Atos 2

Malongi ma Phetelu

14 Hanga Phetelu wátelama yi bawu Kumi yi mosi; wáthuta ndinga amana wázimbula bwabu kwena mulumba-lumba wa batu: «Batu ba mu Yuteya yi benu boosu lwisi zingila mu Yelusalemi, hinikinenu ndinga zama, zayenu bwabu: 15 batu baba bazediku malafu bwosu lubatibwa banza benu, mukuma mu tangwa dya vwa dya mu suka thwenina. 16 Kaasi buthwena, malungidi mana kázimbula mbikudi Yowedi:

17 "Tala mu bilumbu bya tsuka, kázimbula Nzambi;

yimwánga Kitembu kyama kwena mutu wosu;

bana benu ba bakhetu yi ba bayakala babíkula,

bangunza benu bamóna mbona mesu,

amana binunu byenu balóta ndosi*2:17 Ndosi zazi babati zonzila haha zenina mbona mesu zina kisi songila Nzambi kwena batu mu mesu ma thona, konda kukala ku kilu. Ndosi zenina mambu mana kisi hangila Nzambi batu kuna tsya kilu..

18 Mukyedika, yimwanga Kitembu kyama mwena basadi bama ba bakhetu yi basadi bama ba bayakala muna bilumbu meni bina,

amana babíkula.

19 Amana yihána bidimbu bya khumbwa mu londi dya zilu

yi biphadi muna banda dya ha tsi,

yi menga yi mbawu yi kyungila kya mwisi;

20 tangwa kabáluka mu phipha;

amana ngondi kabénga hanga menga,

ku thwala kukwisa kwa kilumbu kya Pfumu, kilumbu meni kina kya mbuta yi kya khembu.

21 Hanga wosu wuna watéla khumbu ya Pfumu, kahúluka."

22 «Bisi Kiseledi, hinikikenu ndinga zazi: Yesu mwisi Nazaleti, mutu wuna kásikununa Nzambi kwena benu mu biphadi yi bidimbu bya khumbwa yi bidimbu bina kásala mu nzila ya yandi ha kati dya benu, bwosu luzayibwa benu-benu, 23 mutu wuna, bámulambula bwosu bwádikadila kedi mu luzolu lwa Nzambi, lwámuhondisa mu kumukhoka ha kitakani kwena bandwandwa. 24 Yandi wuna káfutumuna Nzambi, mu kumukatula mu phasi za lufwa, kikuma lufwa lwáfwanaku ni lwamukwata. 25 Mukuma Tavidi bwabu kázimbula kikuma kya yandi:

"Yikala mona Pfumu tangwa dyosu ku thwala ya meni;

kikuma ku kitata kyama kena ndangu yinikanaku.

26 Ihana ni mbundu yama yenina mu kyesi;

amana ndinga zama zabasa mu kyesi kya lawu;

lutu lwama phi lwazíngila mu kivuvu,

27 mukuma wayámbwadilaku moya wama mu kalunga,

wayámbulaku lutu lwa musadi waku watoma lwavunda.

28 Wátsongila nzila za luzingu,

yimóna mamboti ma lawu bwosu wakwataha kadiki ngeyi.

29 «Baphangi bama, yena yi muswa wa kuluzimbwala yi tsikiningi, mu mambu matadidi khaka wa betu Tavidi: yandi wáfwa, bámuzika; amana mazyamu mandi, yi lelu dyadi menina kwena betu. 30 Bwosu kákala mbikudi, wázaya phi ni Nzambi wázenga ndefi mu kuyadika mosi wa butuka dyandi ha kiti kya kipfumu kyandi. 31 Watekilalwa lota lufutumuku lwa Masiya amana wázonzilabwa, mu kuzimbula:

"Bámuyambwadilaku mu kalunga,

amana lutu lwandi lwávundaku."»

32 «Nzambi wámufutumuna ku lufwa, Yesu wuna yibati zonzila, amana betu boosu thwenina bambangi ba lufutumuku lwandi. 33 Bámutombula kuna koku dya kitata dya Nzambi, wátambula kwena Tata Kitembu Kyatoma kina kásila, amana wututyakidi mana lubati mona yi mana lubati yuka. 34 Mukuma yandi meni Tavidi kátombukaku ku zilu, kaasi kázonza bwabu:

"Pfumu kázimbula kwena Pfumu wama:

sikuka ku kitata kyama*2:34 "Pfumu" kenina Nzambi. Amana "Pfumu wama" kenina Yesu Kidisitu.,

35 kilumbu yikuna yikitwala bambeni baku

kidyatilu kya bitambi byaku."

36 Batu boosu ba Kiseledi bafweti zayabwa mboti-mboti ni Nzambi wámukitula Pfumu yi Masiya, Yesu wuna lwákhoka ha kitakani!»

37 Amana ku nima dya kuyuka bwabuna, mbundu zábalwala, bázimbula phi kwena Phetelu yi kwena bathumwa bahika: «Baphangi, biki twahanga si?» 38 Phetelu wubavutwadi: «Sobenu bikalulu, amana kosu mutu mu kati dya benu katambula mbotika mu khumbu ya Yesu Kidisitu, kikuma kya ndoluka ya masumu menu. Amana lwátambula kabu dya Kitembu Kyatoma. 39 Mukuma lusilu lwena kikuma kya benu yi kikuma kya bana benu yi kikuma kya boosu bana bena ku kyana, boosu bana katéla Pfumu Nzambi wetu.»

40 Amana Phetelu, mu ndinga za hika za lawu, kakala ta kimbangi yi kubaheka kikesa, mu kuzonza: «Dihululenu*2:40 "Dihululenu" disongidila ni "Dikengenu" kwena mbandu yayi yátota nzila!» 41 Bana bakala kwikila mu ndinga zandi, bakala tambula mbotika. Muna kilumbu meni kina, batu, bela-bela yi mafunda ma tatu báyikama.