Marcos 12

ದ್ರಾಕ್ಷಿನ ಬಾಗ್‌ನ ವಾರ್‌ನ ಕರಿರಾಖವಾಳಾನಿ ಬಾರೇಮಾನಿ ಮತ್ಲಬ್‌ನಿ ಖೇಣಿ

1 ತದೆ ಯೇಸುನೆ ಇವ್ಣ ಜೋ಼ಡೆ ಮತ್ಲಬ್‌ನಿ ಖೇಣಿಯೇಥಿ ಬೋಲಾಲಗ್ಯೋಕಿ, "ಏಕ್‌ ಅದ್ಮಿನೆ ಏಕ್‌ ದ್ರಾಕ್ಷಿನು ಬಾಗ್ ಬಣೈನ್, ಇನ ಅಶ್‌ಪೀಶ್‌ ವಾಡ್‌ಗಿ ನಖೈನ್, ದ್ರಾಕ್ಷಿನೊ ರಖ್ಹ್‌ ಕಾಡಾನಖ್ಹಾಜೆ ಖಾಡ್ ಖೋಂದಾಯೊ ಅಜು಼ ಕಾವ್ಲಿನಖ್ಹಾಜೆ ಉಪ್ಪರ್ ಅಟ್‌ಲೊ ಭಂದಾಯೊ. ಅಜು಼ ಇನೆ ಯೋ ದ್ರಾಕ್ಷಿನಬಾಗ್‌ನ ವಾರ್‌ ಕರಾವಾಳವ್‌ನ ದೀನ್, ಘರ್‌ಥೊ ನಿಕ್ಳಿನ್ ದೇಖ್ಹ್‌ಪರ್ ಚ಼ಲೆಗಯೊ. 2 ಪಂಡು ಪಾಕಾನ ಹಗಾಮ್‌ ಆವಾದಿನ್, ವಾರ್‌ನ ದೀರಾಖ್ಯೊಥೋತೆ ಇವ್ಣಾಕಂಥು ದ್ರಾಕ್ಷಿನ ಪಂಡಾಮ ಭಾಗ್‌ ಲ್ಯವಾನಟೇಕೆ, ಏಕ್‌ ಆಳ್‌ನ ಇವ್ಣಾಕನ ಮೋಕ್‌ಲ್ಯೊ. 3 ಇವ್ಣೆ ಯೋ ಆಳ್‌ನ ಧರಿಲೀನ್, ಇನ ಮಾರಿನ್, ಖಾಲಿಹಾತೆ ಮೋಕ್ಲಿದಿದು. 4 ತದೆ ಯೋ ಬಾಗ್‌ನ ಯಜಮಾನ್ನೆ ಬಿಜ್ಜೇಕ್‌ ಜ಼ಣ ಆಳ್‌ನ ಮೋಕ್‌ಲ್ಯೊ; ಯೋ ವಾರ್‌ನ ಲೀರಾಖ್ಯುಥೂತೆ ಇವ್ಣೆ ಇನ ಮುಡ್‌ಕ್ಯಪರ್ ಮಾರಿನ್ ಖ್ಹರಮ್‌ ಕಾಡಿನ್ ಮೋಕ್‌ಲ್ಯು. 5 ಅನ ಬಾದ್‌ಮ ಯೋ ಬಾಗ್‌ನ ಯಜಮಾನ್ನೆ ಬಿಜ್ಜೇಕ್‌ ಜ಼ಣ ಆಳ್‌ನ ಮೋಕ್ಲಾಖ್ಹತರ್‌ ಇನ ಮಾರಿ ನಾಖಿದಿದು; ಅಜೂ಼ಬಿ ಕೈಯೆಕ್ಕಿ ಜ಼ಣಾನ ಮೋಕ್‌ಲ್ಯೊ, ಇವ್ಣಾಮ ಥೋಡ ಜ಼ಣಾನ ಮಾರ‍್ಯು ಅಜು಼ ಥೋಡ ಜ಼ಣಾನ ಕತ್ರಿನಾಖಿದಿದು. 6 ಯೋ ಬಾಗ್‌ನೊ ಯಜಮಾನ್ನೆ ಬಿಜು಼ ಎಕ್ಕಸ್ ಜ಼ಣೊ ರಹಿಗಯೋಥೊ. ಯೋ ಕೋಣ್‌ಕತೊ ಇನೊ ಲಾಡ್‌ನೊ ಛಿಯ್ಯೊ. ತದೆ ಇನೆ ಸೋಚ್ಯೊಕಿ, ‘ಮಾರ ಛಿಯ್ಯಾನ ದೇಖಿನ್‌ ಮರ್ಯಾದಿ ದಿಶೆ’ ಕರಿ ಯಜಮಾನ್ನೆ ಖ್ಹರ್ತಿಮ ಇನ ಛಿಯ್ಯಾನ ಯೋ ವಾರ್ ಕರವಾಳಾವ್‌ಕನ ಮೋಕ್‌ಲ್ಯೊ. 7 ಕತೋಬಿ ಯೋ ವಾರ್‌ನ ಕರಿರಾಖ್ಯೂಥೂತೆ ಅದ್ಮಿಖ್ಹಾರು ಇನ ದೇಖಿನ್‌, ‘ಆಸ್ ಬಾಗ್‌ನೊ ಯಜಮಾನ್ನೊ ಛಿಯ್ಯೊ. ಆವೊ, ಅನ ಮಾರಿನಾಖಿದಿಯ್ಯೆ, ತದೆ ಇನು ಶೊತ್ ಖ್ಹಾರು ಅಪ್ಣು ಹುಯಿಜಾ಼ಶೆ!" ಕರಿ ಏಕ್‌ನ ಜೋ಼ಡೆ ಏಕ್‌ ವಾತೆ ಕರಿಲೀನ್, 8 ಇನ ಛಿಯ್ಯಾನ ಧರೀನ್ ಮಾರಿನಾಖಿದೀನ್‌, ದ್ರಾಕ್ಷಿನ ಬಾಗ್‌ನ ಭಾರ್ ಫೇಕಿದಿದು.

9 ಇಮ್‍ಕತೊ, ದ್ರಾಕ್ಷಿನ ಬಾಗ್‌ನೊ ಯಜಮಾನ್ ಶಾತ್‌ ಕರ್ಶೆ? ಯೋ ಐನ್ ದ್ರಾಕ್ಷಿನ ಬಾಗ್‌ನ ವಾರ್‌ನ ಲೀರಾಖ್ಯುಥೂತೆ ಇವ್ಣುನ ಮಾರಿನಾಖಿದೀನ್‌, ಇನು ದ್ರಾಕ್ಷಿನ ಬಾಗ್‌ನ ಬಿಜಾ಼ನ ದಿನಾಕ್‌ಶೆ.

10 ‘ಘರ್ ಭಾಂದಾವಾಳು ನಕೊಕರಿ ಧಕೇಲೈ ಗಯೋತೆ ಬಂಡೋಸ್,

ಹೋಣುತೆ ಕೋಣಾನೊ ಬಂಡೊ ಹುಯೊ. ಅಮ್ಕರಿ ಧರ್ಮಶಾಸ್ತ್ರಮ ಪಢಿರಾಖ್ಯಸ್ನಿ!

11 ಹೈರುತೆ ಪ್ರಭುನೇಸ್ ಕರ‍್ಯೊತೆ;

ಆ ಅಪ್ಣ ಡೋಳಾಮ ಅಶ್ಚರ್ಯ ದೆಖಾವಸ್ನಿ!"*12:11 ಕೀರ್ತನೆ 118.22-23

12 ಆ ಅಪ್ಣೀಸ್‌ ಬಾರೇಮ ಆ ಮತ್ಲಬ್‌ನಿ ಖೇಣಿ ಬೋಲ್ಯೊ ಕರಿ ಇವ್ಣೆ ಮಾಲುಮ್‌ ಕರಿಲೀನ್ ಯೇಸುನ ಧರ್‌ನು ಕರಿ ಕೋಶಿಶ್ ಕರ‍್ಯು. ಕತೋಬಿ ಅದ್ಮಿನ ಡರ್‌ಥಿ ಇನ ಮ್ಹೆಂದಿನ್ ಚ಼ಲಿಗಯು,

ಶುಂಕ ಭಾಂದಾನಿ ಬಾರೇಮ ಪುಛಾ಼ಯೂತೆ

13 ಅನ ಬಾದ್‌ಮ ಇವ್ಣೆ ಯೇಸುನ ವಾತೆಮ ಫಖ್ಹಾವ್ಣು ಕರಿ, ಫರಿಸಾಯರ್ ಅಜು಼ ಹೆರೋದನಿ ಝೂ಼ಂಡ್‌ಥು ಥೋಡ ಜ಼ಣಾನ ಇನಾಕನ ಮೋಕ್‍ಲ್ಯು. 14 ಇವ್ಣೆ ಇನಾಕನ ಐನ್ ಬೋಲ್ಯೂಕಿ, "ಗುರು, ತೂ ಖ್ಹಾಚಿಸ್ ಬೋಲಾಸ್, ಕಿನಾಬಿ ದೇಖಿನ್‌ ಡರಾಕೊಯ್ನಿ, ತು ಅದ್ಮಿನು ಮ್ಹೋಡುದೇಖಿನ್‌ ವಾತೆ ಕೋ ಬೋಲಾನಿ. ಕತೋಬಿ ಅದ್ಮಿನಿ ಬಾರೇಮ ದೇವ್ನಿ ಮರ್ಜಿ ಶಾತ್‌ ಛಾ಼ಕಿ ಯೋ ಬೋಲಿವತಾಳಸ್ ಕರಿ ಹಮೂನ ಮಾಲುಮ್‌. ಕೈಸರ್‌ನ ಶುಂಕ ದೆವಾನು ನಿಯಮ್‌ಕಿ ಕೊಯ್ನಿ? ದೇಣೂಕಿ ನಾ ದೇವ್ಣು" ಕರಿ ಯೇಸುನ ಪುಛಾ಼ಯು.

15 ತದೆ ಯೇಸುನೆ, ಇವ್ಣೆ ಮಶ್ಲತ್ ಭಂದೈನ್ ಐರ‍್ಹೂತೆ ದೇಖಿನ್, "ಮನ ಫಖ್ಹಾವ್ಣು ಕರಿ ಶನ ದೇಖೊಸ್ತೆ? ಮನ ಏಕ್‌ ರೂಪಾನು ಬಿಲ್ಲು ಲೈನ್‌ ವತಾಳೊ" ಕರಿ ಬೋಲ್ಯೊ.

16 ತದೆ ಇವ್ಣೆ ಏಕ್‌ ಬಿಲ್ಲು ಲಾಯು, ತದೆ ಯೇಸುನೆ, "ಆ ಬಿಲ್ಲಾನ ಉಪ್ಪರ್ ಛಾ಼ತೆ ಮ್ಹೋಡಾನಿ ರೂಪ್‌ಬಿ ನಾಮ್ ಕಿನು?" ಕರಿ ಪುಛಾ಼ವಖ್ಹತರ್ ಇವ್ಣೆ, "ಕೈಸರ್‌ನು" ಕರಿ ಬೋಲ್ಯು. 17 ತದೆ ಯೇಸುನೆ, "ಇಮ್‍ಕತೊ, ಕೈಸರ್‌ನು ಶಾತ್‌ ಛಾ಼ಕಿ ಯೋ ಕೈಸರ್‌ನ ದೆವೊ, ದೇವ್ನ ದೇವ್ಣುತೆ ದೇವ್ನ ದೆವೊ" ಕರಿ ಬೋಲ್ಯೊ.

ಯೇಸುನೆ ಅಮ್ ಬೋಲ್ಯೋತೆ ದೇಖಿನ್ ಇವ್ಣೆ ಘಣು ಆಶ್ಚರ್ಯಖಾದು.

ಮರೀನ್ ಜಿವ್ತೊ ಹುಯಿನ್ ಉಠಾನಿ ಬಾರೇಮ ಪುಛಾ಼ಯೂತೆ

18 ಅನ ಬಾದ್‌ಮ ಸದ್ದುಕಾಯವಾಳು*12:18 ಸದ್ದುಕಾಯವಾಳು ಕತೊ ಯೆಹೂದ್ಯರ್‌ನಿ ಜಾ಼ತ್ನು ಅದಿಕಾರ್ ಚ಼ಲಾವವಾಳು ಏಕ್‌ ಝೂ಼ಂಡ್‌. ಅವ್ಣೆ ಜೂ಼ನು ಒಪ್ಪಂದಾನನು ಪಹಿಲು ಪಾಚ಼್ ಪುಸ್ತಕ್‌ನ ಮ್ಹೇಲಿನ್ ಬಿಜು಼ ಕೆಹೂಬಿ ರಾಕ್‍ತುಥು ಕೊಯ್ನಿ. ಅವ್ಣೆ ಮರ್‌ವಾನ ಬಾದ್‌ಮ ಅದ್ಮಿ ಪಾಛು಼ ಜಿವ್ತುಹುಯಿನ್ ಉಠಾಕೊಯ್ನಿ ಕರಿ ಬೋಲವಾಳು ಅಜು಼ ದೂತರ್, ಆತ್ಮ ಯೋ ಖ್ಹಾರಿ ನಂಬಾಕೊಯ್ನಿ. ಥೋಡು ಜ಼ಣು ಯೇಸುಕನ ಆಯು.ಅವ್ಣೆ ಮರ‍್ಯುಹುಯು ಅದ್ಮಿ ಪಾಛು಼ ಜಿವ್ತುಹುಯಿನ್ ಉಠಾಕೊಯ್ನಿ ಕರಿ ಬೋಲಾವಾಳು. ಅವ್ಣೆ ಯೇಸುನ ಪುಛಾ಼ಯುಕಿ, 19 "ಗುರು, ಏಕ್‌ ಜ಼ಣೊ ಲಡ್ಕಾಕೊಂತೆ ಮರಿಗೋತೊ, ಇನಿ ಬಾವಣ್ಣ ಇನೊ ಭೈ ಕರಿಲೇವ್ಣು. ತದೆ ಇವ್ಣುನ ಲಡ್ಕಾ ಹುಯಾತೊ, ಯೋ ಲಡ್ಕಾ ಮರ‍್ಯೋತೆ ಭೈನ ಲಡ್ಕಾ ಹುಯಿರ‍್ಹಿಶೆ’ ಕರಿ ಮೋಶೆನೆ ಹಮಾರಖ್ಹಾಜೆ ಲೀಖಿರಾಖ್ಯೊಸ್. 20 ಖ್ಹಾತ್‌ಜ಼ಣ ಭೈಯೆ ಥಾ; ಇವ್ಣಾಮ ಪಹಿಲೊ ಭೈ ವ್ಯಹಾ ಕರೀನ್ ಲಡ್ಕಾಕೊಂತೆ ಮರಿಗಯೊ. 21 ಇನಿ ಬಾಯ್ಕೊನ ಇನ ಪೀಟ್‌ಣೊ ಭೈನೆ ಕರಿಲೀನ್ ಯೋಬಿ ಲಡ್ಕಾಕೊಂತೆ ಮರಿಗಯೊ. ಇಮ್ಮಸ್ ತೀನ್ನೊ ಭೈನಾಬಿ ಹುಯು, 22 ಇಮ್ಮಸ್ ಖ್ಹಾತೆ ಜ಼ಣಾಬಿ ಯೋ ತಯೇಡಾನ ಕರಿಲೀನ್ ಲಡ್ಕಾಕೊಂತೆ ಮರಿಗಯ. ಖ್ಹಾರಾನ ಬಾದ್‌ಮ, ಯೋ ತಯೇಡಾಬಿ ಮರಿಗೈ. 23 ಇಮ್‍ಕತೊ, ಮರವಾಳು ಜಿವ್ತುಹುಯಿನ್ ಆವ್‌ಶೇತೆ ಯೋ ದನ್ಮ, ಯೋ ತಯೇಡ ಖೆವಾನಿ ಬಾವಣ್‍ ಹುಯಿರ‍್ಹಿಶೆ? ಶನಕತೊ ಖ್ಹಾತೆ ಜ಼ಣಾಬಿ ಇನ ಕರಿಲಿದಾಥಾನಿ" ಕರಿ ಬೋಲ್ಯು.

24 ಯೇಸುನೆ ಇವ್ಣುನ, "ತುಮೆ ಕೆತ್ರೆ ಗಲ್ತಿಮ ಶನ ಛಾ಼ಕರಿ ಮಾಲುಮ್ ಕಿಶು? ಶನಕತೊ ತುಮೂನ ದೇವ್ನಿ ವಚನ್‌ಬಿ ನಾತೊ ದೇವ್ ಕೆತ್ರೆ ಶಕತ್‌ವಾಳೊ ಕರೀಬಿ ಮಾಲುಮ್‌ಕೊಯ್ನಿ. 25 ಮರವಾಳು ಜಿವ್ತುಹುಯಿನ್ ಆವ್‌ಶೇತೆ ತದೆ, ಇವ್ಣೆ ಸೊರ್ಗಥು ದೇವ್‌ನು ದೂತರ್‌ನಿ ಘೋಣಿ ರ‍್ಹಿಶೆ ಅಜು಼ ವ್ಯಹಾ ಕರ್‌ಶೆಬಿ ಕೊಯ್ನಿ, ವ್ಯಹಾ ಕರಿದಿಶೇಬಿ ಕೊಯ್ನಿ. 26 ಕತೋಬಿ ‘ಮರವಾಳು ಜಿವ್ತುಹುಯಿನ್ ಉಟ್‍ಶೇತೆ’ ಇನಿ ಬಾರೇಮ ಬೋಲ್‌ನು ಕತೊ, ‘ಮೇ ಅಬ್ರಹಾಮ್‌ನೊ ದೇವ್, ಇಸಾಕನೊ ದೇವ್, ಯಾಕೋಬನೊ ದೇವ್’ ಕರಿ ದೇವ್ನೆ ಮೋಶೆನ ಬೋಲ್ಯೊತೆ ಇನ ಮೋಶೇನು ಪುಸ್ತಕ್‌ಮ ಆಗ್‍ನಿ ಡಾಗ್‌ನಿ ಬಾರೇಮ ಛಾ಼ತೆ ವಚನ್ನು ಭಾಗ್‌ಮ*12:26 ವಿಮೋಚನಕಾಂಡ 3.6 ಪಢಿರಾಖ್ಯಕೊಯ್ನಿಕಿ ಶು? 27 ಇವ್ಣೆ ಮರಿಗಯಾತೋಬಿ ದೇವ್ನ ಜೋ಼ಡ್ಮ ಜಿವ್ತು ಹುಯಿನ್ ಛಾ಼; ಇನಖ್ಹಾಜೆ ಯೋ ಜಿವ್ತಾನೊ ದೇವ್ ಹುಯಿರ‍್ಹೋಸ್ತೆ ಪಣ್ಕಿ ಮರ‍್ಯಾಹುಯಾನೊ ಕಾಹೆ, ತುಮೆ ತೀರ್‌ಚಾಸ್ ಗಲ್ತಿಮ ಪಡ್ಯಾಸ್" ಕರಿ ಬೋಲ್ಯೊ.

ಖ್ಹಾರೇಥಿ ಮೋಟಿ ಹುಕುಮ್

28 ಹಿಜ್ಜಾ಼ ಮೋಶೆನಿ ವಚನ್‍ ಶಿಕಾಡವಾಳೊ ಶಾಸ್ತ್ರಿಮ ಏಕ್‌ ಜ಼ಣೊ ಇವ್ಣೆ ಚರ್ಚೆ ಕರುಕರಾತೆ ಖ್ಹಮ್‌ಜಿನ್‌, ಯೇಸುನೆ ಸದ್ದುಕಾಯವಾಳನ ಅಛ್ಛು಼ ಜವಾಬ್‌ ದಿದೋತೆ ದೇಖಿನ್, ಯೇಸುಕನ ಐನ್, "ಖ್ಹಾರಿ ಹುಕುಮ್‌ಮ ಮೋಟಿ ಹುಕುಮ್‌ ಖೆವಿ" ಕರಿ ಪುಛಾ಼ಯೊ.

29 ತದೆ ಯೇಸುನೆ, "ಇಸ್ರಾಯೇಲ್‌ನು ಅದ್ಮಿ ಖ್ಹಮಜ಼್! ಖ್ಹಾರೇಥಿ ಮೋಟಿ ಹುಕುಮ್ ಖೆವಿಕತೊ, ‘ಅಪ್ಣೊ ದೇವ್ ಹುಯಿರ‍್ಹೋತೆ ಪ್ರಭು ಎಕ್ಕಸ್ ಜ಼ಣೊ ದೇವ್ ಹುಯಿರ‍್ಹೋಸ್.’ 30 ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ ಪೂರ ದಿಲ್‌ಥಿ, ಪೂರ ಜಾನ್‌ಥಿ, ಪೂರ ಮನ್‌ಥಿ, ಪೂರ ಶಕಥ್ಥಿ ಪ್ಯಾರ್ ಕರ‍್ನು. 31 ಅಜು಼ ಬೇನಿ ಮೋಟಿ ಹುಕುಮ್ ಖೆವಿಕತೊ, ‘ತಾರು ತು ಕಿಮ್ ಪ್ಯಾರ್ ಕರಾಸ್ಕಿ ಇಮ್ಮಸ್ ತಾರ ಭೀಡೆವಾಳಾನ*12:31 ಲೂಕ 10.27-37, ಪಡೋಶಿವಾಳು ಕತೊ ಕಿನ-ಕಿನ ಜ಼ರೂರತ್ ಛಾ಼ಕಿ ಇವ್ಣುನ ಮದತ್‌ಕರ್‌ನು ಕರಿ ಪ್ಯಾರ್ ಕರ‍್ನು’. ಆ ಬೇ ಹುಕುಮ್‌ಥಿ ಮೋಟಿ ಹುಕುಮ್‌ ಬಿಜೇಕ್ ಖೆವಿಬಿ ಕೊಯ್ನಿ" ಕರಿ ಬೋಲ್ಯೊ.

32 ತದೆ ಯೋ ಶಾಸ್ತ್ರಿನೆ, "ಗುರು, ತೂ ಅಶೇಲ್ ಬೋಲ್ಯೊ, ‘ದೇವ್ ಹುಯಿರ‍್ಹೋತೆ ಪ್ರಭು ಎಕ್ಕಸ್ ಜ಼ಣೊ, ಇನ ಮ್ಹೇಲೀನ್‌ ಬಿಜು಼ ಕೋಣ್‌ಬಿ ದೇವ್ ಕೊಯ್ನಿ, ಕರಿ ತುನೆ ಬೋಲ್ಯೊತೆ ಖ್ಹಾಚಿ. 33 ಇನ ಪೂರ ದಿಲ್‌ಥಿ, ಪೂರ ಮನ್‌ಥಿ ಅಜು಼ ಪೂರ ಶಕಥ್ಥಿ ಪ್ಯಾರ್ ಕರ‍್ನು; ಅಜು಼ ಇನು ಯೋ ಕಿಮ್ ಪ್ಯಾರ್ ಕರಿಲೇಸ್ಕಿ, ಇಮ್ಮಸ್ ಇನ ಭೀಡೆವಾಳಾನ ಪ್ಯಾರ್ ಕರ‍್ನು. ಆ ಬೇ ಹುಕುಮ್‌ ದೇವ್ನ ಖ್ಹಾಮೆ ಅಖ್ಖಯೇಕ್‌ ಶರೀರ್‌ನ ಬಲಿದ್ಯವಾನು ದೆವಾಥೀಬಿ ಅಜು಼ ಬಿಜಿ ಖ್ಹಾರಿ ಜಾನ್ವರ್‌ನ ಬಲಿಥೀಬಿ ಮೋಟು ಹುಯಿರ‍್ಹೂಸ್" ಕರಿ ಬೋಲ್ಯೊ.

34 ಇನೆ ಸೋಚಿಪರ್‌ಖಿನ್ ಜವಾಬ್‌ ದಿದೊತೆ, ಯೇಸುನೆ ದೇಖಿನ್‌, "ತೂ ದೇವ್ನಿ ರಾಜ್ಯಥಿ ದೂರ್‌ಲ್ಯೊ ಕಾಹೆ" ಕರಿ ಬೋಲ್ಯೊ.

ಅನ ಬಾದ್‌ಮ ಯೇಸುನ ಬಿಜು಼ ಶಾತ್ಬಿ ಪುಛಾ಼ವನ ಕಿನೇಬಿ ಹಿಮ್ಮತ್ ಕೋ ಕರ‍್ಯುನಿ.

ಮೆಸ್ಸೀಯಾನಿ ಬಾರೇಮ ಪುಛಾ಼ಯೋತೆ

35 ಯೇಸು ಮಂದಿರ್‌ಮ ವಚನ್ ಬೋಲಿದೇವ್‌ಕರ್‌ತೋಥೊ, ತದೆ ಇನೆ ಪುಛಾ಼ಯೊಕಿ, "ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಖ್ಹಾರು ಮೆಸ್ಸೀಯ ದಾವೀದ್‌ನೊ ಛಿಯ್ಯೊ, ಕರಿ ಬೋಲಾಸ್ನಿ, ಯೋ ಕಿಮ್ ಉಶೆ?

36 ‘ಮೇ ತಾರು ದುಶ್‌ಮನ್ನ ಖ್ಹಾರು ತಾರ ಗೋಡಾನ ಹೇಟ್‌ ನಾಖಾಲಗು

ಮಾರಿ ಖಾವಿ ಬಾಜು಼ಮ ಬೆಠೋರೆ,

ಕರಿ ಪ್ರಭು ಹುಯಿರ‍್ಹೋತೆ ದೇವ್ನೆ ಮಾರ ಮಾಲಿಕ್‌ನ ಬೋಲ್ಯೊ’*12:36 ಕೀರ್ತನೆ 110.1

ಕರಿ ಪವಿತ್ರಾತ್ಮನೆ ದಾವೀದನ ಮ್ಹೋಡಾವಾಟೆ ಬೋಲಾಯೋನಿ. 37 ದಾವೀದಸ್‌ ಕ್ರಿಸ್ತನ ಪ್ರಭುಕರಿ ಬೋಲಾಪರ್ ಕ್ರಿಸ್ತ ದಾವೀದ್‌ನೊ ಛಿಯ್ಯೊ ಕಿಮ್ ಉಶೆ?"

ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೇನಿ ಬಾರೇಮ ಯೇಸುನೆ ಝೇತಾಯೊತೆ

ಯೇಸುನಿ ವಾತೆನ ಘಣು ಅದ್ಮಿ ಖ್ಹುಶೀಥಿ ಖ್ಹಮ್‍ಜು಼ಕರ್ತುಥು. 38 ಯೇಸುನೆ ವಚನ್ ಬೋಲಿ ದೇತೊಹುಯಿನ್ ಬೋಲ್ಯೋಕಿ, "ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರಿಯೇನಿ ಬಾರೇಮ ಹೊಷಾರ್‌ಥಿ ರ‍್ಹವೊ. ಇವ್ಣೆ ಘಣ ಮೋಲ್ನು ಝ಼ಗ್ಗೊ ಪೇರ‍್ಹಿಲೀನ್‌ ಹೈಕಡ್‌ಹೀಕಡ್‌ ಫರ್‌ವಾನು, ದುಕಾನೇನಿ ಗಲ್ಲಿಮ ಅದ್ಮಿಖ್ಹಾರು ಇವ್ಣುನ ಮರ್ಯಾದಿ ದೀನ್ ಖ್ಹಲಾಮ್ ಕರ್ನುಕರಿ, 39 ಅಜು಼ ಸಬೆ ಭರಾವಾನು ಮಂದಿರ್‌ಮ ಅಖ್ಖಾನ ಖ್ಹಾಮೆ ಬೇಖ್ಹ್‌ಣು ಕರಿ, ಮಾನ್-ಮಿಝ಼್‌ವಾನೇನಿ ಝ಼ಗೋಮ ಅಖ್ಖಾನ ದೆಖಾವಾನಿ ಘೋಣಿ ಖ್ಹಾಮೆ ಬೇಖ್ಹ್‌ಣು ಕರಿ ಖಲಿ ಅಮ್ಮಸ್ ಆಖ್ಹ್ ಕರ್ತುರ‍್ಹೇಸ್‌. 40 ಇವ್ಣೆ ಮುಂಡಚ್ಚಿ*12:40 ಬಾವ್ರಿ ಮರಿಜಾ಼ಯಿತೆ ತಯೇಡ, ಮುಂಡಚ್ಚಿ ಕರೀಬಿ ಬೋಲಾಸ್ ತಯೇಡಾವ್‌ನ ಠಗೈನ್ ಇವ್ಣ ಘರ್‌ನ ಲೂಟಿಲೇಸ್ ಅಜು಼ ಅದ್ಮಿನ ವತಾಳಿಲ್ಯಾವನಖ್ಹಾಜೆ ಲಾಂಬಿ ಪ್ರಾರ್ಥನೆ ಕರಾಸ್. ಅವ್ಣಪರ್ ಘಣೇಥಿ ಘಣಿ ನಿಶತ್‌ ಮಳ್‍ಶೆ" ಕರಿ ಬೋಲ್ಯೊ.

ಮುಂಡಚ್ಚಿ ತಯೇಡಾನಿ ಕಾಣ್ಕೆ

41 ಯೇಸು ಮಂದಿರ್‌ನಿ ಹುಂಡಿನ ಖ್ಹಾಮ್ಣೆನಿ ಬಾಜೂ಼ಮ ಬೇಶಿನ್, ಅದ್ಮಿಖ್ಹಾರು ಪೈಶಾ ನಾಖಾತೆ ದೇಖುಕರ್ತೊಥೊ. ಕೈಯೆಕ್ಕಿ ಧನ್‌-ದೌಲತ್‌ವಾಳು ಅದ್ಮಿ ಘಣು-ಘಣು ನಾಖ್ಯು. 42 ತದೆ ಹಿಜ್ಜಾ಼ ಏಕ್‌ ಗರೀಬ್ ಮುಂಡಚ್ಚಿ ತಯೇಡ ಐನ್, ಬೇ ತಾಂಬಾನು ಕಾಖ್ಹ್‌, ಕತೊ ಏಕ್‌ ಪೈಶಾ ನಾಖಿ. 43 ತದೆ ಯೇಸುನೆ ಇನ ಶಿಷ್ಯರ್‌ನ ಖನ್ನೆ ಬುಲೈನ್, "ಮೇ ತುಮೂನ ಖ್ಹಾಚ ಬೋಲುಸ್ಕಿ ಹುಂಡಿಮ ಖ್ಹಾರೇಥಿ ಜಾ಼ಖ್ಹತ್ ಆ ಗರೀಬ್ ಮುಂಡಚ್ಚಿ ತಯೇಡ ನಾಖಿರಾಖಿಸ್‌. 44 ಕಿಮ್ ಕತೊ, ಖ್ಹಾರು ಇವ್ಣುನ ಬಶ್‌ಹುಯಿನ್ ಉಭ್‌ರ‍್ಯುತೆ ಇನಾಮಾಥು ಥೋಡು ನಾಖ್ಯು; ಕತೋಬಿ ಆ ಹೈರಿತೆ, ಅತ್ರೆ ಗರೀಬ್ ರ‍್ಹೀನ್‌ಬಿ, ಇನಾಕನ ಥೂತೆ ಖ್ಹಾರುಸ್‌ ನಾಖಿದಿದಿ, ಇನು ಜಿವ್ಣು ಚ಼ಲಾವಾನ ಥೂತೆ ಖ್ಹಾರೂಸ್ ನಾಖಿದಿದಿ".