ಮತ್ತಾಯ 21

ಯೇಸು ರಾಜಾ಼ನಿಘೋಣಿ ಯೆರೂಸಲೇಮ್ಮ ಗಯೋತೆ

1 ಯೇಸು ಅಜು಼ ಇನ ಶಿಷ್ಯರ್‌ ಯೆರೂಸಲೇಮ್‌ನ ಖನ್ನೆ-ಖನ್ನೆ ಐನ್, ಆಲಿವ್ ಪಹಾಡ್‌ಕನ ಛಾ಼ತೆ ಬೆತ್ಫಗೆ ಕರಿ ಗಾಮ್‌ಕನ ಆಯಾ. ತದೆ ಯೇಸುನೆ ಇನ ಬೇ ಶಿಷ್ಯರ್‌ನ ಬುಲೈನ್, 2 "ತುಮಾರ ಖ್ಹಾಮ್ಣೆ ಛಾ಼ತೆ ಗಾಮ್ಮ ಜಾ಼ವೊ, ಜಾ಼ತಸ್‌ನ ಹಿಜ್ಜಾ಼ ಭಂದೈರ‍್ಹೀಶೆತೆ ಗಧೇಡಾನ ಅಜು಼ ಇನಜೋ಼ಡೆ ಛಾ಼ತೆ ಇನ ಚೆಲ್ಕಾನ ದೇಕ್‌ಶು; ಯೋ ಭೇನ ಛೋ಼ಡಿಲಿನ್, ಮಾರಕನ ಲ್ಯಾವೊ. 3 ಕೋಣ್‌ತೋಬಿ ತುಮೂನ ಶಾತ್‌ತೋಬಿ ಬೋಲ್ಯೂತೊ, ‘ಪ್ರಭುನ ಆ ಹೋಣುಕಸ್; ಅಜು಼ ಒಗ್ಗಿಸ್‌ಮ ಯೋ ಅನ ಮೋಕ್ಲಿದಿಶೆ’ ಕರಿ ಬೋಲೊ" ಕರಿ ಬೋಲಿನ್ ಮೋಕ್‌ಲ್ಯೊ.

4 ಏಕ್‌ ಪ್ರವಾದೀನ ಮ್ಹೋಡವಾಟೆ ಬೋಲಾಯೋತೆ ವಾತೆ ಚಾ಼ಲಾನಖ್ಹಾಜೆ ಅಮ್ ಹುಯೂತೆ: ಯೋ ವಾತೆ ಶಾತ್ ಕತೊ,

5 ಚೀಯೋನ್ ನಂಗರ‍್ನ ಬೋಲೊ,

ದೇಕ್ ತಾರೊ ರಾಜ಼ ತಾರಕನ ವಳ್ಯಾವಸ್,

ಯೋ ಖ್ಹುದ್‌ನ ಝು಼ಕೈಲೀನ್, ಗಧೇಡಾಪರ್ ಬೇಶಿನ್,

ಒಹೊ, ಗಧೇಡಾನ ಚೆಲ್ಕಪರ್‌ ಬೇಶಿನ್ ವಳ್ಯಾವಸ್’ ಕರಿ ಬೋಲಾನುಸ್.

6 ತದೆ ಶಿಷ್ಯರ್‌ ಜೈ಼ನ್, ಯೇಸುನೆ ಇವ್ಣುನ ಬೋಲ್ಯೋತೆ ಇಮ್ಮಸ್ ಕರ‍್ಯು. 7 ಇವ್ಣೆ ಗಧೇಡಾನ ಅಜು಼ ಗಲ್‌ಢ ಚೆಲ್ಕಾನ ಲೈನ್‌, ಇನಪರ್ ಇವ್ಣ ಲುಂಗ್ಡಾವ್‍ನ ನಾಖ್ಯು. ಯೇಸು ಇನಾಪರ್ ಚ಼ಢೀನ್ ಬೇಶಿಗಯೊ. 8 ತದೆ ಅದ್ಮಿನಿ ಝೂ಼ಂಡ್‌ಮ ಥೂತೆ ಘಣು ಅದ್ಮಿ ಇವ್ಣ ಲುಂಗ್ಡಾವ್‍ನ ವಾಟ್‌ಪರ್ ಬಿಛಾ಼ಯು, ಬಿಜು಼ ಥೋಡಾನೆ ಝಾ಼ಡಾನಿ ಡಾಳಿಯೇನ ಕತ್ರಿಲೈನ್, ವಾಟ್‌ಪರ್ ನಾಖ್ಯು. 9 ಯೇಸುನ ಖ್ಹಾಮ್ಣೆ ಅಜು಼ ಪೀಠೆ ಝೂ಼ಂಡ್‌ಥಿ ವಳ್ಯುಜಾ಼ತುಥೂತೆ ಅದ್ಮಿಖ್ಹಾರು, "ದಾವೀದ್‌ನ ಛಿಯ್ಯಾನ ಸ್ತುತಿಹುವ್ವಾದೆ! ಪ್ರಭು ದೇವ್ನ ನಾಮ್‌ಪರ್‌ ಆವಾಳಾನ ಆಶೀರ್ವಾದ್‌ ಹುವಾದೆ! ಉಪ್ಪರ್‌ಲ್ಯ ಲೋಕಾಮ ದೇವ್ನ ಧನ್ಯವಾದ್ ಹುವಾದೆ!" ಕರಿ ಚಿಕ್‌ರ‍್ಯು.

10 ಯೇಸು ಯೆರೂಸಲೇಮ್‌ನ ಜಾ಼ವಾದಿನ್, ಯೋ ಖ್ಹಯೇರ್ ಅಖ್ಖುಸ್ ಚಿಕ್ರಾಣ್ ಪಡೀನ್, "ಆ ಕೋಣ್?" ಕರಿ ಅದ್ಮಿಖ್ಹಾರು ಪುಛಾ಼ಯು.

11 ತದೆ ಯೋ ಅದ್ಮಿನಿ ಝೂ಼ಂಡ್‌ನೆ, "ಆ ಪ್ರವಾದಿ ಹುಯಿರ‍್ಹೋತೆ ಯೇಸು, ಆ ಗಲಿಲಾಯಾನು ನಜ಼ರೇತ್‌ವಾಳೊ" ಕರಿ ಜವಾಬ್‌ ದಿದು.