Mateus 12

ಸಬ್ಬತ್‌ನಿ ಬಾರೇಮ ಪುಛಾ಼ಯುತೆ

1 ಯೋ ದನೂಮ ಸಬ್ಬತ್‌ನ*12:1 ಸಬ್ಬತ್‌ ದನ್‌ಕತೊ, ಯೆಹೂದ್ಯರ್‌ನು ಅರಾಮ್ ಕರಾನೊ ದನ್. ರೋಜೆ ಯೇಸು ಅನಾಜ಼್ ಪಿಕಿಹುಯು ಖೇತರ್‌ಮಾಕರಿ ಚಾ಼ಲಿನ್ ಜಾ಼ವಾನಿ ವಖ್ಹತ್‌ಮ, ಇನ ಶಿಷ್ಯರ್‌ನ ಭುಕ್ ಲಾಗಲಗ್ಯುಥು, ಇನಖ್ಹಾಜೆ ಇವ್ಣೆ ಬುಟ್ಟಾ ತೋಡಿನ್, ಖಾವಲಗ್ಯಾಥ. 2 ಅನದೇಖಿನ್‌ ಫರಿಸಾಯರ್‌ನೆ ಯೇಸುನ, "ಹಂದೇಕ್‌, ತಾರು ಶಿಷ್ಯರ್‌ ಧರ್ಮಶಾಸ್ತ್ರನು ವಿರೋದ್ ಸಬ್ಬತ್‌ ದನ್ಮ ಕರ್ನುನಾತೆ ಕಾಮ್ನ ಕರುಕರಸ್" ಕರಿ ಬೋಲ್ಯು.

3 ತದೆ ಯೇಸುನೆ ಇವ್ಣುನ, "ದಾವೀದ್‌ನಾಬಿ, ಇನ ಜೋ಼ಡ್ಮ ರ‍್ಹವಾಳಾನ ಭುಕ್ ಲಾಗಖ್ಹತರ್‌, ದಾವೀದ್‌ನೆ ಶಾತ್‌ ಕರ‍್ಯೊ ಕರಿ ತುಮೆ ಪಢ್ಯಾಕೊಯ್ನಿಕಿಶು? 4 ದಾವೀದ್‌ನೆ ದೇವ್ನ ಮಂದಿರ್‌ಮ ಜೈ಼ನ್‌, ಯಾಜಕರಸ್‌ ಖಲಿಖಾವ್ಣುಥುತೆ ಪಣ್ಕಿ, ದಾವೀದ್ ರ‍್ಹವೊ, ಇನ ಜೋ಼ಡ್ಮ ರ‍್ಹವಾಳು ರ‍್ಹವೊ, ನಾ ಖಾವ್ಣುಕರಿ ಖಾನುಲ್‌ ರ‍್ಹಯುತೋಬಿ, ದೇವ್ನ ಝಾ಼ಳ್‌ಉತಾರನ ರೋಟಾನ ಖಾದೋನಿ? 5 ಅತ್ರೇಸ್ ಕಾಹೆತೆ, ಸಬ್ಬತ್‌ ದನ್ಮ ಯಾಜಕರ್‌ ಮಂದಿರ್‌ಮ ಸಬ್ಬತ್‌ ದನ್ನ ಮೈಲಾಪ್‍ ಕರ‍್ಯುತೋಬಿ ಇವ್ಣೆ ಅಪರಾದ್‌ಕೊಂತೆ ರ‍್ಹೇಸ್. ಇನತುಮೆ ಮೋಶೆನ ಧರ್ಮಶಾಸ್ತ್ರಮ ಪಢ್ಯಕೊಯ್ನಿಕಿ ಶು? 6 ಕತೋಬಿ ಮೇ ತುಮೂನ, ಮಂದಿರ್‌ಥೀಬಿ ಮೋಟೊ ಹಜ್ಜಾ಼ ಛಾ಼ ಕರಿ ಬೋಲುಸ್. 7 ‘ಮನ ಜಾನ್ವರ್‌ನು ಬಲಿ ನಕೊ, ಗೋರಸ್ ಹೋಣುತೆ’ ಕರಿ ಧರ್ಮಶಾಸ್ತ್ರಮ ಬೋಲಾಸ್ತೆ ಇನಿ ಮತ್‌ಲಬ್ ತುಮೂನ ಖ್ಹಾಚಮಾಬಿ ಮಾಲುಮ್‌ ರ‍್ಹಯುಹೋತ್ತೊ, ಗಲತ್‌ ಕರಾಕೊಂತೆ ಇವ್ಣಾಪರ್ ತುಮೆ ಗಲತ್‌ ಕೋ ಲಗಾಡ್ಯಹೋತ್ನಿ. 8 ಅದ್ಮಿನೊ ಛಿಯ್ಯೊ ಸಬ್ಬತ್‌ ದನ್ನ ಪ್ರಭು ಹುಯಿರ‍್ಹೋಸ್" ಕರಿ ಬೋಲ್ಯೊ.

ಲಕ್‍ವೊನ ಹಾತ್ನ ಯೇಸುನೆ ಅಛ್ಛು಼ ಕರ‍್ಯೊತೆ

9 ಯೇಸು ಹಿಜ್ಜಾ಼ಥೊ ನಿಕ್ಳಿನ್, ಯೆಹೂದ್ಯರ್‌ನ ಸಬೆ ಭರಾವಾನು ಮಂದಿರ್‌ಮ ಗಯೊ. 10 ಹಿಜ್ಜಾ಼ ಹಾತ್‌ ಝೂ಼ಟೊ ಪಡಿಹುಯು ಏಕ್‌ ಅದ್ಮಿಥು. ತದೆ ಥೋಡು ಜ಼ಣು ಯೇಸುಪರ್‌ ಗಲ್ತಿ ಲಗಾಡ್‌ಣು ಕರಿ, ಇವ್ಣೆ ಇನ, "ಸಬ್ಬತ್‌ ದನ್ಮ ಅಛ್ಛು಼ ಕರಾನು ಅಪ್ಣ ಧರ್ಮಶಾಸ್ತ್ರಮ ಬರೋಬರ್‌ಕಿ ಶು?" ಕರಿ ಪುಛಾ಼ಯು.

11 ಯೇಸುನೆ, "ತುಮಾರಮ ಕಿನಾಕನಾತೋಬಿ ಎಕ್ಕಸ್ ಮೇಂಢು ರ‍್ಹೀನ್, ಸಬ್ಬತ್‌ ದನ್ಮ ಯೋ ಮೇಂಢು ಖಾಡ್‌ಮ ಪಡಿಗಯೂತೊ ಯೋ ಇನ ಧರೀನ್, ಉಪ್ಪರ್ ಪಾಡ್‌ಶೆಕೊಯ್ನಿಕಿ ಶು? 12 ಮೇಂಢಥೀಬಿ ಅದ್ಮಿ ಕೈಯೆಕ್ಕಿ ಮಹಾನ್ ಹುಯಿರ‍್ಹುಸ್‍! ಇನಖ್ಹಾಜೇಸ್ ಸಬ್ಬತ್‌ ದನ್ಮ ಅಛ್ಛು಼ಕಾಮ್ ಕರಾನು ಅಪ್ಣಿ ಧರ್ಮಶಾಸ್ತ್ರಮ ಬರೋಬರಸ್‌ ಹುಯಿರ‍್ಹುಸ್‍" ಕರಿ ಜವಾಬ್‌ ದಿದೊ. 13 ಅನಕೇಡೆಥು ಯೇಸುನೆ ಯೋ ಹಾತ್‌ ಝೂ಼ಟೊ ಪಡಿಹುಯು ಅದ್ಮಿನ, "ತಾರೊ ಹಾತ್‌ ಖ್ಹಾಮ್ಣೆ ಕರ್‌" ಕರಿ ಬೋಲ್ಯೊ; ಇನೆ ಖ್ಹಾಮ್ಣೆ ಕರ‍್ಯೊ.

ತದೆ ಇನೊ ಹಾತ್‌ ಅಛ್ಛು಼ ಹುಯಿನ್, ಬಿಜ್ಜೇಕ್‌ ಹಾತ್ನಿ ಘೋಣಿ ಹುಯಿಗಯು. 14 ತದೆ ಫರಿಸಾಯರ್ ಖ್ಹಾರು ಭಾರ್‌ಜೈ಼ನ್‌, ಯೇಸುನ ಖೆವಿ ತರೀಕಾಥಿ ಮಾರಿಯೆ ಕರಿ ಸೋಚ್ಯು.

ದೇವ್ನೆ ಚೂ಼ಣ್ಯೋತೆ ಸೇವಕ್

15 ಯೇಸುನೆ ಇನಿ ವಿರೋದ್ ಇವ್ಣೆ ಸೋಚುಕರಾತೆ ಇನ ಮಾಲುಮ್‌ ಕರಿಲೀನ್, ಹಿಜ್ಜಾ಼ಥೊ ಚ಼ಲೆಗಯೊ; ಮೋಟಿ ಭೀಡ್ ಇನ ಪೀಠೆ ಗಯು. ಅರಾಮ್‌ಕೊಂತೆ ಖ್ಹಾರಾವ್‌ನ ಇನೆ ಅಛ್ಛು಼ ಕರ‍್ಯೊ. 16 ಅಜು಼ ಇನಿ ಬಾರೇಮ ಬಿಜಾ಼ನ ನಾ ಬೋಲ್‌ನು ಕರಿ ಅದ್ಮಿ ಖ್ಹಾರಾನ ಝೇತಾಯೊ. 17 ದೇವ್ನೆ ಪ್ರವಾದಿ ಯೆಶಾಯನ ಮ್ಹೋಡೇಥಿ ಬೋಲಾಯೋತೆ ಖ್ಹಾಚ಼ನ, ಚ಼ಲಾವಾನಖ್ಹಾಜೆ ಯೇಸುನೆ ಆ ಖ್ಹಾರು ಕರ‍್ಯೊತೆ:

18 ಹಂದೇಕ್‌, ಮಾರೊ ಸೇವಕ್, ಅನ ಮೇ ಚೂ಼ಣಿ ರಾಖ್ಯೋಸ್,

ಆ ಮಾರೊ ಪ್ಯಾರ್‌ನೊ ಹುಯಿರ‍್ಹೋಸ್, ಅನೇಥಿ ಮೇ ಖ್ಹುಶಿ ಛೂ಼.

ಮೇ ಮಾರು ಆತ್ಮಾನ ಇನಾಪರ್‌ ರಾಖುಸ್,

ಅಜು಼ ಯೋ ಅಲಕ್‌ ಅದ್ಮಿವೋನಾಬಿ ಮಾರಿ ನ್ಯಾವ್‌ನ ಬೋಲಿವತಾಳ್‌ಶೆ.

19 ಯೋ ಲಡೈ ಕರಾಕೊಯ್ನಿ ಅಜು಼ ಚಿಕ್ರಾಕೊಯ್ನಿ;

ಗಲ್ಲಿಯೇಮ ಇನಿ ಅವಾಜ಼್ ಕಿನಾಬಿ ಖ್ಹಮ್‌ಜಾ಼ವಕೊಯ್ನಿ.

20 ಚ಼ಗ್‌ದೈಗಯುತೆ ಡಂಟ್‍ನ ಯೋ ತೋಡಾಕೊಯ್ನಿ,

ಉಝ಼ವ್‍ಕರಾತೆ ದಿವೋನಾಬಿ ಯೋ ಉಝಾ಼ವಕೊಯ್ನಿ,

ನ್ಯಾವ್‌ನ ಜೀತಾತೋಡಿ ಯೋ ಲಗ್ಯುರ‍್ಹೀಶೆ.

21 ಅಜು಼ ಅಲಕ್‌ ಅದ್ಮಿಖ್ಹಾರು ಇನ ನಾಮ್‌ಪರ್‌ ಭರೋಖ್ಹೊ ಕರ್ಶೆ.

ಯೇಸು ಅಜು಼ ಬೆಲ್ಜಬೂಲ್

22 ಭೂತ್‌ ಧರಿರಾಖ್ಯುಥೂತೆ ಇನಖ್ಹಾಜೇಥಿ ಕಾಣು ಅಜು಼ ಮುಕ್ಕು ಹುಯಿರ‍್ಹುಥೂತೆ ಏಕ್‌ ಜ಼ಣಾನ ಯೇಸುಕನ ಲಾಯು. ಇನೆ ಇನ ಅಛ್ಛು಼ ಕರ್ತಾನ, ಇನ ಡೋಳಾ ಅಜು಼ ವಾತೆ ಆಯು. 23 ತದೆ ಯೇಸುನೆ ಕರ‍್ಯೊತೆ ಇನ ದೇಖಿನ್, ಅದ್ಮಿಖ್ಹಾರು ಆಶ್ಚರ್ಯಖೈನ್, "ಆ ದಾವೀದ್‌ನೊ ಛಿಯ್ಯೊಕಿ ಶು?" ಕರಿ ಬೋಲಿಲಿದು.

24 ಕತೋಬಿ ಫರಿಸಾಯರ್‌ನೆ ಅನಖ್ಹಮ್‌ಜಿನ್, "ಭೂತ್‌ ಖ್ಹಾರಾನೊ ಯಜಮಾನ್ ಹುಯಿರ‍್ಹೋತೆ ಬೆಲ್ಜೆಬೂಲ್‌ನಿ ಮದತ್‌ಥೀಸ್ ಆ ಭೂತ್‌ ಖ್ಹಾರಾನ ಕಾಡಸ್‌ ಪಣ್ಕಿ, ಬಿಜು಼ ಶನೇಥೀಬಿ ಕಾಹೆ" ಕರಿ ಬೋಲ್ಯು.

25 ಯೇಸುನೆ ಇವ್ಣಿ ಸೋಚ್ನ ಮಾಲುಮ್‌ ಕರಿಲೀನ್, "ಕೆಹು ರಾಜ್ಯ ಫುಟ್‌ ಪಡೀನ್, ಇನಿ ವಿರೋದ್ ಯೋಸ್‌ ಭೀಡಾಸ್ಕಿ, ಯೋ ರಾಜ಼್ ಬರ್ಬಾತ್ ಹುಯಿಜಾ಼ಶೆ. ಇಮ್ಮಸ್ ಏಕ್‌ ಘರ್‌ಮ ರ‍್ಹವೊ, ಖ್ಹಯೇರ್‌ಮ ರ‍್ಹವೊ ಫುಟ್‌ ಪಡೀನ್, ಖ್ಹುದ್‌ನಿ ವಿರೋದ್ ಭೀಡಾಲಗಾಸ್ಕಿ, ಇಮ್ನು ಘರ್ ಅಜು಼ ಖ್ಹಯೇರ್ ಪಡಿಜಾ಼ಸ್‌. 26 ಇಮ್ಮಸ್‌ ಶೈತಾನ್ ಶೈತಾನ್ನ ನಖ್ಹಾಡ್ಯುತೊ ಇನಿ ವಿರೋದ್ ಲಡೈಭೀಡಾನಿತರ ಹುಯು, ಇಮ್‍ರ‍್ಹಯುತೊ ಇನಿ ರಾಜ್ಯ ಕಿಮ್ ಭೀರ‍್ಹಿಷೆ? 27 ಮೇ ಬೆಲ್ಜೆಬೂಲ್‌ನಿ ಶಕಥ್ಥಿ ಭೂತ್‌ಖ್ಹಾರು ಕಾಡುಸ್‌ ಕರಿ ತುಮೆ ಬೋಲೋಸ್‌. ಇಮ್‍ಕತೊ, ತುಮಾರು ಶಿಷ್ಯರ್‌ಖ್ಹಾರು ಕಿನಿ ಶಕಥ್ಥಿ ಭೂತ್‌ಖ್ಹಾರನ ಕಾಡಸ್‌? ಇನಖ್ಹಾಜೇಸ್ ತುಮಾರು ಅದ್ಮಿಸ್‌ ತುಮೂನ ನ್ಯಾವ್ ಕರ್ಶೆ. 28 ಮೇ ಬೆಲ್ಜೆಬೂಲ್‌ನಿ ಶಕಥ್ಥಿ ಕಾಹೆ, ಕತೋಬಿ ದೇವ್ನಿ ಆತ್ಮಾನಿ ಶಕಥ್ಥಿ ಭೂತ್‌ಖ್ಹಾರನ ಕಾಡ್ತೊ ಉಶೇತೊ, ದೇವ್ನಿ ರಾಜ್ಯ ತುಮಾರ ಖನ್ನೆ ಆಯಿಗೈಯು ಕರಿ ಆ ವತಾಳಸ್‍.

29 ಅತ್ರೇಸ್ ಕಾಹೆತೆ, ಕೋಣ್‌ಬಿ ಪಹಿಲೆ ಏಕ್‌ ಶಕತ್‌ವಾಳ ಅದ್ಮಿನ ಭಾಂದ್ಯುನಾತೊ, ಇನ ಘರ್‌ಮ ಪೇಶಿನ್, ಇನು ಶೊತ್‌ನ ಲೂಟಾನ ಕೋ ಹುವಾನಿ, ಪಹಿಲ್‌ವಾಣ್ಣ ಭಾಂದಾನ ಬಾದ್‌ಮ, ಇನ ಘರ್‌ನ ಲೂಟೆಜಾ಼ಯ್‌.

30 ಮಾರ ಜೋ಼ಡ್ಮ ಮಳಾಕೊಂತೆ ಇವ್ಣೆ ಮಾರು ವಹೇರ‍್ಯು ಹುಯಿರ‍್ಹುಸ್‍. ಮಾರ ಜೋ಼ಡ್ಮ ಎಕ್ಟು ಕರಾಕೊಂತೆ ಇವ್ಣೆ ಛಿದ್ರಾವವಾಳು ಹುಯಿರ‍್ಹುಸ್‍. 31 ಇನಖ್ಹಾಜೇಸ್ ಮೇ ತುಮೂನ ಬೋಲುಸ್, ಅದ್ಮಿಖ್ಹಾರು ಕರಾತೆ ಹರೇಕ್ ಪಾಪ್ನ ಅಜು಼ ಗಾಳೆನಿ ವಾತೇನ ಮಾಪಿ ಛಾ಼; ಕತೋಬಿ ಪವಿತ್ರಾತ್ಮನ ವಿರೋದ್ ವಾತೆ ಬೋಲವಾಳಾನ ಮಾಪಿಕೊಯ್ನಿ. 32 ಕೋಣ್‌ತೋಬಿ ಅದ್ಮಿನೊ ಛಿಯ್ಯಾನ ವಿರೋದ್ ವಾತೆ ಬೋಲ್ಯುತೊ ಇನ ಮಾಪಿ ಛಾ಼; ಕತೋಬಿ ಪವಿತ್ರಾತ್ಮನಿ ವಿರೋದ್ ವಾತೆ ಬೋಲ್ಯುತೊ ಇನ ಆ ಜಗತ್‌ಮ ಹಮ್ಕೆಬಿ ಕೊಯ್ನಿ, ಕದೇಬಿ ಮಾಪಿಸ್‍ಕೊಯ್ನಿ.

ಝಾ಼ಡು ಅಜು಼ ಇನು ಪಂಡಾನಿ ಬಾರೇಮ

33 "ತುಮೂನ ಅಛ್ಛು಼ ಪಂಡು ಹೋಣುಕತೊ ತುಮಾರಕನ ಅಛ್ಛು಼ ಝಾ಼ಡು ರ‍್ಹೇಣು. ತುಮಾರು ಝಾ಼ಡು ಅಛ್ಛು಼ ನಾ ರ‍್ಹಯೂತೊ, ಯೋ ಖರಾಬ್ ಪಂಡಾನಸ್‌ ಮ್ಹೇಲ್‌ಶೆ, ಏಕ್‌ ಝಾ಼ಡು ಕಿಮ್ನು ಕರಿ ಬೋಲಾನು ಯೋ ಮ್ಹೇಲಾತೆ ಪಂಡಾಥೀಸ್‌ ಮಾಲುಮ್‌ ಪಡಾಸ್‌". 34 ಅಲಾ ಖ್ಹಾಪ್‌ನ ಖಾನ್‌ದಾನ್‌ವಾಳ! ತುಮೆ ಖರಾಬ್ ರ‍್ಹವಾಪರ್, ತುಮಾರ ಮ್ಹೋಡವಾಟೆ ಅಛ಼್ಛು ವಾತೆ ಕಿಮ್ ನಿಕಳ್‌ಶೆ? ದಿಲ್ಮ ಭರೈರ‍್ಹೇಸ್ತೇಸ್‌ ಮ್ಹೋಡವಾಟೆ ನಿಕ್ಳಾಸ್‌. 35 ಏಕ್‌ ಅಛ್ಛು಼ ಅದ್ಮಿ ಇನಿ ಕಣ್ಗಿಮಾಥು ಅಛ಼್ಛು ರಾಛ಼ವ್‍ನ ಭಾರ್ ಕಾಡಸ್‌; ಏಕ್‌ ಖರಾಬ್ ಅದ್ಮಿ ಇನು ಖರಾಬ್ ಕಣ್ಗಿಮಾಥು ಖರಾಬ್ ರಾಛ಼ವ್‍ನ ಭಾರ್‌ಕಾಡಸ್‌. 36 ಅತ್ರೇಸ್ ಕಾಹೆತೆ, ಮೇ "ತುಮೂನ ಶಾತ್‌ ಬೋಲುಸ್‌ಕತೊ, ಅದ್ಮಿಖ್ಹಾರು ಫಾಯಿದೊಕೊಂತೆ ಬೋಲಾಸ್ತೆ ಹರೇಕ್ ವಾತೇನಿ ಬಾರೇಮ ನ್ಯಾವ್‍ನಿ ತೀರ್ಪ್‌ನ ದನ್ಮ ಗಣ್ತಿ ದೇವ್ಣುಪಡ್‌ಶೆ. 37 ತಾರಿ ವಾತೆಥೀಸ್‌ ತೂ ನೀತಿವಾಳೊಕರಿ ತೀರ್ಪ್‌ ಮಳ್‌ಶೆ; ಅಜು಼ ತಾರಿ ವಾತೆಥೀಸ್‌ ತೂ ಅಪರಾದಿಕರಿ ತೀರ್ಪ್ ಮಳ್‌ಶೆ" ಕರಿ ಬೋಲ್ಯೊ.

ಅದ್ಭುತ್ ಕರಾನ ಬೋಲ್ಯೂತೆ

38 ತದೆ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್‌ಮ ಥೋಡು ಜ಼ಣು ಯೇಸುನ, "ಗುರು, ತೂ ಅದ್ಭುತ್ ಕರಾನು ದೇಕ್ಣು ಕರಿ ಹಮೆ ಆಖ್ಹ್ ಕರಿಯೇಸ್" ಕರಿ ಬೋಲ್ಯು.

39 ಯೇಸುನೆ, "ಆ ಜ಼ಗ್‌ನು ಅದ್ಮಿ ಖರಾಬ್ ಅಜು಼ ಪಾಪಿ ಹುಯಿರ‍್ಹುಸ್‍, ಅವ್ಣೆ ಅದ್ಭುತ್ ಕಾಮ್ ದೇಕ್ಣು ಕರಿ ಆಖ್ಹ್ ಕರಾಸ್. ಕತೋಬಿ ಯೋನ ಕರಿ ಪ್ರವಾದಿಮ ಹುಯೂತೆ ಅದ್ಭುತ್ ಕಾಮಸ್ ಪಣ್ಕಿ, ಬಿಜು಼ ಕೆಹೂಬಿ ಕೊಯ್ನಿ. 40 ಯೋನ ಕಿಮ್ ತೀನ್ ರಾತ್‌-ದನ್ ಮೋಟಮಾಛ್ಲಾ಼ನ ಪೇಟ್‌ಮ ಥೋಕಿಇಮ್ಮಸ್‌, ಅದ್ಮಿನೊ ಛಿಯ್ಯೊ ತೀನ್ ರಾತ್‌-ದನ್ ಧರ್ತಿನ ಮಹಿ ರ‍್ಹಿಶೆ. 41 ನ್ಯಾವ್‍ನ ತೀರ್ಪ್‌ನ ದನ್ಮ ನಿನವೆ ನಂಗರ್‌ವಾಳು ಆ ಪಿಳ್ಗಿವಾಳಾನ ವಿರೋದ್ ಭೀರಿನ್‌, ತುಮೆ ಗಲತ್‌ ಕರಿ ಬೋಲ್‌ಶೆ. ಇವ್ಣೆ ಯೋನಾನೆ ಬೋಲ್ಯೋತೆ ವಚನ್ನ ಖ್ಹಮ್‌ಜಿನ್‌, ಪಾಪ್ನ ಮ್ಹೇಲಿನ್ ದೇವ್ ಭಣಿ ಫರಿಗಯು. ಕತೋಬಿ ಮೇ ತುಮೂನ ಬೋಲುಸ್ಕಿ, ಯೋನಾಥೀಬಿ ಮೋಟೊ ಹಜ್ಜಾ಼ ಛಾ಼! 42 ಶೆಬಾ ದೇಖ್ಹ್‌ನಿ ರಾಣಿ ನ್ಯಾವ್‍ನ ತೀರ್ಪ್‌ನ ದನ್ಮ ಆ ಪಿಳ್ಗಿನಿ ವಿರೋದ್ ಭೀರಿನ್‌, ತುಮೆ ಗಲತ್‌ ಕರಿ ಬೋಲ್‌ಶೆ. ಯೋ ಸೊಲೊಮೋನ್ನಿ ಗ್ಯಾನ್ನಿ ವಾತೇನ ಖ್ಹಮ್‌ಜಾ಼ನಖ್ಹಾಜೆ ಜಗತ್ನ ಕಡ್‍ಶೀಥಿ ಆಯಿ. ಕತೋಬಿ ಮೇ ತುಮೂನ ಬೋಲುಸ್ಕಿ, ಸೊಲೊಮೋನ್‌ಥೀಬಿ ಊಚೊರ‍್ಯವಾಳೊ ಹಜ್ಜಾ಼ ಛಾ಼!

ದುರಾತ್ಮ ಪಾಛು಼ಫರಿ ಆವಸ್ತೆ ಬಾರೇಮ

43 "ಭೂತ್‌ ಏಕ್‌ ಅದ್ಮಿನ ಮ್ಹೇಲಿನ್ ನಿಕ್ಳಿಜಾ಼ವಾನ ಬಾದ್ಮ, ಅರಾಮ್‌ ಕರಾನಖ್ಹಾಜೆ ಝ಼ಗೊ ಢೂಂಡ್‌ತುಹುಯಿನ್, ಪಾಣಿಕೊಂತೆ ಝ಼ಗೋಮ ವನ್‌ವನ್ತು ರ‍್ಹೇಸ್. 44 ಕತೋಬಿ ಅರಾಮ್‌ ಕರಾನ ಝ಼ಗೊ ಮಳಾಕೊಂತೆ ದೇಖಿನ್‌, ಯೋ, "ಮೇ ಮ್ಹೆಂದಿನ್ ಆಯೋತೆ ಮಾರ ಘರ್‌ನ ಫಾಛು಼ ಫರೀನ್ ಜ಼ವುಸ್‌" ಕರಿ ಬೋಲಿನ್, ಪಾಛು಼ ಯೋ ಘರ್‌ಕನ ಆಯಿನ್, ಯೋ ಘರ್ ಖಾಲಿ ಪಡ್ಯುತೆ ಅಜು಼ ಝ಼ಡೈಶನ್‌ಗಾರ್‌ ಹುಯಿರ‍್ಹೂತೆ ದೇಖಿನ್‌, 45 ಜೈ಼ನ್‌, ಇನೇಥಿಬಿ ಖರಾಬ್ ಹುಯಿರ‍್ಹೂತೆ ಬಿಜು಼ ಖ್ಹಾತ್ ಭೂತ್‌ನ ಇನ ಜೋ಼ಡೆ ಬುಲೈಲಿನ್ ಆವಸ್. ಇವ್ಣೆ ಯೋ ಅದ್ಮಿನ ಮಹಿ ಪೇಶಿನ್, ಹಿಜ್ಜಾ಼ಸ್ ರ‍್ಹವಾಲಗಸ್‌, ತದೆ ಯೋ ಅದ್ಮಿನಿ ಖ್ಹರ್ತಿಮಾನಿ ಹಾಲ್‌ ಪಹಿಲೆಥೀಬಿ ಖರಾಬ್ ಹುಯಿಜಾ಼ಸ್. ಅಮ್ಮಸ್ ಆ ಪಿಳ್ಗಿನು ಖರಾಬ್ ಅದ್ಮಿನ ಉಶೆ" ಕರಿ ಬೋಲ್ಯೊ.

ಯೇಸುನಿ ಆಯ ಅಜು಼ ಇನ ಭಯ್ಯೆ

46 ಯೇಸು ಅದ್ಮಿನಿ ಝೂ಼ಂಡ್‌ನ ಜೋ಼ಡೆ ಬಿಜೂ಼ಬಿ ವಾತೆ ಬೋಲುಕರಾನಿ ವಖ್ಹತ್‌ಮ, ಇನಿ ಆಯಾಬಿ ಇನ ಭೈಯೇ ಅಯಿನ್, ಇನಜೋ಼ಡೆ ವಾತೆ ಬೋಲ್‌ನು ಕರಿ ಭಾರ್‌ಭೀರ‍್ಯು. 47 ತದೆ ಏಕ್‌ ಜ಼ಣಾನೆ ಯೇಸುನ, "ಹಂದೇಕ್‌, ತಾರಿ ಆಯಾಬಿ, ತಾರ ಭೈಯೇ, ತುನ ವಾತೆ ಬೋಲ್‌ನು ಕರಿ ಭಾರ್‌ ಭಿಯ್ಯುಸ್" ಕರಿ ಬೋಲ್ಯು.

48 ಯೇಸುನೆ, "ಮಾರಿ ಆಯ ಕೋಣ್? ಮಾರ ಭೈಯೇ ಕೋಣ್? ಕರಿ ಬೋಲಿನ್, 49 ಶಿಷ್ಯರ್‌ ಭಣಿ ಹಾತ್‌ ವತಾಳಿನ್ "ಹಂದೇಖೊ! ಅವ್ಣೆಸ್‌ ಮಾರಿ ಆಯ ಅಜು಼ ಮಾರ ಭೈಯೇ". 50 ಪರ್‌ಲೋಕ್‌ಮ ಛಾ಼ತೆ ಮಾರ ಬಾನಿ ಮರ್ಜಿನಿ ಘೋಣಿ ಕೋಣ್ ಚಾ಼ಲಾಸ್ಕಿ, ಯೋಸ್‌ ಮಾರೊ ಭೈ, ಮಾರಿ ಭೇನ್ ಅಜು಼ ಮಾರಿ ಆಯ ಹುಯಿರುಸ್‌" ಕರಿ ಬೋಲ್ಯೊ.