ಯೇಸುನೆ ಧರಮ್ ಮಾಂಗವಾಳ ಕಾಣಾನ ಗುಣ್ಕರ್ಯೋತೆ
35 ಯೇಸು ಯೆರಿಕೋನ ಖನ್ನೆ ಆವ್ಕರಾನಿ ವಖ್ಹತ್ಮ, ಹಿಜ್ಗಾ಼ ಮಾರಗ್ನ ಶೇಡೆ ಬೇಶಿನ್, ಏಕ್ ಕಾಣು ಧರಮ್ ಮಾಂಗುಕರ್ತುಥು. 36 ಅದ್ಮಿನಿ ಭೀಡ್ ವಳಿಜಾ಼ತಿಥೀತೆ ಖ್ಹಮ್ಜಿನ್, ಇನೆ, "ಆ ಶಾತ್ ಚಾ಼ಲುಕರಾಸ್ತೆ?" ಕರಿ ಪುಛಾ಼ಯೊ.
37 ಇವ್ಣೆ ಇನ, "ನಜ಼ರೇತ್ನೊ ಯೇಸು, ಆ ವಾಟೆ ಕರಿ ವಳೇಜಾ಼ಸ್" ಕರಿ ಬೋಲ್ಯು.
38 ತದೆ ಯೋ ಕಾಣು ಜೋ಼ರೆಥಿ ಚಿಕ್ರಿನ್, "ಯೇಸು! ದಾವೀದ್ನ ಛಿಯ್ಯಾ! ಮಾರಪರ್ ಗೋರ್ಕರ್" ಕರಿ ಬೋಲ್ಯೊ.
39 ಖ್ಹಾಮ್ಣೆ ವಳ್ಯುಜಾ಼ತುಥೂತೆ ಅದ್ಮಿ ಇನ, "ಖ್ಹೊಪ್ ರ್ಹೆ" ಕರಿ ಬೋಲಿನ್ ಗುರ್ಕಾಯು. ಕತೋಬಿ ಯೋ ಬಿಜೂ಼ಬಿ ಜೋ಼ರೇಥಿ ಚಿಕ್ರಿನ್, "ದಾವೀದ್ನ ಛಿಯ್ಯಾ! ಮಾರಪರ್ ಗೋರ್ ಕರ್" ಕರಿ ಬೋಲ್ಯೊ.
40 ತದೆ ಯೇಸುನೆ ಭೀರಿನ್, ಯೋ ಕಾಣಾನ ಇನಾಕನ ಬುಲಾವೊ ಕರಿ ಹುಕುಮ್ ದಿದೊ. ಯೋ ಕಾಣು ಖನ್ನೆ ಆವಾದಿನ್, ಯೇಸುನೆ ಇನ, 41 "ಮೇ ತುನ ಶಾತ್ ಕರ್ನು ಕರಿ ತಾರಿ ಆಖ್ಹ್?" ಕರಿ ಪುಛಾ಼ಯೊ.
ತದೆ ಇನೆ, "ಮನ ಪಾಛು಼ ದೆಖಾವಾನಿ ಘೋಣಿ ಕರ್ಲಾ ಪ್ರಭು" ಕರಿ ಬೋಲ್ಯೊ.
42 ಯೇಸುನೆ ಇನ, "ತುನ ದೆಖಾವಾದೆ, ತಾರಿ ವಿಶ್ವಾಸ್ಥೀಸ್ ತುನ ಅಛ್ಛು಼ಹುಯು" ಕರಿ ಬೋಲ್ಯೊ.
43 ತದ್ನು-ತದ್ದೇಸ್ ಇನ ದೆಖಾಯು. ಯೋ ದೇವ್ನಿ ಸ್ತುತಿ ಕರ್ತೊಹುಯಿನ್, ಯೇಸುನ ಪೀಠೆ ಗಯೊ. ಅದ್ಮಿಖ್ಹಾರು ಚಾ಼ಲ್ಯುತೆ ಇನ ದೇಖಿನ್, ದೇವ್ನಿ ಸ್ತುತಿಕರ್ಯು.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)