João 7

ಯೇಸುಬಿ ಇನ ಭೈಯೇ

1 ಆ ಖ್ಹಾರು ಹುವಾನ ಬಾದ್‌ಮ, ಯೇಸು ಗಲಿಲಾಯಮ ಫರುಕರ್ತೊಥೊ; ಯೆಹೂದ್ಯವಾಳು ಇನ ಮಾರಿನಾಖಾನ ಟಿವವ್‍ಕರ್ತೂಥು ಇನಖ್ಹಾಜೆ, ಯೂದಾಯಮ ಫರಾನ ಇನ ಮನ್ ಕೋ ಥೂನಿ. 2 ಯೆಹೂದ್ಯರ್‌ನ ಡೆರಾನ ಘರ್ನಿಪೂಜಾ಼ನಿ ವಖ್ಹತ್ ಖನ್ನೆ ಐಗಿಥಿ.*7:2 ಯಾಜಕ ಕಾಂಡ 23:34; ಧರ್ಮೊಪದೇಶ ಕಾಂಡ 16:13 3 ಇನಖ್ಹಾಜೆ ಯೇಸುನ ಭೈಯೇ ಇನ, "ತೂ ಕರಾನು ಕಾಮ್‌ಖ್ಹಾರು ತಾರು ಶಿಷ್ಯರ್‌ಬಿ ದೇಖಾನ ಖ್ಹಾಜೆ, ಗಲಿಲಾಯ ಮ್ಹೇಲಿನ್ ಯೂದಾಯಾನ ಜಾ಼.ಕರಿ ಬೋಲಾಖ್ಹತರ್ 4 ಖಿವು ಏಕ್‍ಜ಼ಣೊ ಅದ್ಮಿಮ ವತಾಳಿಲೇವ್ಣು ಕರಿ ಇಷ್ಟ ಪಡಸ್‍ಕಿ ಯೋ ಇನಕಾಮ್‍ನ ಲಪಾಡಿನ್ ಕರಾಕೊಯ್ನಿ. ಶನಕತೊ ತೂ ಅದ್ಭುತ್ ಕಾಮ್ನ ಕರಾಸ್, ಇನಖ್ಹಾಜೆ, ಆ ಜಗತ್ನ ಖ್ಹಾಮ್ಣೆ ತಾರುತೂಸ್ ವತಾಳಿಲೆ" ಕರಿ ಬೋಲ್ಯು. 5 ಯೇಸುನ ಭೈಯೇಬಿ ಇನ ನಂಬ್‍ತುಥು ಕೊಯ್ನಿ.

6 ಯೇಸುನೆ ಇವ್ಣುನ, "ಮಾರಿ ವಖ್ಹತ್ ಬಿಜೂ಼ಬಿ ಕೋ ಆಯಿನಿ. ಕತೋಬಿ ತುಮಾರಿ ವಖ್ಹತ್ ಕದೇಬಿ ತೈಯಾರ್ ರ‍್ಹೇಸ್. 7 ಆ ಜಗತ್‌ ತುಮೂನ ವಹೇರ್‌ ಕರಾನ ಕೊ ಹೊಯ್ನಿ, ಕತೋಬಿ ಮೇ ಇನಿ ಕಾಮ್ ಅಖ್ಖಾನ ಖರಾಬ್ ಕರಿ ಸಾಕ್ಷಿಬೋಲುಸ್ತೆ ಇನಖ್ಹಾಜೆ ಯೋ ಮನ ವಹೇರ್‌ ಕರಾಸ್. 8 ತುಮೇಸ್ ಪೂಜಾ಼ನ ಜಾ಼ವೊ. ಮನ ಬಿಜೂ಼ಬಿ ಬರಾಬರ್‌ನಿ ವಖ್ಹತ್ ಕೋಆಯಿನ್ತೆ ಇನಖ್ಹಾಜೆ, ಮೇ ಆ ಪೂಜಾ಼ನ ಆವ್‌ಕೊಯ್ನಿ" ಕರಿ ಬೋಲ್ಯೊ. 9 ಆ ಬೋಲಾನ ಬಾದ್‌ಮ, ಯೋ ಗಲಿಲಾಯಮಸ್‌ ರಹಿಗೊ.

10 ಇನ ಭೈಯೇ ಜಾ಼ವಾನ ಬಾದ್‌ಮ, ಯೇಸುಬಿ ಪೂಜಾ಼ನ, ಅದ್ಮಿನ ದೆಖಾವ್ಣುನಾತೆ ತಿಮ್, ಲಪೀನ್ ಗಯೊ. 11 ಪೂಜಾ಼ಮ ಯೆಹೂದ್ಯರ್‌ನ ಅದಿಕಾರಿ, "ಯೇಸು ಕಿಜ್ಗಾ಼ ಛಾ಼?" ಕರಿ ಪುಛಾ಼ವ್ತುಹುಯಿನ್‌, ಇನ ಢೂಂಡುಕರ್ತುಥು.

12 ಅಜು಼ ಅದ್ಮಿನಿ ಝೂ಼ಂಡೇಮ ಯೇಸುನಿ ಬಾರೇಮ ಮಹಿ-ಮಹಿಸ್ ಗುಣ್‍ಗುಣೈನ್ ಬೋಲುಕರ್ತೂಥು. ಥೋಡು ಜ಼ಣು, "ಯೋ ಅಛ್ಛೊ಼" ಕರಿ ಬೋಲ್ಯು. ಅಜು಼ ಥೋಡು ಜ಼ಣು, "ಕೊಯ್ನಿ, ಯೋ ಅದ್ಮಿನ ಮಂಕ್ ಕರುಕರಸ್" ಕರಿ ಬೋಲ್ಯು. 13 ಕತೋಬಿ ಕೋಣ್‌ಬಿ ಇನಿ ಬಾರೇಮ ಭಾಲ್‌ಥಿ ವಾತೆ ಕೋ ಬೋಲ್ಯೂನಿ.ಶನಕತೊ ಯೆಹೂದ್ಯರ್‌ನ ಅದಿಕಾರಿಥಿ ಡರುಕರ್ತುಥು.

14 ಪೂಜಾ಼ ಖನ್ನೆ-ಖನ್ನೆ ಆಧು ಖತಮ್ ಹುವಾನ ಬಾದ್‌ಮ, ಯೇಸು ಮಂದಿರ್‌ಮ ಜೈ಼ನ್‌ ವಚನ್ ಬೋಲಿ ದೆವಾಲಗ್ಯೊ. 15 ತದೆ ಯೆಹೂದ್ಯರ‍್ನು ಅದಿಕಾರಿಖ್ಹಾರು, "ಪಢ್ಯೊ-ಲೀಖ್ಯೊಕೊಂತೆ ಅನ, ಅತ್ರುಖ್ಹಾರು ಮಾಲುಮ್‌ಛಾ಼ತೆ ಕಿಮ್?" ಕರಿ ಬೋಲಿನ್ ಆಶ್ಚರ್ಯ ಕರ‍್ಯು.

16 ಯೇಸುನೆ, "ಮೇ ಶಿಕಾಡುಸ್ತೆ ಮಾರಿ ವಚನ್ ಕಾಹೆ ಪಣ್ಕಿ, ಮನ ಮೋಕ್‌ಲ್ಯೊತೆ ದೇವ್ನಿ ವಚನ್ ಹುಯಿರ‍್ಹುಸ್‍. 17 ದೇವ್ನಿ ಮರ್ಜಿನಿಘೋಣಿ ಚಾ಼ಲಾನ ಕಿನ ಮನ್ ಛಾ಼ಕಿ ಇವ್ಣುನ ಆ ವಚನ್ ದೇವ್‍ಥಿ ಆಯುಕಿ, ನತರ್ ಮೇಸ್ ಬಣೈನ್ ಬೋಲುಕರುಸ್ಕಿ ಕರಿ ಬೋಲಾನು ಮಾಲುಮ್‌ ಪಡಾಸ್‌. 18 ಕೋಣ್ ಇನುಯೋಸ್ ವಾತೆಬೋಲಿಲೇಸ್ಕಿ ಇನಿ ಶೊಂತ್ ಇಜ಼್ಜತ್‌ನ ಢೂಂಡಸ್. ಇನುಯೋಸ್ ಖ್ಹಾಚ಼ನ ಲೀಲಾವನ ಕೋಶಿಶ್ ಕರಾಸ್, ಕತೋಬಿ ಕೋಣ್‌ಇನ ಮೋಕ್‌ಲ್ಯೊತೆ ಇನಿ ಇಜ್ಜತ್‍ನ ಢೂಂಡಾವಾಳೊ ಅದ್ಮಿಸ್‌ ಖ್ಹಾಚೊ಼; ಇನಾಮ ಶನೀಶ್ ಗಲತ್‌ ಕೊ ರ‍್ಹೇಯ್ನಿ. 19 ಮೋಶೆನೆ ತುಮೂನ ಧರ್ಮಶಾಸ್ತ್ರ ದಿದೊ ಕೊಯ್ನಿಕಿಶು? ಕತೋಬಿ ತುಮಾರಮ ಕೋಣ್‌ಬಿ ಯೊ ಹುಕುಮ್ ಪಾಡಿನ್ ಚಾ಼ಲಕೊಯ್ನಿ. ತುಮೆ ಶನ ಮನ ಮರ್‌ನಾಕ್ಣು ಕರಿ ಕೋಶಿಶ್ ಕರಾಸ್?" ಕರಿ ಬೋಲ್ಯೊ.

20 ತದೆ ಯೋ ಅದ್ಮಿಖ್ಹಾರು, "ತುನ ಭೂತ್ ಧರಿರಾಖ್ಯುಸ್ ತುನ ಮರ್‌ನಾಕ್ಣು ಕರಿ ಕೋಣ್ ಢೂಂಡ್‌ಷೆ?" ಕರಿ ಬೋಲ್ಯು.

21 ಯೇಸುನೆ ಇವ್ಣುನ, "ಮೇ ಏಕ್‌ ಅದ್ಭುತ್ ಕಾಮ್ನ ಕರ‍್ಯೊ, ಇನ ದೇಖಿನ್‌ ತುಮೆಖ್ಹಾರು ಆಶ್ಚರ್ಯ ಹುಯಾಥ. 22 ಮೋಶೆನೆ ತುಮೂನ ಖ್ಹತ್ನ ಕರಾವ್ಣು ಕರಿ ಹುಕುಮ್‌ ದಿದೋಥೊ, ಕತೋಬಿ ಯೋ ಮೋಶೆಥಿ ಆಯೂತೆ ಕಾಹೆ, ಇನೇಥಿಬಿ ಅಗಾಡಿ ಥೂತೆ ತುಮಾರ ಗುರುಖ್ಹಾರಾಥೀಸ್ ಯೋ ಆಯೂತೆ. ಅಜು಼ ತುಮೆ ಸಬ್ಬತ್‌ ದನ್‌ಮಾಬಿ ಲಡ್ಕಾವ್ನ ಖ್ಹತ್ನ ಶನಕರೋಸ್‌.*7:22 ಯಾಜಕ ಕಾಂಡ 12:3; ಆದಿಕಾಂಡ 17:10 23 ಮೋಶೇನು ಧರ್ಮಶಾಸ್ತ್ರ ತೋಡ್ನು ನಾ ಕರಿ ಏಕ್‍ಜ಼ಣೊ ಸಬ್ಬತ್‌ನ ದನ್ಮ ಖ್ಹತ್ನ ಕರೈಲ್ಯವಾನು ರ‍್ಹಿಯುತೊ, ಮೇ ಸಬ್ಬತ್‌ ದನ್ಮ ಏಕ್‌ ಅದ್ಮಿನ ಗುಣ್ ಕರೀನ್ಅಛ್ಛು಼ ಕರ್ತಾನ, ಮಾರಪರ್ ಶನ ಇರಾದೊ ಕರೋಸ್?*7:23 ಯೋಹಾನ 5.9 24 ಡೋಳಾಮ ದೆಖಾವಸ್ತೆ ಇನಾಪರ್‌ ತೀರ್ಪ್‌ ನಕೊ ಕರೊ; ಖ್ಹಾಚು಼ ಶಾತ್ಕಿ ಇನಾಪರ್‌ ತೀರ್ಪ್‌ ಕರೊ.

ಯೇಸುಸ್‌ ಆ ಕ್ರಿಸ್ತಕಿ ಶು?

25 ಯೆರೂಸಲೇಮ್‌ನು ಥೋಡುಜ಼ಣು ಅಮ್ ಬೋಲ್ಯು, "ಯೊ ಅದಿಕಾರಿಖ್ಹಾರು ಇವ್ಣೆ ಮಾರಿನಾಕ್ಣು ಕರಿ ಛಾ಼ತೆ ಆಸ್ ಕಾಹೆಕಿಶು? 26 ಕತೋಬಿ ದೇಖೊ, ಆ ಹೈರೋತೆ ಖ್ಹಾರಾನ ಇಚ಼್‌ಮಾಸ್ ವಾತ್‍ಬೋಲ್‍ತೊ ಛಾ಼ಲ್ಯೊಫಂಡಾಸ್ ತೋಬಿ ಯೊ ಅದ್ಮಿ ಇನ ಶಾತ್ಬಿ ಕರುಕರಕೊಯ್ನಿ. ಅಮ್ಮಸ್ ಕಾಹೇಕಿಶು? ಅಮ್ನಿ ಪರಕ್ಮ ಯೆಹೂದ್ಯರ‍್ನು ಅದಿಕಾರಿಖ್ಹಾರು ಆಸ್ ಖ್ಹಾಚ಼ಮಾಬಿ ಕ್ರಿಸ್ತಸ್ ಕರಿ ಮಾಲುಮ್‌ ಕರಿಲಿದು.

27 ಕತೋಬಿ ಆ ಅದ್ಮಿ ಕಿಜ್ಜಾ಼ಥು ಆಯೊಹುಯೊಕರಿ ಹಮೂನ ಮಾಲುಮ್‌, ಕ್ರಿಸ್ತ ಆವಾನಿ ವಖ್ಹತ್‌ಮ ಯೋ ಕಿಜ್ಜಾಥೊ ಆಯೊಹುಯೊ ಕರಿ ಏಕ್‌ನಾಬಿ ಮಾಲುಮ್ ಕೋ ಪಡ್‌ಶೇನಿ" ಕರಿ ವಾತೆ ಬೋಲಿಲೆವ್‌ಕರ್ತುಥು.

28 ಯೇಸು ಮಂದಿರ್‌ಮ ಬೋಲಿ ದೇವ್ ಕರ್ತೊಥೊ. ತದೆ ಯೊ ಊಚಿ ಆವಾಜ಼್‌ಥಿ ಬೋಲ್ಯೊ, "ಯೊ ಕಿಜ್ಜಾಥೊ ಆಯೊಕರಿ ತುಮೂನ ಮಾಲುಮ್‍ಕಿಶು, ಮಾರಿ‍ಶೊಂತ್ ಅದಿಕಾರ್‌ಥಿ ಕೊ ಆಯೋನಿ ಮನ ಮೋಕ್ಲಿರಾಖ್ಯೊತೆ ಖ್ಹಾಚ ಏಕ್‍ಜ಼ಣಾನ ಖ್ಹಣೇದ್ ಕೊ ಧರಾನಿ." 29 ಕತೊ ಮನ ಯೋ ಮಾಲುಮ್‌, ಶನಕತೊ ಮೇ ಇನಾಕಂಥು ಆಯೊ ಅಜು಼ ಇನೇಸ್‌ ಮನ ಮೋಕ್ಲಿರಾಖ್ಯೊಸ್" ಕರಿ ಬೋಲ್ಯೊ.

30 ತದೆ ಇವ್ಣೆ ಇನ ಧರ್‌ನು ಕರಿ ಕರ‍್ಯು, ಕತೋಬಿ ಯೋ ವಖ್ಹತ್ ಬಿಜೂ಼ಬಿ ಕೋಆಯಿಂಥಿತೆ ಇನಖ್ಹಾಜೆ, ಕೋಣ್‌ಬಿ ಇನಾಪರ್‌ ಹಾತ್‌ ಕೋ ನಾಖ್ಯುನಿ. 31 ಕತೋಬಿ ಝೂ಼ಂಡ್‌ಮ ಥೂತೆ ಘಣು ಅದ್ಮಿ ಇನಾಪರ್ ವಿಶ್ವಾಸ್‌ ಕರ‍್ಯು ಅಜು಼, "ಕ್ರಿಸ್ತ ಆಯೋತೊ ತದೆ, ಅನೆ, ಕರ‍್ಯೊತೆ ಅದ್ಭುತ್ ಕಾಮ್‍ಥೀಬಿ ಆಜೂ಼ಬಿ ಜಾ಼ಖ್ಹತ್ ಕಾಮ್ ಕರಾಸ್ಕಿಶುಕೀನಿ?" ಕರಿ ಬೋಲ್ಯು.

ಯೇಸುನ ಧರಾನ ಕಾವ್ಲಿ ಕರಾವಾಳ ಸೇವಕ್‌ನ ಮೋಕ್‌ಲ್ಯುತೆ

32 ಯೊ ಅದ್ಮಿನು ಝೂ಼ಂಡ್‌ ಯೇಸುನಿ ಬಾರೇಮ ಮಹಿ-ಮಹಿಸ್ ಬೋಲಾತೆ ವಾತೇನ ಫರಿಸಾಯರ್‌ವಾಳು ಅಜು಼ ಮಹಾಯಾಜಕರ್‌ ಖ್ಹಮ್‌ಜ್ಯು, ಅಜು಼ ಯೇಸುನ ಧರಾನಖ್ಹಾಜೆ ಮಂದಿರ್‌ನು ಕಾವ್ಲಿ ಕರಾವಾಳನ ಮೋಕ್‍ಲ್ಯು. 33 ತದೆ ಯೇಸು ಇವ್ಣುನ, "ಬಿಜು಼ ಥೋಡ ದನ್ ಮೇ ತುಮಾರ ಜೋ಼ಡೆ ರ‍್ಹೀಶ್, ಇನ ಬಾದ್‌ಮ ಮನ ಮೋಕ್‌ಲ್ಯೊತೆ ಇನಾಕನ ಮೇ ಚ಼ಲ್ಯೊಜೈ಼ಶ್‌. 34 ತುಮೆ ಮನ ಢೂಂಡ್‌ಶು, ಕತೋಬಿ ಮೇ ತುಮೂನ ಕೋ ಮಳಿಶ್‌ನಿ, ಶನಕತೊ ಮೇ ಛೂ಼ತೆ ಹಿಜ್ಜಾ಼ ತುಮೂನ ಕೋ ಆವಾನ ಉಶೇನಿ" ಕರಿ ಬೋಲ್ಯೊ.

35 ತದೆ ಯೆಹೂದ್ಯರ‍್ನು ಅದಿಕಾರಿಖ್ಹಾರು ಇವ್ಣ ಇವ್ಣಮಾಸ್ ವಾತೆ ಕರಿಲಿದು, "ಅಪ್ಣುನ ಮಳ್ಣುನಾತೆ ಆ ಕಿಜ್ಗಾ಼ ಜಾ಼ವ್ಣುಕರಿ ಛಾ಼? ಯೊ ಕಿಜ್ಜಾ಼ತೋಬಿ ಜಾ಼ವ್ಣುಕಿಶುಕಿ? ಕಿಜ಼್ಜ, ಮಾರು ಅದ್ಮಿ ಗ್ರೀಕ್ ಖ್ಹಯೇರ್‌ಮ ಜಿವ್ಣು ಕರುಕರಸ್, ಹೈರುತೆ ಗ್ರೀಕ್‌ವಳಾನ ಶಿಕಾಡ್‍ದಿಶೆಕಿ ಶು? 36 ತುಮೆ ಮನ ಢೂಂಡ್‌ಶು, ಕತೋಬಿ ಮೇ ತುಮೂನ ಕೋ ಮಳಿಶ್‌ನಿ, ಶನಕತೊ ಮೇ ಛೂ಼ತೆ ಹಿಜ್ಜಾ಼ ತುಮೂನ ಕೋ ಆವಾನ ಉಶೇನಿ" ಕರಿ ಇನೆ ಬೋಲ್ಯೋತೆ ವಾತೆನಿ ಮತ್‌ಲಬ್ ಶಾತ್‌?" ಕರಿ ಇವ್ಣ-ಇವ್ಣ ಮಹಿಸ್ ಬೋಲಿಲಿದು.

ಜಾನ್ನ ದ್ಯವಾನು ಪಾಣಿನು ಝೀಲ್

37 ಪೂಜಾ಼ನೊ ಖ್ಹರ್ತಿನೊ ಅಜು಼ ಮುಖ್ಯದನ್‌ ಹುಯಿರ‍್ಹೋತೆ ತದೆ ಯೇಸು ಭೀರಿನ್‌ ಊಚಿ ಅವಾಜ಼್‌ಥಿ ಬೋಲಾನು ಶುರುಕರ‍್ಯೊ, "ಕಿನ ಠೋಖ್ಹ್‌ ಲಾಗಸ್ಕಿ, ಯೊ ಅವಾದೆ ಅಜು಼ ಪಿಯ್ಯಾದೆ.*7:37 ಯಾಜಕ ಕಾಂಡ 23:36 38 ಧರ್ಮಶಾಸ್ತ್ರಮ ಬೋಲೈರ‍್ಹುತೆ ಇಮ್ಮಸ್, ‘ಕೋಣ್ ಮಾರಪರ್ ವಿಶ್ವಾಸ್‌ ಕರಾಸ್ಕಿ ಇನ ಮಹಿಥು ಜಾನ್ನಪಾಣಿನು ಝೀಲ್ ಇನಾಮ ವ್ಹವ್‍ಶೆ" ಕರಿ ಚಿಕ್ರಿನ್ ಬೋಲ್ಯೊ.*7:38 ಯೆಹೆಜ್ಕೆಲ್ 47:1; ಜಕರೀಯ 14:8 39 ಕತೋಬಿ ಯೇಸುನೆ ಇನ ನಂಬಾವಾಳು ಲೀಲಿಶೇತೆ ಪವಿತ್ರಾತ್ಮ ವರಾನಿ ಬಾರೇಮ ಬೋಲ್ಯೊ. ಯೇಸು ಬೀಜೂಬಿ ಮಹಿಮೆನ ಲೀರಾಖ್ಯೊಥೊ ಕೊಯ್ನಿ ಶನಕತೊ ಪವಿತ್ರಾತ್ಮ ವರ ಅಜೂ಼ಬಿ ದೆವೈರ‍್ಹುಥು ಕೊಯ್ನಿ.*7:39 ಕತೊ, ಯೇಸು ಬಿಜೂ಼ಬಿ ಮರೀನ್, ಜಿವ್ತೊ ಹುಯಿನ್ ಕೋ ಉಠಿರ‍್ಹೊಥೋನಿತೆ ಇನಖ್ಹಾಜೆ ಕರಿ ಮತ್‌ಲಬ್

ಅದ್ಮಿವೋಮ ಬೇ ಭಾಗ್‌

40 ಅನ ಖ್ಹಮ್‌ಜಿನ್‌, ಭೀಡ್‌ಮ ಥೂತೆ ಥೋಡು ಅದ್ಮಿ, "ಖ್ಹಾಚ಼ಮಾಬಿ ಆ ಅದ್ಮಿ ಪ್ರವಾದಿ ಹುಯಿರ‍್ಹೋಸ್" ಕರಿ ಬೋಲ್ಯು.

41 ಬಿಜು಼ ಥೋಡು ಜ಼ಣು, "ಆಸ್ ಕ್ರಿಸ್ತ" ಕರಿ ಬೋಲ್ಯು,

ಕತೋಬಿ ಅಜು಼ ಥೋಡ ಅದ್ಮಿನೆ, "ಕ್ರಿಸ್ತ ಗಲಿಲಾಯಥೊ ಕೋ ಆವ್‌ಶೇನಿ!" 42 ದಾವೀದ್‌ನ ಖಾನ್‌ದಾನ್‌ಥೀಬಿ ಅಜು಼ ದಾವೀದ್‌ ಥೋತೆ ಬೇತ್ಲೆಹೇಮ್ ಕರಿಬೋಲಾನು ಗಾಮ್‌ಥೂಬಿ ಕ್ರಿಸ್ತ ಆವ್‍ಶೆಕರಿ ಧರ್ಮಶಾಸ್ತ್ರಮ ಬೊಲಾವಸ್‍ನಿ" ಕರಿ ಬೋಲ್ಯು.*7:42 2ನು ಸಮುವೇಲ 7:12 ಮೀಕ 5:2 43 ಅಮ್ ಯೇಸುನಿ ಬಾರೇಮ ಅದ್ಮಿಮ ಭಾಗ್‌ ಪಡಿಗಯು. 44 ಇವ್ಣಾಮ ಥೋಡು ಜ಼ಣು ಯೇಸುನ ಧರ್‌ನು ಕರಿ ಥೂ, ಕತೋಬಿ ಏಕ್‌ ಜ಼ಣುಬಿ ಇನಾಪರ್‌ ಹಾತ್‌ ಕೋ ನಾಖ್ಯುನಿ.

ಯೆಹೂದ್ಯರ್‌ನ ಘಲ್ಡಾವ್‍ನಿ ಅವಿಶ್ವಾಸ್

45 ಮಂದಿರ್‌ನು ಕಾವ್ಲಿ ಕರಾವಾಳು ಪಾಛು಼ಫರಿ ಆವಾದಿನ್, ಮಹಾಯಾಜಕರ್‌ ಅಜು಼ ಫರಿಸಾಯರ್‌ವಾಳು ಇವ್ಣುನ, "ತುಮೆ ಶನ ಇನ ಧರ್‌ಲಿ ಕೋ ಆಯಾನೀತೆ?" ಕರಿ ಪುಛಾ಼ಯು.

46 ತದೆ ಕಾವ್ಲಿ ಕರಾವಾಳು, "ಕೋಣ್‌ಬಿ ಹಂಕೆತೋಡಿ ಆ ಅದ್ಮಿನಿಘೋಣಿ ವಾತೆ ಕೋ ಬೋಲ್ಯುನಿ" ಕರಿ ಜವಾಬ್‌ ದಿದು.

47 ಅನ ಖ್ಹಮ್‌ಜಿನ್‌ ಫರಿಸಾಯರ್‌ವಾಳು, "ಇಮ್‍ಕತೊ, ಇನೆ ತುಮೂನಾಬಿ ಠಗೈನಾಖ್ಯೊಕಿ ಶು?" ಕರಿ ಪುಛಾ಼ಯು 48 ಯೆಹುದ್ಯರ್‌ನ ಅದಿಕಾರಿರ‍್ಹವೊ, ಫರಿಸಾಯರ್‌ಮ ರ‍್ಹವೊ ಕೋಣ್‌ತೋಬಿ ಇನಾಪರ್ ವಿಶ್ವಾಸ್‌ ಕರಿರಾಖ್ಯುಸ್ಕಿ ಶು? 49 ಧರ್ಮಶಾಸ್ತ್ರ ಮಾಲುಮ್‌ಕೊಂತೆ ಆ ಝೂ಼ಂಡ್‌ವಾಳು ಶಾಪಲ್ಯವಾಳು ಹುಯಿರುಸ್. ಕರಿ ಬೋಲ್ಯೊ.

50 ಯೋ ಪಹಿಲೆ ಯೇಸುಕನ ಆಯೊಥೋತೆ ನಿಕೊದೇಮ ಇವ್ಣಾಮ ಏಕ್‌ ಜ಼ಣೊ ಹುಯಿರ‍್ಹೊಥೊ. ಯೇಸುನ ಮಳಾನ ಗಯೋಥೋತೆ ಆಸ್.*7:50 ಯೋಹಾನ 3:1, 2 51 ಇನೆ ಇವ್ಣುನ, "ಮಾರಿ ಧರ್ಮಶಾಸ್ತ್ರನಿ ಪರಕ್ಮ,ಕೋಣ್ ಶಾತ್ಬಿ ಖ್ಹಮ್‌ಜ್ಯುಕೊಂತೆ ಅಜು಼ ಯೊ ಶಾತ್‌ ಕರವಾಳೊಕರಿ ಮಾಲುಮ್‌ ಕರಕೊಂತೆ ಇನಿ ಬಾರೇಮ ತೀರ್ಪ್‌ ಬೋಲಾನ ಕೊಹುವಾನಿ.ಕರಿ ಬೋಲ್ಯು.

52 ಇನ ಇವ್ಣೆ, "ತೂಬಿ ಗಲಿಲಾಯವಾಳೊಕಿ ಶು? ಧರ್ಮಶಾಸ್ತ್ರನ ಅಛ್ಛಿನಿತರ ಪಢೀನ್‌ ಶಿಕಿಲೆ. ಗಲಿಲಾಯಥು ಖೆವೂ ಪ್ರವಾದೀಬಿ ಆವ್‌ಶೆ ಕೊಯ್ನಿ ಕರಿ ತದೆ ತುನ ಮಾಲುಮ್‌ ಪಡ್‌ಶೆ" ಕರಿ ಬೋಲ್ಯು. 53 ಇನಪಾರ್ ಅಖ್ಖುಜ಼ಣು ಇವ್ಣ-ಇವ್ಣ ಶೊಂತ್ ಘರೆ ಚ಼ಲಿಗಯು.