1 Ere mu guyed rogon nge t’uf Got romed nge girdi’. Mu nameged e tow’ath nma pi’ e Kan Nthothup, ni ba ga’ ni fare tow’ath nma ayuwegey ngan salap i machibnag e thin rok Got ngak e girdi’. 2 En nma welthin nthin ndawor nrung’ag ma da nnang fan e gathi be welthin ngak e girdi’, ya be welthin ngak Got, ya dariy be’ ni be nang fan e n’en ni be yog. Ya be weliy e tin riyul’ ndawor nnang ni fare Kan Nthothup e ke pi’ gelngin. 3 Machane cha’ ni be weliy e thin rok Got e be welthin ngak e girdi’, ni aram e be ayuwegrad, ma be pi’ e athamgil nga lanin’rad, ma be fal’eg lanin’rad. 4 En ni be welthin nthin ndawor ni rung’ag ma da nnang fan e kemus ni ir e kefel’ rogon riy, ma cha’ ni be weliy e thin rok Got ngak e girdi’ e be ayuweg e galesiya ni polo’.

5 Gub adag ni nge gimed gubin mi gimed welthin nthin ndawor ni rung’ag ma da nnang fan; machane ku gub adag ni nge gimed gubin me pi’ e Kan Nthothup gelngimed ni aram e tow’ath ngomed nge yag ni um weliyed e thin rok Got ngak e girdi’. Ya en ni be weliy e thin rok Got ngak e girdi’ e ka ba ga’ fan ngak e en ni be welthin nthin ndawor ni rung’ag ma da nnang fan — kemus ni fa’anra bay be’ e re ngiyal’ i n’em nrayag ni nge weliy fan e n’en ni be yog fa’anem, ma aram e rayag ni nge fel’ rogon girdi’en e galesiya riy ni urngin. 6 Ere fa’anra gub ngomed, pi walageg ni girdi’en Kristus, mra di’in me yib fag ngomed ni fa’anra gu welthin nthin nda mu nanged fan? Ri dariy bochu’uw nra yib fag riy ngomed, kemus ni fa’anra gu fek i yib ngomed e thin nike pi’ Got ngog, ara boch e llowan’, ara thin ni Kan Nthothup e ke pi’ nga lanin’ug ni nggu pi’ ngomed, ara nggu sukulnagmed.

7 Mus nga tatelin e musik ndariy e yafos riy ni bod e ngal nge harp — ra di’in me nang be’ e ton ni yibe thoy ara yibe chubeg riy ni fa’anra der yan i aw lingan ngarogon? 8 Ma fa’anra dabi thoy e en nma thoy e yabul nrogon ni nge thoy, me mini’ e ra fal’eg rogon ni fan ko mael? 9 Ra aram rogon mra di’in me nang be’ fan e n’en ni ga be weliy nthin ndawor ni rung’ag ma da nnang fan? Ya fapi thin ni ga be yog e bayi m’ay nga fithik’ e nifeng! 10 Bo’or e thin ko pi nam ni bay u roy u fayleng ni go’ ba thilthil, machane dariy ta’reb ndab nnang fan. 11 Machane fa’anra nnon nthin nu bang nda gu nang fan, ma en ni be yog fare thin e ra gu pirew ni ir e be’ u bang me gag e gu be’ u bang. 12 Gimed be finey ni manga yigi yag e tow’ath ko Kan Nthothup ngomed, machane n’en ni ir e ba th’abi ga’ fan nga urngin ban’en e thingar mu guyed rogon ngam maruwelgad ko pin’en ni ra ayuweg girdi’en e galesiya nge gel e michan’ rorad ngak Kristus.

13 En nma welthin nthin ndawor ni rung’ag ma da nnang fan e thangri meybil ngan pi’ ngak gelngin ni nge yag ni weliy fan e n’en ni be yog. 14 Ya fa’anra gu meybil ni aray rogon ma riyul’ ni gu be meybil, machane dagur nang fan e n’en ni gu be yog. 15 Ere mang e nggu rin’? Bay gu rin’ ni l’agruw, bay gu meybil nthin nda nnang fan, machane bay kug meybil ni yira nang fan; bay gon’ e tang ko thin nda nnang fan, machane bay ku gon’ e tang nthin ni yira nang fan. 16 Fa’anra mpining e magaer ngak Got u ban’en nthin nda nnang fan e ga be yog, mra di’in me yog be’ e "Amen", ni be’ ni bay ko fare mu’ulung? Ya dabiyag ni nge nang fan e n’en ni ga be yog. 17 Ni yugu ra bfel’ rogon ni kam pining e magaer ngak Got, ma dabiyag ni nge ayuweg fa’anem nge gel e michan’ rok ngak Kristus.

18 Kug pining e magaer ngak Got ni bochan e pire’ yay ni kug non nthin ndawor ni rung’ag ma da nnang fan ko tin nike yog bigimed. 19 Machane u lan e mu’ulung rok girdi’en e galesiya e kabfel’ u wun’ug ni nggog lal bugithin ni yira nang fan, ni fan e nggu sukulnag e tin ni bay e girdi’, ko bin ni nggu weliy in i biyu’ bugithin nda nnang fan.

20 Pi walageg ni girdi’en Kristus, dab ku um leamgad ni bod e bitir; ngam boded e pi’in bitir ndar nanged rogon i ngongliy e kireb, machane ngam leamgad nrogon e pi’ilal. 21 Ya bay u lan e babyor nib thothup ni kan yoloy ni be ga’ar:

"Be ga’ar Somol: Bay gu non ngak e pi girdi’ ney,

bay gu non ngorad u daken e girdi’ nib thil e thin rorad,

ngu dap’i l’ugun e girdi’ nu bang,

machane yugu aram rogon ma dabi motoyil e girdi’ rog ngog."

22 Ere gelngiy nib tow’ath nma pi’ e Kan Nthothup ni ngan welthin nthin ndawor ni rung’ag ma da nnang fan e pow u gelngin Got ni fan ngak e pi’in nder mich Kristus u wun’rad, ma gathi fan ngak e pi’in ke mich Kristus u wunrad, machane gelngiy nib tow’ath nma pi’ e Kan Nthothup ni fan e ngan machibnag e thin rok Got ngak e girdi’ e pow rok Got ngak e pi’in ke mich Kristus u wun’rad, ma gathi pow rok Got ngak e pi’in nder mich Kristus u wunrad.

23 Ere susun e errogon mi gimed mu’ulung girdi’en e galesiya ni urngin ma gimed gubin mi gimed tabab ko welthin nthin ndawor ni rung’ag ma da nnang fan, ma fa’anra yib yugu boch e girdi’ ngomed ara girdi’ ndawori mich Kristus u wun’rad, ma gathi yad ra yog ni kam aliliygad? 24 Machane fa’anra gubin e girdi’ ni yad be weliy e thin rok Got me yib be’ nder mich Kristus u wan’ ara yugu be’ ngalan e mu’ulung, ma thin nra rung’ag e ra dag ngak e denen rok. Urngin e thin nra rung’ag e ra pufthinnag ir riy u fithik’ i laniyan’, 25 ma tin nib mith u fithik’ i lanyan’ e rayib i pes ngalan e tamilang, ma aram e ra siro’ nge meybil ngak Got mra ga’ar, "Riyul’ ni bay Got romed u roy!"

26 Pi walageg ni girdi’en Kristus, mang e gu be yip’ fan? Gimed ra mu’ulung ni ngam rung’aged e thin rok Got mi gimed meybil mra be’ ma ke fal’eg rogon nrayag ni nge pi’ reb e tang ni machib, ma be’ e nge fil e thin rok Got ngak e girdi’, ma be’ e nge weliy e n’en nike pateg Got nga laniyan’, ma be’ e nge weliy e thin ndawor ni rung’ag ma da nnang fan, ma be’ e nge weliy murung’agen ngan nang fan e re thin nem. Ma urngin nthingari mang ba ayuw ngak girdi’en e galesiya. 27 Ma fa’anra nge welthin be’ nthin nda nnang fan, ma kemus ni l’agruw ni’ ara dalip ni’, ni nge mu’ bagayad ko numon me tabab bagayad ngay, ma yugu be’ e thangri weliy fan e n’en nike yog fa picha’. 28 Ma fa’anra de moy be’ u rom nrayag ni nge weliy fan e pi thin nem, me ere dariy bagayad ni nge non u lan e mu’ulung, machane kemus ni yigo’o ir nge Got. 29 L’agruw ara dalip ni’ ni bay e thin rok Got ni ngrogned, ma tin ni kabay e girdi’ e ngar leam niged fan fapi thin nike weliy fa picha’. 30 Machane fa’anra yib e thin rok Got ngan’ be’ nike un ko par nga but’ u lan e mu’ulung, ma nge tal fa’anem ni be welthin. 31 Gimed gubin nrayag ni ngam weliyed e thin rok Got ni tata’abe’, ni fan e nge urngin e girdi’ miyad nang e thin rok Got me yib e athamgil nga lanin’rad. 32 Ma gelngiy nike pi’ Got ni ngan machibnag e thin rok ngak e girdi’, e cha’ ni ir e nge machib e ir e ngi i gonopiy rogon; 33 ya Got e gathi ke piningdad ni nge dab kud yaramgad, machane ngad pired ni gadad ba gapas.

Rogon urngin e galesiya rok girdi’en Got 34 e pi’in ni ppin e ngar pired ni kar th’abed gulungrad u lan e mu’ulung ko galesiya i yan; ndab ra welthingad; ni bod rogon ni be yog e Motochiyel rok piyu Israel, ma dab ra gagiyeg niged e mu’ulung rok girdi’en e galesiya. 35 Fa’anra yad ba’adag ni ngar nanged murung’agen ban’en, ma ngar fithed ngak e pi’in figirngirad u tabinaw. Ya ra welthin be’ ni bpin u lan e mu’ulung rok girdi’en e galesiya me ir e be n’ag fan ir.

36 Gur thin rok Got e gimed e yib romed? Fa go’ gimed e yib ngomed? 37 Fa’anra be finey be’ ni ir e mol’og rok Got ara bay gelngin nib salap u ban’en ni aram e ba tow’ath ngak ni pi’ fare Kan Nthothup, ma thangri nang ni n’en ni gu be yoloy nga babyor ni nge yib ngomed e Somol e keyog ni ngan rin’. 38 Machane fa’anra dariyfan u wan’ e pin’ey, me ere dab mu telmed ngak.

39 Pi walageg, mu tiyan’med i weliy e thin rok Got ngak e girdi’, machane dab mu taleged ndab kun welthin nthin ndawor ni rung’ag ma da nnang fan. 40 Urngin ban’en ma thingar nrin’ ni bfel rogon ma ba yaram.