Romanos 11

ಇಸ್ರಾಯೇಲ್‌ವಾಳಪರ್ ದೇವ್ನಿ ಗೋರ್‌

1 ಇಮ್‍ಕತೊ, ದೇವ್ ಇನ ಅದ್ಮೆವ್‍ನ ಝಿಟ್ಕಾರ್‌ದಿದೊಕಿ ಶು? ಕರಿ ಮೇ ಬೋಲುಸ್. ಕದೇಬಿ ಕೊಯ್ನಿ, ಮೇ ಏಕ್‌ ಇಸ್ರಾಯೇಲ್‌ವಾಳೊ ಹುಯಿರ‍್ಹೋಸ್. ಅಬ್ರಹಾಮ್‌ನಿ ಖಾನ್‌ದಾನ್‌ವಾಳೊ, ಬೆನ್ಯಾಮೀನ್ನ ಖೂಮ್‍ವಾಳೋಬಿ ಹುಯಿರ‍್ಹೋಸ್. 2 ದೇವ್, ಯೋ ಅಗಾಡಿಸ್ ಮಾಲುಮ್ ಕರಿರಾಖ್ಯೊತೆ ಇಸ್ರಾಯೇಲ್‌ ಅದ್ಮೆವ್‌ನ ಝಿಟ್ಕಾರ್‌ ದಿದೊಕೊಯ್ನಿ. ದೇವ್ನಿ ವಚನ್ ಎಲೀಯನಿ ಬಾರೇಮ ಶಾತ್ ಬೋಲಸ್‍ಕರಿ ತುಮೂನ ಮಾಲುಮ್ ಕೊಯ್ನಿಕಿಶು? 3 "ಪ್ರಭು, ಇವ್ಣೆ ತಾರ ಪ್ರವಾದಿಖ್ಹಾರನ ಮಾರಿನಾಖ್ಯು. ಅಜು಼ ತಾರಿ ಚಾ಼ಚ಼ರ್‌ನ ಫೋಡಿನಾಖ್ಯು. ಮೇ ಎಕ್ಕಸ್‍ಜ಼ಣೊ ಬಚಿರ‍್ಹೋಸ್. ಇವ್ಣೆ ಮಾರ ಜಾನ್‌ ಕಾಡಿನಾಖಿದ್ಯವಾನ ಕೋಶಿಶ್ ಕರುಕರಸ್" 4 ದೇವ್ನಿ ಜ಼ವಾಬ್ ಶಾತ್‍ಕತೊ, "ಬಾಳನ ಮೂರತ್ನ ಅಡ್‍ಪಡ್ಯುಕೊಂತೆ ಖ್ಹಾತ್‍ಹಜಾ಼ರ್‌ ಪರ್ಖ್ಹಾನ ಮಾರಖ್ಹಾಜೆ ಬಚಾ಼ಡಿರಾಖ್ಯೊಸ್. 5 ಯೋಸ್ ಪರಕ್ಮ ಆ ಹಗಾಮ್ಮಾಬಿ ವಾರ್‌ಖ್ಹೇಥಿ ಚೂ಼ಣೈರ‍್ಹುತೆ ಇಸ್ರಾಯೇಲ್‍ವಾಳನು ಜಾನ್ನ ದೇವ್ ಬಚಾ಼ಡ್‌ಶೆ. 6 ಯೋ ಚು಼ನಾವ್ಣಿ ಕಾಮ್ನಿ ಅದಾರ್‌ಪರ್ ಕಾಹೆ, ವಾರ್‌ಖ್ಹೇಥಿಸ್ ಹುಯಿರ‍್ಹೇಸ್. ಕಾಮ್‍ಥಿ ಯೋ ಹುಯಿರ‍್ಹಯುತೊ ಅಜು಼ ಕದೇಬಿ ದೇವ್ನಿ ಕೃಪಾವರ ಕೃಪೆ ಹುಯಿರ‍್ಹಿಶೆಕೊಯ್ನಿ. 7 ಇಮ್‍ಕತೊ ಶಾತ್? ಇನಖ್ಹಾಜೆ ಇಸ್ರಾಯೇಲ್‍ನೆ ಢೂಂಡ್ಯಹುಯಾನ ಲೀಲಿದುಕೊಯ್ನಿ. ಕತೋಬಿ ಇವ್ಣಾಮ ಚೂ಼ಣೈಗಯಹುಯಾನೆ ಲೀಲಿದು; ಉಬ್ರಿಹುಯುಖ್ಹಾರು ಕಠಣ್ ದಿಲ್‍ವಾಳುಹುಯು. 8 ಪವಿತ್ರ ದಪ್ತರ್‌ಮ ಲೀಖೈರ‍್ಹಯುತೆ ತಿಮ್ "ದೇವ್ನೆ ಇವ್ಣುನ ಮಂಕ್ ಆತ್ಮಾನ ದೇಖಾಕೊಯ್ನಿತೆ ಡೋಳಾನಬಿ ಅಜು಼ ಖ್ಹಮ್‌ಜಾ಼ಕೊಯ್ನಿತೆ ಕಾನ್ನ ದಿದೊ. ಆ ಹಮ್ಕೆಲಗೂಬಿ ಇಮ್ಮಸ್ ಛಾ಼." 9 ದಾವೀದನೆ, "ಇವ್ಣು ಮಿಝ಼್‌ವನಸ್ ಇವ್ಣುನ ಫಾಖ್ಹೊಬಿ, ಜಾ಼ಳೂಬಿ, ಇನಾಮ ಖ್ಹಪ್ಡಿ ಪಟ್ಕಿನ್ ನಿಶತ್‌ಲ್ಯವಾದೆ! 10 ಇವ್ಣ ಡೋಳ ಭುಂಬ್‌ಳಹುಯಿನ್ ನಕೊ ದೆಖಾವದೆ, ಅಜು಼ ಕದೆಕದೇಬಿ ಇವ್ಣೆ ಖ್ಹತಾಪ್ಣಿಮ ಪಡಿಜಾ಼ವಾದೆ" ಕರಿ ಬೋಲಸ್.✝11:10 ಕೀರ್ತನೆ 69:23 11 ಇಮ್‍ಕತೊ ಉಟ್ನುನಾತೆ ಪರಕ್ಮ ಯೆಹೂದ್ಯರ್ ಠೋಕರ್‌ಲಾಗಿನ್ ಇವ್ಣೆ ರಡ್ಕಿಗುಕಿಶು? ಕಾಹೆ ಇಮ್‌ ಕಾಹೆ! ಶನಕತೊ ಇವ್ಣಿ ಗಲತ್‌ನಖ್ಹಾಜೆ ಯೆಹೂದ್ಯರ್‌ನ ಪೇಟ್ನ ಬಳಾಪೊ ಹುವಾನಖ್ಹಾಜೆ ರಕ್ಷಣೆ ಯೆಹೂದ್ಯರ್‌ಕಾಹೆತೆ ಅದ್ಮಿಪರ್ ಆಯು. 12 ಕತೋಬಿ ಇವ್ಣಿ ಗಲತ್‌ಥಿ ಜಗತ್ನ ಘಣು ಆಶೀರ್ವಾದ್‌ ಆಯಿನ್, ಇವ್ಣಿ ಹಾರ್‌ಥಿ ಯೆಹೂದ್ಯರ್‌ಕಾಹೆತೆ ಅದ್ಮೆವ್‍ನ ಘಣು ಆಶೀರ್ವಾದ್‌ ಮಳಿರ‍್ಹಯು ಉಷೇತೊ ಯೋಖ್ಹಾರುಸ್ ಯೆಹೂದ್ಯರ್ ಅಯಿನ್ ಎಕ್ಟುಹುಯೂತೊ ಕೆತ್ರೆ ಮಹಾನ್‍ರ‍್ಹಿಶೆ.

ಯೆಹೂದ್ಯರ್ ಕಾಹೆತೆ ಇವ್ಣುನ ರಕ್ಷಣೆ

13 ಯೆಹೂದ್ಯರ್‌ಕಾಹೆತೆ ತುಮಾರಿಜೋ಼ಡ್ಮ ವಾತೆಬೋಲುಕರುಸ್; ಮೇ ಯೆಹೂದ್ಯ ಕಾಹೆತೆ ಅದ್ಮೆವ್‍ನ ಅಪೊಸ್ತಲ ಹುಯಿರ‍್ಹವಾನಿ ಪರಕ್ಮ ಮಾರಿ ಸೇವೆನಿ ಬಾರೇಮ ಖ್ಹರವ್‌ಕರುಸ್. 14 ಕಿಮ್‌ಕತೊ ಮೆ ಮಾರಶೊಂತ್ ಅದ್ಮಿಯೆವ್‌ಮ ಬಳಾಪನ ಜಾ಼ಖ್ಹತ್ ಕರೀನ್ ಇವ್ಣಮ ಥೋಡಜ಼ಣಾನ ತೋಬಿ ರಕ್ಷಣೆಮ ಲ್ಯಾವ್ಣು. 15 ಶನಕತೊ ಇವ್ಣುನ ಝಿಟ್ಕಾರಾಥಿ ಜಗತ್‌ ದೇವ್ನಿಜೋ಼ಡ್ಮ ಮಳೈದ್ಯಾವ ಖ್ಹರ್ಕು ರ‍್ಹಯುತೊ, ಇವ್ಣು ಸ್ವೀಕಾರ್, ಮರ‍್ಯುಹುಯು ಜಿವ್ತುಹುಯಿನ್ ಉಠೀನ್ ಆವಾನಿತರ ರ‍್ಹಿಶೆಕೊಯ್ನಿಕಿ ಶು? 16 ರೋಟಾನು ಫೈಲ ಟುಕ್ಡಾನ ದೇವ್ನ ದಿದೋತೊ, ಯೊ ಅಖ್ಖೋ ಏಕ್‍ರೋಟೊಸ್ ಇನುಸ್ ಹುಯಿಗು. ಝಾ಼ಡ್‌ನಿ ಜ಼ಡ್‌ ಪವಿತ್ರ ಹುಯಿರ‍್ಹುತೊ ಝಾ಼ಡ್‌ನಿ ಡಾಳಿಯೇಬಿ ಇನೀಸ್‍ ಹುಯು. 17 ಖ್ಹಾಚಮಾಬಿ ಫುಟಿರ‍್ಹುತೆ ಆಲಿವ್ ಝಾ಼ಡ್‌ನಿ ಡಾಳಿಯೆ ಟುಟಿಗಯು, ಅಜು಼ ಝಾ಼ಡಿನು ಆಲಿವ್ ಝಾ಼ಡ್‌ನಿ ಡಾಳೀನಿಘೊಣಿ ಹುಯಿರೋತೆ ತುನ ಇನಿ ಝ಼ಗೋಮ ಖಶಿ ಭಾಂದಿರಾಖಾತೆ ಯೋ ಖ್ಹಾಚ ಆಲಿವ್ ರಖ್ಹ್‌ನಿ ಜ಼ಡ್‌ಮ ಯೋ ಭಾಗ್‌ಲೀರಾಖ್ಯುತೊಬಿ ಯೋ ಡಾಳಿಯೇವ್‌ನ ಮ್ಹೇಲಿನ್ ತುನ ಚಿಕಾವನ ಉಪ್ಪರ್ ತೂ ಡಾಳಿನಿಬಾರೇಮ ಭಡೈಲೆನಕೊ. 18 ಭಡೈಲಿದೋತೊ, ತೂ ಯೋ ಜ಼ಡ್ನ ಆಧಾರ್‌ಕಾಹೆ. ಯೋ ಜ಼ಡ್‌ ತುನ ಆಧಾರ್ ಹುಯಿರ‍್ಹಿಶೆ ಎತ್ರೇಸ್. 19 ಇಮ್‍ಕತೊ ತೂ, "ಖಶಿ ಭಂದಾವನಿತರ ಥೋಡು ಡಾಳಿಯೆ ಟುಟಿಗೈಯೇ." ಕರಿ ಬೋಲಿಶ್. 20 ಯೊ ಬರೋಬರ್, ಕತೋಬಿ ಇವ್ಣೆ ವಿಶ್ವಾಸ್‌ಕೊಂತೆ ಟುಟಿಗಯು. ತೂತೋಬಿ ವಿಶ್ವಾಸ್‍ಥಿ ಭಿಯೋಸ್. ಹಂಕಾರ್ ನಕೊಕರ್ತೆ ಡರ್‌ರ‍್ಹವಾದೆ. 21 ಶನಕತೊ ದೇವ್ ಪೈದಾಖ್ಹ್‌ನಿ ಡಾಳಿಯೇನಸ್ ಬಚಾ಼ಡ್ಯೊ ಕೊಯ್ನಿಕತೊ ತುನಾಬಿ ಬಚಾ಼ಡ್‌ಶೆ ಕೊಯ್ನಿ. 22 ಇನಖ್ಹಾಜೆ ದೇವ್ನಿ ಗೋರ್‌ನಾಬಿ, ನಿಶತ್ನಾಬಿ ದೇಕ್. ಪಟ್ಕಿಜಾ಼ವಳಾನ ಇನಿ ನಿಶತ್‌ ಮಳ್‍ಶೆ. ತೂ ಇನಿ ಗೋರ್‌ಮ ಭಡವಾಳೊ ಉಷೇತೊ, ತಾರಪರ್ ದೇವ್ನಿ ಗೋರ್‌ ವತಾಳ್‌ಶೆ. ನಾಹುಯುತೊ, ತೂ ಜಿನುಬಿ ಟುಟಿಜೈಶ್. 23 ಇವ್ಣೆಜಿನೂಬಿ ಬಿಜೂ಼ಬಿ ಅವಿಶ್ವಾಸ್‌ಮ ಭಡ್ಯುನಾತೊ ಖಶಿ ಭಂದೈಜಾ಼ಶೆ. ಶನಕತೊ ಇವ್ಣುನ ಬಿಜು಼ಪಾಚು಼ ಖಶಿಭಂದಾವನ ದೇವ್ ತಾಖತ್‌ವಾಳೊ ಹುಯಿರ‍್ಹೋಸ್. 24 ಕಿಮ್ ರ‍್ಹಯುತೋಬಿ ಝಾ಼ಡಿನು ಆಲಿವ್ ಝಾ಼ಡ್‌ಥಿ ಅಛ್ಛು಼ ಝಾ಼ಡ್‌ನು ಡಾಳಿಯೇಹುವಾನು ಮಾಮುಲಿ ಕಾಹೆ. ಕತೋಬಿ ಯೆಹೂದ್ಯ ಕಾಹೆತೆ ತುಮೆ ಝಾ಼ಡಿನು ಆಲಿವ್‌ಝಾಡ್‍ಥಿ ಕತ್‍ರೈಹುಯು ಡಾಳಿಯೇರ‍್ಹೀನ್ ಅಛ್ಛು಼ ಆಲಿವ್ ಝಾ಼ಡ್‌ಣ ಖಶಿ ಭಂದೈರ‍್ಹಾಸ್. ಯೆಹೂದ್ಯರ್‌ತೊಬಿ ಅಛ್ಛು಼ ಆಲಿವ್ ಝಾ಼ಡ್ಮ ಫುಟಿಹುಯಿ ಡಾಳಿಯೆ. ಇನಖ್ಹಾಜೆ ಇವ್ಣೆ ಇವ್ಣ ಶೊಂತ್ ಝೂ಼ಂಡ್‌ನ ಪಾಛು಼ ಮಳಿಜಾ಼ವಾನು ಘಣು ಶುಲ್ಬ ಹುಯಿರ‍್ಹಿಶೆ.

ಅಖ್ಖಾಸ್‌ಪರ್ ದೇವ್ನಿ ದಯ

25 ಭೇನೆ ಭೈಯೇವೊ, ಏಕ್‌ ಗಪ್ಲತ್‌ನಿ ವಾತೆ ಖ್ಹಾಚು಼ಛಾ಼ ಇನ ತುಮೇಬಿ ಖ್ಹಮಜ಼್‌ಣುಕರಿ ಆಖ್ಹ್‌ಕರುಸ್. ಶನಕತೊ ತುಮೆ ಕೆತ್ರೆ ಅಕ್ಲಿ ಹುಯಿರಾಸ್‍ಕರಿ ಮಾಲುಮ್ ಹುವಾಸ್. ಯೋ ಶಾತ್‍ಕತೊ, ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‍ ದೇವ್‌ಕನ ಆವಾಲಗು ಖಲಿ ಇಸ್ರಾಯೇಲ್‌ವಾಳ ಅದ್ಮಿ ಇವ್ಣ ದಿಲ್ನ ಕಠಣ್ ಕರಿರಾಖಸ್. 26 ಅಮ್ ಧರ್ಮಶಾಸ್ತ್ರಮ ಲೀಖೈರ‍್ಹುತೆ ಪರಕ್, ಇಸ್ರಾಯೇಲ್‌ವಾಳು ಖ್ಹಾರು ರಕ್ಷಣೆ ಲಿಶೆ, "ಛುಟ್ಕಾರ್ ದ್ಯವಾಳೊ ಚೀಯೋನ್‍ಥಿ ಆವ್‌ಶೆ, ಯೋ ಯಾಕೋಬವಾಳಾನ ಖೂಮ್‍ಥಿ ದುಷ್ಟಬುದ್ದಿನ ಕಾಡಿನಾಕ್‌ಶೆ.✝11:26 ಯೆಶಾಯ 27:9—43:25 27 "ಮೇ ಇವ್ಣಿ ಜೋ಼ಡ್ಮ ಕರ‍್ಯೊತೆ ಒಪ್ಪಂದ ಇವ್ಣ ಪಾಪ್ನ ಮೆ ಕಾಡಿನಾಖನಿ ವಖ್ಹ್‌ತೆ ಪೂರಉಷೆ" 28 ಶನಖ್ಹಾಜೆಕತೊ ಇವ್ಣೆ ಸುವಾರ್ತೆನ ಝಿಟ್ಕಾರ‍್ಯು, ಅಜು಼ ಯೆಹೂದ್ಯರ್ ಕೊಂತೆ ಇವ್ಣೆ ತುಮಾರೇಥಿ ದೇವ್ನ ವಿರೋದಿಹುಯು. ಕತೋಬಿ ದೇವ್ನಿ ಚು಼ನಾವ್ಣಿನಿ ಕಾರಣ್‍ಥಿ ಇವ್ಣೆ ಇನ ಪ್ಯಾರ್‌ವಾಳ ಹುಯಿರಾಸ್,ಇನ ಪಿಳ್ಗಿವಾಳು ಕಾರಣ್‍ಹುಯಿರ‍್ಹುಸ್. 29 ಶನಕತೊ ದೇವ್ ವರಾನ ದಿದೋತೆ ಇನಖ್ಹಾಜೇಬಿ, ಅದ್ಮೆವ್‍ನ ಬುಲಾಯೋತೆ ಇನಖ್ಹಾಜೇಬಿ ದಿಲ್‌ಬದ್ಲಾವವಾಳೊ ಕಾಹೆ. 30 ಏಕ್‌ ಹಗಾಮ್ಮ ತುಮೆ ಇನ ವಿಧೇಯ ಕೋಹುಯಿರಾಥಾನಿ. ಇವ್ಣು ಅವಿಧೇಯತೆಥಿ ತುಮೆ ಹಮ್ಕೆ ದೇವ್ನಿ ದಯಾ ಲೀರಾಖ್ಯಾಸ್, 31 ಇಮ್ನಿಸ್ ಪರಕ್ಮ ಇವ್ಣೆ ಹಮ್ಕೆ ಅವಿಧೇಯ ಹುಯುತೋಬಿ ತುಮೂನ ಕಿಮ್ ಗೋರ್‌ ವತಾಳ್ಯೊಕಿ ತಿಮ್ಮಸ್ ಹಮ್ಕೆ ಇವ್ಣುನ ಗೋರ್‌ ವತಾಳವಾಳೊ ಹುಯಿರ‍್ಹೋಸ್. 32 ದೇವ್ ಯೋಖ್ಹಾರಾನ ದಯ ವತಾಳನಖ್ಹಾಜೆ ಖ್ಹಾರಾನ ಅವಿಧೇಯತೆಮ ಭಾಂದಿರಾಖ್ಯೋಸ್.

ದೇವ್ನ ಧನ್ಯವಾದ್ ಹುವಾದೆ

33 ಆಹಾ! ದೇವ್ನಿ ಗ್ಯಾನ್, ಅಕ್ಕಲ್‌ನು ಧನ್‍ದೌಲತ್ ಕೆತ್ರೆ ಗಧಾರ್‌ನು! ದೇವ್ನು ನ್ಯಾಯತೀರ್ಪ್‌ನ ಕೋಣ್‌ಬಿ ಛೋ಼ಡಿವತಾಳನ ಹುವಾಕೊಯ್ನಿ. ಇನ ಮಾರಗ್‌ನ ಢೂಂಡಿಕಾಡನ ಕಿನೇಥೀಬಿ ಹೋಯಿಕೊಯ್ನಿ! 34 ಪವಿತ್ರ ದಪ್ತರ್‌ಮ ಲೀಖೈರುತೆ ತಿಮ್ ಪ್ರಭುನ ದಿಲ್ನ ಮಾಲುಮ್ ಕರಾವಾಳೊ ಕೋಣ್? ನತರ್ ದೇವ್ನ ಅಮ್ಮಸ್ ಕರ್ನುಕರಿ ಬೋಲಿವತಾಳವಾಳು ಕೋಣ್? 35 ದೇವ್‍ಥಿ ಪಾಛು಼ ಮಾಂಗಿಲ್ಯವಾನ ಇನ ದಿರಾಖವಾಳೊ ಕೋಣ್? 36 ಶನಕತೊ ದೇವ್‍ಥಿ ತಮಾಮ್‍ನಾಸ್ ಉಬ್ಜಿರ‍್ಹುಸ್.ಖ್ಹಾರುಸ್ ಇನೇಥಿಸ್ ಇನಖ್ಹಾಜೇಸ್ ರ‍್ಹೇಸ್. ದೇವ್ನ ಜ಼ಗ್‌ಜ಼ಮಾನಮಾಬಿ ಮಹಿಮೆಹುವಾದೆ! ಆಮೆನ್.