Lucas 24

ಯೇಸು ಪಾಛೊ಼ ಜಿವ್ತೊಹುಯಿನ್ ಉಠ್ಯೊತೆ

1 ವಾರಾನು ಪಹಿಲದನ್ನೆ,*24:1 ಯೆಹುದ್ಯರ್‌ ಲೋಗ್‌ನಿ ಇಶಾಬ್‌ಮ ವಾರಾನೊ ಪಹಿಲೊ ದನ್ ಕತೊ, ಐತ್‌ವಾರ್ ನತರ್‌ಕಿ ಐತ್‌ವಾರ್ ಕರಿ. ಅಧಿರ‍್ಹೇಣೆಸ್‌ ಯೋ ತಯೇಡ ಖ್ಹಾರಿ, ಇವ್ಣೆ ಖ್ಹವಾರಿಯೆಥೀತೆ ಅಛ್ಛು಼ ವಾನುತೇಲ್‌ನ ಪಳ್ಳಿನ್‌, ಘವಿಕನ ಗಯ್ಯೆ. 2 ಘವಿನ ಮೂಚಿರಾಖ್ಯುಥೂತೆ ಬಂಡೊ ನಿಕ್‌ಳೈರ‍್ಹೂಥೂತೆ ಇವ್ಣೆ ದೇಖಿನ್, 3 ಘವಿನ ಮಹಿ ಗಯ್ಯೆ, ಕತೋಬಿ ಹಿಜ಼್ಜಾ ಯೇಸು ಪ್ರಭುನು ಶರೀರ್ ಇವ್ಣುನ ಮಳ್ಯುಕೊಯ್ನಿ. 4 ಇವ್ಣೆ ಭೀರಿನ್, ಅನಿ ಬಾರೇಮ ಘಬ್ರಾವ್‌ಕರಾನಿ ವಖ್ಹತ್‌ಮ, ಚ಼ಮಕ್‌ತು ಲುಂಗ್ಡು ಫೇರಿರಾಖ್ಯುಥೂತೆ ಬೇ ಪರ್ಖ್ಹಾ ಐನ್, ಇವ್ಣಾಕನ ಭೀರ‍್ಯು. 5 ಯೋ ತಯೇಡ ಖ್ಹಾರಿ ಡರಿಗಯೇಥಿ. ಜ಼ಮೀನ್‍ತರಬ್‍ ಮುಡ್‌ಕ್ಯು ಝು಼ಕೈನ್‌, ಭೀರಿಗಯ್ಯೆ. ತದೆ ಇವ್ಣೆ ಇನ, "ಜಿವ್ತೊ ಹುಯಿನ್ ಉಠಿರ‍್ಹೋಸ್ತೆ ಇನ, ಮರ‍್ಯಾಹುಯಾಮ ಶನ ಢೂಂಡುಕರಾಸ್ತೆ? 6 ಯೋ ಹಜ್ಜಾ಼ ಕೊಯ್ನಿ, ಉಠಿರ‍್ಹೋಸ್. ಯೋ ಗಲಿಲಾಯಮ ತುಮಾರ ಜೋ಼ಡೆ ಥೋತೆ ತದೆ, ಬೋಲ್ಯೊಥೋತೆ ಇನ ಯಾದ್ ಕರಿಲೆವೊ. 7 ಅದ್ಮಿನೊ ಛಿಯ್ಯೊ ಪಾಪಿ ಅದ್ಮಿನ ಹಾತ್‌ಮ ದೆವೈನ್, ಶಿಲ್‌ಬೆಪರ್ ನಖೈನ್, ತೀನ್ನ ದನ್ಮ ಪಾಛೊ಼ ಉಠಿ ಆವ್‍ಶೆಕರಿ ಬೋಲ್ಯೊಥೋನಿ" ಕರಿ ಬೋಲ್ಯು.

8 ತದೆ ಯೋ ತಯೇಡ ಖ್ಹಾರಿ ಯೇಸುನಿ ವಾತೆನ ಯಾದ್ ಕರಿಲೀನ್, 9 ಮಖ್ಹಾಣ್ಯನಿ ಘವಿಕಂಥು ಪಾಛು಼ಫರಿ ಜೈ಼ನ್, ಗ್ಯಾರ‍್ಹ ಜ಼ಣ ಶಿಷ್ಯರ್‌ನ ಅಜು಼ ಬಿಜ಼ ಖ್ಹಾರಾನ ಅನಿ ಬಾರೇಮ ಬೋಲಿಯೆ. 10 ಯೋ ಖ್ಹಾರಿ ತಯೇಡ ಕೋಣ್-ಕೋಣ್ ಕತೊ, ಮಗ್ದಲನಿ ಮರಿಯ, ಯೋಹಾನ್ನ, ಯಾಕೋಬ್‍ನಿ ಆಯ ಮರಿಯ; ಅವ್ಣೆ ಅಜು಼ ಅವ್ಣ ಜೋ಼ಡೆ ಥೀತೆ ಬಿಜಿ ತಯೇಡ ಖ್ಹಾರಿ ಅನಿ ಬಾರೇಮ, ಅಪೊಸ್ತಲರ‍್ನ ಬೋಲಿಯೆ. 11 ಕತೋಬಿ, ಅಪೊಸ್ತಲರ್ ಖ್ಹಾರು ಅವ್ಣಿ ವಾತೇನ ವಿಶ್ವಾಸ್ ಕರ‍್ಯುಕೊಯ್ನಿ. ಆ ಖ್ಹಾರಿ ವಾತೆ ಚು಼ಪ್‌ಕೇನಿಸ್ ಕರಿ ಸೋಚ್ಯು. 12 ಕತೋಬಿ ಪೇತ್ರನೆ ಉಠೀನ್, ಘವಿಕನ ನಾಶಿಜೈ಼ನ್, ಮಹಿ ಝು಼ಕಿ ದೇಖಿನ್, ಲಪೇಟಿಥೂತೆ ಘಣ ಮೋಲ್ನು ಲುಂಗ್ಡಾನಸ್ ಪಣ್ಕಿ ಬಿಜು಼ ಶಾತ್ಬಿ ದೇಖ್ಯೊ ಕೊಯ್ನಿ. ತದೆ ಪೇತ್ರನೆ ಚಾ಼ಲ್ಯುತೆ ಇನಿ ಬಾರೇಮ ಆಶ್ಚರ್ಯ ಖಾತೊಹುಯಿನ್, ಘರೆ ಚ಼ಲೆಗಯೊ.

ಎಮ್ಮಾಹು ಕರಿ ಗಾಮ್‌ನ ಚಾ಼ಲಿಗಯೂತೆ ಬಾರೇಮ

13 ಯೋಸ್ ದನ್ನೆ ಯೇಸುನು ಶಿಷ್ಯರ್‌ಮ ಬೇ ಜ಼ಣ, ಯೆರೂಸಲೇಮ್‌ಥು ಗ್ಯಾರ‍್ಹ ಕಿಲೊ ಮೀಟರ್ ಥೂತೆ, ಎಮ್ಮಾಹು ಕರಿ ನಾಮ್ನ ಗಾಮೆ ವಳ್ಯಜಾ಼ತಾಥ. 14 ಚಾ಼ಲ್ಯುತೆ ಯೋ ಖ್ಹಾರಿಸ್ ಬಾರೇಮ, ಇವ್ಣೆ ವಾತೆ ಬೋಲ್ತಾಹುಯಿನ್, ಒಳೆಜಾ಼ತಾಥ. 15 ಇವ್ಣೆ ಏಕ್‌ಥಿ-ಏಕ್‌ ವಾತೆ ಬೋಲುಕರಾನಿ ವಖ್ಹತ್‌ಮ, ಯೇಸುಸ್‌ ಖ್ಹುದ್ ಇವ್ಣ ಖನ್ನೆ ಆಯಿನ್, ಇವ್ಣ ಜೋ಼ಡೆ ಚಾ಼ಲ್ತೊ ಗಯೊ. 16 ಇವ್ಣೆ ಇನದೇಖ್ಯು, ಕತೋಬಿ ಇನಿ ಖ್ಹಣೇದ್ ಧರ‍್ಯುಕೊಯ್ನಿ. 17 ತದೆ ಯೇಸುನೆ ಇವ್ಣುನ, "ತುಮೆ ತುಮಾರ-ತುಮಾರಸ್‌ಮ ಶಾತ್‌ ಬೋಲ್ತಾಹುಯಿನ್, ಚಾ಼ಲ್ತ ವಳೆಜಾ಼ಸ್ತೆ?" ಕರಿ ಪುಛಾ಼ಯೊ.

ತದೆ ಇವ್ಣೆ ಮ್ಹೋಡು ಮುರ್‌ಝೈ಼ಲೀನ್‌, ಭೀರಿಗಯು, 18 ಇವ್ಣಾಮ, ಕ್ಲಿಯೋಫಸ್ ಕರಿ ನಾಮ್ನೊ ಏಕ್‌ ಜ಼ಣಾನೆ, "ಯೆರೂಸಲೇಮ್‌ ಬಹಾರ್‌ಥು ಆಯೂತೆ ಹರೇಕ್ನ, ಆ ದನೂಮ ಹಾ ಚಾ಼ಲಿರ‍್ಹೀಸ್ತೆ ವಾತೆನಿ ಬಾರೇಮ, ಮಾಲುಮ್‌ ರ‍್ಹವಾಪರ್ ತುನ ಮಾಲುಮ್ ಕೊಯ್ನಿಕಿ ಶು?" ಕರಿ ಪುಛಾ಼ಯೊ.

19 ತದೆ ಯೇಸುನೆ, "ಖೆವಿ ವಾತೆ?" ಕರಿ ಪುಛಾ಼ಯೊ.

ಇನ ಇವ್ಣೆ, "ನಜ಼ರೇತ್‌ನೊ ಯೇಸುನಿ ಬಾರೇಮ, ಯೊ ದೇವ್ನ ಅಜು಼ ಅದ್ಮಿನ ಡೋಳಾಮ ಪ್ರವಾದಿ ಹುಯಿರ‍್ಹೋಥೊ, ಕಾಮ್ಮಬಿ ಅಜು಼ ವಾತೇಮಾಬಿ ಮೋಟೊ ಪ್ರವಾದಿಹುಯಿರ‍್ಹೋಥೊ. 20 ಹಮಾರ ಮಹಾಯಾಜಕ ಅಜು಼ ಅದಿಕಾರಿಖ್ಹಾರು ಇನ ಮರಣ್ ದಂಡನೆ ದೀನ್, ಶಿಲ್‌ಬೆಪರ್ ಛ಼ಡಾಯು. 21 ಹಮೇತೊ, ಇಸ್ರಾಯೇಲ್‌ ಅದ್ಮಿವೋನ ಛೋ಼ಡಾವವಾಳೊ ಯೋಸ್ ಕರಿ ಭರೋಖ್ಹೊ ಕರಿರಾಖ್ಯಥ! ಯೋ ಖ್ಹಾರು ಚಾ಼ಲಿನ್, ಹಮ್ಕೆ ತೀನ್ ರೋಜ಼್‌ ಹುಯ. 22 ತೋಬಿ ಹಮಾರಮ ಥೋಡಿ ತಯೇಡ ಖ್ಹಾರಿ, ಆಶ್ಚರ್ಯನು ವಾತೆನ ಬೋಲಿಯೆ; ಇವ್ಣೆ ವ್ಹಾಣೇಸ್ ವೇಳಿ ಘವಿಕನ ಜೈ಼ನ್, 23 ಯೇಸುನು ಶರೀರ್ ಹಿಜ಼್ಜಾಕೊಂತೆ ದೇಖಿನ್, ಪಾಛು಼ಫರಿ ಐನ್, ಇವ್ಣೆ ದೇವ್‌ನು ದೂತರ್‌ನ ದೇಖಿಯೆ಼ ಅಜು಼ ಯೋ ಜಿವ್ತೊ ಹುಯಿರ‍್ಹೋಸ್ ಕರಿ ಬೋಲಿಯೆ. 24 ಹಮಾರ ಜೋ಼ಡೆ ಥೂತೆ ಇವ್ಣಾಮ ಥೋಡುಜ಼ಣು ಮಖ್ಹಾಣ್ಯಕನ ಜೈ಼ನ್ ಯೋ ಖ್ಹಾರಿ ತಯೇಡ ಬೋಲಿತೆ ಇಮ್ಮಸ್ ದೇಖ್ಯು. ಕತೋಬಿ ಯೇಸುನ ಕೋ ದೇಖ್ಯೂನಿ" ಕರಿಬೋಲ್ಯಾ.

25 ತದೆ ಯೇಸುನೆ ಇವ್ಣುನ, "ಅಲ ಬಿಣ್‍ಖ್ಹೈಲಾ, ಪ್ರವಾದಿಯೇನೆ ಬೋಲ್ಯಾತೆ ಇನ ವಿಶ್ವಾಸ್‌ ಕರಾಕೊಂತೆ ಮಂದ್‌ ದಿಲ್‌ವಾಳಾವೊ, 26 ಕ್ರಿಸ್ತ ಅಮ್ನಿಖ್ಹಾರಿ ಖ್ಹತಾಪ್ಣಿ ಖೈನ್, ಇನಿ ಮಹಿಮೆಮ ಜಾ಼ವಾನು, ಜ಼ರೂರತ್ ಛಾ಼ನಿ ಕರಿ ಬೋಲಿನ್, 27 ಮೋಶೆಥು ಧರೀನ್, ಖ್ಹಾರ ಪ್ರವಾದಿಯೇನು ಅಖ್ಖ ಪವಿತ್ರ ದಪ್ತರ್‌ಮ, ಇವ್ಣಿ ಬಾರೇಮ ಲೀಖೈರ‍್ಹೂತೆ ಖ್ಹಾರನ ಇವ್ಣುನ ಬೋಲಿವತಾಳ್ಯೊ.

28 ಇವ್ಣೆ ಜಾ಼ವ್ಣುಥೂತೆ ಗಾಮ್‌ನ ಖನ್ನೆ ಇವ್ಣೆ ಆವಾದಿನ್, ಯೇಸು ಬಿಜೂ಼ಬಿ ಖ್ಹಾಮ್ಣೆ ಜಾ಼ವಾನಿ ಘೋಣಿ ದೆಖಾಯು. 29 ಕತೋಬಿ ಇವ್ಣೆ ಇನ, "ಹಮ್ಕೆ ಖ್ಹಾಂಜ಼್ ಹುಯಿಗೈ, ರಾತ್ ಹೋತು ಉಳ್ಯುಜಾ಼ಸ್‌, ಹಮಾರ ಜೋ಼ಡೆ ರ‍್ಹೇ" ಕರಿ ಘಣು ಬೋಲಿಲಿದು. 30 ತದೆ ಯೋ ಖಾಣಾನಖ್ಹಾಜೆ ಇವ್ಣ ಜೋ಼ಡೆ ಬೇಶಿನ್, ರೋಟಾನ ಪಾಡಿನ್, ದೇವ್ನ ಧನ್ಯವಾದ್ ಕರೀನ್, ತೋಡಿನ್ ಇವ್ಣುನ ದಿದೊ. 31 ತದೆ ಇವ್ಣ ಡೋಳ ಉಖ್ಡಾಯ ಅಜು಼ ಇವ್ಣೆ ಯೇಸುನಿ ಖ್ಹಣೇದ್ ಧರ‍್ಯು, ಕತೋಬಿ ಯೇಸು ಇವ್ಣ ಡೋಳಾನ ಖ್ಹಾಮ್ಣೇಥೊ ಮ್ಹಾಯ ಹುಯಿಗಯೊ. 32 ತದೆ ಇವ್ಣೆ ಏಕ್‌ಥಿ-ಏಕ್‌, "ಯೇಸು ವಾಟ್‌ಪರ್ ಅಪ್ಣ ಜೋ಼ಡೆ ವಾತೆ ಬೋಲ್ತೊಹುಯಿನ್, ವಚನ್‍ಮ ಲೀಖೈರ‍್ಹೋತೆ ಇನ ಬೋಲಿವತಾಳ್ಯೋತೆ ತದೆ, ಅಪ್ಣ ದಿಲ್ನಮಹಿ ಆಗ್ ಬಳಾನಿಘೋಣಿ ಹುಯುಕೊಯ್ನಿಕಿ ಶು?" ಕರಿ ಬೋಲ್ಯು.

33 ತದ್‌ನು ತದ್ದೇಸ್ ಇವ್ಣೆ ಉಠೀನ್, ಯೆರೂಸಲೇಮ್‌ನ ಗಯ. ಹಿಜ಼್ಜಾ ಗ್ಯಾರ‍್ಹ ಶಿಷ್ಯರ್‌ ಅಜು಼ ಬಿಜ಼ ಖ್ಹಾರಾನ ಜೋ಼ಡೆ ಎಕ್ಟು ಹುಯಿನ್, 34 ಪ್ರಭು ಉಠಿರ‍್ಹೋಸ್ತೆ ಖ್ಹಾಚಸ್! ಸೀಮೋನ್ನ ಯೋ ದೆಖಾಯೊ!" ಕರಿ ಬೋಲುಕರ್ತೂಥು.

35 ಅನ ದೇಖಿನ್, ಯೋ ಬೇ ಜ಼ಣಾನೇಬಿ ವಾಟ್‌ಪರ್ ಚಾ಼ಲ್ಯುತೆ ಇನ ಅಜು಼ ರೋಟೊ ತೋಡಾನಿ ವಖ್ಹತ್‌ಮ, ಇವ್ಣೆ ಇನಿ ಖ್ಹಣೇದ್ ಧರ‍್ಯೂತೆ ಇನ ಇವ್ಣುನ ಬೋಲಿವತಾಳ್ಯು.

ಯೇಸು ಇನ ಶಿಷ್ಯರ್‌ನ ದೆಖಾಯೊತೆ

36 ಇವ್ಣೆ ಭೇ ಜ಼ಣ ಆ ಬಾರೇಮ ಬೋಲುಕರಾನಿ ವಖ್ಹತ್‌ಮ, ಯೇಸು ಪ್ರಭುಸ್ ಇವ್ಣ ಇಚ಼್‌ಮ ಆಯಿ ಭೀರಿನ್, "ತುಮೂನ ಸಮಾಧಾನ್ ಹುವಾದೆ" ಕರಿ ಬೋಲ್ಯೊ.

37 ತದೆ ಇವ್ಣೆ ಡರ‍್ನ ಮಾರ‍್ನು ಮನ್‌ಮ ಘಬ್‌ರೈಜೈ಼ನ್, ಇವ್ಣೆ ದೇಖ್ಯೂತೆ ಭೂತ್ ಕರಿ ಸೋಚ್ಯು. 38 ಕತೋಬಿ ಯೇಸುನೆ ಇವ್ಣುನ, "ತುಮೆ ಶನ ಘಬ್ರಾವೋಸ್ತೆ? ಶನ ತುಮಾರ ಮನ್‌ಮ ಗುಮಾನಿ ಹುಂಕರಾಸ್ತೆ? 39 ಮಾರ ಹಾತ್ನ ಅಜು಼ ಗೋಡಾನ ದೇಖೊ, ಆ ಮೇಸ್ನಿ! ಮನ ಛೀಮಿ ದೇಖೊ, ತುಮೆ ದೇಖುಕರಾತೆ ಇಮ್‌ ಮನ ಬೋಟಿ ಅಜು಼ ಹಡ್‌ಕ್ಯಾ ಛಾ಼, ಕತೋಬಿ ಭೂತ್‌ನ ಆ ಖ್ಹಾರು ಕೋ ರ‍್ಹೇಯ್ನಿ.

40 ಆ ಖ್ಹಾರು ಬೋಲಾನ ಬಾದ್‌ಮ, ಯೇಸುನೆ ಇನೊ ಹಾತ್‌ ಅಜು಼ ಗೋಡಾನ ಇವ್ಣುನ ವತಾಳ್ಯೊ.*24:40 ಗ್ರೀಕ್‌ನು ಥೋಡು ದಪ್ತರ್‌ಮ 40ನು ವಚನ್ ಕೊಯ್ನಿ. 41 ಕತೋಬಿ, ಇವ್ಣೆ ಬಿಜೂ಼ಬಿ ವಿಶ್ವಾಸ್‌ಕರ‍್ಯುಕೊಂತೆ, ಖ್ಹುಶಿಥಿ ಆಶ್ಚರ್ಯ ಖಾತಾನ ದೇಖಿನ್, ಯೇಸುನೆ ಇವ್ಣುನ, "ಹಜ್ಜಾ಼ ತುಮಾರಕನ ಶಾತ್‌ತೋಬಿ ಖಾವಾನು ರಾಛು಼ ಛಾ಼ಕಿ ಶು?" ಕರಿ ಪುಛಾ಼ಯೊ. 42 ಇವ್ಣೆ ಭೂಂಜಿಹುಯು ಮಾಛ಼್‌ಲಾನು ಏಕ್‌ ಟುಕ್ಡಾನ ಯೇಸುನ ದಿದು. 43 ಯೇಸುನೆ ಇನಲೀನ್, ಇವ್ಣ ಖ್ಹಾಮ್ಣೇಸ್ ಖಾದೊ. 44 ಅಜು಼ ಯೇಸುನೆ ಇವ್ಣುನ, "ಮೇ ತುಮಾರ ಜೋ಼ಡೆಸ್ ಥೋತೆ ತದ್ದೇಸ್, ಆ ಖ್ಹಾರು ತುಮೂನ ಬೋಲ್ಯೊಥೋನಿ. ಮೋಶೇನು ಧರ್ಮಶಾಸ್ತ್ರ, ಪ್ರವಾದಿಯೇನು ಪುಸ್ತಕ್‌ಮ ಅಜು಼ ಕೀರ್ತನೇಮ ಮಾರಿ ಬಾರೇಮ ಲೀಖೈರ‍್ಹೂತೆ ಅಖ್ಖು ಪೂರಹುವಾನು ಜ಼ರೂರತ್ ಛಾ಼ ಕರಿ ಮೇ ತುಮೂನ ಬೋಲ್ಯೊಥೊ ಕೊಯ್ನಿಕಿ ಶು?" ಕರಿ ಬೋಲ್ಯೊ. 45 ಅನ ಬಾದ್‌ಮ ಇವ್ಣೆ ವಚನ್‍ಮ ಲೀಖೈರ‍್ಹೂತೆ ಇನ ಪರ್ಖಿಲವಾನಿಮತ್, ಯೇಸುನೆ ಇವ್ಣಿ ಅಕ್ಕಲ್‍ನ ಛೋ಼ಡ್ಯೊ. 46 ಅಜು಼ ಇವ್ಣುನ, ಕ್ರಿಸ್ತ ಖ್ಹತಾಪ್ಣಿ ಖೈನ್, ಮರಿನ್‌, ತೀನ್ನೊ ದನ್ಮ ಉಠಿ ಆವ್ಣು. 47 ಅಜು಼ ಪಾಪ್ನ ಮಾಪಿ ಮಳ್‌ಣುಕತೊ, ದೇವ್ ಭಣಿ ಫರೊಕರಿ ಬೋಲಾನು, ಯೆರೂಸಲೇಮ್‌ಥು ಧರೀನ್, ತಮಾಮ್‌ ದೇಖ್ಹ್‌ಮ ಇನ ನಾಮ್‌ಪರ್‌ ಬೋಲಾವ್ಣು ಕರಿ ಲೀಖೈರ‍್ಹೂಸ್‌ನಿ, 48 ಆ ಖ್ಹಾರಿ ಬಾರೇಮ, ತುಮೇಸ್ ಸಾಕ್ಷಿ ಹುಯಿರ‍್ಹಾಸ್‌. 49 ಹಂದೇಖೊ! ಮಾರೊ ಬಾ ಜಿಭಾನ್‌ ದಿದೋತೆ ಇನ, ಮೇ ತುಮಾರಾಪರ್ ಬೋಲಿ ಮೋಕ್ಲಿಶ್. ಉಪ್ಪರ್‌ಥು ತುಮಾರಪರ್ ಶಕತ್‍ ಆವಾತೋಡಿ, ಆಸ್ ಖ್ಹಯೇರ್‌ಮ ತುಮೆ ಜ಼ಪಿರ‍್ಹೇಣು ಕರಿ ಬೋಲ್ಯೊ.

ಯೇಸು ಸೊರ್ಗಮ ಪಡೈಲಿದೋತೆ

50 ಅನ ಬಾದ್‌ಮ ಯೇಸುನೆ ಇವ್ಣುನ ಬೇಥಾನ್ಯತೋಡಿ ಬುಲೈಲಿ ಜೈ಼ನ್, ಇನೊ ಹಾತ್ ಪಾಡಿನ್, ಇವ್ಣುನ ಆಶೀರ್ವಾದ್‌ ಕರ‍್ಯೊ. 51 ಆಶೀರ್ವಾದ್‌ ಕರುಕರಾನಿ ವಖ್ಹತ್‌ಮ, ಯೋ ಇವ್ಣುನ ಮ್ಹೆಂದಿನ್, ಸೊರ್ಗಮ ಪಡೈಗಯೊ. 52 ಇವ್ಣೆ ಯೇಸುನಿ ಆರಾದನೆ ಕರ‍್ಯು ಅಜು಼ ಘಣಿ ಖ್ಹುಶಿಥಿ ಯೆರೂಸಲೇಮ್‌ನ ಪಾಛು಼ಫರಿ ಗಯು. 53 ಅಜು಼ ಇವ್ಣೆ ಕದೇಬಿ ಮಂದಿರ್‌ಮಾಸ್ ರ‍್ಹೀನ್, ದೇವ್ನಿ ಸ್ತುತಿಕರ‍್ಯು.