1 Keyog fare Kan Nthothup nib tamilang ni boch e girdi’ e bay ra n’iged e michan’ rorad ngak Kristus ko tin tomuren e rran; miyad fol ko pi kan ni yad ma lifith l’ugunrad, ni aram e kar folgad ko machib rok e pi mo’onyan’. 2 Pi machib ney e yib rok e sabanban ko girdi’ ni yad ma lifith l’ugunrad, ni lanin’rad e gowa ke yim’ ya dakir yog ngorad e kireb ni yad be rin’, ni gowa kan urfiy lanin’rad nga ba wasey nib gowel. 3 Mit i girdi’ nem e yad ma machibnag nib kireb ni ngan mabgol, ara ni kay bmit e ggan. Machane Got e sunumiy e pi ggan nem ni nge kay e pi’in ke mich Got u wun’rad ma kar nanged e tin nib riyul’, ma ngar pininged e magaer riy ngak Got nge mu’ miyad kay. 4 Urngin ban’en nike sunumiy Got e bfel’; ndariy ban’en riy ni nge dab ni kay, machane urngin ni ngan pining e magaer riy ngak Got u fithik’ e meybil nge mu’ min kay; 5 ya thin rok Got nge meybil ni kan pi’ riy ngak Got e ke mat’awnag u wan’ Got.

6 Fa’anra mog e pi thin ney ngak walagdad ni girdi’en Kristus ma ga ra mang reb e tapigpig ni bfel’, ni tapigpig rok Kristus Jesus, ma aram e ga be duruw’iyem ko thin ko mich u wun’uy ngak Kristus nge bin nib riyul’ e machib ni ir e kam fol riy. 7 Machane ngam tem u orel ko yat ni gathi murung’agen Got ndariyfan ni ngan weliy. Um par ma ga be muruwliy ni ngi i par pangim nib m’agan’ Got ngay. 8 Dowef ni yima gelnag u fithik’ urngin mit e gosgos e bay fan, machane gel ni yima tay ko bin nib be’ech e pangiy nike pi’ Got e ri ba ga’ fan u gubin ban’en, ya ba ga’ fan ko biney e tamilang nge binem e tamilang. 9 Re bugithin ney e ba riyul’, ma ngar ni fol riy ma nge mich u wun’uy. 10 Aram fan ni gadad be athamgil ma ba gel e maruwel ni gadad be tay, ni bochan e ke l’agan’dad ngak Got ni be par nib fos, ni ir e ke biyuliy urngin e girdi’ mma ayuwegrad, ni pi’in ke mich Kristus u wun’rad e ri ma ayuwegrad.

11 Um ta’chiylen ngak e girdi’ e pi thin ney ma ga be machibnag ngorad. 12 Dab mu pag be’ nge darifan nigem ni bochan e ka gab pagel, machane ngam dag ngak e pi’in nib mich Kristus u wun’rad rogon e ngongol nib m’agan’ Got ngay ni ngam dag ngorad u rogon e thin ni ga ma yog, ngu rogon pangim, ngu rogon nib t’uf Got nge girdi’ rom, ngu rogon nib mich Kristus u wun’um, ngu rogon ni gab machalbog. 13 Mu tiyan’um ngu’um be’eg e thin u lan e babyor nib thothup ngak e girdi’ ko mu’ulung, ma ga be machib ngorad ma ga be weliy fan e thin rok Got ngorad nge yan i mada’ ko ngiyal’ ni bay gu sul riy. 14 Dab mpag e tin nrayag rom ni Got e ke pi’ ngom, ni pi’ ngom ko fa ngiyal’ ni welthin fapi profet riy me tay e pi’in pi’ilal ko galesiya pa’rad nga dakenam. 15 Um rin’ e pin’ey ma ga tiyan’um ngay, nge yag ni guy e girdi’ ni gubin ni ga be mon’og i yan. 16 Mu ayuwegnem, ma ga ayuweg rogon ni ga be weliy murung’agen e thin rok Got ngak e girdi’. Um rin’ e pin’ey i yan, ya fa’anra mu rin’ ma ga ra ayuwegnem nge pi’in yad ma motoyil ngom ngar thapgad ngak Got.