2 Coríntios 11

I Paul nge fapi apostel ni bogi ban’en

1 Manga yugu mu gumaen’ niged gimed rog, ni yugu ra kugog e thin nike dake thin ko balyang. Wenig ngomed! 2 Gu be taliyeg nagmed ni bod gelngin ni be leam nagmed Got; ya gimed bod be’ ni bpin nib machalbog ni kugog ngak ta’abe’ nib mo’on ni bay ra mabgolgow, ni aram Kristus. 3 Kug rusnagmed nri yib e kireb nga fithik’ i lanin’med nge dab kum yul’yul’gad ngak Kristus, ni bod rogon ni bannag fare porchoyog Eva. 4 Ya mm’agan’med ngay ni gimed ra k’adan’med rok be’ nike yib ngomed ni nge yib i machibnag ngomed yugu reb e Jesus, ni gathi bin ni gamad be machibnag murung’agen; mi gimed fol rok reb e kan nge yugu reb e machib nrib thil ko fare Kan Nthothup nge Thin Ni Bfel’ ni yib rok Got nike yag ngomed romad!

5 Dagur finey ni gub tanggin bochu’uw ngak "fapi apostel" romed ni be’er nib sororad! 6 Sana da gu salap ko welthin, machane ba tamilangan’ug ko thin rok Got; kug tamilang nagmed riy ni gubin ngiyal’ ngu fithik’ urngin ban’en.

7 Dariy ban’en ni gog ngomed ni ngam pi’ed ngog ko ngiyal’ ni ba’aram ni ug machibnag ngomed e Thin Ni Bfel’ ni yib rok Got; ya gu sobut’nag lanin’ug ni fan e nggu ayuwegmed ngam tolanggad. Ere gur ba kireb e ren’em ni gu rin’? 8 Nap’an ni ug maruwel u fithik’med i yan ma yugu boch e galesiya e i pi’ puluwog. Susun e ug gafgow nagrad ko tin ni ug fek rorad ni fan e nge yag ni gu ayuwegmed. 9 Ma ngiyal’ ni ba’aram ni gu bay romed e da gog ngomed ni ngan ayuweged gag ko ngiyal’ ni nge yag e salpiy riy ngog; ni fan e pi walagdad ni girdi’en Kristus nrabad u Macedonia e ra feked i yib urngin e tin ni nge yag ngog. Rogon ko tin nike yan e rran nge tin ni kabay e rran ngam’on e dab mu gafgowgad u puluwog! 10 Rogon feni riyul’ ni bay Kristus u fithik’ag e nggog nre bugithin ney ni gub felan’ ngay e dariy bang u roy u Greece nrayag ni ngan thang riy. 11 Gur mang ni kugog e re bugithin ney? Gur bochan e da mu t’ufgad rog? I Got e manang ni gimed ba t’uf rog!

12 Bay ug ngongliy i yan e tin ni gu be rin’ e chiney, ni fan e nggu tay e tin ni be’er e "apostel" nge dabi yib tapgin ni ngar ufgad ngu’ur rogned ni ta’reb rogon e maruwel ni yad be tay ngomad. 13 Pi girdi’ nir e gathi riyul’ ni yad bogi apostel — yad e apostel ni go’ bogi ban’en, ni yad be lifith l’ugunrad u murung’agen e maruwel ni yad be tay ma kar piliyeged yad kar boded ya’an e tin riyul’ e apostel rok Kristus. 14 Ere dab ni gin ngay! Ya ku rayag rok mo’onyan’ ni nge piliyeg ir nge bod ya’an ba engel ko tamilang! 15 Ere gathi ban’en ni ngan gin ngay ni fa’anra piliyeg e pi tapigpig rok mo’onyan’ yad ngar boded ya’an e pi tapigpig ko tin nib mat’aw. Machane tomur riy e ri bay ni pi’ wenegan ngorad nri bod rogon e pin’en ni yad be rin’.

Gafgow ni tay Paul ni bochan e ir reb e apostel

16 Nggu sul u daken bayay ni nge lungug: dariy be’ ni nge leamnag ni gag be’ ndariy e leam rog. Machane fa’anra kam leam niged ni aram rogon, me ere mu gumaen’ niged gimed rog ni bod rogon be’ ndariy e leam rok ni ngan gumaen’ nigey rok, nge yag ni gu weliy bochu’uw ban’en ni nggu uf ngay. 17 Bmuduwgil ni thin ni nggog e chiney ni gag e gu be uf ngog e aram e gu be non ni bod rogon be’ ndariy e leam rok; ya gathi ireray e thin nike pi’ Somol ngog ni nggog. 18 Machane bochan e pire’ e girdi’ ni yad be non ni yad be uf ni kemus ni fan ngarogon e leam nma tay e girdi’, me ere ngku gu un ngay. 19 Ya gimed ba gonop, ere mm’agan’med ngay ni ngam gumaen’ niged gimed rok e pi’in nib balyang! 20 Ya gimed ma gumaen’ niged gimed rok be’ ni be yog ngomed e n’en ni ngam rin’ed, ara ban nagmed ngi i fek ban’en romed, ara tay e wup ngam awgad ngay, ara i finey ndariy famed, fa reb e batnag owchemed. 21 Gub tamra’ ngay ni nggog ni nge lungug: yigi gel e mitimra’ romad ngomed ma de yag ni gu rin’ed ni errogon!

Machane fa’anra finey be’ nrayag rok ni nge uf nga murung’agen ban’en — gu be non ni bod rogon be’ nib balyang — me ere ku errogon gag. 22 Bogi Hebrew e pi cha’nir? Ku errogon gag. Piyu Israel e pi cha’nir? Ku errogon gag. Yad bogni’ ni owchen Abraham? Ku errogon gag. 23 Yad e tapigpig rok Kristus? Gu be non ni gowa gu be’ ni kug aliliy — machane i gag reb e tapigpig ni kabfel’ e pigpig ni gu be tay ko pigpig ni yad be tay! Kab gel e maruwel ni kug tay ko maruwel ni kar ted, kab yo’or yay ni ka non’eg nga kalbus, ma kab yo’or yay ni kan toyeg, ma kab yo’or yay nike chugur ni nggum’. 24 Ma lal yay nike toyeg piyu Israel nra ba yay ma guyey nge mereb yay e dumow ni aw ngog; 25 ma dalip yay ni toyeg piyu Roma, ma ba yay e ni malangnigeg; ma nga dalip yay ni pil e barkow ni gu bay u daken, ma ba yay e rliw’ nge aningeg e awa ni gu par u fithik’ e day. 26 Ma ke yo’or e milekag ni gu tay ni chugur gum’ ko ran ni sugubur e lul’ nge yib nga daken e binaw, nge rok e moro’ro’ nma fek ban’en u fithik’ e yargel, nge rok piyu Israel ni gamad girdi’en ta’ab nam nge rok e pi’in gathi yad piyu Israel; ma kug chugur ko riya’ u lan e binaw i yan, ngu daken e ted, ngu lan e regur, nge rok e pi’in yad be dake yad boch e walag u daken Kristus. 27 Ma kug maruwel nib gel e maruwel ni kug tay; oren ngiyal’ e dariy e mol; ma gu be yim’ ko bilig nge belel; ma ke yo’or yay ni kug gafgow ko ggan, nge naun, nge mad. 28 Dawor gu weliy yugu boch ban’en ni bochan e gubin e rran nder paslegan’ug ni bochan e gu be leamnag urngin e galesiya i yan. 29 Fa’anra me’waer be’, me un lanin’ug ngak ni susun e gag e kug me’waer; ma fa’ani mul be’ nga fithik’ e denen, me ri kireban’ug.

30 Fa’anra thingar gu weliy ban’en ni nggu n’ufeg ngalang, me ere nggu weliy murung’agen e pin’en ni be dag fenag me’waer. 31 I Got ni Chitamngin e Somol rodad i Jesus e ngan’ pining e sorok nga fithingan ndariy n’umngin nap’an; ir e manang ndagur lifith l’ugunag. 32 Nap’an ni gu bay u Damaskus, me tay governor ni bay u tan pa’ Aretas ni pilung boch e girdi’ ni matnag nga langan e garog ko binaw ni ngar koled gag. 33 Machane gu par ngalan ba dug ngan nguchuruyeg nga but’ u ba winda ko re yoror nem ni malang, mu gu thay rok.