22 ತದೆ ಹೆರೋದ್ಯನಿ ಛೋ಼ರಿ ಮಹಿ ಅಯಿನ್ ಖೇಲಿನ್, ಹೆರೋದನಾಬಿ ಇನ ಜೋ಼ಡ್ಮ ಖಾಣನ ಬೆಠುಥೂತೆ ಖ್ಹಾರಾವ್ನ ಖ್ಹುಶಿಕರಿ. ತದೆ ರಾಜಾ಼ನೆ ಯೋ ಛೋ಼ಕ್ರಿನ, "ತುನ ಶಾತ್ ಹೋಣು ಬೋಲ್? ತುನ ಶಾತ್ ಹೋಣುಕತೋಬಿ ದೆವುಸ್" ಕರಿ ಬೋಲ್ಯೊ. 23 ಇನೆ ಘಣಿ ಶಪತ್ ಲೀನ್, "ತೂ ಶಾತ್ ಬೋಲಿಲಿದಿತೋಬಿ ದೆವುಸ್ ಕರಿ ವಾತ್ ದೆವ್ಕರೂಸ್, ಮಾರ ರಾಜ್ಯಮಾಥು ಆಧು ರಾಜ್ಯನ ಮಾಂಗಿಲಿದಿತೋಬಿ ತುನ ದೆವುಸ್" ಕರಿ ಬೋಲ್ಯೊ.
24 ತದೆ ಯೋ ಛೋ಼ಕ್ರಿ ಭಾರ್ ಇನಿ ಆಯಕನ ಜೈ಼ನ್, "ಮೇ ಶಾತ್ ಮಾಂಗಿಲೆವ್?" ಕರಿ ಪುಛೈ಼.
ತದೆ ಇನಿ ಆಯನೆ, "ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನು ಮುಡ್ಕ್ಯು ಮಾಂಗಿಲೆ" ಕರಿ ಬೋಲಿ.
25 ಇನಿ ಆಯ ಇಮ್ ಬೋಲ್ತಾಸ್ನ, ಒಗ್ಗಿಸ್ಮ ಯೋ ರಾಜ಼ಕನ ಐನ್, "ಹಮ್ಕೆಸ್ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನು ಮುಡ್ಕ್ಯು ಪತ್ತರ್ಮ ಮನ ಮಂಗೈನ್ ದೆ! ಯೋಸ್ ಮಾರಿ ಬಿಂತಿ" ಕರಿ ಬೋಲಿ.
26 ಅನೇಥಿ ಹೆರೋದ ರಾಜಾ಼ನ ಘಣು ದುಖ್ ಹುಯು, ಕತೋಬಿ ಅಖ್ಖಾನ ಖ್ಹಾಮೆ ಇನೆ ವಾಗ್ದಾನ್ ದೀರಾಖ್ಯೊಥೋತೆ ಇನಖ್ಹಾಜೆ, ಹೆರೋದ್ಯನಿ ಛೋ಼ರಿನೆ ಬೋಲಿತೆ ಇನ ಕಾಡಾನ ಕೋ ಹುಯುನಿ. 27 ಅನಾಖ್ಹಾಜೆ ರಾಜಾ಼ನೆ ಒಗ್ಗಿಸ್ಮ ಕಾವ್ಲಿಕರಾವಾಳ ಶಿಪಾಯಿನ, ಜೇಲ್ನ ಜೈ಼ನ್ ಯೋಹಾನನು ಮುಡ್ಕ್ಯು ಕತ್ರಿಲೀನ್ ಆವಾನ ಹುಕುಮ್ ದೀನ್ ಮೋಕ್ಲ್ಯೊ. ತದೆ ಇನೆ ಯೋಹಾನ್ನ ಕೋಂಡಿ ಘಾಲಿರಾಖ್ಯುಥೂತೆ ಹಿಜ್ಜಾ಼ಜೈ಼ನ್, ಇನು ಮುಡ್ಕ್ಯು ಕತ್ರೀನ್, 28 ಇನ ಪತ್ತರ್ಮ ಲೈನ್, ಯೋ ಛೋ಼ಕ್ರಿನ ದಿದು. ಇನೆ ಯೋ ಮುಡ್ಕ್ಯಾನ ಇನಿ ಆಯನ ದಿದಿ.
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)