Lucas 9

Birana Yesu fɔxɔ ra

57 E yi kira yi waxatin naxan yi, xɛmɛna nde yi a fala Yesu xa, a naxa, "I siga dɛdɛ, n sigɛ i fɔxɔ ra."

58 Yesu yi a fala a xa, a naxa, "Xulumaseene xima yinle nan na, xɔline yi e tɛɛn sa, koni hali n na n xunna sama dɛnaxan yi, na mi n tan Muxuna Dii Xɛmɛn yii." 59 A yi a fala xɛmɛna nde xa, a naxa, "Bira n fɔxɔ ra."

Koni na xɛmɛn yi a fala, a naxa, "N Marigina, tin n xa sa n fafe maluxun singen."

60 Yesu yi a yabi, a naxa, "A lu faxa muxune xa e faxa muxune maluxun.*9.60 A muxune nan ma naxanye mi biraxi a fɔxɔ ra naxanye mi nii rakisin sɔtɔxi. Ne luxi alo faxa muxune niin mabinni. I tan xa sa Alaa Mangayana fe Xibarun nali."

61 Gbɛtɛ fan yi a fala, a naxa, "N kanna, n birama nɛn i fɔxɔ ra, koni tin n xa sa n ɲungu n kon kaane ma singen."

62 Yesu yi a fala a xa, a naxa, "Muxu yo ɲinge kenna suxu, a lu a xanbi ratoɛ, na mi daxa a wali Alaa Mangayani."