Mateus 9

2 Muxuna ndee yi fa xɛmɛ lɛbutɛnna nde ra a fɛma, a saxi a sa seni e yii. Yesu yi e dɛnkɛlɛyaan to, a yi a fala lɛbutɛnna xa, a naxa, "N ma diina, i bɔɲɛn xa sa, i yulubine bata xafari." 3 Sariya karamɔxɔna ndee yi e miri, e naxa, "Xɛmɛni ito Ala rayelefuma!"*9.3 Ala rayelefuna: Karamɔxɔne na falaxi nɛn bayo Yesu bata falan ti alo Ala nan yi a tan na, a naxa, "i yulubine bata xafari" anu, Ala nan yulubine xafarima. 4 Yesu yi e miriyaan kolon. A yi a fala, a naxa, "Ɛ mirima fe ɲaxi sifani itoe ma nanfera? 5 Mundun fala raxɔlɔ, ‘I yulubine bata xafari’ hanma, ‘Keli, i sigan ti?’ 6 N na a yitama ɛ ra nɛn nayi fa fala sɛnbɛna n tan Muxuna Dii Xɛmɛn yii dunuɲa yi, n muxune mafelu e yulubine ra." A yi a fala lɛbutɛnna xa, a naxa, "Keli, i ya sa seen tongo, i siga i konni!" 7 Xɛmɛn yi keli, a siga a konni.