ಯೇಸುನೆ ಖೋಡ್ ಲಾಗಿಹುಯು ದಖ್ಹ್ ಅದ್ಮಿನ ಗುಣ್ಕರ್ಯೋತೆ
11 ಯೇಸು ಯೆರೂಸಲೇಮ್ ಭಣಿ ಒಳೆಜಾ಼ತೊಥೋತೆ ತದೆ, ಗಲಿಲಾಯ ಅಜು಼ ಸಮಾರ್ಯ ತಬರ್ಖಾನು ಇಚ಼್ಮಾನಿ ವಾಟೆಕರಿ ಗಯೊ. 12 ಏಕ್ ಗಾಮ್ಮ ಆವಾದಿನ್, ಹಿಜ್ಜಾ಼ ಖೋಡ್ ಲಾಗಿರ್ಹೂಥೂತೆ ದಖ್ಹ್ ಜ಼ಣು ಇನಖ್ಹಾಮ್ಣೆ ಆಯಿನ್, ದೂರ್ ಭೀರಿನ್, 13 "ಯೇಸು, ಗುರೂ, ಹಮಾರಪರ್ ಗೋರ್ಕರ್!" ಕರಿ ಚಿಕ್ರಿನ್ ಬೋಲ್ಯು.
14 ಯೇಸುನೆ ಇವ್ಣುನ ದೇಖಿನ್, "ತುಮೆ ಜೈ಼ನ್, ಯಾಜಕವ್ನ ತುಮಾರು ಆಂಗ್ತನ್ ವತಾಳೊ" ಕರಿ ಬೋಲ್ಯೊ. ಇವ್ಣೆ ಜಾ಼ವನಿ ವಖ್ಹತ್ಮಸ್, ಇವ್ಣೆ ಪಾಕ್ ಹುಯಿಗಯು. 15 ಇವ್ಣಾಮ ಏಕ್ ಜ಼ಣು ಇನ ಅಛ್ಛು಼ ಹುಯೂತೆ ದೇಖಿನ್, ಚೋ಼ರ್ ಆವಾಜ಼್ಥಿ, ದೇವ್ನಿ ಖ್ಹರಾವ್ಣಿ ಕರ್ತುಹುಯಿನ್, ಪಾಛು಼ಫರಿ ಆಯು. 16 ಯೋ ಯೇಸುನ ಗೋಡಾಪರ್ ಪಡೀನ್, ಇನ ಧನ್ಯವಾದ್ ಕರ್ಯು. ಯೋ ಸಮಾರ್ಯವಾಳೊ ಹುಯಿರ್ಹೋಥೊ. 17 ತದೆ ಯೇಸುನೆ ಇನ, "ದಖ್ಹ್ ಜ಼ಣಾನ ಅಛ್ಛು಼ ಹುಯೂನಿ? ಬಿಜು಼ ನೌ ಜ಼ಣ ಕ್ಯಾ?" ಕರಿ ಪುಛಾ಼ಯೊ. 18 ದೇವ್ನಿ ಸ್ತುತಿ ಕರಾನಖ್ಹಾಜೆ, ಆ ಪರೈ ದೇಖ್ಹ್ವಾಳಾನ ಮ್ಹೆಂದಿನ್, ಬಿಜು಼ ಕೋಣ್ಬಿ ಪಾಛು಼ಫರಿ ಆಯು ಕೊಯ್ನಿ ಶು? ಕರಿ ಬೋಲ್ಯೊ. 19 ಅಜು಼ ಯೇಸುನೆ ಇನ, "ಉಪ್ಪರ್ ಉಠೀನ್, ಜಾ಼; ತಾರಿ ವಿಶ್ವಾಸ್ಥೀಸ್ ತುನ ಅಛ್ಛು಼ಕರ್ಯು" ಕರಿ ಬೋಲ್ಯೊ.
/images/a/6c03efee-c76a-4ab8-fe2e-555683f90900)
/images/a/9ec55bb8-7dc5-47b9-c32a-98aea1c00300)