30 ಯೇಸು ಇನ ಜವಾಬ್ ದೇತೊಹುಯಿನ್ ಬೋಲ್ಯೋಕಿ, "ಏಕ್ ಅದ್ಮಿ ಯೆರೂಸಲೇಮ್ಥು ಟೇಕ್ಡಿ ಉತ್ರಿನ್, ಯೆರಿಕೋ ಜಾ಼ವಾನಿ ವಖ್ಹತ್ಮ, ಚೋ಼ರ್ನ ಹಾತ್ಮ ಖ್ಹಪ್ಡಿಗಯು. ಇವ್ಣೆ ಇನಾಕನ ಥೂತೆ ಖ್ಹಾರೂಸ್ ಲೂಟಿಲೀನ್, ಮರ್ವಾಯೆತ್ರೆ ಮಾರ್ತೋಡ್ ಕರೀನ್, ಮ್ಹೆಂದಿನ್ ಚ಼ಲ್ಯೂಗಯು. 31 ತದೆ ಕಿಮ್ಕಿ, ಏಕ್ ಯಾಜಕ್ ಯೋಸ್ ವಾಟೆಕರಿ ಉತ್ರಿನ್ ಜಾ಼ವಾನಿ ವಖ್ಹತ್ಮ, ಇನ ದೇಖಿನ್, ವೇಢೀನ್ ಚ಼ಲೆಗಯೊ. 32 ಇಮ್ಮಸ್ ಏಕ್ ಲೇವಿಬಿ ಯೋ ಝ಼ಗೋಕನ ಆಯಿನ್, ಇನ ದೇಖಿನ್, ಮ್ಹೋಡು ಕರ್ವಟ್ ಕರಿಲೀನ್, ಬಿಜೇಕ್ ವಾಟೆ ಚ಼ಲೆಗಯೊ. 33 ಕತೋಬಿ ಏಕ್ ಸಮಾರ್ಯವಾಳು ಚಾ಼ಲ್ತೊಹುಯಿನ್, ಯೋ ಥೋತೆ ಹಿಜ್ಜಾ಼ ಐನ್, ಇನ ದೇಖಿ ಗೋರ್ಖೈನ್, 34 ಇನ ಖನ್ನೆ ಜೈ಼ನ್, ಇನ ಘಾವ್ಪರ್ ತೇಲ್ ಅಜು಼ ದ್ರಾಕ್ಷಿನು ಕಂದಾಯುಹುಯು ರಖ್ಹ್ನ ನಾಖಿನ್, ಭಾಂದ್ಯು. ಅಜು಼ ಇನು ಶೊಂತ್ ಪಾಳ್ಯುಹುಯಾ ಜಾನ್ವರ್ಪರ್ ಇನ ಪಳ್ಳಿನ್, ಮಂಡಪ್ಕನ ಬುಲೈಲಿ ಜೈ಼ನ್, ಇನಿ ಚಾ಼ಕ್ರಿ ಕರ್ಯೊ. 35 ತಿನವ್ಹಾಣೆ ಯೋ ಸಮಾರಿಯವಾಳಾನೆ ಬೇ ರೂಪಾನು ಬಿಲ್ಲಾನ ಕಾಡಿನ್, ಛತ್ತರ್ವಾಳಾನ ದೀನ್, "ಅನ ದೇಕ್-ಭಾಲ್ ಕರ್, ಆ ಪೈಶಾಥಿ ಜಾ಼ಖ್ಹತ್ ಶಾತ್ತೋಬಿ ಖರ್ಚಿ ಹುಯೂತೊ, ಮೇ ಪಾಛೊ಼ಫರಿ ಆಯಿಶ್ತೆ ತದೆ ತುನ ದಿಶ್" ಕರಿ ಬೋಲ್ಯೊ.
36 "ಆ ತೀನ್ ಜ಼ಣಾಮ ಚೋ಼ರ್ನ ಹಾತ್ಮ ಖ್ಹಪ್ಡ್ಯೂತೆ ಇನ, ಖನ್ನೆವಾಳಾನಿಘೋಣಿ ಹುಯೋತೆ ಕೋಣ್ ಕರಿ ತುನ ಸೋಚಾ಼ವಸ್?" ಕರಿ ಪುಛಾ಼ಯೊ.
37 ತದೆ ಯೋ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿ, "ಇನಾಪರ್ ಗೋರ್ ಕರ್ಯೊತೆ ಯೋಸ್" ಕರಿ ಜವಾಬ್ ದಿದೊ.
ತದೆ ಯೇಸುನೆ ಇನ, "ಜಾ಼, ತೂಬಿ ಇಮ್ಮಸ್ ಕರ್" ಕರಿ ಬೋಲ್ಯೊ.
/images/a/6c03efee-c76a-4ab8-fe2e-555683f90900)
/images/a/9ec55bb8-7dc5-47b9-c32a-98aea1c00300)