1 Pi walageg ni girdi’en Kristus, dakuriy rogon ni nggu yoloy nggu pi’ ngomed murung’agen nap’an nge ngiyal’ i n’en ni bay yib i m’ug e pin’ey riy. 2 Ya gimed ma ri gimed manang ni chirofen ni ir e re Rran rok Somol nem e bay taw ni bod be’ nib moro’ro’ ni yib nneap’. 3 Ngiyal’ nem e ra ga’ar e girdi’ e ke gapas ndariy ban’en nra buch, ma yad ra da’da’ nike taw e riya’ ngorad! Ma dabiyag ni ngar milgad riy — ya bod e amith nma yib ngak be’ ni bpin ni be n’en ni nge gargel. 4 Machane gimed, pi walageg ni girdi’en Kristus, e dakumur pired u fithik’ e lumor, ere dabiyag ni ngam da’da’gad ko re Rran nem ni bod ba moro’ro’ ni mda’da’gad ngak. 5 Ya gimed gubin ni kam manged girdi’en e tamilang ni gimed girdi’en e rran. Ya gathi gadad girdi’en e neap’ ara girdi’en e lumor. 6 Ere dab ud molod ni bod boch e girdi’; ya ngu’ud pired ni gadad be od ma ba tamilangan’dad. 7 Neap’ e ma mol e girdi’ riy; ma neap’ e ma balyang e girdi’ riy ko rrum. 8 Machane gadad girdi’en e rran, ni aram fan ni ngu’ud pired ni gadad ba tamilang. Ere michan’ rodad ngak Kristus nge rogon nib t’uf Kristus rodad nge girdi’, e thingar don’ed nga dakendad ni bod breastplate nma upunguy e salthaw ngorongoren ngay, nge tin ni be l’agan’dad ngay ni bay da guyed ni bochan e kad thapgad ngak Got e ngad maruwelgad ngay ni bod e helmet nma ayweg lolugen e salthaw ko mael. 9 Ya Got e de turguydad ni ngad gafgowgad ko damumuw rok, ya ngad thapgad ngak u daken e Somol rodad i Jesus Kristus, 10 ni ir e yim’ ni bochdad ni bochan e nge yag ndarod ngak ngu’ud pired, ndemturug ko ka gadad ba fos ara kadm’ad ko ngiyal’ nra yib riy. 11 Ireray fan ni nge bigimed mi i pi’ e athamgil nga laniyan’ bigimed, me bigimed mi i ayuweg bigimed, ni bod rogon ni gimed be rin’ e chiney.

12 Gamad be wenig ngomed, pi walagmad ni girdi’en Kristus, ni ngam ted fan e pi’in yad be maruwel u fithik’med, ni pi’in ke mel’egrad Somol ni ngar pow’iyed gimed miyad fonow nagmed. 13 Ngari mu ted farad mi gimed t’ufegrad ni bochan e maruwel ni yad be rin’. Mu um pired ni bfel’ thilmed.

14 Gamad be wenig ngomed, pi walagmad ni girdi’en Kristus, ni ngam nonod ngak e pi’in yad bmalmal ndarir ngongliyed ban’en ngar paged e binem e pa’, mi gimed pi’ e athamgil ngak e pi’in yad be rus, mi gimed ayuweg e pi’in yad mme’waer, mu um pired nib gum’an’med rok urngin e girdi’. 15 Mu um guyed rogon ni dabi fulweg be’ taban e kireb ngak be’, ma gubin ngiyal’ ni ngu’um guyed rogon ni nge bigimed mi i rin’ e tin ni bfel’ ngak bigimed nge ngak urngin e girdi’.

16 Um pired ni gimed ba felfelan’ ni gubin ngiyal’, 17 mu um meybilgad ni gubin ngiyal’, 18 demturug e n’en nra yib ngomed ma gubin ngiyal’ ni ngu’um pininged e magaer ngak Got. Ireray e tin ni ba’adag Got ni ngam rin’ed e pi’in kam manged girdi’en Kristus Jesus.

19 Dab mmagawon niged e maruwel ni be tay fare Kan Nthothup; 20 dab mu darifan niged e thin ni be yog e Kan Nthothup u l’ugun be’. 21 Um sikeng niged urngin ban’en, mi gimed fanay e tin ni bfel’ riy, 22 mi gimed ta’med u orel rok urngin mit e kireb.

23 I Got nma pi’ e gapas nga lanin’dad e nge ngongliymed ngari mpired ni kam manged girdi’en, me ta’ lanin’med, nge nangan’ romed, nge dowmed nib gilaf nga orel rok urngin e kireb nge yan i mada’ ko chirofen ni bayi sul e Somol rodad i Jesus Kristus riy. 24 En nike piningmed e ir e bay rin’ ngomed, ye ir e ba yul’yul’!

25 Pi walagmad ni girdi’en Kristus, ku um pi’ed e meybil romad.

26 Urngin e pi’in kam walagyed u daken Kristus ni gimed ra mada’ ma ngam farayed owcherad nrogon e pi’in kar walaggad u daken Kristus.

27 Ere gu be yog ngomed u fithingan Somol ni ngam be’eged e re gi babyor ney ngak urngin e pi’in walagdad ni girdi’en Kristus.

28 I Jesus Kristus ni ir e Somol rodad e ngi i ayuwegmed.