Marcos 11

ಯೇಸು ರಾಜಾ಼ನಿ ಘೋಣಿ ಯೆರೂಸಲೇಮ್‌ನ ಮಹಿ ಗಯೋತೆ

1 ಇವ್ಣೆ ಯೆರೂಸಲೇಮ್‌ನ ಖನ್ನೆ-ಖನ್ನೆ ಐನ್, ಆಲಿವ್‌ನ ಪಹಾಡ್‌ಕನ ಛಾ಼ತೆ ಬೆತ್ಫಗೆ ಅಜು಼ ಬೇಥಾನ್ಯ ಕರಿ ಗಾಮ್‌ಕನ ಆಯ. ತದೆ ಯೇಸುನೆ ಇನ ಶಿಷ್ಯರ್‌ಮ ಬೇ ಜ಼ಣಾನ ಬುಲೈನ್, 2 ತುಮಾರ ಖ್ಹಾಮ್ಣೆ ಛಾ಼ತೆ ಗಾಮ್ಮ ಜಾ಼ವೊ, ತುಮೆ ಯೋ ಗಾಮ್‌ನ ಮಹಿ ಜಾ಼ತಸ್‌ನ, ಹಿಜ್ಜಾ಼ ಏಕ್‌ ಗಧೇಡಾನು ಚೆಲ್ಕು ಭಂದೈರ‍್ಹೀಶೆತೆ ತುಮೆ ದೇಕ್‌ಶು. ಹಂಕೆತೋಡಿ ಇನಾಪರ್‌ ಕೋಣ್‌ಬಿ ಕೋ ಬೆಠೂನಿ. ಇನ ಛೋ಼ಡಿನ್ ಹಜ್ಜಾ಼ ಲೀನ್‌ ಆವೊ. 3 ಅಜು಼ ಕೋಣ್‌ತೋಬಿ ತುಮುನ ಶನ ಅಮ್ ಕರುಕರಸ್ತೆ ಕರಿ ಪುಛಾ಼ಯುತೊ, ಪ್ರಭುನ ಆ ಹೋಣುಕಸ್‌, ಅಜು಼ ಒಗ್ಗಿಸ್‌ಮ ಅನ ಪಾಛು಼ ಬೋಲಿ ಮೋಕಲ್‌ಶೆ ಕರಿ ಬೋಲೊ" ಕರಿ ಬೋಲಿನ್ ಮೋಕ್‌ಲ್ಯೊ.

4 ತದೆ ಇವ್ಣೆ ಜೈ಼ನ್‌, ವಾಟ್ನ ಶೇಡೆಥೂತೆ ಘರ್‌ನ ಬಾಕಲ್‍ಕನ ಗಧೇಡಾನು ಚೆಲ್ಕು ಭಂದ್ಯೂತೆ ದೇಖ್ಯು. ಇನ ಛೋ಼ಡುಕರಾನಿ ವಖ್ಹತ್‌ಮ, 5 ಹಿಜ್ಜಾ಼ ಭಿಯುಥೂತೆ ಥೋಡು ಜ಼ಣು, "ಆ ಚೆಲ್ಕಾನ ಛೋ಼ಡಿನ್, ಶಾತ್‌ ಕರಾನ ಆಯ?" ಕರಿ ಪುಛಾ಼ಯು.

6 ಇವ್ಣೆ ಯೇಸುನೆ ಬೋಲಿ ಮೋಕ್‌ಲ್ಯೊಥೋತೆ ಇಮ್ಮಸ್ ಬೋಲ್ಯು, ತದೆ ಯೋ ಅದ್ಮಿಖ್ಹಾರು ಜಾ಼ವಾನ ಮ್ಹೇಲ್ಯು. 7 ಇವ್ಣೆ ಯೋ ಗಧೇಡಾನ ಚೇಲ್ಕಾನ ಯೇಸುಕನ ಲೈನ್‌, ಇವ್ಣ ಲುಂಗ್ಡಾವ್‍ನ ಇನಾಪರ್‌ ನಾಖ್ಯು, ತದೆ ಯೇಸು ಇನಾಪರ್ ಚ಼ಢೀನ್ ಬೇಶಿಗಯೊ. 8 ತದೆ ಘಣ ಅದ್ಮಿನೆ ಇವ್ಣ ಲುಂಗ್ಡಾವ್‍ನ ವಾಟ್‌ಪರ್ ಬಿಛಾ಼ಯು. ಬಿಜು಼ ಥೋಡು ಜ಼ಣು ಬಾಗ್‌ಮಾಥು ಡಾಳಿಯೇನ ಕತ್ರಿಲೈನ್ ವಾಟ್‌ಪರ್ ಬಿಛಾ಼ಯು.*11:8 ಆ ಖ್ಹಾರು ಇವ್ಣೆ ಕರ‍್ಯುತೆ, ಮರ್ಯಾದಿ ವತಾಳನಖ್ಹಾಜೆ. ಯೆಹುದ್ಯರ್‌ ಲೋಗ್ ಆ ತರೀಕಾಥಿ ಅದ್ಮಿನ ಸ್ವಾಗತ್ ಕರಸ್. 9 ಯೇಸುನ ಖ್ಹಾಮ್ಣೆಬಿ ಪೀಠೆಬಿ ಒಳಿಜಾ಼ತುಥೂತೆ ಅದ್ಮಿಖ್ಹಾರು ಚಿಕ್ರಾಣ್ ಮ್ಹೇಲ್ತುಹುಯಿನ್, "ಹೊಸನ್ನ!*11:9 "ಹೊಸನ್ನ" ಕತೊ ‘ದೇವ್ನ ಧನ್ಯವಾದ್‌ ಹುವಾದೆ’ ಕರಿ. ಪ್ರಭು ದೇವ್ನ ನಾಮ್‌ಪರ್‌ ಆವಾಳಾನ ದೇವ್ ಆಶೀರ್ವಾದ್‌ ಕರಾದೆ! 10 ಅಪ್ಣೊ ಬಾ ಹುಯಿರ‍್ಹೋತೆ ದಾವೀದ್‌ನಿ ರಾಜ್ಯ ಆವ್‌ಶೆ, ದೇವ್ ಇನ ಆಶೀರ್ವಾದ್‌ ಕರಾದೆ. ಉಪ್ಪರ್‌ಲ್ಯ ಲೋಕಾಮ ಛಾ಼ತೆ ದೇವ್ನ ಧನ್ಯವಾದ್ ಹುವಾದೆ!" ಕರಿ ಬೋಲ್ಯು.

11 ಬಾದ್‌ಮ ಯೇಸು ಯೆರೂಸಲೇಮ್‌ನ ಗಯೊ, ಹಿಜ್ಜಾ಼ ಮಂದಿರ್‌ಮ ಜೈ಼ನ್, ಚಾರ‍್ಹೆ ಬಾಜು಼ ಥೂತೆ ಖ್ಹಾರೂಸ್ ದೇಖ್ಯೊ. ಎತ್ರಾಸ್‌ಮ ಖ್ಹಾಂಜ಼್ ಹುಯಿಗಯುಥು, ಇನಾಖ್ಹಾಜೆ ಇನ ಭಾರ ಜ಼ಣ ಶಿಷ್ಯರ್‌ನ ಕೇಡೆ ಬೇಥಾನ್ಯನ ಚ಼ಲೆಗಯೊ.