6 The sorewis of helle cumpassiden me; the snaris of deeth bifor ocupieden me.7 In my tribulacioun Y inwardli clepide the Lord; and Y criede to my God. And he herde my vois fro his hooli temple; and my cry in his siyt entride in to hise eeris.8 The erthe was mouede togidere, and tremblede togidere; the foundementis of hillis weren troblid togidere, and weren moued togidere; for he was wrooth to hem.9 Smoke stiede in the ire of hym, and fier brente out fro his face; coolis weren kyndlid of hym.