‌ತಾಸ್‌ನ ಮರಿಯ ಫಟ್‌ಕರಿ ಉಠೀನ್, ಒಗ್ಗಿಸ್‌ಮ ಯೇಸುಕನ ಚ಼ಲಿಗೈ. 30 ಯೇಸು ಬಿಜೂ಼ಬಿ ಗಾಮ್‌ನ ಮಹಿ ಕೋ ಆಯೊಥೋನಿ, ಮಾರ್ಥನೆ ಇನ ಮಳಿತೆ ಝ಼ಗೋಕನಾಸ್‌ ಥೊ. 31 ಮರಿಯನ ಜೋ಼ಡೆ ಘರ್‌ಮ ರ‍್ಹೀನ್, ಇನ ಭಾಲಿ ದೆವ್‌ಕರ್‌ತುಥೂತೆ ಯೆಹೂದ್ಯರ್, ಯೋ ಫಟ್‌ ಕರಿ ಉಠೀನ್ ಭಾರ್ ವಳಿಜಾ಼ಯಿತೆ ದೇಖಿನ್‌, ಆ ರೊವಾನಖ್ಹಾಜೆ ಘವಿಕನ ವಳಿಜಾ಼ಸ್ಕಿ ಶುಕಿ? ಕರಿ ಸೋಚಿನ್, ಇನ ಪೀಠೆ ಗಯು.

32 ಮರಿಯ ಯೇಸು ಥೋತೆ ಹಿಜ್ಜಾ಼ ಐನ್, ಇನ ದೇಕ್ತಾಸ್‌ನ, ಇನ ಗೋಡಾಪರ್ ಪಡೀನ್ "ಪ್ರಭು, ತೂ ಹಜ್ಜಾ಼ ರ‍್ಹಯೊಹೋತ್ತೊ ಮಾರೊ ಭೈ ಮರ‍್ಯೊಹೋತ್‌ ಕೊಯ್ನಿ" ಕರಿ ಬೋಲಿ.

33 ಮರಿಯಬಿ ಇನಜೋ಼ಡೆ ಆಯುಥೂತೆ ಯೆಹೂದ್ಯರ್‌ಖ್ಹಾರು ರೊವ್‌ಕರಾತೆ ಯೇಸುನೆ ದೇಖಿನ್‌, ಇನ ಆತ್ಮಮ ಪಶ್‍ತೈನ್ ಘಣು ದುಖ್‌ಹುಯು. 34 ಯೇಸುನೆ, "ತುಮೆ ಇನ ಕಿಜ್ಗಾ಼ ಮ್ಹೇಲಿರಾಖ್ಯಸ್?" ಕರಿ ಪುಛಾ಼ಯೊ. ತದೆ ಇವ್ಣೆ, "ಐನ್, ದೇಕ್‌ಲಾ ಪ್ರಭು" ಕರಿ ಬೋಲ್ಯು.

35 ಯೇಸು ರೋಯೊ. 36 ಇನ ಯೆಹೂದ್ಯರ್‌ನೆ, "ದೇಖೊ! ಆ ಇನಾಪರ್‌ ಕೆತ್ರೆ ಪ್ಯಾರ್ ರಾಖಿರಾಖ್ಯೋಸ್"! ಕರಿ ಬೋಲ್ಯು.

37 ಕತೋಬಿ ಇವ್ಣಾಮ ಥೋಡು ಜ಼ಣು, "ಅನೆ ಯೋ ಕಾಣಾನ ದೆಖಾವಾನಿ ಘೋಣಿ ಕರ‍್ಯೋನಿ? ಲಾಜ಼ರ್‌ನಾಬಿ ಮರಣ್‌ಥು ಬಚಾ಼ಡೇಜಾ಼ಯ್‍ಥೂನಿ?" ಕರಿ ಬೋಲ್ಯು.

ಲಾಜ಼ರ್‌ನ ಪಾಛು಼ ಜಾನ್‌ ಆಯೂತೆ

38 ಯೇಸು ಪಾಛೊ಼ ಇನ ದಿಲ್ಮ ಘಣು ದುಖ್ ಕರ್ತೊಹುಯಿನ್, ಮಖ್ಹಾಣ್ಯನಿ ಘವಿಕನ ಗಯೊ, ಯೋ ಘವಿನ ಬಂಡಾನಿ ಚಿಪಾಟ್‌ಥಿ ಮೂಚಿರಾಖ್ಯುಥು. 39 "ಯೋ ಬಂಡಾನ ಕಾಡೊ" ಕರಿ ಯೇಸುನೆ ಹುಕುಮ್‌ ದಿದೊ.

ಮರ‍್ಯಾಹುಯಾನಿ ಭೇನ್ ಮಾರ್ಥನೆ, "ಪ್ರಭು, ಯೋ ಮರಿನ್‌ ಚಾರ್ ದನ್ ಹುಯಿಗಾ! ಹಿಜ್ಜಾ಼ ಘಣಿ ವಾಖ್ಹ್‌ ಉಶೆ" ಕರಿ ಬೋಲಿ.

40 ಯೇಸುನೆ ಇನ, "ಮೇ ತುನ ಬೋಲ್ಯೊ ಕೊಯ್ನಿಕಿಶು ತೂ ನಂಬಿತೊ, ದೇವ್ನಿ ಮಹಿಮೆನ ದೇಖಿಶ್‌" ಕರಿಬೋಲ್ಯೊ. 41 ಇವ್ಣೆ ಬಂಡಾನ ಕಾಡಿನಾಖ್ಯು. ತದೆ ಯೇಸುನೆ ಡೋಳಾ ಪಾಡೀನ್, ಉಪ್ಪರ್ ದೇಖಿನ್‌, "ಬಾ, ತೂ ಮಾರಿ ಪ್ರಾರ್ಥನೇನ ಖ್ಹಮ್‌ಜ್ಯೂತೆ ಇನಖ್ಹಾಜೆ ತುನ ಧನ್ಯವಾದ್. 42 ತೂ ಕದೇಬಿ ಮಾರಿ ಪ್ರಾರ್ಥನೆ ಖ್ಹಮ್‌ಜಾ಼ಸ್‌ ಕರಿ ಮನ ಮಾಲುಮ್‌, ತೋಬಿ ತುನೇಸ್ ಮನ ಬೋಲಿಮೋಕ್‌ಲ್ಯೊ ಕರಿ ಬೋಲಾನು, ಅಶ್‌ಪೀಶ್‌ ಭಿಯುತೆ ಅದ್ಮಿಖ್ಹಾರು ವಿಶ್ವಾಸ್‌ ಕರಾದೆ ಕರಿ, ಮೇ ಆ ವಾತೇನ ಬೋಲ್ಯೊ" ಕರಿ ಬೋಲ್ಯೊ. 43 ಆ ಬೋಲಾನ ಬಾದ್‌ಮ, ಯೇಸುನೆ ಜೋ಼ರೆಥಿ ಚಿಕ್ರಿನ್, "ಲಾಜ಼ರ್‌, ಭಾರ್‌ ಉಠೀನ್ ಆವ್!" ಕರಿ ಬೋಲ್ಯೊ. 44 ತದೆ ಮರಿಗಯೊಹುಯೊ ಉಠೀನ್ ಫಾದರ್ ಆಯೊ, ಇನ ಹಾತ್‌-ಗೋಡ, ಮ್ಹೋಡು ಮರ‍್ಯಮುರ್ದಾನ ಲುಂಗ್ಡಾಥಿ ಲಪೆಟೈರ‍್ಹೂಥು. ಯೇಸುನೆ ಇವ್ಣುನ, "ಇನ ಛೋ಼ಡೊ, ಯೋ ಜಾ಼ವಾದೆ" ಕರಿ ಬೋಲ್ಯೊ.

ಯೇಸುನಿ ವಿರೋದ್ ಮಶ್ಲತ್ ಭಂದಾಯುತೆ

45 ಮರಿಯನ ಮಳಾನ ಆಯುಥೂತೆ ಯೆಹೂದ್ಯರ್, ಯೇಸುನೆ ಕರ‍್ಯೊತೆ ಆ ಕಾಮ್ನ ದೇಖಿನ್‌, ಇವ್ಣಾಮ ಕೈಏಕ್ ಜ಼ಣು ಇನಾಪರ್‌ ವಿಶ್ವಾಸ್‌ ಕರ‍್ಯು. 46 ಕತೋಬಿ ಇವ್ಣಾಮ ಥೋಡಾನೆ ಫರಿಸಾಯರ್‌ಕನ ಜೈ಼ನ್‌, ಯೇಸುನೆ ಕರ‍್ಯೊತೆ ಇನಿ ಬಾರೇಮ ಇವ್ಣುನ ಬೋಲ್ಯು. 47 ತದೆ ಮಹಾಯಾಜಕರ್‌ ಅಜು಼ ಫರಿಸಾಯರ್‌ನೆ ಶಾಣಾವ್‍ನಿ ಸಭೆ ಎಕ್ಟು ಕರೀನ್, "ಆ ಅದ್ಮಿ ಘಣು ಅದ್ಭುತ್ ಕಾಮ್ ಕರಾಸ್ನಿ,ಅಪ್ಣೆ ಶಾತ್‌ ಕರಿಯೆ? 48 ಅಪ್ಣೆ ಅನ ಅಮ್ಮಸ್ ಮ್ಹೆಂದಿದಾತೊ, ಹರೇಕ್ ಅದ್ಮಿ ಅನ ನಂಬಿಜಾ಼ಶೆ. ತದೆ ರೋಮ್‌ವಾಳು ಐನ್, ಅಪ್ಣಿ ಮಂದಿರ್‌ನ ಅಜು಼ ಅಪ್ಣ ದೇಖ್ಹ್‌ನ ಬರ್ಬಾತ್ ಕರಿನಾಕ್‌ಶೆ!" ಕರಿ ಬೋಲ್ಯು.

49 ಇವ್ಣಾಮ ಕಾಯಫ ಕರಿ ಏಕ್‌ ಜ಼ಣೊ ಥೊ. ಯೋ ವರ್‌ಖ್ಹೆ ಯೋ ಮಹಾಯಾಜಕ್ ಹುಯಿರ‍್ಹೋಥೊ, ಇನೆ ಇವ್ಣುನ, "ತುಮುನ ಶಾತ್ಬಿ ಮಾಲುಮ್ ಕೊಯ್ನಿ! 50 ಹಿಡಿ ದೇಖ್ಹ್‌ ಬರ್ಬಾತ್ ಹುವಾಥೀಬಿ, ಏಕ್‌ ಅದ್ಮಿ ತಮಾಮ್‌ ಅದ್ಮಿನಖ್ಹಾಜೆ ಮರ್‌ವಾನುಸ್‌ ಅಛ್ಛು಼ ಕರಿ ತುಮೆ ಶನ ಮಾಲುಮ್‌ ಕರಿಲೆವ್‌ಕರಾಕೊಂತೆ" ಕರಿ ಬೋಲ್ಯೊ. 51 ಆ ವಾತೆ ಕಾಯಫಾನಿ ಶೊಂತ್ ಸೋಚ್ ಕೋ ಹುಯಿರ‍್ಹೀಥೀನಿ. ಯೋ ವರಖ್ಹ್‌ಮ ಯೋ ಗಲ್‌ಢೊಯಾಜಕ್‌ ಹುಯಿರ‍್ಹೊಥೋತೆ ಇನಖ್ಹಾಜೆ, ಯೇಸು ಯೆಹುದ್ಯರ್‌ ಅದ್ಮಿವೊನಖ್ಹಾಜೆ ಮರ್‌ಶೆ ಕರಿ ಪ್ರವಾದ್‌ನೆ ಬೋಲ್ಯೊತೆ. 52 ಖಲಿ ಯೆಹೂದ್ಯರ್‌ನಖ್ಹಾಜೆ ಕಾಹೆ, ಪಣ್ಕಿ ಛಿದ್‍ರೈಗಯುತೆ ದೇವ್‌ನು ಅದ್ಮಿಖ್ಹಾರಾನ ಎಕ್ಟು ಕರಾನಖ್ಹಾಜೆ ಯೇಸು ಮರವಾಳೊ ಥೊ.

53 ಯೋ ದನ್‌ಥು ಯೇಸುನ ಮಾರ‍್ನು ಕರಿ ಇವ್ಣೆ ಸೋಚಾಲಗ್ಯು,ಯೋ ಅಖ್ಖು ಪ್ರವಾದನೆ ಹುಯಿರ‍್ಹುಥು. 54 ಅನಖ್ಹಾಜೆ ಯೇಸು ಯೆಹೂದ್ಯರ್‌ನ ದೆಖಾನಿಘೋಣಿ ಫರಾನು ಮ್ಹೆಂದಿನ್, ಉಜ್ಜಾ಼ಡಿ ಝ಼ಗೋನ ಖನ್ನೆ ಥೂತೆ, ಎಫ್ರಾಯಿಮ್‌ ಕರಿ ಖ್ಹಯೇರ್‌ಮ ಜೈ಼ನ್‌ ಶಿಷ್ಯರ್‌ನ ಜೋ಼ಡ್ಮ ರಹಿಗೊ.

55 ಯೆಹೂದ್ಯರ್‌ನ ಪಸ್ಕ ಪೂಜಾ಼ನಿ ವಖ್ಹತ್ ಖನ್ನೆ ಐಗೈಥಿ, ಇನಖ್ಹಾಜೆ ಅದ್ಮಿಖ್ಹಾರು ಉಪ್ಲಿಬಾಜು಼ ಚ಼ಲಿಗಯುಥು. ಪೂಜಾ಼ಥಿ ಪಹಿಲೆ ಇವ್ಣುನ ಶುದ್ದಿಕರಣ್ ಕರಿಲೇವ್ಣು ಕರಿ ಗಾಮ್‌ಥು ಯೆರೂಸಲೇಮ್‌ ಆಯು. 56 ಇವ್ಣೆ ಯೇಸುನ ಢೂಂಡ್‌ತುಹುಯಿನ್ ದೇವ್ನಿಮಂದಿರ್‌ಮ ಭೀರಿನ್‌, "ತುಮೂನ ಕಿಮ್ ಸೊಚಾವಸ್‌ ಯೋ ಪೂಜಾ಼ನ ಆವ್‌ಶೆಸ್‌ ಕೊಯ್ನಿಕಿ ಶು?" ಕರಿ ಏಕ್‌ಥಿ-ಏಕ್‌ ಬೋಲಿಲಿದು. 57 ಮಹಾಯಾಜಕರ್‌ ಅಜು಼ ಫರಿಸಾಯರ್ ಯೇಸು ಕಿಜ್ಗಾ಼ ಛಾ಼ ಕರಿ ಕಿನಾಬಿ ಮಾಲುಮ್‌ ಪಡ್ಯುತೊ, ಹಮೂನ ಬೋಲ್‌ನು ಕರಿ ಹುಕುಮ್‌ ದಿದು. ಶನಕತೊ ಇವ್ಣೆ ಇನ ಧರ್‌ನು ಕರಿ ಥೂ.