Mateus 4

O kedeya Yeso

1 Na Obere Ashili tare kaa Yeso a ale owake ka ogomo o bere o buru kedeya kai. 2 Aka meke ongmǝ o tomore tuuru naaze, lelyaare ka letereme, na ekomo meke kai. 3 Na ogomo obere o buru deya kai awa bekaana, "Boa baaya Kena ka Ashili, ote lecale leena ka le itǝ oborode."

4 Na Yeso kabare na, "Angmǝ Ashili a bekaana, "Epaolya belle ta ongtaza oromo ne, seena ka koonang angmǝ ka susi ongmǝ Ashili."✝4:4 Otik 8:3.

5 Na ogomo o bere oburu, ale ka kai a Urushalima apeng a odera madinǝ, nawa zalara kai araa o kala bezaati a akwilǝ Ashili. 6 Na wa bena, "Bo kena ka Ashili kaaza, cangko ka otaru a deze, obena a wele na,

‘Wayo ote atoma wai a kazo o,

kane woboo ka taara tene

nangka oto jukǝ tobona to ocale ne."✝4:6 Sel 91:11-12.

7 Na Yeso kabare wai na, "A wele na, ‘Tana okedeya Ateokora Ashili au ne.’ "✝4:7 Otik 6:16.

8 Kangza na ogomo obere oburu ale ka kai oyara o zaati awa wore kai pate togomo te lerambo leena ka o gongha te. 9 Awa kang bena, "Pate tenna eyang nyau, ba girwǝ a begeshe beng o ezeng makili ma Ashili."

10 Na Yeso bekaa wai na, "Era arakaana, Shetan! A wele na, ‘Eza Ashili Ateokora au makili ma ai, kangza aiya belle oyo saba.’ "✝4:10 Otik 6:13.

11 Na ogomo obere o buru ale awa baya kai, na atoma Ashili o dera lepung de nane kangkama kai.