3 ತದೆ ಚಾರ್ ಅದ್ಮಿನೆ, ಏಕ್ಜ಼ಣೊ ಲಕ್ವೊ ಮಾರ್ಯುಹುಯಾನ ಹಿಜ್ಜಾ಼ ಪಳ್ಳಿನ್ ಆಯು. 4 ಹಿಜ್ಜಾ಼ ಅದ್ಮಿನಿ ಭೀಡ್ ಭರೈರ್ಹಿಥೀತೆ ಇನಾಖ್ಹಾಜೆ, ಮಹಿ ಯೇಸುಕನ ಇನಲೀನ್ ಆವಾನ ಕೋ ಹುಯೂನಿ. ಇನಾಖ್ಹಾಜೆ ಇವ್ಣೆ ಯೋ ಘರ್ನ ಛ಼ತ್ಪರ್ ಚ಼ಢೀನ್, ಯೇಸುನಿ ನೇರ್ ಉಪ್ಪರ್ ಛ಼ತ್ನ ಥೋಡು ಕಾಡಿನಾಖಿದೀನ್, ಮೋಟಿ ಖೀಂಡ್ ಬಣೈನ್ ಇನಾಮಾಕರಿ ಯೋ ಲಕ್ವೊ ಮಾರಿರಾಖವಾಳನ ಖ್ಹುಡೈರಾಖ್ಯುಥೂತೆ ಬಿಛಾ಼ವ್ಣಿ ಖ್ಹಮೇದ್ ಇಮ್ಮಸ್ ಹೇಟ್ ಉತಾರ್ಯು. 5 ಯೇಸುನೆ, ಇವ್ಣೆ ಎತ್ರೇ ಇನಾಪರ್ ವಿಶ್ವಾಸ್ ಕರ್ಯುತೆ ದೇಖಿನ್, ಯೋ ಲಕ್ವೊ ಮಾರಿರಾಖವಾಳನ, "ಛಿಯ್ಯಾ, ತಾರು ಪಾಪ್ಖ್ಹಾರು ಮಾಪ್ ಹುಯಿಗಯು" ಕರಿ ಬೋಲ್ಯೊ.
6 ಹಿಜ್ಜಾ಼ ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರೀಮ ಥೋಡು ಜ಼ಣು ಬೆಠೂಥು. 7 ಇವ್ಣೆ, "ಆ ಅಮ್ ಶನ ಬೋಲಾಸ್ತೆ? ಆ ದೇವ್ನ ಚಿಂಘಾವ್ಣಿ ಕರಾನಿ ವಾತೆ, ದೇವ್ನ ಮ್ಹೇಲಿನ್ ಬಿಜು಼ ಕಿನೇಥಿ ಪಾಪ್ಖ್ಹಾರು ಮಾಪ್ ಕರಾನ ಹುವಾನು? ಕರಿ ಇವ್ಣ-ಇವ್ಣ ದಿಲ್ಮ ಸೋಚಾಲಗ್ಯು.
8 ಯೇಸುನೆ ತದ್ನು-ತದೇಸ್ ಇವ್ಣೆ ಮನ್ಮ ಇಮ್ ಸೋಚುಕರಾತೆ ಮಾಲುಮ್ ಕರಿಲೀನ್, "ತುಮೆ ತುಮಾರ ದಿಲ್ಮ ಶನ ಅಮ್ ಸೋಚುಕರಾಸ್ತೆ? 9 ಕೆಹು ಶುಲ್ಬ? ಆ ಲಕ್ವೊ ಮಾರಿರಾಖವಾಳನ, ‘ತಾರು ಪಾಪ್ಖ್ಹಾರು ಮಾಪ್ ಹುಯಿಗಯು’ ಕರಿ ಬೋಲಾನುಕಿ, ನಾತೊ ‘ಉಠೀನ್ ತಾರಿ ಬಿಛಾ಼ವ್ಣಿ ಪಳ್ಳಿನ್ ಚಾ಼ಲ್’ ಕರಿ ಬೋಲಾನು? 10 ಕತೋಬಿ ಮೇ ತುಮೂನ ಅದ್ಮಿನೊ ಛಿಯ್ಯಾನ ಜ಼ಮೀನ್ಪರ್ ಪಾಪ್ಖ್ಹಾರು ಮಾಪ್ಕರಾನ ಹಕ್ ಛಾ಼, ಕರಿ ವತಾಳುಸ್" ಅಮ್ ಬೋಲಿನ್ ಯೋ ಲಕ್ವೊ ಮಾರಿರಾಖವಾಳ ಭಣಿ ದೇಖಿನ್, 11 "ಉಟ್, ತಾರಿ ಬಿಛಾ಼ವ್ಣಿ ಪಳ್ಳಿನ್, ಘರೆ ಜಾ಼! ಕರಿ ಮೇ ತುನ ಬೋಲುಸ್" ಕರಿ ಬೋಲ್ಯೊ.
12 ಅಮ್ ಬೋಲ್ತಾಸ್ನ ಇನೆ ಉಠೀನ್, ಇನಿ ಬಿಛಾ಼ವ್ಣಿನ ಪಳ್ಳಿನ್, ಅಖ್ಖಾನ ದೇಕ್ತಾಡೋಳೆ ಭಾದರ್ ಚ಼ಲೆಗಯೊ. ಅನ ದೇಖಿನ್ ಖ್ಹಾರುಜ಼ಣು ಘಣು ಅಶ್ಚರ್ಯಹುಯಿನ್, "ಹಮೆ ಹಂಕೆತೋಡಿ ಕದೇಬಿ ಅಮ್ನು ದೇಖೀಸ್ರಾಖ್ಯಕೊಯ್ನಿ" ಕರಿ ದೇವ್ನ ಸ್ತುತಿ ಕರ್ತುಹುಯಿನ್ ಬೋಲ್ಯು.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)