1 Yane’ e ra gaman e dalip yay ngay ni nggub gguymed. "Ra nog nike bucheg be’ ban’en ma thingar ni micheg ko mich nike pi’ ruw ni’ ara dalip ni’ " — ni bod rogon nike yog e babyor nib thothup. 2 Nggog ngomed e pi’in ni um denengad nge urngin e tin kabay e girdi’, ni ka’a gog faram ko yay ni gaman e l’agruw ngay ni gub gguymed, machane ngku gog bayay e chiney ni ngiyal’ney nda gu moy romed: ni yanem nra gub e dariy be’ nra thay ko gechig. 3 Ma urngin e mich ni gimed ba’adag ma bay mu guyed ni Kristus e riyul’ ni be non u l’ugunag. Ra non ngomed ma de me’waer; ya ra dag gelngin u fithik’med i yan. 4 Ya yugu aram rogon feni me’waer nli’ ngem’ u daken e kuruth, machane gelngin Got e ir e be par riy nib fos. Kug ta’ab girdi’gad Kristus, ma ku errogon gamad ni gamad mme’waer; machane gelngin Got e bay i ayuwegmad ngu’ug pired rok Kristus ni fan ngomed.

5 Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’. Bmuduwgil ni gimed manang ni bay Kristus u fithik’med fa? Fa’anra danga’ me ere kam mulgad. 6 Mmich u wun’ug ni gimed manang ndawor gu mulgad. 7 Gamad be meybil ngak Got ndab mu ngongliyed e kireb — gathi bochan e nge yan i m’ug nib soromad ko maruwel ni gu ted u fithik’med, machane fan e nge yag ni mu rin’ed e tin nib mat’aw, ni mus ni fa’anra yan i m’ug ni gomanga de taw e maruwel romad. 8 Ya dariy ban’en nrayag ni gu rin’ed nib togopluw ko thin rok Got ni aram e tin riyul’, ya kemus ni ban’en ni nge yib fan ngay. 9 Gamad ba felan’ ngay ni gamad ra me’waer machane gimed e kigimed ba gel. Me ere ku errogon ni gamad be meybil ni nge yag ni ngam marod mpired ni kam yal’uwgad. 10 Aram fan ni kug yoloy e re babyor ney ko ngiyal’ ni kug bay u orel romed; bochan e nggu taw ngomed ma dab gu non ngomed nib gel u mat’wug nike pi’ Somol ngog — ni mat’wug ni ngug gelnagmed ngay, ma gathi nggu kireb nagmed ngay.

11 Pi walageg ni girdi’en Kristus, kefel’! Mu athamgiliyed ngam yal’uwgad; mu telmed ko tin kugog; ma nge ta’reban’med, mu um pired u fithik’ e gapas. Mi Got ni gadad ba t’uf rok me ir e ma pi’ e gapas e bay i un ngomed.

12 Gimed ra mada’ ma ngam farayed owchemed nrogon e girdi’ nike walag u daken Kristus.

Urngin e girdi’ rok Got ni be lungurad e ngi i felan’ Got ngomed.

13 Ngi i ayuwegmed Somol Jesus Kristus, ma ngu’um pired ni gimed ba t’uf rok Got, ma gimed be par ni bay fare Kan Nthothup romed.