33 Kire wese wenumu Tapa Sekoromu xosa utu putawoteneai. Pa wese xosa Yesusu na nikitoto xouro wareteneai. Apu xoxi aimore rania wainikereteneai, kirepa Yesusupo xupo meruirapu na nikitoto xosana, kire paiya xupo sakipairapu na nikitoto xosa wareteneai. 34 Kakeri Yesusue kunauna, "Xauwa, ne ninipo xunu weterinike. Mua kapia kaketeneaia nini sipa xuwe xati kakineri," xetai. Xomatuae Yesusupo nekei xuru niko utei tepure satu nerawoteneai. 35 Xuiapue tumuneri xekeu puroria, Yuta nikau tumue Yesusu ipaki pireuneri, "Nu kireu apu tianikeyai. Suwau Xoiteue mua apu iyarati nupo saina tina nupo xuiapu xiyeri tinikepina xatia, nukoini nuko tianuwopina," xeteneai. 36 Xomatuae rania pirewoteneai. Yesusu nutiemu maneri xisa isi worotai tuwopure xeteneai. 37 Kakeri ipaki kunauneri, "Ne suwau Yuta nikau kokemu xatia, nakieni naki tianiwo," woteneai. 38 Kakerineri kire kuna xayau tineri Yesusupo taporo na nikitoto xosa tareteneai. Pa kuna muanumu, "Mua apu nu Yuta nikau kokemu," xeteneai. 39 Apu xoxi aimore Yesusu xeika wainikereteneai, kirei Yesusu ipaki pireuna. "Xoiteue iyaretai apu nere, wo? Paina ne naki tianinau, sini rania tianisike," wotai. 40 Kakati kire apue pa kuna iyeserina, xatau ipaki auna, "Ne rania mua apu tetai sie xu titiai, ne Xoiteure ximikau xana xuwere? 41 Sini ousieri xumuyatia, nini asinaku kapia kakineri. Sioe xoxi kapia kakiyatiareni kutu mua xu tinuwa. Pana mua apu nu kire poripori kapia kakepu xuwe," wotai. 42 Kakeri kunauna, "Yesusu, ne xuiapu yakunikewai yause xosa, ye nanuyewai," wotai. 43 Kakati Yesusue ipaki kauna, "Ye suwauni kutu kanine, ximine ne ye xeika mena xouro purowai," wotai.