Lucas 10

ಯೇಸುನೆ ಬೇ ಉಪ್ಪರ್ ಖ್ಹಡ್‌ತೀನಿಖ್ಹ್ ಜ಼ಣಾನ ಬೋಲಿ ಮೋಕ್‌ಲ್ಯೊತೆ

1 ಅನ ಬಾದ್‌ಮ ಯೇಸು ಪ್ರಭು ಬಿಜೂ಼ಬಿ ಬೇ ಉಪ್ಪರ್ ಖ್ಹಡ್‌ತೀನಿಖ್ಹ್*10:1 ಗ್ರೀಕ್‌ನು ಥೋಡು ದಪ್ತರ್‌ನಿ ಭಾಗ್‌ಮ ಖ್ಹಡ್‌ತೀನಿಖ್ಹ್ ಕರೀಬಿ ಲಿಖೈರ‍್ಹುಸ್. ಜ಼ಣಾನ ಚೂ಼ಣಿನ್, ಬೆಬ್ಬೆ ಜ಼ಣ ಕರೀನ್, ಯೋ ಜಾ಼ವ್ಣುಕರಿ ಥೋತೆ ಹರೇಕ್ ಗಾಮ್‌ನ ಅಜು಼ ಝ಼ಗೋನ ಇನೇಥಿ ಅಗಾಡಿ ಇವ್ಣುನ ಮೋಕ್‌ಲ್ಯೊ. 2 ಮೋಕ್ಲಾನಿ ವಖ್ಹತ್‌ಮ ಇವ್ಣುನ, "ಅನಾಜ಼್ ಜಾ಼ಖ್ಹತ್ ಛಾ಼, ಕತೋಬಿ ಎಕ್ಟು ಕರಾನ ಕಾಮ್ ಕರಾವಾಳು ಕಮ್ ಛಾ಼. ಇನಖ್ಹಾಜೆ ಅನಾಜ಼್‌ನೊ ಪ್ರಭುನ ‘ತಾರು ಅನಾಜ಼್‌ನ ಎಕ್ಟು ಕರಾನಖ್ಹಾಜೆ ಕಾಮ್‌ವಾಳಾನ ಮೋಕಲ್’ ಕರಿ ಬಿಂತಿ ಕರೊ. 3 ಜಾ಼ವೊ! ಜ಼ರಕ್‌ನ ಮಹಿ ಮೇಂಢಾವ್ನ ಮೋಕ್ಲಾತೆ ಇಮ್‌, ಮೇ ತುಮೂನ ಮೋಕ್ಲುಕರುಸ್. 4 ದೇಖೊ, ಪೈಶಾನಿ ಚ಼ಂಚಿ ರ‍್ಹವೊ, ಮಾಂಗಾನಿ ಝೋ಼ಳಿ ರ‍್ಹವೊ, ಖೋಖ್ಹ್‌ಡಾ ರ‍್ಹವೊ ನಕೊ ಲೀಜಾ಼ವೊ. ಜಾ಼ವಾನಿ ವಖ್ಹತ್‌ಮ, ವಾಟ್‌ಪರ್ ಕಿನಾಬಿ ಖ್ಹಲಾಮ್ ಕರಿ ಬೋಲಿನ್, ವಖ್ಹತ್ ಬರ್ಬಾತ್ ನಕೊ ಕರ್ಶು. 5 ಎತ್ರೇಸ್ ಕಾಹೆತೆ ತುಮೆ ಖೆವ ಘರ್‌ಮ ಗಯಾತೋಬಿ, ‘ಆ ಘರ್‌ನ ಶಾಂತಿ ಹುವಾದೆ’*10:5 ಯೆಹೂದ್ಯವಾಳು ಶಾಲೋಮ್ ಕರಿ ಬೋಲಾಸ್. ಕರಿ ಬೋಲೊ. 6 ಶಾಂತಿಥಿ ರ‍್ಹವಾನ ಆಖ್ಹ್ ಕರಾವಾಳು ಅದ್ಮಿ ಹಿಜ್ಜಾ಼ ರ‍್ಹಯೂತೊ, ತುಮಾರಿ ಆಶೀರ್ವಾದ್‌ ಇನಾಪರ್ ಟಿಕ್‌ಶೆ, ನತರ್‌ಕಿ ಯೋ ಆಶೀರ್ವಾದ್‌ ಪಾಛು಼ಫರಿ ತುಮೂನ ಆವ್‌ಶೆ. 7 ಯೋಸ್ ಘರ್‌ಮ ರ‍್ಹವಾಕರೊ, ಇವ್ಣೆ ಶಾತ್‌ ದೇಸ್ಕಿ ಯೋ ಖಾವೊ, ಪೀಯೊ. ಕಾಮ್ ಕರಾವಾಳ*10:7 ಕತೊ ಆಳ್‌ ಕರಿ ಮತ್‌ಲಬ್ ಆಳ್‌ ಕೂಲಿನ ಲ್ಹಾಯೇಕ್ ಎತ್ರೇಸ್. ಇನಖ್ಹಾಜೆ ಏಕ್‌ ಘರ್‌ನ ಮ್ಹೆಂದಿನ್ ಬಿಜೇಕ್ ಘರ್‌ಮ ಜೈ಼ನ್ ನಕೊ ರ‍್ಹವೊ. 8 ಅಜು಼ ತುಮೆ ಖೆವಾತೋಬಿ ಏಕ್‌ ಗಾಮ್ಮ ಜಾ಼ವಾನ ಬಾದ್‌ಮ, ಹಿಜ್ಜಾ಼ನು ಅದ್ಮಿ ತುಮೂನ ಬುಲೈಲಿದೊತೊ, ಇವ್ಣೆ ಶಾತ್‌ ದೇಸ್ಕಿ ಯೋ ಖಾವೊ. 9 ಹಿಜ್ಜಾ಼ ರೋಗ್-ರಾಯಮ ರ‍್ಹೇಸ್ತೆ ಇವ್ಣ ಅಛ್ಛು಼ಕರೊ, ಅಜು಼ ಹಿಜ್ಜಾ಼ನು ಅದ್ಮಿಖ್ಹಾರಾನ ದೇವ್ನಿ ರಾಜ್ಯ ತುಮಾರ ಖನ್ನೆ ಐರ‍್ಹೀಸ್ ಕರಿ ಬೋಲೊ. 10 ಕತೋಬಿ ತುಮೆ ಖೆವಾತೋಬಿ ಏಕ್‍ ಗಾಮ್ಮ ಜಾ಼ವಾನ ಬಾದ್‌ಮ, ಹಿಜ್ಜಾ಼ನು ಅದ್ಮಿ ತುಮೂನ ನಾ ಬುಲೈಲಿದುತೊ, ಯೋ ಗಾಮ್‌ನಿ ಗಲ್ಲಿಯೇಮ ಜೈ಼ನ್, 11 ‘ಹಮಾರ ಗೋಡಾನ ಲಾಗೀತೆ, ತುಮಾರ ಗಾಮ್‌ನಿ ಧೂಳ್‌ನ ಜಿನ್‌ಕುಬಿ, ಹಮೆ ತುಮಾರಿ ವಿರೋದ್‌ ಝ಼ಟ್ಕಿ ದೆವ್‌ಕರೇಸ್. ಕತೋಬಿ ದೇವ್ನಿ ರಾಜ್ಯ ತುಮಾರ ಖನ್ನೆ ಐರ‍್ಹೀಸ್ ಕರಿ ತುಮೂನ ಮಾಲುಮ್ ರ‍್ಹವಾದೆ ಕರಿ ಬೋಲೊ.’ 12 ಮೇ ತುಮೂನ ಬೋಲುಸ್ಕಿ, ನ್ಯಾವ್‍ನಿ ತೀರ್ಪ್‌ನ ದನ್ಮ ಯೋ ಗಾಮ್‌ನಿ ಹಾಲ್‌, ಸೊದೋಮ್ ಗಾಮ್‌ನಿ ಹಾಲ್‌ಥೀಬಿ ಖರಾಬ್ ರ‍್ಹಿಶೆ.

ವಿಶ್ವಾಸ್‌ ಕೊಂತೆ ಖ್ಹಯೇರ್‌ನಿ ಬಾರೇಮ

13 ಅಯ್ಯೋ, ಖೊರಾಜಿನ್‌ ಖ್ಹಯೇರ್‌, ತಾರಿ ಹಾಲ್ನ ಶಾತ್‌ಬೋಲು ಬೆತ್ಸಾಯಿದ ತುಮಾರಿ ಹಾಲ್ನ ಶಾತ್‌ ಬೋಲು! ತುಮಾರಾಮ ಚಾ಼ಲ್ಯುತೆ ಮಹಾನ್ ಕಾಮ್‌ಖ್ಹಾರು ತೂರ್ ಅಜು಼ ಸೀದೋನ್ ಖ್ಹಯೇರ್‌ಮ ಚಾ಼ಲ್ಯುಹೋತ್ತೊ, ಹಿಜ್ಜಾ಼ವಾಳು ಕದೇಸ್‌ಕಿ ಛೈ಼ನೊಕೋಥ್‌ಳೊ ಲಪೇಟಿಲೀನ್, ರಾಕ್‌ಮ ಬೇಶಿನ್, ದೇವ್ ಭಣಿ ಫರಿಗಯೂಹೋತ್. 14 ಕತೋಬಿ ನ್ಯಾವ್‍ನಿ ತೀರ್ಪ್‌ನ ದನ್ಮ ತುಮೂನ ಉಷೇತೆ ಹಾಲ್‌ಥೀಬಿ ತೂರ್ ಅಜು಼ ಸೀದೋನ್ ಖ್ಹಯೇರ್‌ನ ಹುಯುತೆ ಹಾಲತ್ಪರ್ ದೇವ್‌ ಘಣು ಗೋರ್‌ ಕರ್ಶೆ. 15 ಕಪೆರ್ನೌಮ್, ತೂ ಪರಲೋಕ್‌ನ ಚ಼ಢೀನ್ ಜೈ಼ಶ್‌ನ? ಕೊಯ್ನಿ! ತುನ ಪಾತಾಳ್ಮ*10:15 ಅಂತಸ್‌ಕೊಂತೆ ಗಗನ್ ಕರಿ ಮತಲಬ್. ನಾಕ್‌ಶೆ!

16 ಯೇಸುನೆ ಇವ್ಣುನ, "ತುಮಾರಿ ವಾತೇನ ಖ್ಹಮ್‌ಜಾ಼ವಾಳು ಮಾರಿ ವಾತೆ ಖ್ಹಮ್‌ಜಾ಼ವಾಳು ಹುಯಿರ‍್ಹೂಸ್; ತುಮೂನ ಝಿಟ್ಕಾರವಾಳು ಮನ ಝಿಟ್ಕಾರವಾಳು ಹುಯಿರ‍್ಹೂಸ್; ಮನ ಝಿಟ್ಕಾರವಾಳು ಮನ ಮೋಕ್‌ಲ್ಯೊತೆ ಇನಾಸ್ ಝಿಟ್ಕಾರವಾಳು ಹುಯಿರ‍್ಹೂಸ್" ಕರಿ ಬೋಲ್ಯೊ.

ಬೇ ಉಪ್ಪರ್ ಖ್ಹಡ್‌ತೀನಿಖ್ಹ್ ಜ಼ಣು ಪಾಛು಼ಫರಿ ಆಯೂತೆ

17 ಯೋ ಬೇ ಉಪ್ಪರ್ ಖ್ಹಡ್‌ತೀನಿಖ್ಹ್ ಜ಼ಣು ಘಣು ಖ್ಹುಶಿಥಿ ಪಾಛು಼ಫರಿ ಆಯಿನ್, "ಪ್ರಭು, ತಾರು ನಾಮ್ ಬೋಲ್ತಾನ ಭೂತ್‌ಖ್ಹಾರು ಜಿನ್‌ಕುಬಿ ಹಮಾರಿ ಹುಕುಮ್‌ನ ಮಾನ್ಯು" ಕರಿ ಬೋಲ್ಯು.

18 ತದೆ ಯೇಸುನೆ ಇವ್ಣುನ, "ಶೈತಾನ್ ವಿಜ಼್‌ಳೀನಿಮತ್‌ ಪರ್‌ಲೋಕ್‌ಥು ಹೇಟ್ ಪಡಾತೆ ಮೇ ದೇಖ್ಯೊ. 19 ಹಂದೇಖೊ, ಖ್ಹಾಪ್‌ಪರ್‌ಬಿ, ವಿಛ್ಛಿಪರ್‌ಬಿ ಚಾ಼ಲಾನ ಅಜು಼ ದುಶ್‌ಮನ್ನಿ ಖ್ಹಾರೀಸ್‍ ಶಕತ್ನ ಹರಾವನ ಮೇ ತುಮೂನ ಅದಿಕಾರ್ ದೀರಾಖ್ಯೊಸ್. ಕೆಹೂಬಿ ತುಮೂನ ಖರಾಬ್ ಕೋ ಕರ್‌ಶೇನಿ. 20 ಕತೋಬಿ ಭೂತ್‌ಖ್ಹಾರು ತುಮಾರಿ ವಾತೇನ ಖ್ಹಮ್‌ಜಾ಼ಸ್‌ ಕರಿ ಬೋಲಿನ್ ಖ್ಹುಶಿ ನಕೊ ಕರೊ, ತುಮಾರು ನಾಮ್‌ಖ್ಹಾರು ಪರ್‌ಲೋಕ್‌ಮ ಲೀಖೈರ‍್ಹುಸ್ ಕರಿ ಬೋಲಿನ್ ಖ್ಹುಶಿ ಕರೊ".

ಯೇಸುನೆ ಖ್ಹುಶಿ ಕರ‍್ಯೊತೆ

21 ಯೋಸ್ ವಖ್ಹತ್‌ಮ ಯೇಸು ಪವಿತ್ರಾತ್ಮಥಿ ಖ್ಹುಶಿಹುಯಿನ್, ಅಮ್ ಪ್ರಾರ್ಥನೆ ಕರ‍್ಯೊ, "ಬಾ, ಸೊರ್ಗ ಅಜು಼ ಧರ್ತಿನೊ ಯಜಮಾನ್! ಮೇ ತುನ ಧನ್ಯವಾದ್‌ ಕರುಸ್. ಶನಕತೊ ತುನೆ ಗ್ಯಾನಿ ಅಜು಼ ಅಕ್ಲಿಥಿ ಆ ವಾತೇನ ಲಪಾಡಿನ್, ಲಡ್ಕಾವ್ನ ಮಾಲುಮ್ ಕರೈರಾಖ್ಯೋಸ್. ಓಹೋಲಾ ಬಾ, ಅಮ್ಮಸ್ ತೂ ಕರ‍್ನು ಕರಿ ಥೊ.

22 ಮಾರೊ ಬಾ ಮನ ಖ್ಹಾರುಸ್‌ ಮಾರ ಹಾತ್ಮ ದೀರಾಖ್ಯೊಸ್, ಛಿಯ್ಯೊ ಕೋಣ್ ಕರಿ ಬಾನಸ್ ಮಾಲುಮ್ ಪಣ್ಕಿ ಬಿಜಾ಼ನ ಕಾಹೆ. ಬಾ ಕೋಣ್ ಕರಿ ಛಿಯ್ಯೋಸ್ ಪಣ್ಕಿ ಬಿಜು಼ ಕೋಣ್‌ಬಿ ಮಾಲುಮ್ ಕೋಕರಿರಾಖ್ಯೂನಿ. ಅಜು಼ ಛಿಯ್ಯೊ, ಕಿನ ಬಾನಿ ಬಾರೇಮ ಮಾಲುಮ್ ಕರಾವಸ್ಕಿ, ಇವ್ಣೆಸ್ ಬಾನ ಮಾಲುಮ್‌ ಕರಿಲ್ಯವಾಳು ಹುಯಿರ‍್ಹೂಸ್".

23 ಅನ ಬಾದ್‌ಮ ಯೇಸುನೆ ಇನ ಶಿಷ್ಯರ್‌ ಭಣಿ ಫರೀನ್, ಖಲಿ ಇವ್ಣುನ ಬೋಲ್ಯೋಕಿ, "ತುಮೆ ದೇಖುಕರಾಸ್ತೆ ಆ ಖ್ಹಾರು ದೇಖವಾಳು ಧನ್ಯರ್ ಹುಯಿರ‍್ಹೂಸ್! 24 ಶನಕತೊ ಘಣು ಪ್ರವಾದಿಖ್ಹಾರು ಅಜು಼ ರಾಜ಼ಖ್ಹಾರು ತುಮೆ ದೇಖುಕರಾತೆ ಆ ಖ್ಹಾರಾನ ದೇಕ್ಣು ಕರಿ ಆಖ್ಹ್ ಕರ‍್ಯುತೋಬಿ, ಇವ್ಣೆ ದೇಖ್ಯು ಕೊಯ್ನಿ. ತುಮೆ ಖ್ಹಮ್‌ಜು಼ಕರಾತೆ ಖ್ಹಮಜ಼್‌ಣು ಕರಿ ಆಖ್ಹ್‌ ಕರ‍್ಯುತೋಬಿ ಖ್ಹಮ್‌ಜ್ಯು ಕೊಯ್ನಿ ಕರಿ ಮೇ ತುಮೂನ ಬೋಲುಸ್".

ಯೇಸುನೆ ಗೋರ್‌ಕರಾವಾಳೊ ಸಮಾರಿಯಾನಿ ಮತ್ಲಬ್‌ನಿ ಖೇಣಿನ ಬೋಲ್ಯೋತೆ

25 ತದೆ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿ ಏಕ್‌ ಜ಼ಣು ಉಠಿ ಐನ್, ಯೇಸುನ ಖ್ಹಪ್‌ಡಾವ್ಣು ಕರಿ, "ಗುರು, ಹಮೇಶಾನಿ ಜಿ಼ಂದ್‌ಗಿ ಮಳ್‌ಣುಕತೊ ಮೇ ಶಾತ್‌ ಕರ‍್ನು? ಕರಿ ಯೇಸುನ ಫುಛಾ಼ಯೊ.

26 ತದೆ ಯೇಸುನೆ ಇನ, "ಮೋಶೇನು ಧರ್ಮಶಾಸ್ತ್ರಮ ಶಾತ್‌ ಲಿಖೈರ‍್ಹುಸ್? ಇನ ತೂ ಕಿಮ್ ಪಢ್ಯೋಥೊ?" ಕರಿ ಪುಛಾ಼ಯೊ.

27 ಇನೆ ಜವಾಬ್‌ ದಿದೋಕಿ, "ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ, ತಾರೊ ಪೂರ ದಿಲ್‌ಥೀಬಿ, ತಾರೊ ಪೂರ ಜಾನ್‍ಥೀಬಿ, ತಾರಿ ಪೂರ ಶಕತ್‌ಥೀಬಿ, ತಾರೊ ಪೂರ ಮನ್‌ಥೀಬಿ ಪ್ಯಾರ್ ಕರ‍್ನು, ಅಜು಼ ತಾರ ಭೀಡೆವಾಳಾನ ತಾರೀನಿಘೋಣಿಸ್ ಪ್ಯಾರ್ ಕರ‍್ನು ಕರಿ ಲಿಖೈರ‍್ಹುಸ್" ಕರಿ ಜವಾಬ್‌ ದಿದೊ.

28 ಯೇಸುನೆ ಇನ, "ತುನೆ ಬರಾಬರ್‌ಥಿ ಜವಾಬ್‌ ದಿದೊ. ಇಮ್ಮಸ್ ಕರ್‌, ತದೆ ತೂ ಕದೇಬಿ ಜಿವ್ತು ರ‍್ಹೀಶ್ ಕರಿ ಬೋಲ್ಯೊ.

29 ಕತೋಬಿ ಯೋ ಅದ್ಮಿ ಇನುಯೋಸ್ ಖ್ಹಾಚು಼ ಕರಿ ಬೋಲಿ ವತಾಳಿಲ್ಯಾವನಖ್ಹಾಜೆ ಆಖ್ಹ್‌ಕರೀನ್, "ಮಾರು ಭೀಡೆವಾಳು ಕತೊ ಕೋಣ್?" ಕರಿ ಯೇಸುನ ಪುಛಾ಼ವಖ್ಹತರ್;

30 ಯೇಸು ಇನ ಜವಾಬ್‌ ದೇತೊಹುಯಿನ್ ಬೋಲ್ಯೋಕಿ, "ಏಕ್‌ ಅದ್ಮಿ ಯೆರೂಸಲೇಮ್‌ಥು ಟೇಕ್ಡಿ ಉತ್ರಿನ್, ಯೆರಿಕೋ ಜಾ಼ವಾನಿ ವಖ್ಹತ್‌ಮ, ಚೋ಼ರ‍್ನ ಹಾತ್‌ಮ ಖ್ಹಪ್‌ಡಿಗಯು. ಇವ್ಣೆ ಇನಾಕನ ಥೂತೆ ಖ್ಹಾರೂಸ್ ಲೂಟಿಲೀನ್, ಮರ್‌ವಾಯೆತ್ರೆ ಮಾರ್‌ತೋಡ್ ಕರೀನ್, ಮ್ಹೆಂದಿನ್ ಚ಼ಲ್ಯೂಗಯು. 31 ತದೆ ಕಿಮ್ಕಿ, ಏಕ್‌ ಯಾಜಕ್ ಯೋಸ್ ವಾಟೆಕರಿ ಉತ್ರಿನ್ ಜಾ಼ವಾನಿ ವಖ್ಹತ್‌ಮ, ಇನ ದೇಖಿನ್, ವೇಢೀನ್ ಚ಼ಲೆಗಯೊ. 32 ಇಮ್ಮಸ್ ಏಕ್‌ ಲೇವಿಬಿ ಯೋ ಝ಼ಗೋಕನ ಆಯಿನ್, ಇನ ದೇಖಿನ್, ಮ್ಹೋಡು ಕರ್ವಟ್‌ ಕರಿಲೀನ್, ಬಿಜೇಕ್ ವಾಟೆ ಚ಼ಲೆಗಯೊ. 33 ಕತೋಬಿ ಏಕ್‌ ಸಮಾರ್ಯವಾಳು ಚಾ಼ಲ್ತೊಹುಯಿನ್‌, ಯೋ ಥೋತೆ ಹಿಜ್ಜಾ಼ ಐನ್, ಇನ ದೇಖಿ ಗೋರ್‌ಖೈನ್, 34 ಇನ ಖನ್ನೆ ಜೈ಼ನ್, ಇನ ಘಾವ್‌ಪರ್ ತೇಲ್ ಅಜು಼ ದ್ರಾಕ್ಷಿನು ಕಂದಾಯುಹುಯು ರಖ್ಹ್‌ನ ನಾಖಿನ್, ಭಾಂದ್ಯು. ಅಜು಼ ಇನು ಶೊಂತ್ ಪಾಳ್ಯುಹುಯಾ ಜಾನ್ವರ್‌ಪರ್ ಇನ ಪಳ್ಳಿನ್‌, ಮಂಡಪ್‌ಕನ ಬುಲೈಲಿ ಜೈ಼ನ್, ಇನಿ ಚಾ಼ಕ್ರಿ ಕರ‍್ಯೊ. 35 ತಿನವ್ಹಾಣೆ ಯೋ ಸಮಾರಿಯವಾಳಾನೆ ಬೇ ರೂಪಾನು ಬಿಲ್ಲಾನ ಕಾಡಿನ್, ಛತ್ತರ್‌ವಾಳಾನ ದೀನ್, "ಅನ ದೇಕ್-ಭಾಲ್ ಕರ್‌, ಆ ಪೈಶಾಥಿ ಜಾ಼ಖ್ಹತ್ ಶಾತ್‌ತೋಬಿ ಖರ್ಚಿ ಹುಯೂತೊ, ಮೇ ಪಾಛೊ಼ಫರಿ ಆಯಿಶ್‍ತೆ ತದೆ ತುನ ದಿಶ್" ಕರಿ ಬೋಲ್ಯೊ.

36 "ಆ ತೀನ್ ಜ಼ಣಾಮ ಚೋ಼ರ್‌ನ ಹಾತ್‌ಮ ಖ್ಹಪ್‌ಡ್ಯೂತೆ ಇನ, ಖನ್ನೆವಾಳಾನಿಘೋಣಿ ಹುಯೋತೆ ಕೋಣ್ ಕರಿ ತುನ ಸೋಚಾ಼ವಸ್?" ಕರಿ ಪುಛಾ಼ಯೊ.

37 ತದೆ ಯೋ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿ, "ಇನಾಪರ್ ಗೋರ್‌ ಕರ‍್ಯೊತೆ ಯೋಸ್" ಕರಿ ಜವಾಬ್‌ ದಿದೊ.

ತದೆ ಯೇಸುನೆ ಇನ, "ಜಾ಼, ತೂಬಿ ಇಮ್ಮಸ್ ಕರ್‌" ಕರಿ ಬೋಲ್ಯೊ.

ಯೇಸು ಮಾರ್ಥ ಅಜು಼ ಮರಿಯನ ಘರೆ ಗಯೋತೆ

38 ಯೇಸುಬಿ ಇನು ಶಿಷ್ಯರ್‌ ಫರ್ತುಹುಯಿನ್ ಏಕ್‌ ಗಾಮ್ಮ ಆಯು. ಹಿಜ್ಜಾ಼ ಮಾರ್ಥ ಕರಿ ನಾಮ್ನಿ ಏಕ್‌ ಜ಼ಣಾನೆ ಯೇಸುನ ಇನ ಘರ್‌ಮ ಬುಲೈಲಿದಿ. 39 ಮಾರ್ಥನ ಮರಿಯ ಕರಿ ಏಕ್‌ ನ್ಹಾನಿ ಭೇನ್ ಥಿ. ಆ ಪ್ರಭುನ ಗೋಡಾಕನ ಬೇಶಿನ್, ಇನಿ ವಚನ್ನ ಖ್ಹಮ್‌ಜು಼ಕರ್‌ತೀಥಿ. 40 ಜಾ಼ಖ್ಹತ್ ಕಾಮ್ ಥೂತೆ ಇನಖ್ಹಾಜೆ ಮಾರ್ಥನೆ ಖಟುಖೈನ್, ಯೇಸುಕನ ಆಯಿನ್, "ಪ್ರಭು, ಮಾರಿ ಭೇನ್ ಮನ ಎಕ್ಕಸ್ ಜ಼ಣಿನ ಕಾಮ್ ಕರಾದೆಕರಿ ಮ್ಹೇಲಿದಿದೀನಿ, ಆ ಬಾರೇಮ ತುನ ಫಿಕರ್ ಕೊಯ್ನಿಕಿ ಶು? ಮನ ಮದತ್ ಕರಾದೆ ಕರಿ ಇನ ಬೋಲ್‌ಕರಿ ಬೋಲಿ.

41 ಕತೋಬಿ ಪ್ರಭುನೆ ಇನ, "ಮಾರ್ಥ, ಮಾರ್ಥ ತೂ ಕಾಮ್ನಕೊಂತೆ, ವೇಚ಼್‌ಣೆಮಾಬಿ, ಘಬ್ರಾಟಿಮಾಬಿ ಖ್ಹಪ್‌ಡಿರ‍್ಹೀಸ್. 42 ಕತೋಬಿ ಜ಼ರೂರತ್‌ ಹೋಣುತೆ ಎಕ್ಕಸ್, ಮರಿಯನೆ ಅಛ಼್ಛು ಚೂ಼ಣಿರಾಖಿಸ್, ಕೋಣ್‌ಬಿ ಇನೇಥಿ ಯೋ ಕಾಡಾನ ಕೋ ಉಶೇನಿ" ಕರಿ ಬೋಲ್ಯೊ.