Mateus 21

Yeso ka lyǝ aa Urushalima

1 Nangka Yeso kaa atoma kai ne dukǝ kapeng ka Betapaji kamea ka amara ka Urushalima, ba kulǝ oyara o mati ma Zaitun, na Yeso ka tong atoma kai a leere, 2 naka beka nee na, "Lyǝ na ba kapeng kaa niini ba izi oying. Ee lyǝ eyo laka kurungzǝ baa tera, ka kabana kame. Dinggǝ na e ka ecang. 3 Ondo wa pirkǝ, ying e beka wai na, Ateokora ya yeme one. Wayo kuriyǝ ee aa rabokoro."

4 A ye nyimia adorana a panza epa eeka ondo beya angmǝ ka mawo ma Ashili Zakariya beke obena,

5 "Ee bekaa kagala ka Sihiyona na,

laka, Ogomo oying waya zo deya ba ying!

Ondo o nata ukpwei wai,

Waya zaa kabana kurungzǝ."✝21:5 Zak 9:9.

6 Na atoma Yeso ne ale, nane ye epaaka Yeso ka bekaa ne. 7 Nane de kaa kurungzǝ ka kabana kame, nane nata ne madibi aa zaa one, a ka zale. 8 Na aromo ba cak ne nata madibi mane ba zaa orona, aana ondo gera marane ma mati nane eese ba zaa orona. 9 A okurkǝnǝng aromo ka neya teweno ba izi ka kai kaa andaaka neya dimǝ kai, nane ara angmelo aane beya na,

"Hosana Kena ka Daoda!

Okona oleba wa itǝ

o kando ko deya ba nyimi leze le Ateokora!

Hosana o Ashili!"✝21:9 Sel 118:25-26.

10 Nangka Yeso ka lyǝ baa nyimi Urushalima na pate apeng me a bitǝkǝrnu, aane beya naa, "Mana waana?"

11 Na aromo aaka neya tare o Yeso bekaana, "Kanna kando ka o beya angmǝ ka mawo ma Ashili Yeso kamea ka surǝa Nazarat o makeke ma Galili."