ಯೇಸುನು ರೂಪ್ ಬದ್ಲ್ಯೂತೆ
1 ಛೊ಼ ದನ್ನ ಬಾದ್ಮ ಯೇಸುನೆ ಪೇತ್ರ, ಯಾಕೋಬ ಅಜು಼ ಇನೊ ಭೈ ಯೋಹಾನ್ನ ಬುಲೈಲಿನ್, ಏಕ್ ಊಚಾ಼ ಪಹಡ್ಪರ್ ಗಯೊ. ಹಿಜ್ಜಾ಼ ಇವ್ಣುನ ಮ್ಹೆಂದಿನ್ ಕೋಣ್ಬಿ ಕೋ ಥೂನಿ. 2 ಹಿಜ್ಜಾ಼ ಇವ್ಣ ಡೋಳಾನ ಖ್ಹಾಮ್ಣೇಸ್, ಯೇಸುನು ರೂಪ್ ಬದ್ಲಿಗಯು: ಇನು ಮ್ಹೋಡು ಚಾ಼ಂದ್ನಿಘೋಣಿ ಝ಼ಮ್ಕಾಲಗ್ಯು ಅಜು಼ ಇನ ಲುಂಗ್ಡ ಉಜಾ಼ಳಾನಿಘೋಣಿ ಧೋಳುಫಟ್ ಹುಯಿಗಯು. 3 ಎತ್ರೇಸ್ ಕಾಹೆತೆ ಮೋಶೇಬಿ, ಎಲೀಯ ಯೇಸುನ ಜೋ಼ಡೆ ವಾತೆ ಬೋಲುಕರಾತೆ ಯೋ ತೀನ್ ಶಿಷ್ಯರ್ನೆ ದೇಖ್ಯ. 4 ತದೆ ಪೇತ್ರನೆ ಯೇಸುನ, "ಪ್ರಭು, ಹಮೆ ಹಜ಼್ಜಸ್ ರ್ಹವಾನು ಕೆತ್ರೇಕ್ಕಿ ಅಛ್ಛು಼ ಹುಯಿರ್ಹೂಸ್! ತೂ ಬೋಲ್ತೊ ಉಶೇತೊ, ಮೇ ಹಜ್ಜಾ಼ ತೀನ್ ಡೇರಾ ಠೋಕೆಸ್, ಏಕ್ ತುನ, ಏಕ್ ಮೋಶೇನ ಅಜು಼ ಏಕ್ ಎಲೀಯನ" ಕರಿ ಬೋಲ್ಯೊ.
5 ಯೋ ಅಮ್ ಬೋಲುಕರಾನಿ ವಖ್ಹತ್ಮಾಸ್, ಏಕ್ ಉಜಾ಼ಖ್ಹ್ನು ವಾದ್ಳು ಐನ್, ಇವ್ಣಾಪರ್ ಢಪಾಯು, ಅಜು಼ ಯೋ ವಾದ್ಳಾನ ಮಹಿಥು, "ಆ ಮಾರೊ ಪ್ಯಾರ್ನೊ ಛಿಯ್ಯೊ, ಅನೇಥಿ ಮೇ ಘಣು ಖ್ಹುಶಿ ಛೂ಼!" ಕರಿ ಏಕ್ ಅವಾಜ಼್ ಆಯೊ.
/images/a/6c03efee-c76a-4ab8-fe2e-555683f90900)
/images/a/9ec55bb8-7dc5-47b9-c32a-98aea1c00300)