1 Pi walageg ni girdi’en Kristus, de yag ni gu welthin ngomed ni bod ni gu ma welthin ngak e pi’in bay fare Kan Nthothup rorad; ya thingar gu non ngomed ni bod ni yima non ngak e pi’in nib mil farad ko re fayleng ney, ni bod e pi’in girdi’en Kristus ni yad bod e pi’in bitir u rogon e michan’ rorad ngak Kristus. 2 Ere thingar gu pi’ e milik ngomed, ma gathi ggan nib el, ya dawori taw nga nap’an ni ngan pi’ ngomed. Ni mus ko chiney ma dawori taw nga nap’an ni nggu pi’ ngomed, 3 ya kigimed be ngongol ni bod rogon e girdi’ nib mil farad ko re fayleng ney. Mogned, ngiyal’ ni be awan’med ngomed, ma gimed be malu’ag thin, e fa’anra aram rogon ma gathi ireram e n’en ni be micheg ni kigimed e girdi’ nib mil famed ko re fayleng ney? Ya gimed be ngongol nrogon e ngongol rok e pi’in nib mil farad ko re fayleng ney. 4 Fa’anra ga’ar bigimed, "I gag e gub mu’un ngak Paul," me ga’ar be’, "I gag e gub mu’un ngak Apollos", ma aram e gathi gimed be ngongol ni bod rogon e pi’in nib mil farad ko re fayleng ney?

5 Me mini’ Apollos? Me mini’ Paul? Kemus ni gamow e tapigpig rok Got, ni gamow e gu pow’iyew gimed nge mich Kristus u wun’med. Ra bagamow ma be muruwliy e re maruwel ni Somol e ke pi’ ngak ni nge muruwliy: 6 I gag e gu yung e awoch me tugul, mi Apollos e i pu’og e ran ngay, machane Got e be pi’ gelngin be ga’. 7 Cha’ ni yung nge cha’ ni pu’og e ran ngay e gathi rib ga’ farow. Ya Got e ir e ba ga’ fan, yi ir e be pi’ gelngin e woldug be ga’. 8 Ma ta’reb rogon e en ni yung nge en ni pu’og e ran ngay; ya Got e bayi bagayow me pi’ puluwon u rogon e maruwel ni tay. 9 Ya gamow ngabang ni gamow be maruwel rok Got u ta’bang, ma gimed e gimed e milay’ rok Got.

Ma ku errogon ni gimed e naun rok Got. 10 Gu maruwel ko salap ni pi’ Got ngog ngug ngongliy e maruwel rok e girdi’ nib salap ko dimow naun mu gu ngongliy e def, me yib be’ i dimow nga daken. Machane ra be’ ma thangri ayuw ngarogon e naun ni be toy nga daken. 11 Ke m’ay i tay rok Got ni Jesus Kristus e kemus e ta’are def, ma dakuriy yugu reb e def nrayag ni ngan ngongliy ngabang. 12 Boch e girdi’ e bayi maruwel ko gol, ara silber, ara manang nib tolang puluwon ngar dimowgad nga daken e re def nem; ma boch e girdi’ e bay maruwel ko ren, ara pan, ara kenggin e komey. 13 Ma ra be’ ma bay ni guy fel’ngin e maruwel rok ko chirofen ni bay fin nchuweg e upong u daken, ni aram e Chirofen ni bay sul Kristus riy. Ya nifiy ko re Rran nem e bayi dag rogon e maruwel rok urngin e girdi’ ni ba’aray rogon: nifiy e bayi sikengnag e maruwel rorad nge be’ me m’ug e bin riyul’ i fel’ngin e maruwel rok. 14 Fa’anra dabi yik’ e n’en nike toy be’ nga daken e re def nem, ma bay puluwon nrayag ngak. 15 Machane fa’anra yik’ e tin ni muruwliy be’, ma aram e dabiyag puluwon ngak; machane ir e ke thap, nsusun e mil u fithik’ e nifiy nge thay.

16 Bmuduwgil ni gimed manang ni gimed e naun rok Got, ni be par fare Kan Nthothup rok Got u fithik’ i dowmed! 17 Ere fa’anra kirebnag be’ e naun rok Got, mra kirebnag Got fa’anem. Ya naun rok Got e ba thothup, me gimed e naun rok.

18 Dariy be’ ni nge bannag ir. Fa’anra bay be’ u fithik’med ni be finey ni ir be’ nib gonop nrogon e leam nma tay e girdi’ nib mil farad ko re fayleng ney, ma nge tay ndariy ban’en ni manang, ni bochan e ngari yag ni mang be’ nib gonop. 19 Ya n’en ni be tafinaynag e pi’in nib mil farad ko re fayleng ney ni aram e gonop, e bm’ay fan u p’eowchen Got. Ni bod rogon ni be yog e babyor nib thothup ni be ga’ar, "Gonop nge llowan’ rok e girdi’ e ir e ma maruwel Got ngay nge mang wup ngak e girdi’ "; 20 ma bang u lan e babyor nib thothup e be ga’ar, "I Somol e manang ni leam nma tay e pi’in yad ba gonop e dariyfan." 21 Ere dariy be’ ni nge ufanthin ko tin nrayag ni nge ngongliy e girdi’. Machane bin riyul’ riy e urngin ban’en ni gimed e fanmed, 22 ni aram e gag Paul, nge Apollos, nge Peter; nge re fayleng ney, nge yafos nge yam’, ngiyal’ney nge yu ngiyal’ ni kabay ngam’on ni bay fini yib; urngin e pin’ey e yigo’o gimed e fanmed, 23 ma mmil famed ngak Kristus, mi Kristus e mmil fan ngak Got.